Saꞌyéajëꞌ Pablo Jerusalén
21
Gudödi buláꞌalentuꞌ légaquiëꞌ,
guyúꞌutë nöza barco naꞌ,
ateꞌ lirá guyéajtuꞌ ga zoa luyú bidxi nazíꞌi le Cos.
Dza buropi naꞌ,
gudö́dituꞌ iaꞌtú lataj nazíꞌi le Rodas,
ateꞌ buzáꞌatuꞌ niꞌ,
en bidxintuꞌ yödzö Pátara.
2 Yöjxácaꞌtuꞌ tu barco yúbölö niꞌ le zeaj luyú Fenicia.
Gurentuꞌ lëꞌe barco naꞌ,
ateꞌ guyúꞌutë nöza.
3 Gudö́dituꞌ ga naláꞌ Chipre,
le gutaꞌ tsöláꞌa yö́göla,
ateꞌ guyéajtuꞌ luyú Siria,
ga niꞌ guyaza barco naꞌ lu yödzö Tiro,
tuꞌ ral-laꞌ tsöjcáꞌana yuaꞌ niꞌ le dzöꞌö lëꞌe barco naꞌ.
4 Lu yödzö Tiro naꞌ yöjxácaꞌtuꞌ tu bönniꞌ réajlëꞌë Cristo,
ateꞌ bugáꞌanalentuꞌ lëꞌ,
en yuguꞌ bö́chiꞌruꞌ niꞌ idú gadxi dza.
Tuꞌ chibuluíꞌinëꞌ Dios Böꞌ Láꞌayi légaquiëꞌ le ral-laꞌ gaca queëꞌ Pablo,
gulë́ꞌ lëꞌ bitiꞌ tsejëꞌ Jerusalén.
5 Cateꞌ chibizáꞌa dza naꞌ,
burúajtuꞌ niꞌ,
ateꞌ gulaꞌzáꞌlenëꞌ netuꞌ tsözxö́n yúguꞌtëꞌ len nigula que queë́gaquiëꞌ,
en yuguꞌ biꞌi quégaquiëꞌ,
ga bidxíntëtuꞌ níꞌilö raꞌ yödzö naꞌ.
Raꞌ nísadoꞌ niꞌ buzóa zxíbituꞌ,
en bulidztuꞌ-nëꞌ Dios.
6 Budxi bunidaꞌ luzáꞌatuꞌ tutuꞌ iaꞌtutuꞌ,
bubentuꞌ lëꞌe barco,
ateꞌ légaquiëꞌ yöjhuö́jgaquiëꞌ lídxigaquiëꞌ.
7 Buzáꞌatë barco naꞌ lu yödzö Tiro,
ateꞌ ga yöjsé bidxín lu yödzö Tolemaida.
Burúajtuꞌ lëꞌe barco naꞌ niꞌ.
Bugápatuꞌ Dios bö́chiꞌruꞌ nacuꞌë niꞌ,
ateꞌ bugáꞌanalentuꞌ légaquiëꞌ tu dza.
8 Cateꞌ zaꞌ reníꞌ iaꞌtú dza,
burúajëꞌ Pablo niꞌ,
ateꞌ dzágatuꞌ-nëꞌ netuꞌ guyéajtuꞌ yödzö Cesarea.
Niꞌ guyúꞌutuꞌ lu yuꞌu lidxëꞌ Felipe,
ateꞌ bugáꞌanalentuꞌ lëꞌ.
Runëꞌ Felipe naꞌ libán que didzaꞌ dxiꞌa.
Bítsëꞌë gadxëꞌ bönniꞌ niꞌ buluꞌcuꞌë dza niꞌte para ilácalenëꞌ bönachi queëꞌ Cristo.
9 Nacuáꞌabiꞌ tapa biꞌi nigula raꞌbán queëꞌ Felipe naꞌ,
tuíꞌibiꞌ didzaꞌ uláz queëꞌ Dios.
10 Gudödi gudzetuꞌ chopa tsonna dza niꞌ,
níꞌirö bidxinëꞌ Agabo niꞌ,
bönniꞌ ruꞌë didzaꞌ uláz queëꞌ Dios,
narúajëꞌ luyú Judea.
11 Bönniꞌ ni buduyúëꞌ netuꞌ,
ateꞌ gudélëꞌë pan le néquini guídi queëꞌ Pablo.
Béguëꞌë niꞌa naꞌ cuinëꞌ,
en gunnë́ꞌ:
―Caní rnnëꞌ Dios Böꞌ Láꞌayi:
“Caní ilunëꞌ bönniꞌ judío nacuꞌë Jerusalén.
