2
Jwan' nasa bla' go' reta jwan' narax,
reta yalkwin',
na'lo'd go' jwan' nanakta go',
na'aknayi'd go' wi' go' jwan' ngeno xaga men,
nde bla' go' reta di's yix.
2 Ta xa nkwan' re mbed to' ben'ta ngola nis,
taxa pkwan' go' xki's Dios jwan' nak jwan' gal',
sa xyen go' nde lya' go',
3 tez lipa mbro' lazo' go' xa wen nak Xud na Dios.
Crist nak ke naban
4 Bike gax go' lo Crist,
Xa' nak ke naban jwan' mblo'tal reta men,
le' lo Dios,
Xa' nak ke mblí Dios ke jwan' ntak toz.
5 Nde noga go' xaja ke naban nak go',
ke ndoya' yodon' Dios,
nde nak go' ngwley' nayon nde por Jesucrist ta' go' re jwan' yon lo Dios,
jwan' ndryo' lazo' Dios.
6 Jwan' nasa noga nchab lo Xki's Dios:
Wi' go' nea,
na tob ti ke len' yez Sion jwan' mas ndli sin',
thi ke mblía na nde ntak toza,
men jwan' li lazo' ney,
men ya na'ryo'yanthoda.
7 Lo reta go' jwan' ta ndli lazon' Dios,
Crist nak ke ntak toz,
le' lo re men jwan' nandlid lazon' Xa' nchak jwan' nchab lo xki's Dios:
Ke jwan' mblo'tal xa' nta' yo,
ke ya ngolal ke ntak toz lo dib yo.
8 Nde nchaba' lo xki's Dios:
Ke ncheb men nde ke jwan' ndli nchab men.
Ncheb xa' xki's Dios,
tak namxobyekta xa'y,
tala mbyan' yate xa'.
Yez Dios
9 Le' go' nde lo bin jwan' mblí Dios,
go' nak ngwley' jwan' ndli sin' lo Dios jwan' nak rey,
yez nayon nak go',
yez chan' Dios ngolal go'.
Sa tej go' re yalnaro jwan' mbli Xa',
mbrez Xa' go' sen' ndo go' lo yal'kow sa nde go' lo xni jwan' nawe toz nya.
10 Nera go' nanakta yez Dios,
nde naya nak go' yez Dios,
nera namblata lazo' Dios go',
nde naya mblat lazo' Xa' go'.
Xajka xin' Dios ndablo kete men
11 Go' jwan' nke' toz lazo'n,
nya'b na lo go',
xajka men xa'a lo xyona nde ben'ta ndarid ndab xis izyo re',
nata'd go' di's lo re jwan' narax nya'b bel' go',
tak re jwan' na ntaba xbin men.
12 Naxuta pkete go' xij reta men jwan' nanzolod Dios,
sa reta xa' jwan' ni xin xis go' xaja men ndli jwan' narax,
li naro xa' Dios,
lo wi' xa' re jwan' wen ndli go',
sen' lo nya'b Dios kwent lo reta men.
13 Nde lo ndli lazo' go' Crist,
bxobyek go' re xa' nyebe' xis izyo re',
xa nak rey,
tak xa' ya naka sin' ro,
14 nde bxobyek go' re gobernador jwan' mtob rey,
xa' toti re men ndli jwan' narax nde li naro xa' re men ndli jwan' wen.
15 Tak jwan' re' nchola's Dios,
li go' jwan' wen,
sa tow' go' ro re xa' na'yenta tak ngenta xgab yek xa'.
16 Pkete go' xaja men naxàl' ngete nde te'nyega naxàl' ngete go' nalid go' re jwan' narax.
Che'la pkete go' xajka men nge sin' lo Dios.
17 Bxobyek go' reta men.
Pke' lazo' go' reta xa' jwan' ndli lazon' xki's Dios,
pseb lazo' go' Dios,
nde bxobyek go' xa' nak rey.
18 Re go' nak moza,
bxobyek go' xa' nak chan' sin',
nde na'xobyekta go' ben'ta re xa' wen nde nabe'z nak,
noga re xa' jwan' narax nak ndablo bxobyek go'.
19 Tak nabe'z nak xek men re yalti tenye nanzal'ta mena,
sen' nzolo men Dios.
20 Tak,
¿cho kwan li go' gan ta nxek go' nke' xay cho go',
tez liga yalke nchap go'?,
nde tez nxek go' yalti ndorid go' kwent ndli go' jwan' gal',
jwan' na nak jwan' ndryo' lazo' Dios.
21 Tak jwan' naga sa mbrez Xa' go',
tak taga Crist ne mbrid Xa' yalti por na',
nde ta mblo' Xa'y nde jwan' naga' ndablo li go'.
22 Nde namblid Xa' nek thib yalke neka thiblan di's kwin' nambrod ro' Xa'.
23 Lo sen' mnixin men xis Xa',
nankabta Xa' kon di's xin,
lo sen' mtoti men Xa' nambezta Xa' kota Xa'y,
che'la retay mtob Xa' lo ya' Dios jwan' gal' nya'b kwent.
24 Nde yub Crist mbe' re xken na' lo kruz,
sa la' na' reta jwan' narax ndli na' nde ban na' lo jwan' gal'.
Nde lo mbwi' lad Xa' sa mdyan' reta go'.
25 Nera go' ngok xaja mbakxil' jwan' mdyab,
le' naya mbere go' lo Crist,
Xa' nak pastor go',
Xa' nkenap go'.