2 Reta go' wes na,

bl nale lazo' go' sen' lo rid go' choja' re yalti.

3 Tak mnela go' sen' lo ndlipa lazo' go' Dios,

zya nde yalti,

bxek go' lo yalti,

tamod sa xyen go'.

4 Nde sen' mxek go' lo yalti,

sa ak go' men ndosa',

men ngol xgab na',

nde reta jwan' tsal li go'y.

5 Nde tez cho go' nangenoda yalnchak,

mna'b go'y lo Dios,

Xa' nda' bro toza lo reta men jwan' nya'ba,

nde nambezked Xa'y lo nda' Xa'y.

6 Sen' lo nya'b go'y,

blipa lazo' go' Dios nde tamod sa ta' Xa'y,

na'akropta xgab go',

tak men jwan' nchak rop xgab na',

xa' ya nak xaja bde lo nitto',

ndano mbiy lada lada.

7 Le' xa' jwan' ta naka,

ana'li xa' xgab kaya' xa' nek tib yalwen chan' Dios,

8 tak nchak rop xgab xa'.

Naya ndli xa' tib xgab nde ye' tediba,

nantolid xa' xgab xa'.

9 Wes jwan' nabil ndarid lo izyo re',

ndablo nale yo lazo' xa',

tak xa' ya nak tib men ntak lo Dios.

10 Taga re xa' rik ndablo nale yo lazo' xa' sen' ndolux chan' xa',

tak re jwan' ngeno xa' naka xaja ye' ndo lo wan.

11 Sen' lo ndryo' wiz nde ndlya toz be,

zya mbis wan,

nchab ye' nde ndlux yalnawe nyay.

Taga yote re men jwan' ngeno bro toz jwan' lo izyo re',

lux xa' lo reta chan' xa'.

12 Wen toz nda men jwan' nxek lo re yalti nde lo reta jwan' narax ntokil' men lo izyo re';

tak sen' lo mxek xa' lo reta jwan' na,

xa' ya kaya' yalnaban adi',

jwan' re' mke' yek Dios taya' Xa' lo re men jwan' nke' lazon' Dios.

13 Sen' lo ndlya tib xgab yek men li men jwan' narax,

nagapta men:

“Dios mtokil' na”,

tak Dios neka ndli Xa' xgab li Xa' jwan' narax nde neka ntokil' Xa' men sa li mena.

14 Tak,

sen' lo ndlya xgab narax yek men,

lega xgab men naka,

jwan' na mbey men nde ntokil' la men.

15 Nde lo xgab narax ya nchal xken men;

nde le' yalke ya,

sen' lo mxyen na,

ngok naroy nde ncholala yalguj lo men.

16 Wes na,

nke' lazo'n go',

nata'd go' di's tya'b yek go'.

17 Tak reta jwan' wen nde reta jwan' gal' ndey lo be',

lo Xud na',

Xa' nak xwan' reta xni ndob lo be'.

Dios nanzyed Xa' nde nangenta yal' kow par Xa'.

18 Dios dib nzo lazo' Xa',

mbli Xa' ngol nakub na' lo xki's Xa' di's gal',

sa ak na' jwan' ndak lo reta jwan' mdoxkwa' Xa'.

19 Wes na,

pte'las go' jwan' re':

Reta go' ndablo jwin gon go' tib jwan',

nde nerla li go' xgaba zyara kab go',

nde ndablo sow' ak nayi' go'.

20 Tak men jwan' nayi',

nandlid men jwan' gal' lo Dios.

21 Jwan' nasa blo'tal go' reta jwan' xkap nde reta jwan' narax toz nzo lo izyo re' nde kon yalnado' pkaya' go' xki's Dios len' lazo' go',

tak ben'ta xki's Dios tola' xbin go'.

22 Nde bli go' re jwan' ngeni xki's Dios,

na'akta go' men ben'ta nchon na,

na'kwin'nod go' lazo' go'.

23 Tak tez xanya go' ben'ta nchon xki's Dios nde nandlid go'y,

nak go' xaja tib xa' ngwi' lon' tib lo spej.

24 Naya ndo wi' xa' lo spej nyen' xanya lo xa' nde nda xa' nde zyaga mbyaj yek xa' xa ndab lo xa'.

25 Le' xa' jwan' jwin nchon xki's Dios,

di's gal' jwan' ntola' men,

nde nxek xa' tibla' ndo xa' lo xki's Dios,

nanchajtay yek xa',

che'la ndli xa' re jwan' ngeni xki's Dios,

xa' ya wen toz nda lo reta jwan' ndli xa'.

26 Tez nzo xa' ndli xgab,

gal' toz ndo xa' lo xned Dios nde nankenapta xa' loz xa' ben'ta nkwin'no xa' lazo' xa',

nde le' jwan' ta ndli xa' xgab gal' toz ndo xa' lo xned Dios,

nalid sin' na.

27 Le' ned gal'pa nde ned nambi lo Dios,

jwan' na nak:

Ya tna men or ptyab nde re xa' jwan' nguj sal' na',

la'sto men xa' lo yaltin xa',

nde kenap men lazo' men lo re jwan' narax nzo lo izyo re'.