Ilúguiëꞌ bönniꞌ ni nequi queëꞌ pan guídi ni,
ateꞌ uluꞌdödëꞌ lëꞌ lu náꞌagaca bönachi izáꞌa.”
12 Cateꞌ biyö́nituꞌ didzaꞌ ni,
gútaꞌyutuꞌ lahuëꞌ Pablo,
netuꞌ,
en nupa nacuáꞌ niꞌ,
para cabí tsejëꞌ Jerusalén.
13 Bubiꞌë didzaꞌ Pablo,
gunnë́ꞌ:
―¿Bizxi ni runliꞌ,
ribö́dxiliꞌ,
en rusuhuíꞌiniliꞌ nedaꞌ?
Nedaꞌ chizóa cazaꞌ sinaꞌ,
calë́gasö ilúguiëꞌ nedaꞌ,
pero gátiaꞌ caꞌ lu yödzö Jerusalén niꞌa queëꞌ Xanruꞌ Jesús.
14 Tuꞌ cabí guzxéquiꞌtuꞌ-nëꞌ didzaꞌ,
bítiꞌrö bi gúdxituꞌ-nëꞌ,
ateꞌ gunnatuꞌ:
―Gaca ca raza ládxëꞌë Xanruꞌ.
15 Cateꞌ chigulaꞌdödi dza naꞌ,
bupaꞌatuꞌ queë́tuꞌ,
ateꞌ guyéajtuꞌ Jerusalén.
16 Gulaꞌzáꞌlenëꞌ netuꞌ bal-lëꞌ bönniꞌ taꞌyéajlëꞌë Cristo,
nacuꞌë Cesarea,
ateꞌ dzáguiëꞌ Mnasón,
tu bönniꞌ Chipre,
légaquiëꞌ.
Réajlëꞌë Cristo dza niꞌte,
ateꞌ ral-laꞌ tsöjgáꞌanatuꞌ lidxëꞌ bönniꞌ ni.
Pablo röjyúëꞌ Jacobo
17 Cateꞌ bidxintuꞌ Jerusalén,
len yöl-laꞌ rudzeja quégaquiëꞌ bö́chiꞌruꞌ niꞌ taꞌyéajlëꞌë Cristo gulunëꞌ netuꞌ bal.
18 Dza buropi naꞌ Pablo guyázalenëꞌ netuꞌ lu yuꞌu,
yöjyutuꞌ-nëꞌ Jacobo,
ateꞌ nudúbigaquiëꞌ niꞌ yúguꞌtë bönniꞌ gula tapa chiꞌë bönachi queëꞌ Cristo nacuꞌë Jerusalén.
19 Cateꞌ Pablo chibugapëꞌ légaquiëꞌ Dios,
busiyönnëꞌ légaquiëꞌ yúguꞌtë le benëꞌ Dios lu nëꞌë lëꞌ ga nacuáꞌ bönachi izáꞌa.
20 Cateꞌ bilaꞌyönnëꞌ lë ni,
gulaꞌguꞌë Dios yöl-laꞌ ba.
Níꞌirö gulë́ꞌ Pablo:
―Nöz quézinuꞌ,
bö́chiꞌtuꞌ,
cateꞌ xö zián gáyuꞌë bönniꞌ judío taꞌyéajlëꞌë Cristo,
ateꞌ yúguꞌtëꞌ túndëꞌë bal xibá queëꞌ Moisés.
21 Chibilaꞌyönnëꞌ yuguꞌ le tuíꞌi didzaꞌ bönachi le taꞌnnë́ quiuꞌ,
taꞌnná rigúꞌu yö́l-luꞌu yúguꞌtë bönniꞌ judío nútsaꞌgaquiëꞌ ladaj bönachi izáꞌa,
para uluꞌcáꞌanëꞌ le gunná bëꞌë Moisés,
en rinná béꞌenuꞌ légaquiëꞌ bitiꞌ ilaꞌchúguiëꞌ lu xpë́laꞌgacabiꞌ biꞌi bö́nniꞌdoꞌ quégaquiëꞌ,
en bitiꞌ ilunëꞌ bal yuguꞌ le nalë́biruꞌ runruꞌ rëꞌu,
bönachi judío.
22 ¿Nacxi caz gunruꞌ naꞌa?
Uluꞌrúaj bönachi zián cateꞌ ilaꞌyöni chibidxínuꞌ ni.
23 Naꞌa,
ben lë ni rëtuꞌ liꞌ.
