Wiz ye'd Crist
3
Go' jwan' nke' toz lazon',
jwan' re' nak mbrop ye's ndoke'n lo go' nde lo ropa mbez na yek go' sa naxut ak xgab go'.
2 Nde pte'la's go' reta di's jwan' mni re profet,
xa' nayon jwan' ngo pola,
nde re jwan' mnabe' Crist Xa' nyebe' nde Xa' mtolan',
jwan' ta mblo' re' apost chan' Xa' ya.
3 Jwan' tibla' ndablo pte'la's go' nak:
lo sen' ndasin lulka wiz,
yo re xa' li re jwan' narax nda lazo' xa',
xi xa'
4 nde gab xa':
“¿Maga di's ta nak kwent bere Crist?
Re xa' gox lon' ngujla nde reta jwan' tatka nziy,
xatka nziy lo mdobte ner reta jwan'.”
5 Reta xa',
sin'ka ndli xa' nanchola'sta xa' yen xa',
ke axta pola por xki's Dios mdoxkwa' be' nde taga izyo,
len' nit mbro' izyo nde xij nit nzoy.
6 Nde nit jwan' mbyedno yi xu' toz tira mbluxa izyo pola.
7 Le' be' nde izyo jwan' nzi naya,
mbyan'la le'y yol,
xa mnabe' Dios sen' sin wiz nya'b Dios kwent lo re men nde lux Dios re xa' xkap.
8 Go' jwan' nke' toz lazon',
nayajta jwan' re' yek go',
le' lo Dios thi wiz nak xaja thi mil lin',
nde thi mil lin' nak xaja thi wiza.
9 Nde nandolen'ta Xa' li xa' re jwan' mkeyek Xa',
xa ndli rol men xgab,
che'la mxek Xa' na' tak nanchola'sta Xa' tya'b nek thib men,
che'la nchola's Xa' reta men sye' xgab na' nde la' men re jwan' narax.
10 Nde le' wiz ye'd Jesucrist ye'd Xa' xaja ndlya thi wan' yal' la.
Zyasa ti bi toz yen nde le' be' lux nde reta jwan' lo be' ga' bela,
luxa,
le' izyo na reta jwan' nzo xis ne'y yol rey.
11 Lo ta reta jwan' luxa,
¡Ndablo,
naxut nde nayon kete go'!
12 Pkembed go' nde pken go' bli go' sa nayen sin wiz achan' Dios.
Wiz ya le' be' lux lo bel,
nde reta jwan' nzi lo be' yola nde zun'na lo bel,
13 Le' na' nkembed izyo kub nde be' kub jwan' mkeyek Dios ta' Dios lon',
ten' nzo reta jwan' gal'.
14 Go' jwan' nke' toz lazo'n,
laja nkembed go' jwan' na,
pchal go' sa naxut,
nambi nde nabez yosib Dios go'.
15 Byen go' ke Xa' nchola's lya' na' jwan' nasa ndoxek Xa' na'.
Nde jwan' re'ga mke' wes na' Pab lo go' xata nak yalnchak jwan' mda' Dios lo xa'.
16 Nde re lo ye's jwan' mtel' xa' mdej xa' jwan' re' nde nzo rola nagan yen men,
jwan' nasa re xa' nanchenta xki's Dios nde re xa' rop xgab na' ntokan xa'y,
ta xaga ntokan xa' temas xki's Dios,
lega le' lo xa' ndli xa' jwan' narax sa lux xa'.
17 Jwan' nasa,
go' jwan' nke' toz lazon',
naya ta ax mnela go' jwan' re',
pkenap go' lazo' go' nde ndawi' go' na'li lazo' go' xki's re xa' ntokil' men,
sa na'la'd go' jwan' gal' ngeli go'.
18 Che'la jwin byolo go' yalwen chan' Jesucrist,
Xa' mtolan' nde nyebe' lon' nde xyen go' lo yalwen chan' Xa'.
Xa' kaya' yalnaro naya nde dib adi'.
Ta naka.