6
Reta xa' jwan' nak mos ndablo jwin xobyek xa' men nak xwan' xa',
sa na'nixinta men xis le Dios nde xis jwan' ndlon'.
2 Nde taga' re mos jwan' ngeno xwan' na',
xa' ndli lazon' Dios,
nakotalta mos yalnyebe' chan' xa' ya lo ta nak xa' men ndli lazon' Dios.
Che'la jwin toz li mos rsin' mos,
tak lo men jwan' ndli xa' sin',
taga' ndli lazo' xa' Dios,
thita nak xa' nde nke lazo' xa' ta xa'.
Jwan' re' blo' nde mnibe'.
Jwan' gal' ndli lazon' nde yalnale
3 Tez nzo thi xa' ndlo' xa'ga jwan',
nde nandade xajka nda jwan' gal' ndlo' Jesucrist Xa' Nyebe' lon',
nde neka nday xa nda jwan' gal' ndli lazon',
4 nchak naro xa' nde ngen kwan mne xa',
ndyen xa' kwezno xa' ta xa' nyen' xa ryoxkan choja re di's,
yiz naka lo xa' nde tya nchal re jwan' re':
Yalnarax nda lazo' xa' nye xa' ta men xa',
re yalbyo,
yalnixin,
nandlitra lazo' xa' ta xa',
5 tibla nzo yalbyo xij xa',
thiptane mdya'b xgab xa' lo jwan' narax,
nde nanzolod xa' jwan' li,
nkelo xa' ben'ta tmi ko' xa' lo xki's Dios.
Naketad la re xa' ya.
6 Liga,
bro toz jwan' wen nde sen' gal' nxo'byek men Dios,
lo nale nzo lazo' men lo re jwan' ngeno men.
7 Tak ngen kwan ndenon' lo izyo re',
nde taga' ngen kwan wen'.
8 Jwan' nasa,
tez nzo jwan' wa na' nde lar gok na',
nale yo lazon' lo jwan' na.
9 Mbay le' re xa' jwan' nchola's ak rik,
naxekta xa' lo yaltokil' nde nchab xa' lo ko' chan' Maxu' nde lo yalntabla's jwan' ntotiy xa',
ngaba xa',
nde thiptane ndlu'xa xa'.
10 Tak xan' reta jwan' narax nde,
sen' ndyen men tyonke men xis tmi.
Jwan' na ngote pla xa' mtabla'sa,
mdya'b xa' lo jwan' ndli lazo' xa' nde yalti toz mkwan' xa' lo xa'.
Jwan' nya'b Pab li Timoteo
11 Le' lu,
mbi' ndli sin' lo Dios,
bxon' lo reta jwan' re',
nde bli jwan' gal',
jwin bxobyek Dios,
thibla' bli lazo'a Dios,
pke' lazo'a re men,
bxek lo reta jwan' nde nado' gok.
12 Ne bchal bli rsin' Dios xaja' thi sondad,
nde na'lad la yalnaban adi',
lo jwan' ta mbrez Xa' lu,
jwan' nchab la ndli lazo'a sen' bro toz xa' nzi wi'.
13 Jwan' re'ya nyebe'n loa,
ndowi' Dios,
Xa' jwan' mtoxkwa' reta jwan',
nde ndowi' Jesucrist,
Xa' jwan' gal' mdej lo Poncio Pilat cho nak Xa',
14 bxob yek jwan' che' nyebe'n loa xaja' naka,
sa ngencho ni narax xis la,
axta kebe' bere Jesús Xa' Nyebe' lon'.
15 Sen' sin wiz mto Dios be' li Dios bere Jesús,
tak ngencho xaja' Xa',
Xa' Nayon nak jwan' nyebe' dib nax,
Rey lo reta rey,
nde Xa' Nyebe' lo reta xa' nyebe'.
16 Thib nya Xa' jwan' nandluxta,
Xa' nzoban lo xni plo ngencho toyal bike gax.
Nek thi mbi' tera' wi' lo xa' Dios nde neka wi' xa' Xa'.
Lo Xa' nak dib yalnaro nde yalne tibtane.
Ta aka.
17 Lo reta xa' rik lo izyo re',
mnabe' na'gaknarod xa' nde na'tobta xa' xgab xa' lo re jwan' ngeno' xa',
tak re jwan' re' ndluxa,
che'la tob xa' xgab xa' lo Dios naban,
Xa' ta nda' bro toz jwan' wen lon' sa nale li rsin' ne'y.
18 Li xa' nde ak xa' men jwan' li bro toz yalwen,
dib nzo lazo' xa' la'sto xa' men,
nde naxal' gak xa' kon re jwan' ngeno xa'.
19 Tamod ngetenta xa' jwan' ndak toz jwan' nak xan' lo jwan' ta kaya' xa' yoloba nde gal xa' yalnaban adi'.
Jwan' lult mnabe' Pab lo Timoteo