2 Wes na,

ngena'b na lo Dios sa reta jwan' ndlia naxut ryo'y,

nde kenoa yalnadan',

ta xa naxut ndoxen yalnaban chan' la.

3 Nale toz ngo lazo'n sen' mbyed re wes nde mdej xa' xa gal' ndoa nde ngetea lo jwan' lipa.

4 Nangenotra na yalnale taja naro lo jwan' re',

sen' nchon na le' xin' na ngete lo jwan' lipa.

5 Wes na,

gal' toz ndlia sen' ndla'stoa re xa' ndli lazon' Dios,

tenye nanzolot la xa'.

6 Tak re xa' ya,

mdej xa' lo yodo' re yalwen jwan' ndlia lo xa'.

Nya'b na loa thitka bla'sto xa',

bta' jwan' nakin' xa' ned ten' nda xa',

xaxa ndryo' lazo' Dios.

7 Tak re xa' ya,

ndyen xa' nda xa' lo rsin' Jesucrist,

nde nek thib jwan' nda' re men na'nzolod Dios nankaya'd xa'.

8 Jwan' nasa,

ndablo laston' re xa' ya,

zyasa non' ndola'sto jwan' lipa.

9 Na mke' ti ye's mtel na lo yodo',

per Diótrefes na'ndryo'd lazo' xa' jwan' ndli ná',

tak xa' nchola's nyebe' lo yodo'.

10 Jwan' nasa,

tez le'n ya,

zya tej na lo xa' re jwan' ndli xa',

xa ndyodi's yix xa' nde ni xin xa' xis ná'.

Nde nanakte ben'ta jwan' nata ndli xa',

noga na'ta'da xa' plo kwed re xa' ndli lazon' Dios nzin tya.

Le' re xa' jwan' ncholas ta' plo kwed re xa' ya,

nka Diótrefes di's li xa'y nde ngote Diótrefes xa' yodo'.

11 Wes na,

na'te'dta lu jwan' narax,

che'la pte'd jwan' wen.

Tak men ndli jwan' wen,

men ya nak xin' Dios,

le' xa' ndli jwan' narax,

xa' ya nanzolod Dios.

12 Reta men,

wen ndyodi's xa' xis Demetr nde yub lo xki's Dios wen ndo xa'.

Nde taga ná',

wen ndyodi's ná' xis xa',

nde lu mne le' re jwan' ndyodi's ná',

jwan' liy.

13 Bro toz jwan' ncholas na tej na loa,

per na'ncholasta na ke' nay lo ye's,

14 tak ndlin xgab yatwi'n la len' wiz re',

sa todi's rop na'.

15 Yalnabe'z chan' Dios tyonoa.

Re xa' ndli lazon' Dios nzi nche' ya,

ni xa' dyux loa.

Nde ba bta' dyux lo tiba xa' nzinoa.