Biꞌi Timoteo runbiꞌ tsözxö́n Pablo, en Silas
16
Gudödi niꞌ bilaꞌdxinëꞌ Pablo,
en Silas yödzö Derbe,
en yödzö Listra.
Zóabiꞌ tu biꞌi bönniꞌ niꞌ,
réajlëꞌëbiꞌ Cristo,
lëbiꞌ Timoteo.
Nácabiꞌ zxíꞌininu tu nigula judío réajlëꞌënu Cristo,
pero xúzibiꞌ bitiꞌ náquiëꞌ judío.
2 Yuguꞌ bö́chiꞌruꞌ nacuꞌë Listra,
en Iconio tunëꞌ ba nalí queë́biꞌ,
taꞌnnë́ꞌ runbiꞌ le naca dxiꞌa.
3 Gúꞌunnëꞌ Pablo tséajlenbiꞌ biꞌi ni lëꞌ,
ateꞌ gudélëꞌë-biꞌ,
en guchúguiëꞌ lu xipë́laꞌbiꞌ ca tun bönachi judío.
Caní benëꞌ para cabí ilaꞌnnë́ꞌ queë́biꞌ bönniꞌ judío nacuꞌë yuguꞌ yödzö niꞌ,
tuꞌ nö́ziguequinëꞌ yúguꞌtëꞌ xúzibiꞌ bitiꞌ náquiëꞌ judío.
4 Cateꞌ Pablo,
en nupa dzágagaca lëꞌ gulaꞌdödëꞌ gapa nacuáꞌ yödzö niꞌ,
tu tu yödzö naꞌ buluꞌdödëꞌ lu náꞌagaquiëꞌ yuguꞌ bö́chiꞌruꞌ nacuꞌë gapa niꞌ yuguꞌ xibá naꞌ gulunëꞌ gubáz nasö́l-lëꞌë Cristo,
en bönniꞌ gula tapa chiꞌë bönachi queëꞌ,
nacuꞌë Jerusalén.
Buluꞌdödëꞌ yuguꞌ xibá ni lu náꞌagaquiëꞌ para ilunëꞌ ca rinná bëꞌ xibá naꞌ.
5 Caní guca,
bönachi yúguꞌtë cöꞌ bönachi queëꞌ Cristo bilaꞌdipa ládxiꞌgaca ca naca le réajlëꞌëruꞌ Cristo,
ateꞌ gulaꞌyán tu tu dza.
Tu bönniꞌ Macedonia rulidzëꞌ Pablo lu yëla bë́chigal
6 Pablo,
en bönniꞌ dzágagaquiëꞌ lëꞌ gulaꞌdödëꞌ luyú Frigia,
en luyú Galacia,
tuꞌ buzáguëꞌë Dios Böꞌ Láꞌayi xinö́zgaquiëꞌ,
para cabí ilunëꞌ libán que xtídzëꞌë Xanruꞌ luyú Asia.
7 Cateꞌ bilaꞌdxinëꞌ luyú Misia,
gulë́ꞌënnëꞌ tsöjáquiëꞌ luyú Bitinia,
pero Dios Böꞌ Láꞌayi,
Nu risö́l-lëꞌë Jesús queë́ruꞌ,
bitiꞌ bëꞌë légaquiëꞌ lataj.
8 Níꞌirö gulaꞌdödëꞌ galaꞌ ga dë Misia,
ateꞌ yöjáquiëꞌ lu yödzö Troas.
Nedaꞌ Lucas,
ruzúajaꞌ lu guichi lë ni,
guzóaꞌ Troas naꞌ,
ateꞌ yöjsóalenaꞌ-nëꞌ Pablo.
9 Lu yödzö niꞌ Dios buluíꞌinëꞌ Pablo tu le biléꞌenëꞌ lu yëla bë́chigal.
Tu bönniꞌ Macedonia buluíꞌi lahuëꞌ lëꞌ,
zuínëꞌ,
en rátaꞌyuëꞌ lahuëꞌ Pablo,
rnnëꞌ:
“Gudödi ladztuꞌ,
lu xiyú Macedonia,
en gúcalen netuꞌ.”
10 Cateꞌ biléꞌenëꞌ Pablo lë ni,
lë naꞌ buluíꞌi lahui lëꞌ,
laꞌ bëꞌ ládxiꞌtëtuꞌ tséajtuꞌ luyú Macedonia,
tuꞌ gúquibeꞌetuꞌ Dios chibulidzëꞌ netuꞌ tsöjentuꞌ libán que didzaꞌ dxiꞌa lógaca bönachi luyú niꞌ.
