22
Caní gunnë́ꞌ Pablo:
―Libiꞌiliꞌ,
bönniꞌ gula,
en libíꞌiliꞌ bö́chaꞌa.
Buliꞌzë́ nágaliꞌ le guíaꞌ libíꞌiliꞌ ca naca le runaꞌ.
2 Cateꞌ bilaꞌyönnëꞌ ruꞌë didzaꞌ hebreo,
gulaꞌcuáꞌarëꞌ dxisö.
Pablo gudxëꞌ légaquiëꞌ,
rnnëꞌ:
3 ―Naca cazaꞌ nedaꞌ bönniꞌ judío.
Guljaꞌ lu yödzö Tarso luyú Cilicia,
pero guzxönaꞌ lu yödzö ni,
ateꞌ busédinëꞌ Gamaliel nedaꞌ idú ca naca xibá quégaquiëꞌ xuz xtóꞌoruꞌ.
Bë́ꞌticaꞌsö ládxaꞌa guyéaj ládxaꞌa Dios ca runliꞌ libíꞌiliꞌ naꞌa.
4 Zíꞌalö gudxía ládxiꞌgacaꞌ-nëꞌ bönniꞌ nazíꞌ lu náꞌagaquiëꞌ xtídzëꞌë Cristo,
en guchë́ꞌgacaꞌ-nëꞌ ga ilátiëꞌ.
Guzxö́ngacaꞌ-nëꞌ,
en gulúꞌugacaꞌ-nëꞌ lidxi guíë,
yuguꞌ bönniꞌ,
en nigula.
5 Lëscaꞌ huáca ilunëꞌ ba nalí yuguꞌ bixúz unná bëꞌ,
en yuguꞌ bönniꞌ gula tuꞌzéajniꞌinëꞌ que le gulunëꞌ.
Gulunëꞌ guichi unná bëꞌ le yöjuꞌa ga nacuꞌë bö́chiꞌruꞌ judío lu yödzö Damasco.
Guyijaꞌ niꞌ para tsöjxö́ngacaꞌ nupa niꞌ taꞌyéajlëꞌ Cristo,
para idichë́ꞌgacaꞌ-nëꞌ nágaꞌgaquiëꞌ Jerusalén ni,
para ilácagaquiëꞌ xíguiaꞌ.
Riguíxjöꞌë Pablo ca böáquiëꞌ queëꞌ Cristo
6 Níꞌirö gunnë́ꞌ Pablo:
―Cateꞌ niꞌ saꞌyéajaꞌ laꞌ nöza,
en siꞌ idxinaꞌ Damasco,
cateꞌ guca idú huagubidza,
tsálidoꞌos guyëpi yösa beníꞌ le zaꞌ lúzxiba,
le buzeníꞌ ga naꞌ saꞌyéajaꞌ.
7 Laꞌ yöjö́taꞌteaꞌ lu yu,
en biyöndaꞌ chiꞌi Nu gudxi nedaꞌ:
“Saulo,
Saulo,
¿bizx que ribía ládxuꞌu nedaꞌ?”
8 Níꞌirö gunábidaꞌ lëꞌ,
gunníaꞌ:
“¿Nuzxi liꞌ,
Xan?”
Lëꞌ gudxëꞌ nedaꞌ:
“Nedaꞌ ni Jesús,
bönniꞌ Nazaret.
Nedaꞌ caz ribía ládxuꞌu.”
9 Nupa niꞌ gulaꞌcuáꞌlen nedaꞌ bilaꞌléꞌe caz beníꞌ naꞌ,
en guladxi,
pero bitiꞌ bilaꞌyöni chiꞌi Nu naꞌ bulidza nedaꞌ.
10 Níꞌirö gudxaꞌ-nëꞌ:
“¿Nacxi gunaꞌ,
Xan?”
Xanruꞌ gudxëꞌ nedaꞌ:
“Guyasa,
en guyéaj Damasco.
Zoëꞌ niꞌ tu bönniꞌ guíëꞌ liꞌ ca naca yúguꞌtë le ral-laꞌ gunuꞌ.”
11 Tuꞌ cabirö riléꞌedaꞌ tuꞌ budíꞌi yösa beníꞌ naꞌ guyë́pidaꞌ lahuaꞌ,
que lë ni naꞌ yuguꞌ bönniꞌ dzágagaquiëꞌ nedaꞌ gulaꞌguélëꞌë naꞌa,
ateꞌ gulaꞌchë́ꞌë nedaꞌ ga bidxínteaꞌ Damasco.
