―Bönniꞌ lo unná bëꞌ,

Félix.

Niꞌa quiuꞌ liꞌ ruziꞌtuꞌ xibé le run tsahuiꞌ netuꞌ,

ateꞌ lu yöl-laꞌ réajniꞌi quiuꞌ rinná béꞌenuꞌ dxiꞌa bönachi uládz queë́tuꞌ.

3 Yúguꞌtë lë ni ruzíꞌticaꞌstuꞌ xibé gátiꞌtës,

ateꞌ idú ládxiꞌtuꞌ rëtuꞌ liꞌ:

“Xclenuꞌ.”

4 Naꞌa,

para cabí upízxjarötuꞌ liꞌ,

rátaꞌyuaꞌ loꞌ gun zxön ládxuꞌu,

yönnuꞌ tu le doꞌ guíëtuꞌ liꞌ.

5 Gúquibeꞌetuꞌ bönniꞌ ni rigúꞌu yö́l-lëꞌë bönachi,

en runëꞌ ga taꞌdáꞌbaguëꞌë yúlahuiꞌ yuguꞌ bönniꞌ judío nacuꞌë idútë yödzölió,

en náquiëꞌ bönniꞌ lo quégaquiëꞌ bönniꞌ dáꞌgaquiëꞌ bönniꞌ Nazaret naꞌ.

6 Lëscaꞌ gúꞌunnëꞌ gun dítjanëꞌ yudoꞌ queë́tuꞌ.

Que lë ni naꞌ guzxöntuꞌ-nëꞌ,

en gúꞌunituꞌ uchiꞌa usörötuꞌ lëꞌ ca naca xibá queë́tuꞌ.

7 Níꞌirö Lisias,

bönniꞌ lo rinná béꞌenëꞌ bönniꞌ röjáquiëꞌ gudil-la bidxinëꞌ ga zóatuꞌ,

en lu yöl-laꞌ síniaꞌ zxön bugǘëꞌ bönniꞌ ni lu naꞌtuꞌ.

8 Níꞌirö gunná béꞌenëꞌ Lisias naꞌ ídigaca nupa tuꞌzegui lëꞌ didzaꞌ loꞌ liꞌ.

Naꞌa,

liꞌ caz,

cateꞌ rinabi yúdxinuꞌ-nëꞌ Pablo ni,

huáca inö́zinuꞌ gate ga rëꞌ yúguꞌtë lë ni ruzéguituꞌ lëꞌ didzaꞌ.

9 Lëscaꞌ caní gulaꞌnnë́ꞌ yuguꞌ bönniꞌ judío niꞌ,

gulaꞌnnë́ꞌ naca caz caní.

10 Níꞌirö butásö nëꞌë bönniꞌ rinná bëꞌë uláz que Roma naꞌ para guꞌë didzaꞌ Pablo,

ateꞌ lëꞌ bubiꞌë didzaꞌ,

gunnë́ꞌ:

―Idú ládxaꞌa quíxjöꞌa ca naca le runaꞌ,

tuꞌ chinaca zián iz ruchiꞌa rusörö́uꞌ le raca quégaca bönachi ladztuꞌ.

11 Le benaꞌ huáca inabuꞌ.

Bitiꞌ réquini chinnu dza bidxinaꞌ Jerusalén para tseaj ládxaꞌa-nëꞌ Dios.

12 Bitiꞌ yöjxácaꞌgaquiëꞌ nedaꞌ nu ridíl-lalenaꞌ didzaꞌ,

en bitiꞌ benaꞌ ga uluꞌtsatsa bönachi ga naca chila yudoꞌ,

en cabí lu yuꞌu ga tuꞌdubëꞌ tuꞌsëdëꞌ queëꞌ Dios,

en cabí lu yödzö.

13 Bitiꞌ caꞌ gaca uluꞌbéaj liëꞌ yuguꞌ lë ni tuꞌzéguiëꞌ nedaꞌ didzaꞌ.

14 Lë ni rixóalëpaꞌ loꞌ.

Ca runaꞌ xichinëꞌ Dios quégaquiëꞌ xuz xtóꞌotuꞌ nalëbi ca le tuꞌsë́dinëꞌ légaquiëꞌ,

pero bönniꞌ judío ni tuꞌë le:

Le ridáꞌbagaꞌ Dios,

tuꞌ réajlëꞌa yúguꞌtë le rinná bëꞌ xibá queëꞌ Dios,

encaꞌ yúguꞌtë le buluꞌzúajëꞌ bönniꞌ guluꞌë didzaꞌ uláz queëꞌ Dios.

15 Ca naꞌ légaquiëꞌ tunëꞌ löza Dios,

lëscaꞌ nedaꞌ runaꞌ löza Dios,

usubanëꞌ nupa chinátigaca,

bönachi tsahuiꞌ,

en bönachi bitiꞌ nácagaca tsahuiꞌ.

