Pkenap go' yez Dios
5
Nya'b na lo re xa' gox jwan' nyebe' xij go',
tak noga na nak xa' gox nde mbwi'pa na re yalti mbrid Crist,
nde non gal yalnaro jwan' ryo'to ye' wíz.
2 Pkenap go' mbakxil' Dios jwan' mda'ya' Dios lo go'.
Pkenap go' mbakxil' dib nzo lazo' go',
na'lid go'y tak nyebe' men lo go',
neka li go'y tak ndyabla's go' tmi,
che'la dib nzo lazo' go' bli go'y.
3 Na'nyebe'tozta go' lo re xa' mda' Dios lo go',
che'la kon jwan' ndli go' blo' go' re jwan' ndablo li yez Dios.
4 Tamod sa sen' ye'd Crist jwan' nyebe' lo re xa' ngenap mbakxil',
zyasa kaya' go' ti koron ndak toz nde nandluxta.
5 Taga re go' or yen',
bin go' di's ro re xa' gox.
Nde taga reta men,
nado' gok go' bin go' di's ro ta go',
tak:
Nandryo'd lazo Dios re men nchak naro,
Nde lo men nado' nda' Dios yalwen.
6 Jwan' nasa gok lud go' lo yalne nzo lo ya' Dios,
sa li naro Xa' go',
sen' lo sin wiza.
7 Reta xgab ndyak go' ptob go'y lo ya' Dios,
tak Xa' nkenap go'.
8 Nalas pkete go' nde nda wi' toz go' xa kete go',
tak Maxu' ta nayi' lo go' ba,
ngete xaja thi mbe's jwan' mbez ndyan',
ngete kwan' nyen' cho yala wa.
9 Jwan' nasa ne nde nali pto go' lo jwan' ndli lazo' go',
tak mne go' jwan' naga' ndo rid reta men jwan' ndli lazon' xki's Dios nzi dib izyo.
10 Tak Dios jwan' nda' reta yalwen,
Xa' ta mbrez na' lo yalnaro adi' chan' Jesucrist,
lo mbridla go' yalti chop son wiz,
le'ga Dios toxut Xa' go',
gal' to Xa' go',
ko ne Xa' lazo' go' nde to ne Xa' go'.
11 Xa' kaya' yalnaro nde yalne,
dib adi'.
Ta naka.
Dyux jwan' ngolo ye's
12 Di's re' mnibe'n mke' Silvan lo ye's,
wes jwan' ngwi'n gal' ndo,
nde lo ye's re' mnin lud yek go' nde ngetej na lo go',
jwan' re' nakpa yalwen chan' Dios tibla' pto go' lo ney.
13 Re xa' ndli lazon' xki's Dios nzo Babiloniaa xa' jwan' mblí Dios ta xa mblí Xa' go' ba,
kon Mark xa' jwan' nak xaja xin' na ntel' ná' dyux lo go'.
14 Mni go' dyux lo re wes na' nde lo re ptan' na',
kon chut nayon.
Yalnabe'z chan' Dios ndo kon go',
re go' jwan' ndo kon Jesucrist.
Ta naka.