Le gulunëꞌ Pablo, en Silas lu yödzö Filipos
11 Níꞌirö gurentuꞌ lëꞌe barco,
en buzáꞌatuꞌ Troas.
Gudö́dituꞌ lirá ga bidxintuꞌ yödzö Samotracia,
ateꞌ gudödi iaꞌtú dza bidxintuꞌ yödzö Neápolis.
12 Buzáꞌatuꞌ niꞌ,
ateꞌ bidxintuꞌ Filipos,
yödzö naꞌ nácarö lo ca yúguꞌtë yödzö nabábagaca tsöláꞌa niꞌ luyú Macedonia.
Lu yödzö niꞌ yuguꞌ bönniꞌ Roma nucuáꞌagaquiëꞌ bönachi uládz quégaquiëꞌ.
Lu yödzö nisö guzóatuꞌ nababa dza.
13 Cateꞌ bidxín tu dza láꞌayi,
birúajtuꞌ lu yödzö,
en guyéajtuꞌ raꞌ yegu ga naꞌ tuꞌdubi caz bönachi yödzö naꞌ,
en tuꞌlidza Dios.
Gurö́ꞌötuꞌ niꞌ,
en busiyöntuꞌ yuguꞌ nigula nudúbigacanu niꞌ ca naca xtídzëꞌë Xanruꞌ.
14 Nútsaꞌnu ládjagacanu Lidia,
tu nigula Tiatira.
Nácanu nigula rútiꞌnu lariꞌ xiná chul-la le nazácaꞌdaꞌ.
Reaj ládxiꞌnu Dios,
ateꞌ buzë́ náganu didzaꞌ ruꞌë Pablo,
ateꞌ Xanruꞌ gúcalenëꞌ-nu para guzxíꞌ lu náꞌanu didzaꞌ naꞌ bëꞌë.
15 Níꞌirö bidílanu lënu nisa,
ateꞌ gulaꞌdila caꞌ nisa bönachi nacuáꞌ lídxinu.
Gudödi niꞌ gútaꞌyunu lotuꞌ,
gunnánu:
―Channö réquibeꞌeliꞌ réajlëꞌa Xanruꞌ,
guliꞌtsaza lidxaꞌ,
en guliꞌsóa niꞌ.
Bennu bayudxi ugáꞌanatuꞌ niꞌ.
16 Iaꞌtú le guca tu dza tsanni niꞌ zéajtuꞌ ga naꞌ rulidztuꞌ-nëꞌ Dios,
birúajbiꞌ dutságabiꞌ tu biꞌi nigula netuꞌ yuꞌu lëbiꞌ böꞌ le run ga rinnë́ yáꞌabiꞌ.
Len yöl-laꞌ rinnë́ yaꞌa queë́biꞌ runbiꞌ ga taꞌzíꞌdëꞌë dumí yuguꞌ bönniꞌ xanbiꞌ.
17 Biꞌi nigula ni sudunóbiꞌ-nëꞌ Pablo,
en netuꞌ,
ruíꞌibiꞌ zidzaj didzaꞌ,
rnnabiꞌ:
―¡Yuguꞌ bönniꞌ ni tunëꞌ xichinëꞌ Dios nayë́pisëtërëꞌ!
¡Tuꞌsiyönnëꞌ libíꞌiliꞌ naca gaca uláliꞌ!
18 Caní benbiꞌ zián dza.
Cateꞌ bítiꞌrö guyaza ládxëꞌë Pablo,
buécjëꞌ,
en bulidzëꞌ böꞌ naꞌ yuꞌu lëbiꞌ,
rnnëꞌ:
―Lu Lëꞌ Xanruꞌ Jesucristo,
rinná béꞌedaꞌ liꞌ.
¡Burúaj icja ládxiꞌdoꞌobiꞌ biꞌi nigula ni!
Laꞌ níꞌisö burúajtë böꞌ naꞌ.
19 Cateꞌ bilaꞌléꞌenëꞌ xanbiꞌ chiburúaj böꞌ naꞌ run ga rinnë́ yáꞌabiꞌ,
en bítiꞌrö naca löza ilaꞌziꞌë dumí niꞌa queë́biꞌ,
que lë ni naꞌ gulaꞌzönëꞌ Pablo,
en Silas,
ateꞌ gulaꞌchë́ꞌë légaquiëꞌ lógaquiëꞌ bönniꞌ yúlahuiꞌ,
nudúbigaquiëꞌ ga naca lu yë́ꞌëyi.
