23
Níꞌirö buyúdëꞌë Pablo lógaquiëꞌ bönniꞌ yudoꞌ tuꞌchiꞌa tuꞌsörö́ëꞌ naꞌ,
en gunnë́ꞌ:
―Libíꞌiliꞌ,
bö́chaꞌa.
Ga ridxintë naꞌa ribözaꞌ dxíꞌadoꞌ.
Caní naca,
bitiꞌ zoa le ruxösa ládxiꞌdaꞌahuaꞌ nedaꞌ lahuëꞌ Dios.
2 Níꞌirö Ananías,
bixúz lo,
gunná béꞌenëꞌ nupa nacuáꞌ cuita lëꞌë Pablo ilaꞌgápëꞌë ruꞌë.
3 Pablo gudxëꞌ lëꞌ:
―Lëzcaꞌ caní Dios ubiꞌë quiuꞌ,
liꞌ,
ruluíꞌisö tsahuiꞌ cuinuꞌ.
¿Naruꞌ röꞌö cazuꞌ ruchiꞌa rusörö́uꞌ nedaꞌ ca rinná bëꞌ xibá,
pero ridödi bëꞌtsoꞌ ca rinná bëꞌ xibá naꞌ,
naꞌ rinná béꞌenuꞌ ilaꞌgápëꞌë nedaꞌ?
4 Nupa nacuáꞌ niꞌ të Pablo:
―¿Naruꞌ rulidza ziꞌtsoꞌ-nëꞌ bixúz lo queëꞌ Dios?
5 Pablo gudxëꞌ légaquiëꞌ:
―Libíꞌiliꞌ,
bö́chaꞌa.
Nazúaj lu guichi,
rnna:
“Bitiꞌ ulidza ziꞌu nu rinná beꞌe bönachi uládz quiuꞌ”,
pero nedaꞌ bitiꞌ gúquibeꞌedaꞌ náquiëꞌ bixúz lo.
6 Níꞌirö gúquibeꞌenëꞌ Pablo bal-lëꞌ nácagaquiëꞌ bönniꞌ yudoꞌ saduceo,
ateꞌ iaꞌbal-lëꞌ bönniꞌ yudoꞌ fariseo.
Níꞌirö bëꞌë zidzaj didzaꞌ lógaquiëꞌ bönniꞌ yudoꞌ tuꞌchiꞌa tuꞌsörö́ëꞌ naꞌ,
gunnë́ꞌ:
―¡Libíꞌiliꞌ,
bö́chaꞌa!
¡Nacaꞌ bönniꞌ fariseo,
en nacaꞌ zxíꞌinëꞌ tu bönniꞌ fariseo!
¡Naꞌa ruchiꞌa rusöröliꞌ nedaꞌ tuꞌ runaꞌ löza uluꞌbán nupa chinátigaca!
7 Cateꞌ bëꞌë Pablo didzaꞌ ni,
bilaꞌrúajëꞌ choplö yuguꞌ bönniꞌ yudoꞌ fariseo,
en yuguꞌ bönniꞌ yudoꞌ saduceo,
ateꞌ gulaꞌdil-la dídzëꞌë laꞌ légacasëꞌ.
8 Caní gulunëꞌ tuꞌ taꞌnnë́ꞌ bönniꞌ saduceo naꞌ bitiꞌ uluꞌbán nupa chinátigaca,
en bitiꞌ nacuꞌë gubáz láꞌayi,
en bitiꞌ nacuáꞌ böꞌ nácagaca caz bönachi,
pero taꞌyéajlëꞌë bönniꞌ yudoꞌ fariseo nácagaca yúguꞌtë lë ni.
9 Que lë ni naꞌ gulaꞌbö́dxiꞌë.
Níꞌirö gulaꞌyasëꞌ bönniꞌ nazë́dagaquiëꞌ xibá queëꞌ Dios,
yuguꞌ bönniꞌ yudoꞌ fariseo,
en gulaꞌdil-la dídzëꞌë,
taꞌnnë́ꞌ:
―Rusácaꞌtuꞌ queë́tuꞌ bitiꞌ bi döꞌ nuꞌë bönniꞌ ni.
Channö tu böꞌ naca caz bönachi bë́ꞌlen lëꞌ didzaꞌ,
o channö tu gubáz láꞌayi queëꞌ Dios bë́ꞌlenëꞌ lëꞌ didzaꞌ,
bitiꞌ ral-laꞌ táꞌbagaꞌruꞌ-nëꞌ Dios.
