Lipa lazo' men Jesús sa lyayo re jwan' narax
5
Reta men jwan' ndli lazon' le' Jesús nak Xa' mtel' Dios,
men ya nak xin' Dios.
Nde reta men jwan' nke' lazon' xud mdyen',
taga nke' lazo' men re mdyen' xin' xa'
2 Sen' nxobyek na' yalnyebe' chan' Dios nde nke' lazon' Xa',
zyasa ndlo' nke' lazon' re xin' Xa'.
3 Jwan' re' nak ke' lazo' men Dios,
xobyek men re yalnyebe' chan' Xa'.
Nde re yalnyebe' chan' Xa' na'nakte jwan' nagan,
4 tak re men jwan' nak xin' Dios,
men ya li lyayo re jwan' narax lo izyo.
Sen' lipa lazo' men Jesús,
jwan' re' li lyayo re jwan' narax lo izyo.
5 ¿Cho men li lyayo re jwan' narax lo izyo?
Men jwan' ndli lazon' Jesús nak Xin' Dios.
Jwan' ndej Mbi Nayon
6 Sen' mbyed Jesucrist lo izyo re',
mbro'le Xa' len' nit nde sen' nguj Xa' mxo Xa' ren Xa'.
Nde le' Mbi Nayon ndej jwan' re',
tak Mbi Nayon nak jwan' li.
7 Tak son Xa' ndej lo be' jwan' nak Jesús,
Xa' ya nak:
Xud na' Dios,
Di's Naban nde Mbi Nayon.
Nde re yon Xa' re',
thita Xa'.
8 Taga' lo izyo,
nzo son jwan' ndej jwan' nak Jesús:
xbi,
nit nde ren.
Nde re yona thita naka.
9 Tez ndli lazon' jwan' ndej men lo izyo re',
ndablo mas li lazon' jwan' ndej Dios,
tak Dios ndej jwan' nak Xin' Xa'.
10 Men jwan' ndli lazon' Xin' Dios,
ne' xa' jwan' re' len' lazo' xa',
le' xa' jwan' na'ndlid lazon' Dios ndlilal xa' Dios xaja ti Xa' kwin',
tak na'ndlid lazo' xa' jwan' ndej Dios kwent chan' Xin' Dios.
11 Nde jwan' re' nak jwan' ndej Dios:
Dios mda' yalnaban adi' lon',
nde yalnaban re' ngeno Xin' Xa'.
12 Men jwan' ndono Xin' Dios,
men ya ndono yalnaban,
le' xa' jwan' na'ndonod Xin' Dios na'ndonod xa' yalnaban.
Yolo men yalnaban adi'
13 Ngeke'n jwan' re' lo re go' jwan' ndli lazon' le Xin' Dios,
sa nye go' ngeno go' yalnaban adi',
nde li lazo' go' Xa' nak Xin' Dios.
14 Nde jwan' re' nak xla's ngenon' lo Dios,
tez nya'b na' jwan' xaja nchola's Xa',
ton Xa' xki's na'.
15 Nde tez mnen' Dios nchon choja jwan' nya'b na' lo Xa',
ndablo nyen' mkaya'la na' re jwan' mna'b na' lo Xa'.
16 Tez nzo cho go' ngwi' ti xa' ndli lazon' Dios ngeli xa' yalke jwan' na'ncheda men lo yalguj,
mna'b go' lo Dios,
nde Dios ta' yalnaban lo xa',
jwan' re' nak lo re xa' ndli yalke jwan' na'ncheda men lo yalguj.
Nzo yalke ndeno yalguj,
jwan' na na'nit na lo go' cho tna'b go' por xa' ya lo Dios.
17 Reta jwan' na'gal'ta,
yalke naka,
per nzo yalke na'nchede men lo yalguj.
18 Mnen' nek tib men jwan' nak xin' Dios na'ndlid men jwan' narax,
tak Jesús Xin' Dios nkenap Xa' men nde maxu' na'galtra' xa' men.
19 Mnen',
nak na' xin' Dios nde le' dib izyo nzoya' maxu'y.