20 Buluꞌcuꞌë légaquiëꞌ lógaquiëꞌ bönniꞌ yúlahuiꞌ naꞌ,
taꞌnnë́ꞌ:
―Yuguꞌ bönniꞌ ni nácagaquiëꞌ judío,
en tunëꞌ ga tuꞌtsatsa bönachi yödzö ni.
21 Tuꞌsë́dinëꞌ le cabí ral-laꞌ siꞌ lu náꞌaruꞌ,
en bitiꞌ ral-laꞌ gunruꞌ,
tuꞌ nabábaruꞌ Roma.
22 Níꞌirö bönachi zián niꞌ gulaꞌdáꞌbagaꞌ Pablo,
en Silas,
ateꞌ yuguꞌ bönniꞌ yúlahuiꞌ gulaꞌnná béꞌenëꞌ nupa gulaꞌlecja lariꞌ nácugaquiëꞌ Pablo,
en Silas,
ateꞌ gulaꞌguínëꞌ légaquiëꞌ gubáꞌayi.
23 Gudödi gulaꞌguíndëꞌë légaquiëꞌ,
gulaꞌguꞌë légaquiëꞌ lidxi guíë.
Gulaꞌnná béꞌenëꞌ bönniꞌ rusayjëꞌ lidxi guíë naꞌ gun chíꞌidëꞌë légaquiëꞌ.
24 Bönniꞌ ni,
cateꞌ chigulaꞌnná béꞌenëꞌ lëꞌ caní,
guluꞌë légaquiëꞌ lu yuꞌu lëꞌe dxiꞌ lidxi guíë naꞌ,
en guluꞌë níꞌagaquiëꞌ yeru yaga taꞌzö́n níꞌagaquiëꞌ.
25 Idú guluhuëla Pablo,
en Silas tuꞌlidzëꞌ Dios,
en tul-lëꞌ yöl-laꞌ ba queëꞌ Dios,
ateꞌ taꞌyönnëꞌ yuguꞌ bönniꞌ nadzúngaquiëꞌ lidxi guíë naꞌ.
26 Níꞌirö tsálidoꞌos gudödi budóꞌ zxuꞌ bach.
Caní guca ga bidxintë guzxizi xilibi zöꞌö lidxi guíë naꞌ,
ateꞌ laꞌ gulaꞌyáljatë yúguꞌtë gapa nu riyaza,
ateꞌ buluꞌhuédxi caꞌ yuguꞌ du guíë nágaꞌgaca bönniꞌ nadzúngaquiëꞌ niꞌ.
27 Bubanëꞌ bönniꞌ naꞌ rusayjëꞌ lidxi guíë.
Cateꞌ biléꞌenëꞌ nayáljagaca gapa nu riyaza lidxi guíë naꞌ,
gulecjëꞌ guíë tuchiꞌ queëꞌ para guti cuinëꞌ,
tuꞌ réquinëꞌ chibuluꞌzxúnnajëꞌ bönniꞌ nadzúngaquiëꞌ lidxi guíë naꞌ.
28 Níꞌirö Pablo zidzaj bulidzëꞌ lëꞌ,
gunnë́ꞌ:
―¡Bitiꞌ bi gúni cuinuꞌ,
tuꞌ zóatuꞌ ni yúguꞌtëtuꞌ!
29 Níꞌirö bönniꞌ naꞌ gunabëꞌ guíꞌ,
ateꞌ gudáꞌatëꞌ lu yuꞌu lidxi guíë naꞌ.
Guzxízidëꞌë lu yöl-laꞌ radxi,
ateꞌ biyéchuëꞌ xiníꞌagaquiëꞌ Pablo,
en Silas.
30 Cateꞌ chinubéajëꞌ légaquiëꞌ lidxi guíë naꞌ,
gudxëꞌ légaquiëꞌ:
―Libiꞌiliꞌ,
bönniꞌ,
¿bizxi ral-laꞌ gunaꞌ para uláꞌ?
31 Légaquiëꞌ tëꞌ lëꞌ:
―Guyéajlëꞌë Xanruꞌ Jesucristo,
ateꞌ ulóꞌ liꞌ,
en lëscaꞌ caní uluꞌlágaca bönachi nacuáꞌ lidxuꞌ.