Nacuáꞌlenëꞌ netuꞌ ni tapëꞌ bönniꞌ,
chinazíꞌ lu náꞌagaquiëꞌ lahuëꞌ Dios tu le ilunëꞌ.
24 Guchë́ꞌë yuguꞌ bönniꞌ ni,
en ben légaquiëꞌ tsözxö́n gun dxiꞌa cuinliꞌ ca naca que yudoꞌ,
en gudizxaj liꞌ le ral-laꞌ ilaꞌguizxjëꞌ para ilún yútusö ícjagaquiëꞌ.
Níꞌirö ilaꞌnö́zinëꞌ yúguꞌtë bönniꞌ judío bitiꞌ nácatë lë naꞌ taꞌnnë́ꞌ quiuꞌ,
pero lëscaꞌ liꞌ runuꞌ le naca dxiꞌa,
en runuꞌ ca rinná bëꞌ xibá queëꞌ Moisés.
25 Ca naca quégaca bönachi izáꞌa,
nupa niꞌ chitaꞌyéajlëꞌ Cristo,
chibén xtídzaꞌtuꞌ,
en buzúajtuꞌ lu guichi ca ral-laꞌ ilunëꞌ.
Bitiꞌ run bayudxi ilún chiꞌë yuguꞌ lë ni tunëꞌ bönniꞌ judío,
pero tuz:
Bitiꞌ ilahuëꞌ le taꞌgúꞌu bönachi lógaca budóꞌ guiö́j budóꞌ yaga.
Bitiꞌ ilahuëꞌ rön.
Bitiꞌ ilahuëꞌ xipë́laꞌgacabaꞌ böaꞌ guixiꞌ bitiꞌ narúaj-gácabaꞌ rön.
Bitiꞌ ilunëꞌ le ruáꞌ döꞌ.
Taꞌzönëꞌ Pablo löꞌa yudoꞌ
26 Níꞌirö Pablo guchë́ꞌë queëꞌ tapëꞌ bönniꞌ naꞌ,
ateꞌ dza buropi niꞌ ben dxiꞌa cuinëꞌ tsözxö́n len légaquiëꞌ ca naca que yudoꞌ.
Níꞌirö guyáziëꞌ löꞌa yudoꞌ,
para gaca bëꞌ bizxi dza údxi ilunëꞌ le tuꞌún dxiꞌa cuíngaquiëꞌ,
dza niꞌ ral-laꞌ tsöjuáꞌagaquiëꞌ le ilaꞌguꞌë lahuëꞌ Dios que queë́gaquiëꞌ.
27 Cateꞌ chizóa izáꞌa gadxi dza naꞌ,
bal-lëꞌ judío narúajgaquiëꞌ luyú Asia bilaꞌléꞌenëꞌ Pablo,
zoëꞌ löꞌa yudoꞌ.
Gulunëꞌ ga gulún dzatsa bönachi zián,
ateꞌ gulaꞌzönëꞌ Pablo.
28 Guluꞌë zidzaj didzaꞌ,
taꞌnnë́ꞌ:
―¡Guliꞌgácalen netuꞌ,
bönniꞌ Israel!
Bönniꞌ ni rusédinëꞌ yúguꞌtë bönachi yúguꞌtë lataj uluꞌcáꞌana cáꞌasö yödzö queë́ruꞌ,
en xibá queëꞌ Moisés,
en yudoꞌ queë́ruꞌ ni.
Naꞌa,
chiguluꞌë yuguꞌ bönniꞌ izáꞌa lu yudoꞌ ni.
Caní runëꞌ,
run dítjanëꞌ lataj láꞌayi ni.
29 Caní gulaꞌnnë́ꞌ tuꞌ bilaꞌléꞌenëꞌ Pablo zíꞌalö lu yödzö dzáguiëꞌ Trófimo,
bönniꞌ Éfeso,
en téquinëꞌ guluꞌë bönniꞌ ni lu yudoꞌ.
30 Caní guca,
buluꞌdubi yúguꞌtë bönachi yödzö,
ateꞌ bilaꞌguírëꞌ niꞌ.
Níꞌirö gulaꞌzönëꞌ Pablo,
en guláꞌayöjëꞌ lëꞌ,
buluꞌbéajëꞌ lëꞌ löꞌa yudoꞌ,
ateꞌ laꞌ buluꞌsáyjatëꞌ ga nu riyaza löꞌa yudoꞌ naꞌ.