10 Cateꞌ chitaꞌdíl-ladaꞌ dídzëꞌë bönniꞌ judío naꞌ,
gúdxinëꞌ bönniꞌ lo naꞌ rinná béꞌenëꞌ bönniꞌ röjáquiëꞌ gudil-la,
tuꞌ réquinëꞌ uluꞌzxuzxaj uluꞌquínnajëꞌ Pablo.
Níꞌirö gunná béꞌenëꞌ bönniꞌ röjáquiëꞌ gudil-la tsöjléajgaquiëꞌ Pablo ladaj bönniꞌ judío naꞌ,
en uluꞌchë́ꞌë lëꞌ lu yuꞌu zxön ga naꞌ nagáꞌanagaquiëꞌ bönniꞌ naꞌ röjáquiëꞌ gudil-la.
11 Cateꞌ chinaca chiꞌi dzö́ꞌölö laꞌ dza náꞌasö,
buluíꞌi lahuëꞌ Xanruꞌ ga zoëꞌ Pablo,
en gudxëꞌ lëꞌ:
―Butipa ládxuꞌu,
Pablo.
Ca naꞌ chibenuꞌ ba nalí quiaꞌ Jerusalén ni,
lëscaꞌ run bayudxi gunuꞌ ba nalí quiaꞌ lu yödzö Roma.
Tun xtídzaꞌgaquiëꞌ ilútiëꞌ Pablo
12 Cateꞌ zaꞌ reníꞌ iaꞌtú dza,
gulún xtídzaꞌgaquiëꞌ bal-lëꞌ bönniꞌ judío,
en gulún tsutsu xtídzaꞌgaquiëꞌ,
taꞌnnë́ꞌ gunëꞌ Dios légaquiëꞌ xíguiaꞌ channö cabí ilunëꞌ lë naꞌ gulún xtídzaꞌgaquiëꞌ,
gulaꞌnnë́ꞌ bitiꞌ caꞌ ilëꞌaj ilahuëꞌ ga idxinrö chigulútiëꞌ Pablo.
13 Nayanrö ca choáꞌgaquiëꞌ bönniꞌ naꞌ gulún tsutsu xtídzaꞌgaquiëꞌ caní.
14 Yöjáquiëꞌ bönniꞌ ni ga nacuꞌë yuguꞌ bixúz unná bëꞌ,
en bönniꞌ gula tuꞌzéajniꞌinëꞌ bönachi judío,
ateꞌ gulaꞌnnë́ꞌ:
―Chiben tsutsu xtídzaꞌtuꞌ,
gunnatuꞌ gunëꞌ Dios netuꞌ xíguiaꞌ channö cabí guntuꞌ caní.
Bitiꞌ guíꞌaj gágutuꞌ ga gútirötuꞌ-nëꞌ Pablo.
15 Naꞌa,
libíꞌiliꞌ,
en bönniꞌ yudoꞌ tuꞌchiꞌa tuꞌsörö́ëꞌ,
guliꞌguíëꞌ bönniꞌ lo rinná béꞌenëꞌ bönniꞌ röjáquiëꞌ gudil-la idichë́ꞌë Pablo cuxö́ para idxinëꞌ ga nudúbiliꞌ,
innaliꞌ rë́ꞌëniliꞌ inábiliꞌ-nëꞌ Pablo tu didzaꞌ gate ga rëꞌ.
Netuꞌ cöꞌö nistuꞌ-nëꞌ laꞌ nöza,
ateꞌ gútituꞌ-nëꞌ zíꞌalö ca idxinëꞌ ni.
16 Biyö́nibiꞌ biꞌi bönniꞌ queë́nu nigula zanëꞌ Pablo ca naꞌ ilaꞌbö́ꞌ nísiëꞌ Pablo,
ateꞌ guyéajbiꞌ,
en guyúꞌubiꞌ yuꞌu zxön naꞌ,
ateꞌ yöjtíxjöiꞌibiꞌ-nëꞌ Pablo.
17 Pablo bulidzëꞌ tuëꞌ bönniꞌ nacuꞌë lu nëꞌë bönniꞌ röjáquiëꞌ gudil-la en gudxëꞌ lëꞌ:
―Guchë́ꞌë-biꞌ biꞌi ni lahuëꞌ bönniꞌ lo,
tuꞌ nuáꞌabiꞌ didzaꞌ guië́biꞌ-nëꞌ.