32 Guluíꞌilenëꞌ lëꞌ didzaꞌ ca naca xtídzëꞌë Xanruꞌ,
dzágagaca lëꞌ yúguꞌtë bönachi nacuáꞌ lidxëꞌ.
33 Laꞌ náꞌasö,
niꞌ naca chiꞌi dzö́ꞌölö laꞌ guchëꞌtëꞌ légaquiëꞌ,
ateꞌ yöjtibëꞌ légaquiëꞌ ga dxíagaquiëꞌ huëꞌ.
Gudödi niꞌ,
laꞌ bidílatëꞌ nisa,
ateꞌ gulaꞌdila caꞌ nisa yúguꞌtë bönachi nacuáꞌ lidxëꞌ.
34 Níꞌirö guchë́ꞌë légaquiëꞌ lidxëꞌ,
en bëꞌë le gulahuëꞌ.
Rudzéjanëꞌ lëꞌ,
en tuꞌdzeja caꞌ yúguꞌtë bönachi nacuáꞌ lidxëꞌ tuꞌ taꞌyéajlëꞌë Dios.
35 Cateꞌ zaꞌ reníꞌ dza naꞌ,
yuguꞌ bönniꞌ yúlahuiꞌ gulaꞌsö́l-lëꞌë niꞌa náꞌagaquiëꞌ,
ateꞌ gulë́ꞌ bönniꞌ naꞌ rusayjëꞌ lidxi guíë:
―Busán-gáquiëꞌ bönniꞌ naꞌ.
36 Níꞌirö bönniꞌ naꞌ rusayjëꞌ lidxi guíë gudíxjöiꞌinëꞌ Pablo didzaꞌ ni,
gunnë́ꞌ:
―Gulaꞌsö́l-lëꞌë bönniꞌ yúlahuiꞌ didzaꞌ usanaꞌ libíꞌiliꞌ.
Naꞌa,
guliꞌrúaj,
en buliꞌhuö́aj dxíꞌadoꞌ ga rizóaliꞌ.
37 Níꞌirö birúajëꞌ Pablo,
en gudxëꞌ yuguꞌ niꞌa náꞌagaquiëꞌ bönniꞌ yúlahuiꞌ naꞌ,
gunnë́ꞌ:
―Chigulaꞌguínëꞌ netuꞌ lógaca bönachi sal-laꞌ bitiꞌ narúguini queë́tuꞌ ca rinná bëꞌ xibá,
en gulaꞌguꞌë netuꞌ lidxi guíë,
ateꞌ netuꞌ ni nabábatuꞌ Roma.
¿Naruꞌ tuꞌsantsëꞌ netuꞌ bagáchiꞌsö?
¡Bitiꞌ caꞌ gaca!
¡Ilídigarëꞌ légaquiëꞌ udusángaquiëꞌ netuꞌ!
38 Yöjhuö́jgaquiëꞌ niꞌa náꞌagaquiëꞌ bönniꞌ yúlahuiꞌ naꞌ,
en buluꞌsiyönnëꞌ yuguꞌ bönniꞌ yúlahuiꞌ didzaꞌ ni,
ateꞌ légaquiëꞌ guládxinëꞌ cateꞌ bilaꞌyönnëꞌ nabábagaquiëꞌ Pablo,
en Silas Roma.
39 Cateꞌ bilaꞌdxinëꞌ lidxi guíë niꞌ,
gulátaꞌyuëꞌ lógaquiëꞌ Pablo,
en Silas cabí uluꞌsubáguëꞌë légaquiëꞌ xíguiaꞌ.
Níꞌirö gulaꞌbéajëꞌ légaquiëꞌ lidxi guíë naꞌ,
en gulátaꞌyuëꞌ lógaquiëꞌ uluꞌrúajëꞌ yödzö naꞌ.
40 Níꞌirö bilaꞌrúajëꞌ Pablo,
en Silas lidxi guíë naꞌ,
ateꞌ gulaꞌyáziëꞌ lídxinu Lidia.
Cateꞌ chibilaꞌléꞌenëꞌ bö́chiꞌruꞌ nacuꞌë niꞌ,
buluꞌchíziëꞌ didzaꞌ icja nágagaquiëꞌ,
en laꞌ buluꞌzáꞌatëꞌ niꞌ.