12 ’Zoëꞌ Ananías niꞌ,
tu bönniꞌ runëꞌ idútë ca rinná bëꞌ xibá queëꞌ Dios,
ateꞌ yuguꞌ bönniꞌ judío nacuꞌë Damasco tunëꞌ lëꞌ bal.
13 Bidxinëꞌ Ananías naꞌ ga zoaꞌ,
en gudxëꞌ nedaꞌ:
“Saulo,
bö́chaꞌa,
huöálaj guiö́j loꞌ.”
Laꞌ níꞌisö böálaj guiö́j lahuaꞌ,
ateꞌ biléꞌedaꞌ lëꞌ.
14 Lëꞌ gudxëꞌ nedaꞌ:
“Dios quégaquiëꞌ xuz xtóꞌoruꞌ,
dza niꞌte gurö́ cazëꞌ liꞌ para inö́zinuꞌ le rë́ꞌëni quézinëꞌ Lëꞌ,
en iléꞌenuꞌ-nëꞌ Bönniꞌ Tsahuiꞌ,
Lë cazëꞌ Zxíꞌinëꞌ,
en yönnuꞌ le guíëꞌ Lë cazëꞌ liꞌ.
15 Caní gaca,
tuꞌ ral-laꞌ gunuꞌ ba nalí queëꞌ Lëꞌ lógaca yúguꞌtë bönachi,
usiyönnuꞌ légaquiëꞌ ca naca le chibiléꞌenuꞌ,
en le chibiyö́ninuꞌ.
16 Naꞌa,
¿bizx que ridzenuꞌ?
¡Guyasa,
en bidila nisa!
Bulidzëꞌ Xanruꞌ para únëꞌ liꞌ dxiꞌa,
en ugǘëꞌ dul-laꞌ nabáguꞌu.”
Cristo gusö́l-lëꞌë Pablo para gunëꞌ libán lógaca bönachi izáꞌa
17 Gunnë́ꞌ caꞌ Pablo:
―Gudö́di niꞌ,
cateꞌ budxinaꞌ Jerusalén,
en tsanni niꞌ rulidzaꞌ-nëꞌ Dios lu chila yudoꞌ,
biléꞌedaꞌ tu le naca ca tu lu yëla bë́chigal.
18 Biléꞌedaꞌ-nëꞌ Xanruꞌ,
ateꞌ gudxëꞌ nedaꞌ:
“¡Guyéaj carelö!
¡Burúajtë Jerusalén ni,
tuꞌ cabí ilunëꞌ bal bönniꞌ ni le gunuꞌ ba nalí quiaꞌ!”
19 Nedaꞌ gudxaꞌ-nëꞌ:
“Xan,
nö́zgaca quézinëꞌ ca benaꞌ nedaꞌ.
Guyáziaꞌ gapa naca lu yuꞌu ga tuꞌdubëꞌ tuꞌsëdëꞌ bönniꞌ judío queëꞌ Dios.
Gudinaꞌ nupa niꞌ taꞌyéajlëꞌ Liꞌ,
en gulúꞌugacaꞌ-nëꞌ lidxi guíë.
20 Cateꞌ niꞌ gulútiëꞌ Esteban,
bönniꞌ niꞌ benëꞌ ba nalí quiuꞌ,
lëscaꞌ zoaꞌ nedaꞌ niꞌ,
en benaꞌ tuz yuguꞌ bönniꞌ gulútiëꞌ lëꞌ tuꞌ ben chiꞌa lariꞌ nácugaquiëꞌ bönniꞌ naꞌ buluꞌladxëꞌ lëꞌ guiö́j.”
21 Níꞌirö Xanruꞌ gudxëꞌ nedaꞌ:
“Guyéaj,
tuꞌ risö́l-laꞌa liꞌ lógaca bönachi izáꞌa.”
Pablo ruíꞌilenëꞌ bönniꞌ lo didzaꞌ, bönniꞌ rinná béꞌenëꞌ bönniꞌ röjáquiëꞌ gudil-la
22 Nisö ze lo yuguꞌ bönniꞌ judío buluꞌzë́ nágagaquiëꞌ didzaꞌ bëꞌë Pablo,
ateꞌ níꞌirö gulaꞌbö́dxiꞌë.