18 Níꞌirö bönniꞌ naꞌ gudélëꞌë-biꞌ,
en guchë́ꞌë-biꞌ ga naꞌ zoëꞌ bönniꞌ lo naꞌ,
ateꞌ gudxëꞌ lëꞌ:
―Bulídzëꞌ Pablo,
bönniꞌ naꞌ yuꞌë lidxi guíë,
nedaꞌ,
en gútaꞌyuëꞌ lahuaꞌ idiguꞌa-biꞌ biꞌi ni loꞌ,
tuꞌ rë́ꞌënibiꞌ güíꞌilenbiꞌ liꞌ didzaꞌ.
19 Bönniꞌ lo naꞌ gudélëꞌë náꞌabiꞌ,
en guchë́ꞌë-biꞌ quez,
ateꞌ gunábinëꞌ-biꞌ,
rnnëꞌ:
―¿Bizxi naꞌ ral-laꞌ guíoꞌ nedaꞌ?
20 Lëbiꞌ gúdxibiꞌ-nëꞌ:
―Chinúngaquiëꞌ didzaꞌ bönniꞌ judío ilátaꞌyuëꞌ loꞌ ichëꞌu-nëꞌ Pablo cuxö́,
para idxinëꞌ lógaquiëꞌ bönniꞌ yudoꞌ tuꞌchiꞌa tuꞌsörö́ëꞌ.
Ilë́ꞌ liꞌ të́ꞌënnëꞌ ilaꞌnábinëꞌ lëꞌ tu didzaꞌ gate ga rëꞌ,
21 pero bitiꞌ tséajlëꞌu le ilaꞌnnë́ꞌ tuꞌ nadödi choáꞌgaquiëꞌ ilaꞌbö́ꞌ nísiëꞌ Pablo.
Chigulún tsutsu xtídzëꞌë gulaꞌnnë́ꞌ gunëꞌ Dios légaquiëꞌ xíguiaꞌ channö cabí ilútiëꞌ lëꞌ.
Bitiꞌ bi ilëꞌaj ilahuëꞌ ga idxinrö ilútiëꞌ lëꞌ.
Chizóagaquiëꞌ taꞌbözëꞌ siꞌ lu noꞌo gunuꞌ le ilaꞌnábinëꞌ liꞌ.
22 Níꞌirö bönniꞌ lo naꞌ rinná béꞌenëꞌ bönniꞌ röjáquiëꞌ gudil-la gunná béꞌenëꞌ-biꞌ cuntu nu guië́biꞌ lë naꞌ chigúdxibiꞌ lëꞌ,
ateꞌ níꞌirö busö́l-lëꞌë-biꞌ biꞌi ni.
Ridxinëꞌ Pablo lahuëꞌ Félix, bönniꞌ rinná bëꞌë luyú naꞌ
23 Níꞌirö bönniꞌ lo naꞌ bulidzëꞌ chopëꞌ bönniꞌ nacuꞌë tu gáyuꞌë bönniꞌ röjáquiëꞌ gudil-la lu náꞌagaquiëꞌ tu tuëꞌ,
ateꞌ gunná béꞌenëꞌ légaquiëꞌ uluꞌcözëꞌ chopa gáyuꞌë bönniꞌ röjáquiëꞌ gudil-la taꞌzëꞌe níꞌagaquiëꞌ,
en tsónnalalaj yuꞌ chiëꞌ bönniꞌ röjáquiëꞌ gudil-la dxíagaquiëꞌ böaꞌ,
en chopa gáyuꞌë bönniꞌ röjáquiëꞌ gudil-la iluꞌë yaga tuchiꞌ para tsöjáquiëꞌ yödzö Cesarea idú ridödi xtsöꞌ.
24 Lëscaꞌ gunná béꞌenëꞌ légaquiëꞌ uluꞌcözëꞌ-baꞌ tu böaꞌ cuíëꞌ-baꞌ Pablo,
ateꞌ ilaꞌchë́ꞌë lëꞌ dxíꞌadoꞌ,
cabí bi gaca queëꞌ,
para idxinëꞌ lahuëꞌ Félix,
bönniꞌ lo rinná bëꞌë uláz que Roma.