31 Cateꞌ chitequi quézinëꞌ ilútiëꞌ Pablo,
bidxín didzaꞌ lahuëꞌ bönniꞌ lo rinná béꞌenëꞌ bönniꞌ röjáquiëꞌ gudil-la.
Biyönnëꞌ tun dzatsa yúguꞌtë bönachi Jerusalén.
32 Bönniꞌ lo ni laꞌ butúbitëꞌ bönniꞌ röjáquiëꞌ gudil-la,
len bönniꞌ taꞌnná béꞌenëꞌ légaquiëꞌ,
ateꞌ carelö guyéajlenëꞌ légaquiëꞌ ga naꞌ tun dzatsa bönachi naꞌ.
Cateꞌ bilaꞌléꞌe bönachi niꞌ bönniꞌ lo naꞌ rinná béꞌenëꞌ bönniꞌ röjáquiëꞌ gudil-la,
en bönniꞌ naꞌ röjáquiëꞌ gudil-la,
buluꞌsanëꞌ taꞌguinëꞌ Pablo.
33 Níꞌirö gubíguiꞌë bönniꞌ lo naꞌ,
en guzxönëꞌ Pablo,
ateꞌ gunná béꞌenëꞌ bönniꞌ röjáquiëꞌ gudil-la ilúguiëꞌ lëꞌ len chopa du guíë.
Gudödi niꞌ gunábinëꞌ bönachi zián niꞌ,
rnnëꞌ:
―¿Nuzxi caz bönniꞌ ni,
en bizxi benëꞌ?
34 Taꞌbö́dxiꞌa bönachi zián naꞌ,
que queë́gaca ca taꞌnná.
Caní guca,
bitiꞌ bi guca tséajniꞌinëꞌ bönniꞌ lo naꞌ,
tuꞌ tuꞌtsatsa bönachi naꞌ,
ateꞌ gunná béꞌenëꞌ bönniꞌ röjáquiëꞌ gudil-la ilaꞌchë́ꞌë Pablo lu yuꞌu zxön ga nagáꞌanagaquiëꞌ bönniꞌ naꞌ röjáquiëꞌ gudil-la.
35 Cateꞌ bilaꞌdxinëꞌ ga naca niꞌyëpiꞌ que yuꞌu zxön naꞌ,
bönniꞌ naꞌ röjáquiëꞌ gudil-la guluíꞌinëꞌ Pablo,
tuꞌ dxíadiꞌigaca bönachi zián légaquiëꞌ,
36 en záꞌgaca cúdzuꞌlögaquiëꞌ,
taꞌbö́dxiꞌa,
taꞌnná:
―Guliꞌgútiëꞌ.
Didzaꞌ bëꞌë Pablo uláz queëꞌ lógaca bönachi
37 Cateꞌ niꞌ gulaꞌsí lógaquiëꞌ ilaꞌguꞌë Pablo lu yuꞌu zxön niꞌ,
lëꞌ gudxëꞌ bönniꞌ lo naꞌ rinná béꞌenëꞌ bönniꞌ röjáquiëꞌ gudil-la,
gunnë́ꞌ:
―¿Naruꞌ gunnuꞌ nedaꞌ lataj guíaꞌ liꞌ tu didzaꞌ?
Bönniꞌ lo naꞌ gudxëꞌ Pablo:
―¿Rácatsoꞌ didzaꞌ griego?
38 ¿Naruꞌ calëga liꞌ bönniꞌ Egipto naꞌ dza lahui nisö butubëꞌ yuguꞌ bönniꞌ gulaꞌdáꞌbaguëꞌë yúlahuiꞌ,
ateꞌ guchë́ꞌë idú choáꞌ gáyuꞌë bönniꞌ huëti bönachi lu lataj cáꞌasö?
39 Níꞌirö Pablo gudxëꞌ lëꞌ,
gunnë́ꞌ:
―Le nácatë nacaꞌ nedaꞌ bönniꞌ judío.
Guljaꞌ Tarso,
tu yödzö lo luyú Cilicia.
Rátaꞌyuaꞌ loꞌ gunnuꞌ nedaꞌ lataj guꞌa didzaꞌ lógaca bönachi ni.
40 Bönniꞌ lo naꞌ bëꞌë lëꞌ lataj,
ateꞌ guzuínëꞌ Pablo ga naca niꞌyëpiꞌ,
en guchisa nëꞌë para ilaꞌcuáꞌ dxisö bönachi zián niꞌ.
Cateꞌ chigulaꞌcuꞌë dxisö,
Pablo bë́ꞌlenëꞌ légaquiëꞌ didzaꞌ lu didzaꞌ hebreo.