Jesús nchab yalke naka la' men sal' men
10
Mbro' Jesús yez Capernaum,
tya nda xa' lo xyon Judea nde mzin xa' tib lad ro yo' Jordán nde taxa men toz mdyop lo Xa' tya.
Le' Jesús mdobte mblo' Xa' xki's Dios lo reta men,
mod jwan' ndliga Xa'.
2 Zyasa mbike pla xa' fariseo mnabdi's xa' lo Jesús ben'ta par kwan' xa' mod ke' xa' yalke yek Jesús,
nchab xa':
—¿Cho gal' naka la' xa' bi' ngol xa'?
3 Le' Jesús mkab lo xa':
—¿Xomodka nchab ley chan' Dios jwan' mke' Moisés?
4 Le' xa' nchab:
—Lo ley jwan' mke' Moisés ngeni,
toyal la' men sal' men ben'ta ndablo tyoxkwa' tib ye's jwan' nyebe' ke la' xa' bi' sal' xa'.
5 Le' Jesús mkab lo xa':
—Por yalneyek chan' go' jwan' nasa mke' Moisés yalnyebe' re'.
6 Axta sen' mtoxkwa' ner Dios reta jwan',
zya mtoxkwa' Xa' mbi' nde ngol.a
7 “Jwan' nasa le' men bi' la' xa' xud xa' nde xna' xa' nde tyobno xa' ngol xa',
8 nde rop xa',
tipta ak xa'.”b
Jwan' nasa ya nanakta xa' chop,
le' xa' ngolal tipta.
9 Nde rop xa' jwan' Dios mtenta,
ngenta cho men li sa la' xa' sal' xa'.
10 Sen' lo mzin xa' yo,
le' re xin' te'd Xa' bere mnabdi's xa' jwan' na lo Jesús ti gob.
11 Zyasa nchab Jesús:
—Tez nzo men bi' la' xa' ngol nak sal' xa' nde ka xa' tedib ngol,
yalke naka mbla' xa' sal' xa'.
12 Noga ngol,
tez la' xa' sal' xa' nde ka ngol tedib mbi',
yalkega naka mbla' ngol sal' ngol.
Jesús ndli ley' re or bix
13 Zyasa nar men ndano or bix lo Jesús sa xob Jesús ya Xa' yek or;c
le' re xa' nak xin' te'd Jesús mbrez xa' yek re men ta ndeno or bixa.
14 Sen' lo mbwi' Jesús ta nzi li xa',
ngok nayi' Jesús nde nchab Xa':
—Bta' go' di's yed re or bixa lon nde nakad go' di's;
tak Dios nyebe' lazo' men jwan' nak xaja or bix re'.
15 Nipa na lo go',
men jwan' nakaya'da yalnyebe' chan' Dios,
xaja ti or bix re',
men ya na'lyada lo yalnyebe' chan' Dios.
16 Zyasa mde's Jesús re or bixa,
mxob ya' Xa' yek or nde mbli ley' Xa' or.
Tib mbi' rik mdodi'sno Jesús
17 Sen' leja ndoro' Jesús nda xa',
zya mbro' tib mbi' nde karrel mzin lo Jesús nde mdoxub xa',
nchab xa':
—Maestr mnen ke gal' nak la,
na nyabdi's loa.
¿Cho kwan lin sa lin gan yalnaban adi'?
18 Le' Jesús mkab lo xa':
—¿Cho kwan ndliy mbez la gal' nak na?
Ngenta nek tib men gal',
ben'ta Dios nak Xa' gal'.
19 Re jwan' ngenabe' Dios mnela luy:
Na'ketenod la tedib men jwan' nanakta sal' la.
Nakujta lu men.
Nalid la yalwan'.
Naket la yalke yek men jwan' nanakta xa'.
Nakwin'ta lu.
Bxob yek xud la nde xna'a.
20 Le' xa' nchab:
—Maestr,
reta jwan' re' ya ndolila nay axta lud na.
21 Zya mbwi' Jesús lo xa' nde mblat lazo' Jesús xa',
nchab Jesús:
—Tipta jwan' tera lia,
bya,
ptho reta jwan' ngenoa nde pta' tmi lo re xa' jwan' ngenta chan' na',
tamod kenoa bro toz jwan' lo be' zyasa de',
sa wea kruz la nde tyonkea xis na.d
22 Zya mbli toz xa' xgab sen' lo mbin xa' di's ya nde nabil ndya xa',
tak bro toz jwan' ngeno xa'.
23 Zyasa mbwi' Jesús lo re xin' te'd Xa' nde nchab Xa':
—Plopa ne naka lo re xa' ngeno bro toz jwan',
sa yote xa' len' yalnyebe' chan' Dios.
24 Nzoyen toz re xa' nak xin' te'd Jesús sen' mbin xa' re di's re';
le' Jesús bere nchab:
—Xin' na,
plopa ne naka,
sa yote xa' len' yalnyebe' chan' Dios,
re xa' jwan' ndob xgab na' lo re jwan' ngeno xa'.
25 Mas nale' rid ndab tib kamey yer yagux,
ke tib xa' rik lya xa' lo yalnyebe' chan' Dios.
26 Zya masra' nzoyen re xa' nde nchab xa' lo ta xa':
—¿Cho' men li gan lya' sa?
27 Jesús mbwi' lo xa' nde nchab Jesús:
—Lo re men nagana,
le' lo Dios nakte nagan,
reta jwan' tak li Dios.