Guluꞌë zidzaj didzaꞌ,
taꞌnnë́ꞌ:
―¡Guliꞌgútiëꞌ bönniꞌ ni!
¡Bítiꞌrö ral-laꞌ soëꞌ ibanëꞌ!
23 Níꞌirö tuꞌ taꞌbö́dxiꞌë,
en taꞌchözëꞌ le nácugaquiëꞌ lu yöl-laꞌ rilé quégaquiëꞌ,
en tuꞌchejëꞌ bëchtö yu lu böꞌös,
24 bönniꞌ lo naꞌ rinná béꞌenëꞌ bönniꞌ röjáquiëꞌ gudil-la gunná bëꞌë uluꞌguꞌë Pablo lu yuꞌu zxön naꞌ.
Lëscaꞌ gunná béꞌenëꞌ légaquiëꞌ ilaꞌguinëꞌ Pablo para quíxjöꞌë le nácatë,
para ilaꞌnö́zinëꞌ bizx que naꞌ taꞌbö́dxiꞌë bönniꞌ judío caní queëꞌ Pablo.
25 Cateꞌ gulúguiꞌë lëꞌ du guídi para ilaꞌguinëꞌ lëꞌ,
Pablo gudxëꞌ tu bönniꞌ nacuꞌë lu nëꞌë bönniꞌ röjáquiëꞌ gudil-la zoëꞌ niꞌ,
rnnëꞌ:
―¿Naruꞌ dë lataj quíniliꞌ nedaꞌ?
Nababaꞌ Roma,
ateꞌ cuntu nu buchiꞌa busörö́ nedaꞌ channö nabágaꞌa xíguiaꞌ.
26 Cateꞌ bönniꞌ naꞌ biyönnëꞌ lë ni,
guyijëꞌ yöjtíxjöiꞌinëꞌ bönniꞌ lo naꞌ rinná béꞌenëꞌ bönniꞌ röjáquiëꞌ gudil-la.
Rëꞌ lëꞌ:
―¿Bizxi caz ni runruꞌ?
¡Bönniꞌ ni nababëꞌ Roma!
27 Níꞌirö bidëꞌ bönniꞌ lo naꞌ ga zoëꞌ Pablo,
en gudxëꞌ lëꞌ:
―¡Gudixjöꞌ!
¿Naruꞌ nababuꞌ liꞌ Roma?
Pablo gudxëꞌ lëꞌ:
―Ön,
nababaꞌ.
28 Bubiꞌë didzaꞌ bönniꞌ lo naꞌ,
gunnë́ꞌ:
―Nedaꞌ ni,
dumí zián gudizxjaꞌ para ibabaꞌ Roma.
Níꞌirö Pablo gudxëꞌ lëꞌ:
―Nedaꞌ gubabaꞌ Roma cateꞌ niꞌ guljaꞌ tuꞌ nabábagaquiëꞌ xuz xináꞌa Roma.
29 Cateꞌ bönniꞌ naꞌ chizóa ilaꞌguinëꞌ lëꞌ bilaꞌyönnëꞌ lë ni,
laꞌ buluꞌbígaꞌtëꞌ ga zoëꞌ Pablo.
Lëscaꞌ gúdxinëꞌ bönniꞌ lo naꞌ cateꞌ gunö́zinëꞌ nababëꞌ Pablo Roma,
tuꞌ chigunná bëꞌë ilúguiëꞌ lëꞌ.
Ridxinëꞌ Pablo lógaquiëꞌ bönniꞌ yudoꞌ tuꞌchiꞌa tuꞌsörö́ëꞌ
30 Dza buropi niꞌ,
gúꞌunnëꞌ bönniꞌ lo naꞌ inö́zinëꞌ gazxi ga rëꞌ bizxi naꞌ yuguꞌ bönniꞌ judío tuꞌzéguiëꞌ Pablo didzaꞌ.
Gunná bëꞌë buluꞌsedxëꞌ du guíë naꞌ náguëꞌë Pablo,
ateꞌ gunná bëꞌë uluꞌdubëꞌ bixúz unná bëꞌ judío,
en yúguꞌtë bönniꞌ yudoꞌ tuꞌchiꞌa tuꞌsörö́ëꞌ.
Níꞌirö bubéajëꞌ Pablo ga naꞌ nagúꞌugaquiëꞌ lëꞌ,
ateꞌ buzóëꞌ lëꞌ lógaquiëꞌ.