Wes na,

nandabloda nar toz go' ak maestr xa' ndlo' xki's Dios,

tak mnela go' na' jwan' ta ndlo' xki's Dios bro toz kwent tayan' lo Dios.

2 Reta na' ndli jwan' narax.

Tez nzo tib men nandlida jwan' narax sen' lo ndyodi's xa',

xa' ya nak tib men gal',

nde xa' ya tli gan yoned dib xa' lo jwan' wen.

3 Go' mne ben'ta ti yib lud ngo men ro way sa gon ma' di's,

nde tamod ngoned men dib ma'.

4 Taga bwi' go' lo bark;

tenye nabi'y,

nde sen' nde mbi toz nchola's mbi tek mbiy,

zya le' xa' jwan' ndano bark,

ben'ta tib jwan' lud nge xan' bark,^a

jwan' nata ndli nchoned dib bark.

5 Nde taga nak loz men,

naka tib jwan' lud nde toyal liy jwan' naro toz,

xaja tib ki lud ntol' la dipta ti wan ro.

6 Le' loz men naka xaja ki,

sey nzo di's narax,

nde lega ro men ndoba,

nde ntotiy dib men.

Le' re di's narax jwan' ndryo' lo loz men ndey lo ki lo bel.^b

7 Toyal li maz men reta ned ma' wan,

nde re ma' jwan' ndob xil' na,

re ma' jwan' ndye len' na izyo,

nde re ma' jwan' nzo len' nitto'.

8 Nde nek tib men nalida gan li maz men loz men,

naka ti jwan' ndliy gan natoyaltey yoneda,

nde nab di's tin nzoy.

9 Kon loz men ndli ley' men Xud na' Dios,

nde loz men ni xin men lega xis ta men,

men jwan' mtoxkwa' Dios a xaja nak Xa'.

10 Nde lega ro men ndryo' di's wen nde di's xin.

Wes na,

jwan' re' nandabloda li men.

11 ¿Cho nzo plo ten' ndob yal' nit,

tya sib nit nasi nde lega tya sib nit nala?

12 Wes na,

¿cho toyal tib lo ya hig ke xa'la ngud ndole aseytun,

o lo lus ub ke ngud hig?

Nde taga,

tib plo ten' ndob yal' nit na'toyalta tya sib nit nasig nde tyaga sib nit nasi.