Yuguꞌ bönachi Tesalónica tunëꞌ dzatsa
17
Gulaꞌdödëꞌ Pablo,
en Silas lu yödzö Anfípolis,
en lu yödzö Apolonia,
ateꞌ bilaꞌdxinëꞌ lu yödzö Tesalónica,
ga niꞌ zoa tu yuꞌu ga tuꞌdubëꞌ bönniꞌ judío,
en tuꞌsëdëꞌ queëꞌ Dios.
2 Bugáꞌanëꞌ Pablo niꞌ idú galaj dza,
ateꞌ ca run cazëꞌ,
guyijëꞌ ga zoa yuꞌu naꞌ cateꞌ naca dza láꞌayi quégaquiëꞌ bönniꞌ judío,
ateꞌ bë́ꞌlenëꞌ légaquiëꞌ didzaꞌ.
3 Buchila láꞌanëꞌ,
en buluíꞌinëꞌ légaquiëꞌ rusëdi le nazúaj lu guichi láꞌayi run bayudxi quiꞌi sáquëꞌë Cristo,
Bönniꞌ naꞌ tunëꞌ löza bönniꞌ judío udusölë́ꞌ légaquiëꞌ,
ateꞌ tödi gátiëꞌ ubanëꞌ lu yöl-laꞌ guti.
Níꞌirö Pablo gudxëꞌ légaquiëꞌ:
―¡Caní guca queëꞌ bönniꞌ naꞌ lëꞌ Jesús,
runaꞌ libán queëꞌ ga ni zóaliꞌ!
¡Bönniꞌ ni náquiëꞌ Cristo!
4 Níꞌirö bal-lëꞌ gulaꞌyéajlëꞌë Cristo,
ateꞌ gulunëꞌ tsözxö́n Pablo,
en Silas.
Lëscaꞌ caní zián bönniꞌ izáꞌa,
bönniꞌ taꞌyéaj ládxiꞌgaquiëꞌ Dios,
gulaꞌyéajlëꞌë Cristo.
Lëscaꞌ zián nigula lo gulaꞌyéajlëꞌënu Cristo.
5 Níꞌirö yuguꞌ bönniꞌ judío bitiꞌ taꞌyéajlëꞌë,
lu yöl-laꞌ ruzxéꞌe quégaquiëꞌ Pablo,
buluꞌtubëꞌ yuguꞌ bönniꞌ bitiꞌ nácagaquiëꞌ tsahuiꞌ,
bönniꞌ taꞌdasëꞌ caꞌ.
Cateꞌ chibuluꞌtúbëꞌ bönachi zián,
gulunëꞌ ga gulún dzatsa idú lu yödzö naꞌ,
ateꞌ bayudxi gulaꞌyáziëꞌ lidxëꞌ Jasón para uluꞌbéajëꞌ Pablo,
en Silas lógaca bönachi naꞌ tun dzatsa.
6 Cateꞌ bitiꞌ buluꞌdzö́linëꞌ Pablo,
en Silas,
gulaꞌbéajëꞌ Jasón,
en iaꞌzícaꞌrëꞌ bö́chiꞌruꞌ nacuꞌë niꞌ,
ateꞌ gulaꞌchë́ꞌë légaquiëꞌ lógaquiëꞌ bönniꞌ yúlahuiꞌ.
Guluꞌë zidzaj didzaꞌ,
taꞌnnë́ꞌ:
―Yuguꞌ bönniꞌ naꞌ nutsáꞌgaquiëꞌ bönachi idútë yödzölió chibilaꞌdxinëꞌ caꞌ ni.
7 Jasón ni guluꞌë légaquiëꞌ lidxëꞌ.
Yúguꞌtë bönniꞌ ni taꞌdáꞌbaguëꞌë xibá queëꞌ César,
bönniꞌ rinná béꞌenëꞌ rëꞌu,
taꞌnnë́ꞌ:
“Zoëꞌ iaꞌtúëꞌ bönniꞌ rinná bëꞌë,
lëꞌ Jesús.”
8 Cateꞌ bilaꞌyönnëꞌ yuguꞌ bönniꞌ lu yödzö,
en yuguꞌ bönniꞌ yúlahuiꞌ naꞌ lë ni,
gulaꞌböꞌë böniga.
9 Níꞌirö,
gudödi gulaꞌziꞌë bönniꞌ yúlahuiꞌ dumí le buluꞌcáꞌanagarëꞌ Jasón,
en iaꞌzícaꞌrëꞌ bönniꞌ naꞌ,
buluꞌsanëꞌ légaquiëꞌ.
Le gulunëꞌ Pablo, en Silas lu yödzö Berea
10 Níꞌirö yuguꞌ bö́chiꞌruꞌ niꞌ laꞌ gulaꞌsö́l-laꞌtëꞌ Pablo,
en Silas,
niꞌ naca chiꞌi dzö́ꞌölö,
ateꞌ söjáquiëꞌ yödzö Berea.
