―¿Naruꞌ bidisóalenëꞌ Dios Böꞌ Láꞌayi libíꞌiliꞌ cateꞌ niꞌ guyéajlëꞌëliꞌ Cristo?

Gulë́ꞌ lëꞌ:

―Bitiꞌ nayö́nituꞌ channö zoëꞌ Dios Böꞌ Láꞌayi.

3 Níꞌirö Pablo gunábinëꞌ légaquiëꞌ,

rnnëꞌ:

―¿Nacxi guca le bidílaliꞌ nisa?

Taꞌnnë́ꞌ:

―Ca buquílëꞌ Juan bönachi nisa.

4 Pablo gunnë́ꞌ:

―Buquílëꞌ Juan bönachi nisa,

nupa niꞌ buluꞌbíꞌi ládxiꞌguequi,

ateꞌ Juan caz gudxëꞌ léguequi ral-laꞌ ilaꞌyéajlëꞌ Bönniꞌ naꞌ siꞌ záꞌtëlëꞌ ca lëꞌ,

ateꞌ Bönniꞌ ni naquiëꞌ Jesús,

Lëꞌ Cristo.

5 Cateꞌ yuguꞌ bönniꞌ naꞌ bilaꞌyönnëꞌ didzaꞌ ni ruꞌë Pablo,

bilaꞌdilëꞌ nisa tuꞌ chitaꞌyéajlëꞌë Xanruꞌ Jesús.

6 Cateꞌ guxóa nëꞌë Pablo légaquiëꞌ,

en niꞌ rulidzëꞌ Dios,

bidisóalenëꞌ Dios Böꞌ Láꞌayi légaquiëꞌ,

ateꞌ guluꞌë didzaꞌ yúbölö,

en guluꞌë didzaꞌ uláz queëꞌ Dios.

7 Guláquiëꞌ bönniꞌ ni idú chínnuëꞌ.

8 Guzóëꞌ Pablo idú ca tsonna beoꞌ niꞌ,

ateꞌ guyáziëꞌ lu yuꞌu ga tuꞌdubëꞌ bönniꞌ judío,

en tuꞌsëdëꞌ queëꞌ Dios,

ateꞌ lu yöl-laꞌ rugu ladxiꞌ benëꞌ libán lógaquiëꞌ.

Bë́ꞌlenëꞌ légaquiëꞌ didzaꞌ,

en gúꞌunnëꞌ uluíꞌinëꞌ légaquiëꞌ nácatë le riguíxjöꞌë ca rinná bëꞌë Dios.

9 Níꞌirö bizídi icja ládxiꞌdoꞌgaquiëꞌ bal-lëꞌ,

en bitiꞌ gulaꞌyéajlëꞌë Cristo,

ateꞌ gulaꞌnnë́ ziꞌë que xtídzëꞌë Xanruꞌ ga nacuáꞌ bönachi zián naꞌ.

Níꞌirö Pablo buláꞌalenëꞌ légaquiëꞌ,

ateꞌ bubéajëꞌ quez nupa taꞌyéajlëꞌ Cristo.

Bë́ꞌlenëꞌ bönachi ni taꞌyéajlëꞌ Cristo didzaꞌ yuguꞌ dza ga naꞌ tuꞌdubëꞌ lu yuꞌu ga rusédinëꞌ Tiranno bönachi.

10 Caní bénticaꞌsëꞌ Pablo idú ca chopa iz,

ateꞌ caní guca,

bilaꞌyöni yúguꞌtë bönachi didzaꞌ ca naca queëꞌ Xanruꞌ Jesús,

bönachi nacuꞌë yuguꞌ yödzö luyú Asia,

bönachi judío,

en bönachi izáꞌa.

