Xamod ndablo kwe re xa' ndob sal' na'
3
Taga re go' men got,
bin go' di's ro sal' go',
sa tez nzo ti go',
sal' na' nandlid lazon' xki's Dios,
lo wi' xa' xa nak go',
tli lazo' xa'y,
nanakin'ta tej go'y lo xa',
2 lo wi' xa' naxut nak go' nde nchon go' di's.
3 Lo tyokwa' go' na'aktey jwan' xis,
xa ndrid be' ngu' yis yek go',
re jwan' or ndlirsin' go' o re lar nap jwan' nda' xna lo go',
4 che'la wi' go' xa nak len' lazo' go',
nabe'z gok go',
nado' gok go',
jwan' na nanchasa'da nde jwan' na ntak toz lo Dios.
5 Tak ta mbli re men got nayon ngo pola,
mblí lazo' xa' Dios nde mbin xa' di's ro sal' xa'.
6 Ta mbli Sar,
mbin xa' di's ro sal' xa' Abraham nde mni xa' lo Abraham “sal' na”.
Nde go' nak xin' Sar,
tez ndli go' jwan' wen nde ngen cho kwan nzyeb go'.
7 Nde taga go' men bi',
naxut btobno go' sal' go'.
Pkenap go' xa',
xaja thi jwan' nadan toza,
tak noga xa' kaya' yalnaban jwan' ta' Dios lo go' tak wen nak Dios.
Ta bli go' sa na'ngen kwan tow' lo xki's go' sen' todi'sno go' Dios.
Jwan' ndablo li men nzolo Dios
8 Jwan' ncholas na nin lo go',
thita gok reta go',
tita xgab ptono go',
pke' lazo' go' ta go' xajka men liza,
blat lazo' go' nde naxut psal' ta go'.
9 Na'sired go' jwan' narax lo men ndli jwan' narax lo go',
na'ke'ded go' men jwan' nke'de xis go',
che'la wen mni go' xis xa',
tak mnela go' mkwe'z go' sa kaya' go' yalwen.
10 Tak nchab lo xki's Dios:
Tez cho nchola's ban nde nabe'z yo,
kenap xa' los xa' lo re di's narax,
nde na'nid xa' re di's kwin'.
11 La' xa' jwan' narax,
nde li xa' jwan' wen,
kwan' xa' yalnabe'z nde nabe'z ak xa'.
12 Tak Dios nkenap re men gal' nkete,
nde nchon Xa' xki's re men ya,
Le' re xa' ndli jwan' naraxa,
nale'da ngwi' Dios xa'.
13 Nde,
¿cho li gan toti go',
tez thibla jwan' wen ndli go'?
14 Mbay tez jwan' gal' ndli go' nde ne ndrid go' yalti,
nabe'z toz nda go'.
Jwan' nasa nandabloda zyeb go' nde nalid go' xgab,
15 che'la dib nzo lazo' go' bxobyek go' Crist,
Xa' Nyebe'.
Nde thibla bresa' go',
sa naxut nde nado' kab go',
choja lo men jwan' nyabdi's lo go',
lo jwan' ngembed go'.
16 Nde nambi gok xgab go',
sa re men jwan' nixin xis go',
lo wi' xa' naxut nak go' lo ta ndli lazo' go' Crist,
ryo' yantho xa'.
17 Tak jwin toz nak,
rid men yalti,
lo ndli men jwan' wen,
tez ta nchola's Dios,
kega lo li men jwan' narax.
18 Tak taga Crist mbrid Xa' yalti nde ti gobta nguj Xa' por reta xken na',
tenye ngen cho yalke nchap Xa' per nguj Xa' por reta men nzob xkena',
sa we Xa' na' lo Dios.
Nguj Xa' xajka men lo izyo re,
per naban xbin Xa'.
19 Nde ngwa xbin Xa' ten' nzo now'yo re xbin men nguj,
ngwa nì Xa'.
20 Re xa' re' na'ngonta di's pola,
sen' mxek Dios nkembed Dios lo ndotoxkwa' ark sen' ngo Noé pola,
jwan' plata men mblya',
ben'ta xon xa' mblya' lo nit.
21 Le' nit ya nak xaja nit ndryo'len' naya,
ntola'y na' lo ta mbro'xban Jesucrist.
Lo ta ndryo'le na' naktey jwan' nkib yo lad na',
le'y ndli sa ke'yek na' kenon' xgab nambi lo Dios.
22 Nde lo ngwap Jesucrist lo be',
ndob Xa' lad ban Dios,
tya nyebe' Xa' lo reta áng,
lo reta yalnyebe' nde lo reta yalne.