Kwent nabix chan' pla xa' narax mke sin'
12
Zyasa mdobte Jesús mda' Xa' kwent nabix chan' xki's Dios nde nchab Xa':
—Ngo tib mbi' mblo bin lus ub nde mtow' xa' dib ten' nzo bina kon ke,
mtoxkwa' xa' tib plo ten' ko' xa' nit ub nde mtoxkwa' xa' tib yo ke,
gap toz ndab sa tya toyal kenap xa' diba.
’Zyasa mtan' no xa' lus ub lo pla men sa li men sin' na nde le' xa' ngo ned ndya tij.
2 Sen' ngoxob be' gaba,
zya mtel' xa' tib mos sa ya xi' mos jwan' nak chan' xa'.
3 Per le' re xa' ta mbyan' no lus ub ba,
mxen xa' mos nde mke' xa'y nde mbloned xa' mos tata ngenta kwan ntel' xa'.
4 Le' xa' nak xwan' lus ub mtel' xa' tedib mos;
nde sen' lo mzin mos tya,
mblo's xa' mos,
mbwadke xa' mos axta mbwi'y yek mos.
5 Zyasa bere mtel' xa' tedib mos nde mos re' mbij xa';
taga mblino xa' tipla mos jwan' mtel' xa' nak xwan' lus ub,
cho mos mke xa'y nde cho mos mbij xa'.
6 ’Ya mbre mos lo xa' nak xwan' lus ub,
per ngeno xa' tib xin' xa' jwan' nke toz lazo' xa' nde nchab xa':
“Tel na xin' bi'n re',
or re' xob yek xa'.”
7 Le' re xa' ta mbyan' no lus ub ba,
nchab xa' lo ta xa':
“Or ba kaya' izyo.
De' go',
sa kuj na' or sa na' kaya' izyo nde aka chan' na'.”
8 Zya mxen xa' or nde mbij xa' or nde mblobi xa' or tij ten' nzob lus ub.
9 Zyasa mnabdi's Jesús lo re men nzi tya nchab Jesús:
—¿Cho kwan li xa' nak xwan' lus ub,
xa ndli go' xgab?
Yed xa' nde tolux xa' reta men ta mbyan' no lus ub ba nde taya' xa'y lo tib ned men.
10 ’¿Cho nandlapta go' jwan' nchab lo xki's Dios?
Le' ke jwan' mblotal xa' nta' yo,
ke ya ngok tib ke jwan' ndenke' dib yo.
11 Dios ta mtoxkwa'y;
nde naya naka tib jwan' nzoyen men.a
12 Zya nchola's xa' tyen xa' Jesús,
tak mbyen xa' xis xa' nda kwent nabix jwan' mda' Jesús.
Nde mzyeb xa',
ya nandenta xa' Jesús tak men toz nzi,
yaja ngo xa' ned ndya xa'.
Mnabdi's xa' lo Jesús cho tyix xa' lo Cesar
13 Zyasa mtel' xa' pla xa' nak fariseo nde pla men Herodes,
sa ya nabdi's xa' lo Jesús,
ben'ta nkwan' xa' jwan' ke' xa' yalke yek Jesús.
14 Sen' lo mzin xa' nchab xa':
—Maestr,
mne ná' li re jwan' ndyodi's la nde nandyod la re jwan' ndyodi's men xis la,
neka ndlia xgab cho xa'y,
tak lu ben'ta ndlo' jwan' li,
nyen' xa xob yek men Dios.
Jwan' nasa nyabdi's ná' loa:
“¿Cho ndablo kix na' tmi chan' izyo lo Cesarb o nakixta na'y?
¿Ta' na'y,
o natad na'y?”
15 Le' Jesús mnela xgab narax jwan' ndono re men ya nde nchab Jesús lo xa':
—¿Cho kwan ndliy nkwan' go' yalke ke' go' yek na?
De'no go' tib tmi Rom,
wi'n.
16 Zya ngwano xa'y,
le' Jesús nchab:
—¿Cho yek nde cho le nke lo tmi re'?
Le' re xa' mkab nde nchab xa':
—Cesar.
17 Le' Jesús nchab:
—Bta' go' lo Cesar jwan' nak chan' Cesar nde bta' go' lo Dios jwan' nak chan' Dios.
Le' reta men nzi tya,
nzoyen toz xa' mbin xa' jwan' mkab Jesús.
Yalnyabdi's chan' yalryoxban
18 Zyasa mbye'd pla xa' saduceos lo Jesús,
re xa' jwan' mbez:
“Re men nguj naryoxbanta men.”
Jwan' nasa mnabdi's xa' lo Jesús,
nchab xa':
19 —Maestr,
lo ley jwan' mke' Moisés nchab:
“Tez tib xa' bi' mselya',
nde na'nkad ngol xin' xa' tata nguj xa',
tya sa wes thabol ndablo selya'no ngol,
sa tan' xa' bin wes xa'.”c
20 Ngo tib xa',
gaz wes na'.
Xa' nak ner,
mselya' xa' nde na'nkad ngol xin' xa',
tata nguj xa'.
21 Tya mbro' tib wes xa',
xa' jwan' nak mbrop lo xud na',
mselya'no xa' ngol nde taga na'nkad ngol xin' xa',
tata nguj xa'.
