Yalte'd kwin'
4
Le' Mbi Nayon nambi niy,
sin wiz yoloba pla xa' na'litra' lazo' xa' Dios,
nde tyonke xa' xis re yalte'd kwin' nde yalte'd chan' re mbi narax.
2 Gon xa' re yalkwin' chan' re xa' rop lo,
re xa' ta ngok nad xgab na,
3 re xa' ya,
natad xa' di's selya' men,
nde rol jwan' ka xa' di's wa mena,
tenye Dios mtan'na sa reta men jwan' nak xin' Dios nde re men nzolo jwan' li,
ta' men dyux lo Dios sa wa mena.
4 Tak reta jwan' mtan' Dios nabe'z naka,
nde ngenkwan toyal kotal men,
tez nda' men dyux lo Dios sen' lo ncha mena.
5 Tak xki's Dios nde sen' nda' men dyux lo Dios ndli sa nchak nayon na.
Thi xa' jwin nke rsin' Jesucrist
6 Tez jwan' re' ndlo'a lo re xa' ndli lazon' xki's Dios,
yolal la thi xa' jwin ndli rsin' Jesucrist,
thi xa' jwin nchak xki's Dios,
nde jwin mte'd la jwan' mbyoloa.
7 Blo'tal re di's andoja' ndye nde re di's nta lazo' men.
Che'la btosa' nde jwin bxobyek jwan' nyebe' Dios loa,
8 tak re jwan' ndli sa xyax men,
lud sin' ndliy lo men,
per lo xobyek men Dios,
re lo sin' ndliy,
liy li ley' Xa' men na naban men nde yoloba sen' yono Dios men.
9 Jwan' re' nak di's li nde nzal' la kaya' men na.
10 Tak por jwan' re'ga ne nken' sin' nde ndrindab na' yalti,
tak ngembed na' Dios nayenaban,
Xa' ntola' reta men,
nde mas re men ndlila lazon' Dios.
11 Jwan' re' mnibe' nde jwan' re' blo'.
12 Na'tad la di's nala wi' men lu tak yen' la,
che'la loa te'd re men ndli lazo'n Dios,
lo wi' xa' xa ndyodi's la,
xa ngetea,
xa nke' lazo'a,
xa mban la,
xa ndlipa' lazo'a Dios,
nde xa nambi nak la.
13 Laj ndal na,
blab xki's Dios lo re men yodo',
blo ne lazo' xa',
nde btote'd xa'.
14 Thibla' bli rsin' reta jwan' mda' Dios loa nde mkaya'a,
sen' lo mxo'b ya' re xa' ngol xgab na',
xa' nak sin' lo yodo' yek la,
lo mdej xa' jwan' ne Dios lia.