3 Ndan dyux lo Dios,

lo Xa' jwan' kon xgab nambi ndlin sin' ta xa mbli re xa' gox lon pola,

ndlya be nde yal',

thibla' ntelas na lu sen' ndyodi'snon Dios.

4 Sen' ntelas na mbin' la,

ncholas na wi'n la,

sa yo nale lazo'n.

5 Tak ndelazo'n xa ndli lazo'a Dios dib nzo lazo'a,

ta xa ner xna' gol la Loida mbli lazo' xa' Dios,

nde noga' xna'a Eunise,

taga' mnen noa ndli lazo'a Dios.

6 Jwan' nasa nin loa,

dib nzo lazo'a bli rsi'n jwan' mda' Dios loa sen' mxo'b na ya'n yek la.

7 Tak Dios namdad ti xbi seb lon',

che'la mda' Xa' thi xbi nda' yalne,

nda' yalnke' lazo',

nde nda' yalmbek lazo'.

8 Jwan' nasa natyola'sta la tej la xki's Jesucrist lo re men,

nde taga' na'tyola'sta la por na ta ngen lizyi'b tak ndlin sin' lo Jesucrist.

Che'la,

noa kon yalne chan' Dios,

bxek nde bri'd yalti jwan' ndablo rid la lo ta ndej la di's wen chan' Jesucrist.

9 Dios mtolan' nde mbrez Xa' na' sa nayon kete'n,

naktey tak mblin' re jwan' wen,

le' Xa' mbliy tak xgab ya ndonola Xa' nde tak nke' lazo' Xa' na',

lo yalwen chan' Jesucrist,

sen' tera' tyoxkwa' izyo.

10 Naya,

ndlo' plopa' nke' lazo' Xa' na' lo mtel' Xa' Jesucrist,

Xa' ntola'n.

Mkib Xa' yalnyebe' chan' yalguj nde mblo'xob Xa' yalnaban jwan' nandluxta lo xni por di's wen chan' Jesucrist.

11 Dios mton lo sin' re',

ndej na xki's Dios,

nak na apost nde ndlo'n di's wen chan' Jesucrist lo re xa' nanakta men Israel.

12 Nde jwan' nasa ndoridndab na reta yalti re'.

Nde nandyolasta na,

tak mnen cho ndli lazo'n nde mnen le' Dios ngeno yalne sa kosa' Xa' re jwan' mdaya' Xa' lon axta kebe' sin wiz bere Xa'.

13 Thibla btonke' xis re di's gal' mte'd la lon,

lo yalndli lazo' nde yalnke' lazo' jwan' mda' Jesucrist.

14 Kon yalne chan' Mbi Nayon jwan' nzo len' lazon',

bkenap di's li jwan' mdaya' Dios loa.

15 Mnea la,

reta xa' nzi lo xyon Asia mbla'ya' xa' na,

xija nzo Figelo nde Hermógenes.

16 Lyat lazo' Dios re xa' liz Onesíforo,

tak nar toz gob mblo ne Onesíforo lazo'n nde na'ndolasta xa' mbyed twi' xa' na sen' ngen lizyi'b.

17 Che'la sen' mzin xa' yez Roma,

nangoched lazo' xa' mkwan' xa' na axta kebe' mzyal xa' na.

18 Xa' Nyebe' li sa kaya' Onesíforo yalwen chan' Dios sen' sin wiz bere Jesús.

Lu jwin mnea plopa' mbla'sto xa' na' yez Éfeso.