25 Gusö́l-lëꞌë caꞌ tu guichi le rnna caní:
26 “Nedaꞌ,
Claudio Lisias,
ruzúajaꞌ quiuꞌ lu guichi,
bönniꞌ lo unná bëꞌ,
Félix.
Rugapaꞌ Dios liꞌ.
27 ’Bönniꞌ ni risö́l-laꞌa-nëꞌ quiuꞌ,
gulaꞌzönëꞌ bönniꞌ judío lëꞌ,
en gulë́ꞌënnëꞌ ilútiëꞌ lëꞌ.
Cateꞌ gúquibeꞌedaꞌ nababëꞌ Roma,
guchë́ꞌgacaꞌ-nëꞌ bönniꞌ röjáquiëꞌ gudil-la,
en busöláꞌ-nëꞌ lu náꞌagaquiëꞌ judío naꞌ.
28 Gúꞌunidaꞌ inözdaꞌ bizxi benëꞌ,
lë naꞌ tuꞌzéguiëꞌ lëꞌ didzaꞌ bönniꞌ judío,
ateꞌ guchëꞌa-nëꞌ lógaquiëꞌ bönniꞌ yudoꞌ tuꞌchiꞌa tuꞌsörö́ëꞌ légaquiëꞌ.
29 Cateꞌ buédxi didzaꞌ,
gunözdaꞌ tuꞌzéguiëꞌ lëꞌ didzaꞌ ca naca le rinná bëꞌ xibá quégaquiëꞌ,
en bitiꞌ bi nabáguëꞌë bönniꞌ ni para nu guti lëꞌ,
o nu cuꞌu lëꞌ lidxi guíë.
30 Níꞌirö cateꞌ bidxín nu gudíxjöiꞌi nedaꞌ taꞌbö́ꞌ nísiëꞌ yuguꞌ bönniꞌ judío lëꞌ,
laꞌ gusö́l-laꞌteaꞌ lëꞌ ga zuꞌ,
ateꞌ gunná béꞌegacadaꞌ-nëꞌ bönniꞌ ni tuꞌzéguiëꞌ lëꞌ didzaꞌ ilaꞌdxinëꞌ loꞌ liꞌ,
para ilaꞌguíxjöiꞌinëꞌ liꞌ bi didzaꞌ nápagaquiëꞌ lëꞌ.
¡Dios gun tsáhuëꞌë liꞌ!”
31 Níꞌirö bönniꞌ naꞌ röjáquiëꞌ gudil-la gulaꞌguélëꞌë Pablo,
en gulunëꞌ ca naꞌ chigunná béꞌenëꞌ légaquiëꞌ,
ateꞌ gulaꞌchë́ꞌë lëꞌ yödzö Antípatris,
niꞌ naca chiꞌi dzö́ꞌölö.
32 Cateꞌ zaꞌ reníꞌ iaꞌtú dza bönniꞌ röjáquiëꞌ gudil-la taꞌzëꞌe níꞌagaquiëꞌ yöjhuö́jgaquiëꞌ Jerusalén,
ateꞌ bönniꞌ röjáquiëꞌ gudil-la dxíagaquiëꞌ böaꞌ buluꞌúꞌë nöza,
dzágagaquiëꞌ Pablo.
33 Cateꞌ bönniꞌ naꞌ röjáquiëꞌ gudil-la nachë́ꞌgaquiëꞌ Pablo bilaꞌdxinëꞌ Cesarea,
buluꞌnödzjëꞌ guichi naꞌ lu nëꞌë bönniꞌ rinná bëꞌë uláz que Roma,
en buluꞌsudxinëꞌ Pablo lahuëꞌ.
34 Gudödi bulabëꞌ bönniꞌ unná bëꞌ guichi naꞌ,
gunábinëꞌ Pablo gazxi bönniꞌ lëꞌ.
Cateꞌ gúquibeꞌenëꞌ nababëꞌ luyú Cilicia,
35 gudxëꞌ lëꞌ:
―Yö́nidaꞌ le innóꞌ cateꞌ ilaꞌdxín ni nupa tuꞌzegui liꞌ didzaꞌ.
Níꞌirö gunná béꞌenëꞌ ilún chiꞌë lëꞌ lu yuꞌu yúlahuiꞌ ga riböꞌë Herodes,
bönniꞌ rinná bëꞌë,
para uchiꞌa usörö́ëꞌ bönachi.