Cateꞌ bilaꞌdxinëꞌ niꞌ,
gulaꞌyáziëꞌ lu yuꞌu ga tuꞌdubëꞌ bönniꞌ judío nacuꞌë niꞌ,
en tuꞌsëdëꞌ queëꞌ Dios.
11 Gulácarëꞌ tsahuiꞌ bönniꞌ ni ca bönniꞌ nacuꞌë Tesalónica,
tuꞌ gulaꞌzíꞌ lu náꞌagaquiëꞌ xtídzëꞌë Xanruꞌ idú ládxiꞌgaquiëꞌ.
Yuguꞌ dza buluꞌlabëꞌ dxiꞌa le nazúaj lu guichi láꞌayi,
para iléquibeꞌenëꞌ channö nácatë lë naꞌ rnnëꞌ Pablo.
12 Caní guca,
zián bönniꞌ judío gulaꞌyéajlëꞌë Cristo.
Lëscaꞌ caní,
zián bönniꞌ izáꞌa,
yuguꞌ nigula lo,
en yuguꞌ bönniꞌ gulaꞌyéajlëꞌë Cristo.
13 Níꞌirö cateꞌ guléquibeꞌenëꞌ bönniꞌ judío nacuꞌë Tesalónica,
lëscaꞌ riguíxjöꞌë Pablo xtídzëꞌë Dios lu yödzö Berea,
yöjáquiëꞌ niꞌ,
en gulunëꞌ caꞌ niꞌ ga gulún dzatsa bönachi zián.
14 Níꞌirö yuguꞌ bö́chiꞌruꞌ niꞌ laꞌ gulaꞌsö́l-laꞌtëꞌ Pablo,
para tsejëꞌ ga naca raꞌ nísadoꞌ,
pero buluꞌgáꞌanasëꞌ Silas,
en biꞌi Timoteo lu yödzö Berea.
15 Yuguꞌ bönniꞌ Berea naꞌ gulaꞌchë́ꞌë Pablo lu yödzö Atenas.
Níꞌirö laꞌ yöjhuö́jgacatëꞌ lu yödzö Berea,
tuꞌúꞌë xtídzëꞌë Pablo,
para ilë́ꞌ Silas,
en biꞌi Timoteo,
tsöjácatëꞌ ga niꞌ zoëꞌ Pablo.
Le benëꞌ Pablo lu yödzö Atenas
16 Tsanni niꞌ zoëꞌ Pablo ribözëꞌ Silas,
en biꞌi Timoteo,
lu yödzö Atenas,
ruhuíꞌini ládxëꞌë tuꞌ riléꞌenëꞌ taꞌyéaj ládxiꞌgaca yúguꞌtë bönachi yödzö naꞌ yuguꞌ budóꞌ guiö́j budóꞌ yaga.
17 Que lë ni naꞌ bë́ꞌlenëꞌ bönniꞌ judío,
en bönniꞌ taꞌyéaj ládxiꞌgaquiëꞌ Dios didzaꞌ ga naca lu yuꞌu ga tuꞌdubëꞌ tuꞌsëdëꞌ queëꞌ Dios.
Yuguꞌ dza bë́ꞌlenëꞌ nupa taꞌdá lu yë́ꞌëyi didzaꞌ ca naca xtídzëꞌë Cristo.
18 Bal-lëꞌ bönniꞌ dáꞌgaquiëꞌ le tuꞌsë́dinëꞌ bönniꞌ epicúreo,
en le tuꞌsë́dinëꞌ bönniꞌ estoico guluíꞌilenëꞌ Pablo didzaꞌ.
Bal-lëꞌ gulaꞌnnë́ꞌ:
―¿Bizxi rë́ꞌënitsenëꞌ innë́ꞌ bönniꞌ huëꞌ didzaꞌ ni?
Iaꞌbal-lëꞌ gulaꞌnnë́ꞌ:
―Réquituꞌ náquiëꞌ nu run libán quégaca dios ziꞌtuꞌ.
Caní gulaꞌnnë́ꞌ tuꞌ runëꞌ libán Pablo lógaquiëꞌ que didzaꞌ dxiꞌa queëꞌ Jesús,
en que yöl-laꞌ rubán.
19 Níꞌirö gulaꞌguélëꞌë nëꞌë Pablo,
en gulaꞌchë́ꞌë lëꞌ lu guíꞌa ga tuꞌdubëꞌ tuꞌë didzaꞌ,
nazíꞌi le Areópago,
taꞌnnë́ꞌ:
―¿Naruꞌ huácatsö yö́nituꞌ didzaꞌ cubi ni rusiyönnuꞌ netuꞌ?
20 Rusiyönnuꞌ netuꞌ le tun ga rubánituꞌ.
Rë́ꞌënituꞌ inö́zituꞌ bizxi rnna didzaꞌ ni ruꞌu.