Nde tya mbro' tedib wes xa',
xa' jwan' nak mbyon lo xud na',
taga ngote xa'.
22 Nde ta ngote re gaz wes xa'.
Nek tib xa' namkad ngol xin' na' nde lulka mney nguj ngol.
23 ¿Lo sen' yo yalryoxban,
xanya xa' ak sal' ngol,
ta re gaz wes xa' mselya'no ngol?
24 Zyasa mkab Jesús nde nchab Xa':
—¡Tiptane mdyab go'!
Tak nanzolot go' xki's Dios neka nye go' yalnaro chan' Dios.
25 Tak sen' ryoxban re men nguj,
ya nakta xa' selya'.
Le' xa' ak xaja nak re Áng ta nzi lo be' ba.
26 Nde jwan' ta ryoxban re xa' nguja,
¿Cho nandlapta go' ye's mke' Moisés,
sen' mni Dios lo xa' ten' ndob ya yis,
nchab Dios:
“Na nak Dios lo Abraham,
Dios lo Isaak nde Dios lo Jakob”?d
27 Nde Dios,
nanakta Xa' Dios lo re men nguj,
le' Xa' nak Dios lo re men naban.
Nde le' go' tiptane mdyab go'.
Yalnyebe' ro toz
28 Tya ndo tib xa' jwan' nak maestr ndlo' ley xki's Dios,
mbin xa' re jwan' mdodi'sno Jesús xa' saduceo.
Nde mbwi' xa' nawe mkab Jesús,
zyasa mbike xa' lo Jesús nde mnabdi's xa',
nchab xa':
—¿Lo reta yalnyebe' jwan' ngebez Dios,
xanyay nak jwan' ner?
29 Le' Jesús mkab:
—Le' yalnyebe' ner lo retay nak:
“Pto nza go',
men Israel;
le' Dios na',
Xa' nyebe' lon',
tipta Xa'.
30 Nde bke' lazo'a Dios,
dib nzo lazo'a,
dib yalnaban chan' la,
dib xgab la nde dib yalne chan' la.”e
Jwan' re'ta nak yalnyebe' ndak toz lo retay.
31 Le' mbrop yalnyebe' jwan' ngebez Dios,
taxa naka:
“Bke' lazo'a ta men la axaja nke' lazo'a lega lu.”f
Na'ngenta tib yalnyebe' naro toz lo rop jwan' re'.
32 Zyasa le' xa' jwan' nak maestr ndlo' ley xki's Dios,
nchab:
—¡Linka luy,
maestr!
¡Li jwan' ndej la!
Tipta Dios nde na'ngenta tedib Xa'.g
33 Le' jwan' ke' lazo' men Dios,
dib nzo lazo' men,
dib xgab men,
dib yalnaban chan' men nde dib yalne chan' men nde ke' lazo' men ta men xaja nke lazo' men lega men,
re jwan' re' ndak toz,
lo reta jwan' ta ndli xa',
nguj xa' ma' sa ta' xa' gon lo Dios.
34 Zya mbwi' Jesús nawe mkab xa' liga nchen xa' xki's Dios nde nchab Jesús lo xa':
—Nandod la tij sa nyebe' Dios len' lazo'a.
Yaja nek tib men na'nabdi'sta lo Jesús.
¿Cho lo bin nde Crist?
35 Laj ngelo' Jesús xki's Dios lo men ten' ndob yodo',
zya mnabdi's Jesús,
nchab Xa':
—¿Cho kwan ndliy re xa' nak maestr ndlo' ley xki's Dios,
mbez xa':
“Lo bin David yed Xa' jwan' tel' Dios”?
36 Tak yub David mni sen' ndono xa' Mbi Nayon chan' Dios,
nchab xa':
Le' Diosh nchab lo Xa' Nyebe' lon:
“Ptob lad ban na,
kebe' lin sa lyayo re xa' jwan' nayi' loa.”i
37 Yub David mbez le' Crist nak “Xa' Nyebe' lo David”.
¿Xamod yed Crist lo bin David sa?
Nde bro toz men nzo yez,
nale ngo lazo' xa' mbin xa' xki's Jesús.
Jesús mdej xa nak re maestr ndlo' ley xki's Dios
38 Xij ngetoted Jesús men,
nchab Xa':
—Kenap toz go' lo re xa' jwan' nak maestr ndlo' ley xki's Dios,
tak re xa' re' ndyen xa' gok xa' lar nol' jwan' ntak toz nde taja ndyen xa' ni men dyux lo xa' lo xbi'.
39 Nde nkwan' xa' ten' nawe nya tyobza' xa' len' yo ten' ndyop men Israel,
taga sen' lo wa xa',
nkwan' xa' ten' nawe nya tyob xa'.
40 Nde nkib xa' liz re ngol nguj sal' na',
taja nol' toz ndyodi'sno xa' Dios sa tyák men naxut toz nak xa'.
Re xa' re' sen' lo taya' xa' jwan' mbli xa' lo Dios,
naro toz nak yalti kaya' xa'.
Tib ngol prob mda' tmi yon
41 Jesús ndob gax ro yodo' ten' ndob jwan' ngo xa' tmi yon,
ndowi' Xa' taja ngo re men tmi tya,
nar xa' rik bro tmi ngo xa' tya.
La ofrenda de la viuda (Marcos 12.41)