Xa ndablo li men lo re masra' men
5
Nakwesnod la re xa' bi' gol,
che'la btoni xa' xajka xud la nde re mbyo yen' btoni or xajka wes la.
2 Le' re men got gol btoni xa' xajka xna'a nde le' re mza' yen' kon xgab nambi btoni or xajka ptan' la.
3 Bla'sto re ngol nguj sal' na',
xa' jwan' liga ndyak yalti.
4 Tez nzo ngol nguj sal' na' nde nzi xin' xa' o xin' xot xa',
re or ya ndablo ner te'd or wi'r re men liz or,
tela's or re yalwen mbli xud or lo or nde taga' lir,
tak jwan' re' jwan' wen nde jwan' ndryo' lazo' Dios.
5 Le' xa' got nguj sal' na',
xa' liga mbyan' thib nya,
ngembed xa' la'sto Dios xa',
ndlyabe nde yal' nyab' xa' nde ndyodi'sno xa' Dios.
6 Per le' re ngol nguj sal' na' xa' jwan' nakij re jwan' narax lo izyo re' nak xa' xaja' thi men nguj,
tenye naban xa'.
7 Noga mnabe' re jwan' re' lo xa',
sa ngen plo tob ro men xis xa';
8 tak tez thib xa' nankwan'ta jwan' nakin' re xa' len' liz xa' nekla jwan' nakin' re ta xa',
nandlod xa' nak xa' men ndli lazon' Dios,
nde mas narax nak xa' lo thi xa' jwan' nandlid lazon' Dios.
9 Lo ye's ten' nzo le re ngol nguj sal' na',
ben'ta ndablo yo le re xa' mbrid nda'b la son gal lin',
xa' jwan' gal' ngok lo sal' na',
10 xa' jwan' nabe'z nzo'b xki's na' lo re jwan' wen mbli xa';
tez nabe'z mxen' xa' re xin' xa',
nabe'z mkaya' xa' re men mzin liz xa',
nado' mbli xa' sin' lo re xa' ndli lazo'n Dios,
mbla'sto xa' re men jwan' liga ndari'd yalti,
xa' jwan' thibla' mbli re yalwen.
11 Nde na'kod la le re ngol yen' nguj sal' na' lo ye's;
tak sen' re jwan' ndryo' lazo' bel' xa' mbey xa' nde nzike' tija xa' lo Crist,
taxa nchola's xa' selya' xa' tedib gob.
12 Nde nchak xa' men nxyo'b xken' tak mchixla' xa' jwan' ner mke yek xa'.
13 Nde taga' ncholal xa' men ngete choja re liz men,
nchak sa'b xa',
nde nanaktey ben'ta nchak sa'b xa',
noga nchak xa' men nakij di's yix,
ndlya xa' xij re jwan' nandabloda lya xa' nde ni xa' jwan' nandabloda ni xa'.
14 Jwan' na ncholas na,
re ngol yen' nguj sal' na' selya' xa' tedib gob,
keno xa' xin' xa',
kenap xa' re men liz xa',
tamod sa xa' ta ngino na' na'nixinta xa' xis re xa' re'.
15 Tak pla xa' mbwanla xgab na' nde mdonke xa' xis Maxu'.
16 Tez nzo men ndli lazon' Dios nde nzo ngol ta xa' nguj sal' na',
ndablo ta' xa' jwan' nakin' ngol ya,
sa na'tyodod ngol lo yodo',
sa le' yodo' toyal la'sto re ngol nguj sal' na',
xa' jwan' liga ndeche jwan'.
17 Re xa' ngol xgab na' xa' jwin ndoye' yodon' Dios,
nzal' xa' xobyek men xa' nde kix men ka xa',
nde masra lo re xa' jwan' toz nke sin' ndej nde ndlo' xki's Dios.
18 Tak le' xki's Dios nchab:
"Nakod la yex ro ngon sen' lo nkenoa ma' sin' ngis ma' trig."
Nde taga':
"Xa' nke sin' nzal' xa' yax ka xa' tak nke xa' sin'."
19 Natonzad la yalke jwan' nke men xis thi xa' ngol xgab na' nak sin' lo yodo' tez nandenod xa' ya chop o son men jwan' liga mbwi'y.
20 Re xa' jwan' thidka ndli jwan' narax,
ndablo kwez la yek xa' ndowi' reta men yodo',
sa noga' re xa' seb lazon'.
21 Ndowi' Dios,
Jesucrist nde re ang mblí Dios,
nya'b na lia reta jwan' re',
thita gok lo re men nde nakwid la xa'.
22 Jwin bli xgab sen' xo'b la ya'a yek xa' jwan' ak sin' lo yodo',
tak ndaga ga'snoa xken xa' ya.
Nambi pkete.
23 Na'gutra la ben'ta nitye,
che'la gu' lud bin lo ta thibla nayiz len' la.