28 Le' Pey mdobte nchab lo Jesús:
—Ná' re',
reta jwan' mbla' ná' nde mdonke ná' xis la.
29 Jesús mkab nde nchab xa':
—Nipa na lo go',
tez nzo men mbla' liz na',
wes na',
btan' na',
xud na',
xnan',
ngol na',
xin' na',
izyon na' tak ndyonke xa' xis na nde ndata' xa' xki's Dios,
30 men ya laj naban xa' kaya' xa'y tib ayo' gob masra'.
Kaya' xa' liz xa',
wes xa',
btan' xa',
xna' xa',
xin' xa' nde izyon xa' nde noga toti men xa' lo izyo re'.
Per sin tib wiz kaya' xa' yalnaban adi' lo be'.
31 Le' re men jwan' ntak toz naya,
yoloba nantakta xa' nde re men jwan' nantakta naya,
yoloba ntak xa'.
Mbyon gob Jesús mdej gaj Xa'
32 Zyasa ngo xa' ned nda xa' yez Jerusalén.
Jesús nda siblo,
le' re xin' te'd Xa' ndanke xis anta ngan xgab xa' nde masra' re men anta ndake seb xa' xis Jesús.
Zyasa xa'ta mbrez Jesús re xin' te'd Xa' nde ndobte mda' Xa' kwent re jwan' yote Xa':
33 —Bwi' go' naya ndan' yez Jerusalén,
le' Xin' Mbi' mbye'd lo izyo re',
taya' men Xa' lo re ngwley' jwan' nyebe' nde lo re xa' nak maestr ndlo' ley xki's Dios,
nde tya nyebe' men gaj Xa' nde taya' men Xa' lo re men nanakta Israel,
34 zya xino men Xa',
kin men Xa',
suk men lo Xa' nde kuj men Xa';
per yoxob mbyon wiz ryoxban Xa'.
Jakob nde Juan mnab xa' tib jwan' lo Jesús
35 Zyasa Jakob nde Juan,
xin' Zebedeo,
mbike xa' lo Jesús nde nchab xa':
—Maestr,
nchola's ná' ke lia tib jwan' nyab ná' loa.
36 Jesús nchab lo xa':
—¿Cho kwan nchola's go' lin?
37 Le' rop xa' nchab:
—Ná' nchola's ke sen' tyob la nyebe'a,
ta'a di's tib ná' tyob lad ban la nde tib ná' tyob lad beg la.
38 Le' Jesús nchab:
—Nanyed go' jwan' nyab go'.
¿Cho tli go' gan rid go' re yalti,
jwan' rid na nde gaj go' mod jwan' gaj na?e
39 Le' rop xa' mkab nde nchab xa':
—Tli ná' gan.
Jesús nchab lo xa':
—Lin go'y,
reta yalti rid na jwan' na rid go' nde taj go',
mod jwan' gaj na.
40 Le' jwan' ta nyab go',
tib go' tyob lad ban na nde tib go' tyob lad beg na,
nakta jwan' na kwent chan' na,
ben'ta Dios nyebe' jwan' na.
41 Sen' lo mbin ti si' xin' te'd Xa' jwan' re',
zya mdobte ngok nayi' xa' lo Juan nde lo Jakob.
42 Zyasa mbrez Jesús re xa' nde nchab Jesús lo xa':
—Ya mnela go' xamod nak re xa' ta nchak sin' ro,
ben'ta ndob nyebe' xa' nde nchak naro xa' lo tib ned men.
43 Le' xij go' re' nanakte tamod;
che'la,
tez nzo go' nchola's ak xa' ro,
xa' ya nerla nakin' li sin' lo re go'.
44 Nde tez nzo go' nchola's nyebe',
xa' ya ndablo li sin' lo re men.
45 Tak na Xin' Mbi' mbye'd lo izyo re',
nandalta na sa li men sin' lon,
na ndal sa lin sin' lo men nde tob na yalnaban chan' na,
sa lya' re men lo xken men.
Jesús mxal' ngud lo Bartimeo
46 Zyasa mzin Jesús yez Jericó kon re xin' te'd Xa'.
Nde sen' lo mbro' xa' yez ya kon reta men jwan' ndanke xis xa',
neda ndob tib xa' ngwlef nyab gon ndole Bartimeo,
xin' Timeo.
47 Sen' lo mbin xa' le' Jesús,
Xa' yez Nazaret ndarid tya,
zyaga ne mbrez xa',
nchab xa':
—Jesús nde lo bin David,
blat lazo'a na.
48 Nde nar men ngok nayi' lo xa' sa nakwesta xa',
per zya mas ne mbrez xa':
—¡Jesús nde lo bin David,
blat lazo'a na!
49 Zya ngoto Jesús nde nchab Xa' lo men:
—Brez go' xa'.
Nde mbrez xa' men nayiza,
nchab xa':
—¡Blo nale lazo'a,
ptoli,
tak ngebez Xa' lu!
50 Le' men ngwle ya zyaga gotoli xa',
mblobi xa' lar nzob xis xa' nde nda xa' lo Jesús.
51 Jesús mnabdi's lo xa':
—¿Cho kwan nchola's la lin loa?
Le' men ngwle ya nchab:
—Maestr,
na ncholas xyal' ngud lon sa wi'n.
52 Jesús nchab lo xa':
—Bya,
mbyak la lu,
tak ndlipa lazo'a Dios.
Zyaga mxyal' ngud lo xa' nde mdonke xa' xis Jesús.