11 Dios benëꞌ yuguꞌ yöl-laꞌ huáca zxön lu nëꞌë Pablo.

12 Caní guca,

bal-lëꞌ bönniꞌ gulaꞌziꞌë yuguꞌ láriꞌdoꞌ béguëꞌë icjëꞌ Pablo,

en yuguꞌ lariꞌ tsöláꞌa bugalëꞌ lëꞌë,

ateꞌ yöjuáꞌgaquiëꞌ léguequi gapa nacuáꞌ nupa teꞌe,

ateꞌ buluꞌhuöáquiëꞌ ca naca yödzöhuë́ꞌ que queë́gaquiëꞌ,

en buluꞌrúaj böꞌ xihuiꞌ yúꞌugaca bönachi naꞌ.

13 Níꞌirö bal-lëꞌ bönniꞌ judío udá dzaga tuꞌbéajëꞌ böꞌ xihuiꞌ gulë́ꞌënnëꞌ uluꞌgunëꞌ dxin Lëꞌ Xanruꞌ Jesús para uluꞌbéajëꞌ yuguꞌ böꞌ xihuiꞌ yúꞌugaca bönachi,

taꞌnnë́ꞌ:

―Niꞌa que Lëꞌ Jesús,

Nu naꞌ runëꞌ libán que Pablo,

rinná béꞌetuꞌ libíꞌiliꞌ urúajliꞌ.

14 Caní gulunëꞌ gadxi bönniꞌ zxíꞌinëꞌ Esceva,

tu bönniꞌ judío náquiëꞌ bönniꞌ lo ládjagaquiëꞌ bixúz unná bëꞌ.

15 Bubíꞌi didzaꞌ böꞌ xihuiꞌ naꞌ,

gunná:

―Núnbëꞌa-nëꞌ Jesús,

en núnbeꞌedaꞌ bönniꞌ lëꞌ Pablo,

pero libíꞌiliꞌ,

¿núzxitë libíꞌiliꞌ?

16 Níꞌirö guxítiꞌë bönniꞌ naꞌ yuꞌu lëꞌ böꞌ xihuiꞌ,

yöjenëꞌ légaquiëꞌ ziꞌ,

en bucul-lëꞌ yúguꞌtëꞌ,

tuꞌ guzxéquiꞌrönëꞌ ca légaquiëꞌ.

Caní guca,

xiguídigacasëꞌ,

en huë́ꞌgacatëzëꞌ buluꞌzxúnnajëꞌ gadxëꞌ bönniꞌ naꞌ lu yuꞌu niꞌ.

17 Guzë́ didzaꞌ ca guca lë ni,

ateꞌ bilaꞌyöni yúguꞌtë nupa nacuáꞌ lu yödzö Éfeso,

bönachi judío,

en bönachi izáꞌa,

ateꞌ yúguꞌtëꞌ guládxinëꞌ Dios.

Que lë ni naꞌ gulunëꞌ zxön Lëꞌ Xanruꞌ Jesús.

18 Lëscaꞌ bilaꞌdxinëꞌ zián bönniꞌ taꞌyéajlëꞌë Cristo,

en gulaꞌxóalëpëꞌ dul-laꞌ nabágaꞌgaquiëꞌ,

en gulaꞌguíxjöꞌë le chigulunëꞌ.

19 Lëscaꞌ caní gulunëꞌ zián bönniꞌ,

zíꞌalö gulunëꞌ yöl-laꞌ udzáꞌ.

Dujuáꞌagaquiëꞌ yuguꞌ guichi udzáꞌ quégaquiëꞌ,

ateꞌ buluꞌzéguiꞌë léguequi lógaca yúguꞌtë bönachi.

Buluꞌlabëꞌ tsca nazácaꞌgaca guichi naꞌ,

le guca idú chi un mil dumí plata.

20 Caní guca,

guzëdaꞌ xtídzëꞌë Xanruꞌ,

en bidéliꞌdaꞌ bönachi zián.

Idú ládxiꞌgaquiëꞌ gulaꞌyéajlëꞌë Cristo.

21 Gudödi gulaca lë ni,

benëꞌ queëꞌ Pablo tsejëꞌ Jerusalén,

pero zíꞌalö ral-laꞌ tödëꞌ yuguꞌ yödzö luyú Macedonia,

en luyú Acaya,

ateꞌ gunnë́ꞌ:

―Tödi tsejaꞌ Jerusalén,

run bayudxi tsejaꞌ caꞌ Roma.