21 Bítiꞌrö taꞌyaza ládxiꞌgaquiëꞌ ilunëꞌ bönniꞌ Atenas naꞌ,
en bönniꞌ izáꞌa nacuꞌë niꞌ,
pero ilaꞌyö́nisinëꞌ,
en iluíꞌisëꞌ didzaꞌ tu le cubi.
22 Níꞌirö guzuínëꞌ Pablo gatsaj láhuiꞌlö löꞌa Areópago naꞌ,
gunnë́ꞌ:
―Bönniꞌ Atenas,
yúguꞌtë le riléꞌedaꞌ naca bëꞌ reaj ládxiꞌdaꞌaliꞌ yuguꞌ dios queë́liꞌ.
23 Cateꞌ gudödaꞌ lu yödzö,
en buyúgacaꞌ yuguꞌ le reaj ládxiꞌliꞌ,
yöjxácaꞌa caꞌ tu nichu ga niꞌ nazúaj le rnna caní:
“Tu Dios,
Cuntu Nu Nunbëꞌ Lëꞌ.”
Dios naꞌ reaj ládxiꞌliꞌ-nëꞌ sal-laꞌ bitiꞌ núnbëꞌëliꞌ-nëꞌ,
Dios ni runaꞌ libán queëꞌ loliꞌ.
24 ’¡Dios ni benëꞌ yödzölió,
en yúguꞌtë le nacuáꞌ yödzölió ni!
¡Náquiëꞌ Xani yehuaꞌ yubá,
en Xani luyú ni,
en bitiꞌ caꞌ zoëꞌ tu yudoꞌ núngaca bönachi!
25 Bitiꞌ bi riyadzaj queëꞌ le gaca uluꞌnödzaj bönachi,
tuꞌ runödzjëꞌ Lë cazëꞌ quégaca yúguꞌtë bönachi yöl-laꞌ naꞌbán,
en yúguꞌtë le riquíniruꞌ.
26 ’Lëꞌ benëꞌ tuzëꞌ bönniꞌ ga záꞌgaca yúguꞌtë bönachi izáꞌa para ilaꞌcuáꞌ idú yödzölió,
en buluꞌe dza ilaꞌcuáꞌ,
en gapa ral-laꞌ ilaꞌcuáꞌ.
27 Dios bucuꞌë légaquiëꞌ para uluꞌguiljëꞌ Lëꞌ,
channö nácatiꞌtës ilaꞌdzö́linëꞌ Lëꞌ sal-laꞌ ilaꞌgán ilaꞌzönsëꞌ.
Caní raca sal-laꞌ bitiꞌ zoëꞌ ziꞌtuꞌ ga zóaruꞌ tu turuꞌ.
28 Lë cazëꞌ runëꞌ ga zóaruꞌ nabanruꞌ,
en bi gaca gunruꞌ,
en le nácaruꞌ.
Naca ca naꞌ gulaꞌnnë́ꞌ bal-lëꞌ bönniꞌ nútsaꞌgaquiëꞌ libíꞌiliꞌ,
nupa buluꞌzúaj le doꞌ rúl-laliꞌ,
le taꞌnná:
“Diꞌa dza queëꞌ Dios nácaruꞌ.”
29 Naꞌa,
channö nácaruꞌ diꞌa dza queëꞌ Dios,
bitiꞌ ral-laꞌ innaruꞌ náquiëꞌ Dios ca tu budóꞌ guiö́j budóꞌ yaga,
o tu le néquini oro,
o plata,
o guiö́j,
le núngaca bönachi ca naca tu le taꞌguínnajsö ícjaguequi.
30 Dios budödëꞌ cáꞌasö yuguꞌ le gulunëꞌ lu yöl-laꞌ bitiꞌ réajniꞌi quégaquiëꞌ yuguꞌ iz chigulaꞌdödi,
pero naꞌa rinná béꞌenëꞌ yúguꞌtë bönachi idútë yödzölió uluꞌbíꞌi ládxiꞌgaca.
31 Dios chinuluꞌë tu dza cateꞌ uchiꞌa usörö́ëꞌ yúguꞌtë bönachi.
Idú tsahuiꞌ naca ca uchiꞌa usörö́ëꞌ légaquiëꞌ lu nëꞌë Jesús,
bönniꞌ naꞌ buzóa cazëꞌ Lëꞌ,
ateꞌ lógaca yúguꞌtë bönachi benëꞌ tsutsu gaca caní tuꞌ busubanëꞌ Lëꞌ lu yöl-laꞌ guti.
32 Cateꞌ bilaꞌyönnëꞌ didzaꞌ bëꞌë Pablo ca guca,
zoa nu bubán lu yöl-laꞌ guti,
buluꞌtitjëꞌ bal-lëꞌ,
ateꞌ iaꞌbal-lëꞌ gulaꞌnnë́ꞌ:
―Yö́niguetuꞌ iaꞌtú lë ni ruꞌu didzaꞌ que.