Chal men ban men xa nchola's Dios
4
Jwan' nasa ta xa mbrid Crist yalti,
taga' ndablo ne ak xgab go',
xaja xgab mkeno Crist sen' mbrid Crist yalti,
taga' bxek go' rid go' yalti.
Tak xa' jwan' mbridla yalti,
ndlo' mbla' xa' re jwan' narax.
2 Sa laja ben' naban xa',
li xa jwan' nchola's Dios nde na'litra xa' re jwan' narax nya'b bel' xa'.
3 Jwan' tozla mbli go' nera,
lo mbli go' xa ndli re xa' nanzolod Dios.
Mbli go' jwan' nda lazo' go',
mbli go' jwan' narax nya'b bel' go',
mkete go' lo yalguy,
mblicho go' yalxkap lo wi',
mdus go' axta ploja mda' gan go' nde mdoxub go' re lo mnab jwan' ngen cho sin' li.
4 Naya,
nzoyen re xa' ya ngwi' xa' go' kwent nanzaltatra go' xa' li go' re jwan' narax,
jwan' nasa nixin xa' xis go'.
5 Le' re men ya,
ta'ya' xa' kwent lo Dios,
ta ndobsa'la nya'b kwent jwan' mbli re men naban nde men ngujla.
6 Tak jwan' naga mbyaj xki's Dios lo re men ngujla,
sa taya' xa' kwent lo Dios jwan' mbli xa' sen' naban xa',
nde ban xbin xa' lo Dios.
7 Ndesin gaxla lux reta jwan'.
Jwan' nasa bin ye pkete go' nde tibla' ptodi'sno go' Dios.
8 Nde lo reta jwan' re',
pke' toz lazo' go' ta go',
tak yalke' lazo' li gan ton' nar toz yalke.
9 Bta' go' liz go' kwed ta men go',
nde na'todi'sxinta go' sen' lo li go'y.
10 Nde lo tiba go' mda' Dios jwan' nchak ndli go',
naxut blirsin' go'y sen' ndli go' sin' lo reta ta men go',
xajka men naxut ndlirsin' jwan' mda' Dios lon'.
11 Tez cho go' ni,
mni go' xajka nge ni xki's Dios.
Tez cho go' ndla'sto men,
bli go'y dib nzo lazo' go' xajka yalne nda' Dios lo go'.
Nde reta jwan' ndli go',
bli go'y,
sa li naro re men le Dios por Jesucrist,
tak Xa' nzal' re yalnaro nde reta yalnyebe',
dib adi'.
Ta naka.
Yalti ndrid men ndli lazon' Dios
12 Go' jwan' nke' toz lazo'n,
na'yoyenta go' lo re yalti xaja bela,
jwan' nak prueb ndo rid go',
xaja ti jwan' nangwi'd go'.
13 Che'la,
blo nale lazo' go' lo ta ndo rid go' re yalti jwan' mbrid Crist,
sa yo nalega lazo' go' sen' bere Crist kon yalnaro chan' Xa'.
14 Tez cho xa' naxin mbez lo go',
lo ndli lazo' go' Crist,
nabe'z nda go',
tak yalnaro chan' Xbin Dios ndono go'.
Re xa' ya nixin xa' xis Crist,
nde le' go' ndli naro go' Crist.
15 Jwan' nasa,
tez cho go' ndorid yalti,
nandabloda rid go'y por yalguj men,
yalwan',
yalxkap,
nekla kwent mbla go' lo re jwan' nanakta chan' go'.
16 Nde tez ndrid go' yalti lo ndli lazo' go' Crist,
na'tyola'sta go',
che'la bli naro go' Dios,
lo re jwan' na.
17 Tak ngoxobla be' tyobte nya'b Dios kwent lo re men yez Dios,
mbay tez nerla kon na' tyobte Dios,
¿cho kwan yote re men jwan' nanxobyekta xki's Dios?
18 Nde tez re men jwan' gal' ngete,
nen toz lya' xa',
¿xaga lya' re men xkap nde re men jwan' nzob xken na' ba?
19 Jwan' nasa re men jwan' ndo rid yalti xaja nchola's Dios,
tibla' li men jwan' wen nde ta'ya' men lazo' men lo Dios,
Xa' jwan' mdoxkwa' men nde thibla' ndli jwan' gal'.