22 Níꞌirö gusö́l-lëꞌë-biꞌ chópabiꞌ biꞌi bönniꞌ tácalenbiꞌ lëꞌ,

lë́gacabiꞌ Timoteo,

en Erasto,

luyú Macedonia,

pero bugáꞌanëꞌ lëꞌ nababa dza luyú Asia naꞌ.

23 Buluꞌtsatsa bönachi Éfeso dza niꞌ,

ateꞌ gulaꞌdáꞌbaguëꞌë xtídzëꞌë Xanruꞌ.

24 Benëꞌ Demetrio,

bönniꞌ gubëdxi guíë plata ga buluꞌtsatsëꞌ.

Run cazëꞌ yuguꞌ lidxi budóꞌ guiö́j budóꞌ yaga néquiguequini plata que dios quégaquiëꞌ,

lënu Diana.

Gulaꞌziꞌë bönniꞌ tunëꞌ dxin ni dumí bach.

25 Butubëꞌ Demetrio naꞌ iaꞌzícaꞌrëꞌ bönniꞌ tunëꞌ laꞌ dxin nisö,

ateꞌ gudxëꞌ légaquiëꞌ:

―Böchaꞌa,

nöz quéziliꞌ ca naca dxin runruꞌ,

runna dumí queë́ruꞌ.

26 Riléꞌeliꞌ,

en riyö́niliꞌ ca runëꞌ Pablo naꞌ.

Calë́gasö Éfeso ni,

pero idú luyú Asia chibidéliꞌnëꞌ bönachi zián,

ateꞌ chibutsë́ꞌë ca tunëꞌ,

tuꞌ rëꞌ légaquiëꞌ:

“Yúgu le núngaca bönachi bitiꞌ nácagaca dios.”

27 Calë́gasö zoa bönadxi ugáꞌana cáꞌasö dxin ni runruꞌ,

pero lëscaꞌ zoa bönadxi ugáꞌana cáꞌasö yudoꞌ que dios zxön lënu Diana.

Caní gaca,

ugáꞌana cáꞌasö yöl-laꞌ zxön queë́nu,

dios ni taꞌyéaj ládxiꞌgaca-nu bönachi idútë luyú Asia,

encaꞌ idútë yödzölió.

28 Cateꞌ yuguꞌ bönniꞌ naꞌ bilaꞌyönnëꞌ didzaꞌ ni,

gulaꞌlédeꞌenëꞌ,

ateꞌ guluꞌë zidzaj didzaꞌ,

taꞌnnë́ꞌ:

―Nácatërönu zxön Diana,

dios queë́ruꞌ rëꞌu,

bönachi Éfeso.

29 Caní guca,

buluꞌtsatsa bönachi idútë lu yödzö naꞌ,

ateꞌ guláquiëꞌ tuz,

en carelö yöjáquiëꞌ löꞌa yúlahuiꞌ.

Guláꞌayöjëꞌ Gayo,

en Aristarco,

bönniꞌ Macedonia túngaquiëꞌ Pablo tsözxö́n,

ga niꞌ.

30 Cateꞌ gúꞌunnëꞌ Pablo tsáziëꞌ ga nacuáꞌ bönachi zián naꞌ,

bitiꞌ caꞌ guluꞌë lëꞌ lataj bönniꞌ taꞌyéajlëꞌë Cristo.

31 Lëscaꞌ caní gulunëꞌ bal-lëꞌ bönniꞌ yúlahuiꞌ que luyú Asia,

bönniꞌ taꞌléꞌenëꞌ Pablo dxiꞌa.

Gulaꞌsö́l-lëꞌë queëꞌ nupa gulátaꞌyu lahuëꞌ bitiꞌ tsaziëꞌ löꞌa yúlahuiꞌ naꞌ.

32 Ga niꞌ tuꞌtsatsëꞌ,

en taꞌbö́dxiꞌë,

tu le taꞌnnë́ꞌ bal-lëꞌ,

en iaꞌtú le taꞌnnë́ꞌ iaꞌzícaꞌrëꞌ,

tuꞌ rö́ꞌögacasëꞌ baröli bönniꞌ zián naꞌ tuꞌtsatsëꞌ,

en láꞌtuꞌbiquiꞌ yúguꞌtëgaquiëꞌ bitiꞌ nö́zguequinëꞌ bizx que naꞌ nudúbigaquiëꞌ niꞌ.

33 Níꞌirö yuguꞌ bönniꞌ judío gulaꞌbéajëꞌ Alejandro ladaj bönachi zián naꞌ,

ateꞌ buluꞌdxíguëꞌë lëꞌ lógaca bönachi zián naꞌ.

Buluꞌe Alejandro naꞌ len nëꞌë para ilaꞌbö́ꞌ dxisö,

tuꞌ gúꞌunnëꞌ guꞌë didzaꞌ le gácalen yuguꞌ bönniꞌ judío naꞌ lógaca yúguꞌtëguequi.

34 Cateꞌ guléquibeꞌenëꞌ náquiëꞌ judío,

yúguꞌtëꞌ guluꞌë tsözxö́n zidzaj didzaꞌ idú ca chopa hora,

taꞌnnë́ꞌ:

―¡Nácatërönu zxön Diana,

dios queë́ruꞌ rëꞌu bönachi Éfeso!

35 Níꞌirö bönniꞌ uzúaj que yúlahuiꞌ benëꞌ ga gulaꞌbö́ꞌ dxisö bönachi zián naꞌ,

gunnë́ꞌ:

―Bönniꞌ Éfeso,

nö́zigaca yúguꞌtë bönachi zoa yudoꞌ queë́nu Diana,

dios zxön,

ni.

Rëꞌu ni,

bönachi Éfeso,

run chíꞌiruꞌ yudoꞌ naꞌ,

encaꞌ budóꞌ naꞌ böxaj ga zóaruꞌ,

le birúaj lúzxiba.

36 Cuntu nu gaca táꞌbagaꞌ lë ni.

Que lë ni naꞌ run bayudxi sóaliꞌ dxisö,

en bitiꞌ bi gúntëziliꞌ.

37 Nachë́ꞌgacaliꞌ-nëꞌ bönniꞌ ni,

en bitiꞌ taꞌbanëꞌ le dzöꞌö yudoꞌ,

en bitiꞌ taꞌnnë́ xihuëꞌë queë́nu dios queë́liꞌ.

38 Que lë ni naꞌ,

channö zoa didzaꞌ bizxaj quégaquiëꞌ Demetrio,

en yuguꞌ bönniꞌ gubëdxi guíë plata nacuáꞌlenëꞌ lëꞌ,

len nútiꞌtës bönniꞌ,

dë lataj ga nu uzë́ nagui légaquiëꞌ,

en zoa nu uchiꞌa usörö́ légaquiëꞌ.

Niꞌ huáca uluꞌzegui luzáꞌagaquiëꞌ didzaꞌ tuëꞌ iaꞌtúëꞌ.

39 Naꞌa,

channö dë iaꞌtú le inábaliꞌ,

huáca ucáꞌanaruꞌ tsahuiꞌ le cateꞌ uluꞌdubi bönniꞌ yúlahuiꞌ ca naꞌ rinná bëꞌ yúlahuiꞌ.

40 Zoa bönadxi nu uzegui rëꞌu didzaꞌ niꞌa que dzatsa ni guca naꞌa,

inná ridáꞌbagaꞌruꞌ yúlahuiꞌ.

Bitiꞌ bi gaca innaruꞌ bizx que guca dzatsa ni.

41 Cateꞌ budxi bëꞌë didzaꞌ ni,

busö́l-lëꞌë bönachi zián naꞌ nudúbigaca niꞌ tsöhuö́jgaca lídxiguequi.