Xki's Dios ngeni nawenta kwi men ta men
2
Wes na,
go' ta ndlipa lazon' Jesucrist,
Xa' Nyebe' ro,
nandabloda kwi go' men.
2 Bli go' xgab,
tez nzi go' len' yodo' nde sin chop mbi':
Tib xa' nzo anil or yan' nde lar wen nok xa',
nde xisa mzin tib xa' nok lar gox xa' nabil ndate,
3 nde tez nchakno toz go' xa' wen nok xaba nde gab go' lo xa':
“De' sa wen tyob la,”
nde le' lo xa' ta nabil ndate ya gab go':
“Bata ptoli,
o ptob izyo ba.”
4 Mne go' lon,
¿cho nanakta jwan' na ngebi go' ta go',
nde ngoxyo go' xa',
cho xa' ntak nde cho xa' nantakta?
5 Wes na,
nke' lazo'n go',
bke'nza go' jwan' re':
Dios mbli men nabil ndate lo izyo re' sa ak xa' men li toz lazon' Dios nde xa' ya kaya' ti ten' taya' Dios lo xa',
tak nke' lazo' xa' Dios.
6 Nde le' go' che'la ngotal go' men jwan' nabil ndate.
Nde,
¿Cho nanakta xa' jwan' wen ndarid lo izyo re' nak xa' ta ntoti go' ya,
nde lega le' xa' ya ta nche' xa' go' nda go' yolow?
7 Nde,
¿Cho nanakta lega le' xa' ya ta nixin xis le Xa' jwan' ta ndli lazon' re'?
8 Wen nge li go',
tez lipa xobyek go' yalnyebe' ro jwan' nchab lo xki's Dios:
“Pke lazo'a ta men la axaja nke' lazo'a lega lu.”a
9 Tez le' go',
nkwi go' men,
zyasa nge kwan' go' yalke lo go',
nde nge li go' yalneyek lo xki's Dios.
10 Tak,
tez cho xa' nxobyek dib ley,
per nchixla' xa' tiba,
yek xa' ya nda reta yalke jwan' ngeni ley.
11 Tak Dios nchab:
“Nagaknod la tedib men nanakta sal' la”,
nde lega Dios ya nchab:
“Nakujta lu ta men la”.
Nde naya,
tez nanchaknod la tedib men,
per nguj la ta men la,
seba nge kwan' la yalke nde nangexobyekta lu yalnyebe' jwan' ngeni xki's Dios.
12 Ndablo wen btodi's go' nde wen bli go' lo men,
xajka men jwan' taya' kwent lo Dios,
tak ben'ta xki's Dios ndli sa ndlya' go' lo xken go'.
13 Tak xa' jwan' nandlata lazon' nye xa' tib men,
taga ngenta cho lat lazon' nye xa' sen' lo taya' xa' kwent lo Dios,
le' xa' jwan' ndlat lazon' nye men,
xa' ya wen toz nda sen' lo nya'b Dios kwent lo xa'.
Men ndlipa lazon' Dios nde nandlid men jwan' ngeni xki's Dios
14 Wes na,
¿cho sin' liy lo men tez tib xa' gab:
“Le' na ndlipa lazo'n Dios”,
nde nandlid xa' jwan' ngenabe' xki's Dios?
¿Cho nye tla' xa' lo xken xa' tez ben'ta mbez xa' ndlipa lazo' xa' Dios?
15 Nde tez tib wes na' o tib tan' na' nangenod xa' lar gok xa',
nde ndyak xa' yalti ngenta jwan' wa xa' re wiz,
16 nde le' go' gab lo xa':
“Nabe'z bya liz la,
gok xab la sa zyen la nde jwin waa”,
per namda'd go' nek tib jwan' nakin' xa'.
¿Cho sin' li jwan' na lo go' sa?
17 Taxa naka sen' lo ndlipa lazo' men Dios,
nde nandlid men jwan' ngenabe' xki's Dios,
zyasa le' jwan' ndlipa lazo' men Dios,
nguja.
18 Nzo men toyal gab:
“Lu,
ndlipa lazo'a Dios,
nde le' na ndli re jwan' ngenabe' xki's Dios.”
Blo' lon nyen' plopa ndlipa lazo'a Dios nde na'lid la jwan' ngenabe' xki's Dios,
nde le' na lo' loa plopa ndlipa lazo'n Dios nde ndlin re jwan' ngenabe' xki's Dios.
19 Lu ndli lazo'a nzo tipta Dios;
wen nak xgab la.
Noga re mbi narax ndli lazon' nzo tipta Dios nde nxida tak nzyeba Dios.
20 ¡Na'akta lu men kow!
Ndablo nyea na,
na'ngenta cho sin' liy tez ben'ta ndlipa lazo' men Dios nde nalid men jwan' ngenabe' xki's Xa'.
21 Abraham,
xa' gox jwan' ngo pola,
Dios mbwi' nak xa' ti men gal' ndo lo Dios,
sen' lo mbli xa' jwan' mnabe' Dios lo xa',
sen' mdaya' xa' xin' xa' Isaak sa gaj or lo Dios.
22 Bwi' jwan' mbli Abraham,
lo mblipa lazo' xa' Dios,
mbli xa' jwan' mnibe' Dios lo xa',
nde kwent mbli xa' jwan' mnibe' Dios lo xa' tamod sa ngobe' ndlipa lazo' xa' Dios.
23 Nde tamod ngok jwan' nchab lo xki's Dios:
“Abraham mbli lazo' xa' Dios,
jwan' nasa mkaya' Dios xa' tib men gal'.”b
Nde mbro'le xa' amig Dios.
24 Ba bwi' go' naya,
Dios lilal Xa' men tib men gal' sen' lo li men jwan' ngenabe' xki's Dios nde nanaktey ben'ta lo lipa lazo' men Dios.
25 Nde taga ngote Rahab,
ngol jwan' mtho lad na';
gal' mbyan' ngol lo Dios tak mbli ngol jwan' mnibe' Dios,
sen' lo mda' ngol yo ten' mka'slo rop xa' jwan' mtel' Josué,
xa' jwan' ngwala's yez Jericó nde mblo ned ngol xa' tib ned ten' nazyalta men xa'.c
26 Ta xaxa nak tib mena,
tez nangenta xbin men,
nguj men,
ta nak sen' ben'ta lipa lazo' men Dios nde nalid men jwan' ngenabe' xki's Dios,
jwan' na nak tib jwan' nguj.