16 Que lë ni naꞌ ruíꞌi ládxiꞌticaꞌsaꞌ cabí ibágaꞌa le gun ga uxö́s ládxiꞌdaꞌahuaꞌ nedaꞌ lahuëꞌ Dios o lógaca bönachi.

17 ’Gudödi zoaꞌ ga yúbölö idú chopa tsonna iz,

budxinaꞌ ga nacuáꞌ bönachi uládz quiaꞌ para unödzjaꞌ dumí le gácalen bönachi yechiꞌ,

en unödzjaꞌ le riguꞌa lahuëꞌ Dios.

18 Tsanni niꞌ runaꞌ caní,

bal-lëꞌ bönniꞌ judío narúajgaquiëꞌ luyú Asia bidixácaꞌgaquiëꞌ nedaꞌ.

Niꞌ zoaꞌ löꞌa yudoꞌ,

nubéaj dxiꞌa cuinaꞌ ca naca que yudoꞌ,

en cabí nutubaꞌ bönachi zián,

en cabí nunaꞌ ga uluꞌtsatsa bönachi.

19 Yuguꞌ bönniꞌ judío niꞌ ral-laꞌ ilaꞌdxinëꞌ loꞌ liꞌ,

en uluꞌzéguiëꞌ nedaꞌ didzaꞌ channö nápagaquiëꞌ nedaꞌ didzaꞌ.

20 Ilaꞌnnátsöquiëꞌ bönniꞌ judío ni channö buluꞌdzö́linëꞌ bi le cabí naca dxiꞌa benaꞌ cateꞌ niꞌ bidxinaꞌ lógaquiëꞌ bönniꞌ yudoꞌ tuꞌchiꞌa tuꞌsörö́ëꞌ légaquiëꞌ.

21 Tuz cateꞌ niꞌ zoaꞌ lógaquiëꞌ,

bëꞌa zidzaj didzaꞌ,

gunníaꞌ:

“Ruchiꞌa rusöröliꞌ nedaꞌ naꞌa tuꞌ runaꞌ löza uluꞌbán nupa chinátigaca.”

22 Cateꞌ biyönnëꞌ Félix didzaꞌ ni,

en dxíꞌadoꞌ chinö́zinëꞌ ca naca que lë naꞌ rusë́dinëꞌ Pablo,

buzë́ láhuiꞌsëꞌ caꞌ didzaꞌ bizxaj ni,

gunnë́ꞌ:

―Catiꞌ idxinëꞌ Lisias,

bönniꞌ lo rinná béꞌenëꞌ bönniꞌ röjáquiëꞌ gudil-la,

údxi yö́nidaꞌ ca naca didzaꞌ bizxaj queë́liꞌ.

23 Níꞌirö Félix gunná béꞌenëꞌ tu bönniꞌ nacuꞌë lu nëꞌë bönniꞌ röjáquiëꞌ gudil-la zoëꞌ niꞌ,

gun chiꞌë Pablo,

pero guꞌë lëꞌ lataj tëꞌ löꞌa,

en bitiꞌ uzáguëꞌë xinö́zgaquiëꞌ böchiꞌ luzë́ꞌë duyúgaquiëꞌ lëꞌ bi dxin ilunëꞌ queëꞌ.

24 Chopa tsonna dza gudzé,

bidëꞌ leyúbölö Félix naꞌ.

Drusila,

nigula queëꞌ dzáganu lëꞌ.

Nácanu nigula judío.

Félix bulidzëꞌ Pablo,

ateꞌ buzë́ náguiëꞌ xtídzëꞌë ca naca le réajlëꞌëruꞌ Jesucristo.

25 Cateꞌ bëꞌë didzaꞌ Pablo ca ral-laꞌ gácaruꞌ tsahuiꞌ,

en inná beꞌe cuinruꞌ,

ateꞌ idxinruꞌ ga uchiꞌa usörö́ëꞌ Dios rëꞌu dza siꞌ zaꞌ,

níꞌirö gudxi bidzö́binëꞌ Félix,

en gudxëꞌ Pablo:

―Guyéaj naꞌa.

Cateꞌ gapaꞌ lataj ulidzaꞌ liꞌ.

26 Lëscaꞌ gúꞌunnëꞌ Félix siꞌë dumí le unödzjëꞌ Pablo lëꞌ para usanëꞌ lëꞌ,

ateꞌ que lë ni naꞌ,

zián luzuí bulidzëꞌ Pablo,

en bë́ꞌlenëꞌ lëꞌ didzaꞌ.

27 Cateꞌ bizáꞌa chopa iz guyáziëꞌ Porcio Festo xilatjëꞌ Félix,

ateꞌ tuꞌ gúꞌunnëꞌ Félix gunëꞌ le tsaza ládxiꞌgaquiëꞌ bönniꞌ judío,

bucáꞌanëꞌ Pablo nadzunëꞌ lidxi guíë.