Tuꞌdubëꞌ huen dxin queëꞌ Cristo lu yödzö Jerusalén
15
Níꞌirö bal-lëꞌ bönniꞌ narúajgaquiëꞌ luyú Judea bilaꞌdxinëꞌ yödzö Antioquía,
ateꞌ buluꞌsë́dinëꞌ bö́chiꞌruꞌ,
bönniꞌ izáꞌa niꞌ,
taꞌnnë́ꞌ:
―Channö cabí irugu lu xipë́laꞌliꞌ ca nalë́bituꞌ runtuꞌ ca naꞌ gunná bëꞌë Moisés,
bitiꞌ gaca uláliꞌ.
2 Níꞌirö Pablo,
en Bernabé gulaꞌdíl-lalenëꞌ légaquiëꞌ didzaꞌ,
ateꞌ gúcadaꞌ dzatsa.
Gudödi niꞌ,
gulaꞌbö́ëꞌ Pablo,
en Bernabé len iaꞌbal-lëꞌ bönniꞌ bö́chiꞌruꞌ niꞌ,
para tsöjáquiëꞌ Jerusalén,
en ilaꞌdxinëꞌ lógaquiëꞌ gubáz niꞌ queëꞌ Cristo,
encaꞌ lógaquiëꞌ bönniꞌ gula tapa chiꞌë bönachi queëꞌ Cristo niꞌ,
para iluíꞌilenëꞌ légaquiëꞌ didzaꞌ ca naca lë ni raca,
tuꞌsédinëꞌ bönniꞌ naꞌ bönachi le nachixi.
3 Níꞌirö yuguꞌ bönniꞌ queëꞌ Cristo nacuꞌë Antioquía buluꞌguꞌë légaquiëꞌ nöza,
ateꞌ gulaꞌdödëꞌ lu xiyú yödzö Fenicia,
en luyú Samaria,
ateꞌ buluꞌsiyönnëꞌ böchiꞌ luzáꞌaruꞌ yuguꞌ lataj niꞌ ca guca,
buluꞌhuöáquiëꞌ bönniꞌ izáꞌa queëꞌ Cristo.
Lë ni ben ga buluꞌdzéjanëꞌ yúguꞌtë böchiꞌ luzáꞌaruꞌ niꞌ.
4 Cateꞌ bilaꞌdxinëꞌ Pablo,
en Bernabé lu yödzö Jerusalén,
yuguꞌ bönniꞌ queëꞌ Cristo nacuꞌë niꞌ,
encaꞌ yuguꞌ gubáz nasö́l-lëꞌë Lëꞌ,
en yuguꞌ bönniꞌ gula tapa chiꞌë gulunëꞌ légaquiëꞌ bal.
Pablo,
en Bernabé buluꞌsiyönnëꞌ légaquiëꞌ yúguꞌtë le benëꞌ Dios lu náꞌagaquiëꞌ.
5 Níꞌirö gulaꞌzuínëꞌ bal-lëꞌ bönniꞌ yudoꞌ fariseo,
bönniꞌ taꞌyéajlëꞌë Cristo,
en taꞌnnë́ꞌ:
―Run bayudxi irugu lu xipë́laꞌgaquiëꞌ bönniꞌ izáꞌa naꞌ taꞌyéajlëꞌë Cristo,
en inná béꞌeruꞌ légaquiëꞌ ilunëꞌ ca rnna bëꞌ xibá queëꞌ Moisés.
6 Níꞌirö buluꞌdubëꞌ gubáz nasö́l-lëꞌë Cristo len bönniꞌ gula tapa chiꞌë bönachi queëꞌ,
para uluꞌchiꞌa uluꞌsörö́ëꞌ lë ni raca.
7 Gudödi guluꞌë zián didzaꞌ,
guzuínëꞌ Pedro,
en gudxëꞌ légaquiëꞌ:
―Libiꞌiliꞌ,
bö́chaꞌa.
Nöz quéziliꞌ ca guca dza niꞌte,
Dios gurö́ cazëꞌ nedaꞌ para gunaꞌ libán lógaca bönachi izáꞌa para ilaꞌyöni didzaꞌ dxiꞌa,
en ilaꞌyéajlëꞌ Cristo.
8 Dios,
Nu nunbëꞌ caz le yuꞌu icja ládxiꞌdoