Jesús ndosin yez Jerusalén
11
Sen' lo ndosin gaxla re xa' yez Jerusalén,
ndoyotu xa' gax ten' nak kox ya Olib,
gax tya nzi chop yez bix ndole Betfage nde Betania zya mbloned Jesús chop xin' te'd Xa',
2 nde nchab Jesús lo xa':
—Wa go' tib yez bix ta nzi gax lon' re',
sen' sin go' tya,
yosib go' tib burr yen' ngedo',
tib burr jwan' tera tyob xa' xis na'.
Xak go' ma' nde yedno go' ma'.
3 Nde tez nzo xa' nye lo go':
“¿Cho kwan ndliy ngexak go' burr?”
Go' gab lo xa':
“Xa' Nyebe' nakin' ma' nde napa yedno Xa' ma'.”
4 Zyasa ngwa rop xa' nde mzyal xa' tib burr yen' ngedo' ro ned gax tib ro yo nde mxak xa' ma'.
5 Nde pla xa' jwan' nzi tya,
nchab xa':
—¿Cho kwan ndliy ngexak go' burr?
6 Zya nchab xa' di's jwan' mdej Jesús lo xa' par gab xa' nde tamod mda' xa' di's mbe' xa' burr.
7 Nde mzin no xa' burr lo Jesús,
mxob xa' xab xa' xis ma' nde mdob Jesús xis burr.
8 Bro toz men mxen xa' lar jwan' nzob xis xa',
mtoga' xa'y ned,
tipla xa' taja mcho' re xod la wan nde mblek xa'y ned.
9 Reta xa' jwan' nda siblo nde reta xa' jwan' ndanke xis,
taja ne mbez xa',
nchab xa':
—¡Naro Dios,
Nayon nak Xa' ta mtel' Dios!
10 ¡Mbli ley' Dios Jesús sa nyebe' Xa',
Xa' nde lo bin David,
xa' gox ngo pola!
¡Naro Dios ndob lo be'!
11 Zyasa mzin Jesús len' yez Jerusalén nde ngwa Xa' ten' ndob yodo'.
Ngwa twi' Xa' dib cho yodo',
nde seba ndekowla izyo,
yaja ngo Xa' ned ndya Xa' yez Betania kon re tib sen xin' te'd Xa'.
Jesús ngosib ya hig ngenta ngud
12 Mduxni izyo tib wiz,
sen' lo mbro' xa' yez Betania,
laj ndo xa' ned msib ndyan' xa'.
13 Nde mbwi' xa' tij ndob tib ya hig ndo la lon',
zyasa ngwa twi' xa' lo ya nyen' cho tozal tib ngud wa xa'.
Nde sen' lo mzin xa' ten' ndob ya,
nek tib ngud ngenta ben'ta la ndo lo ya,
tak nakte tyemp jwan' nda'y ngud.
14 Zya nchab Jesús lo ya hig:
—Nek tib ngud ya natyotra loa,
wa men.
Nde mbin re xin' te'd Xa' di's jwan' nchab Xa' lo ya.
Jesús mtoxon' re men jwan' nzi tho cho yodo'
15 Sen' lo mzin xa' yez Jerusalén,
Jesús ngote ten' ndob yodo',
tolo mblote Xa' re men,
re xa' jwan' nzi tho nde re xa' jwan' nzi ti'.
Mxen Jesús re mes xa' jwan' nsil' tmi,
mtub Xa'y,
taga mtub Xa' re yasil xa' nzi tho palom.
16 Nde ya na'ndad Jesús di's rid re men ndeno re jwan' ten' nak lo le chan' yodo'.
17 Zya tolo mtote'd Jesús re men,
nchab Xa':
—Lo xki's Dios ngeni ten' nchab Dios:
“Liz na ryole tib yo dyop reta men nzi lo izyo re' sa todi'sno xa' na.”a
¡Nde go' mblilal nche' xaja tib yo ten' ndyop re xa' wan'!b
18 Nde re xa' nak maestr ndlo' ley xki's Dios nde re ngwley' jwan' nyebe' mbin xa' re jwan' nchab Jesús,
zyasa tolo mkwan' xa' mod kuj xa' Jesús,
tak nzyeb xa',
men toz nzoyen re jwan' ndlo' Jesús.
19 Sen' lo ndela yal',
zya mbro' re xin' te'd Xa' yez Jerusalén.
Le' ya hig mbiza
20 Mduxni tib wiz,
til' toz mbrid re xa' ten' ndob ya hig nde mbwi' xa' axta dib lox ya mbiz.
21 Zyasa mtela's Pey nde nchab Pey lo Jesús:
—Maestr,
bwi',
le' ya hig ta mke' bdea ya,
mbiza.
22 Le' Jesús nchab:
—Blipa lazo' go' Dios.
23 Tak nipa na lo go' tez nzo xa' na'akropta xgab na',
nde li lazo' xa'y tak jwan' gab xa',
toyal gab xa' lo kox re':
“Byib nche' nde wa yo len' nitto'”,
nde taka.
24 Jwan' nasa nin lo go',
reta jwan' ta nyab go' lo Dios,
bli lazo' go' ke ta' Xa'y nde ta aka.
25 Nde sen' lo ndyodi'sno go' Dios,
tez nzo kwan narax ndateno go' ta men go',
ndablo tiptane brid go'y yek go',
tamod sa Xud na' ndob lo be' ton' Xa' re xken go'.
26 Tak tez narita go'y tiptane yek go' re jwan' narax ndli men lo go',
no Xud na' ndob lo be',
naton'ta Xa' re xken go'.
¿Kon cho yalnyebe' ndli Jesús re jwan'?
27 Zyasa bere nda xa' len' yez Jerusalén tib gob.
Nde laj ngete Jesús ten' ndob yodo',
tya mbye'd re ngwley' jwan' nyebe',
re xa' nak maestr ndlo' ley xki's Dios nde re xa' nak sin' lo men Israel.
28 Nde nchab xa' lo Jesús:
—¿Kon cho yalnyebe' ndlia re jwan' re' nde cho mda' di's sa ndli le?
29 Le' Jesús mkab lo xa':
—Tej na lo go' kon cho yalnyebe' ndlin re jwan' re',
tez kab go' tib jwan' nyabdi's na lo go'.
30 ¿Cho xa' mtel' Juan sa mblole xa' men?
¿Cho Dios mtel' xa' o men mtel' xa'?
Pkab go' lon.
31 Zyasa mdodi'sno xa' ta xa' nde nchab xa':
—Tez gab na':
“Dios mtel' Juan”,
nye xa' lon':
“¿Cho kwan ndliy nandlid lazo' go' xki's xa' sa?”
32 Nde tez gab na':
“Men mtel' Juan”...
Per mzyeb xa' ta gab xa',
tak reta men ndli lazon' ke Juan liga ngok tib xa' mbye'd mda' xki's Dios.c
33 Zyasa nchab xa' lo Jesús:
—Nanyet ná' cho xa' mtel' Juan.
Le' Jesús mkab lo xa':
—Noga na natejta na lo go' kon cho yalnyebe' ndlin re jwan' re'.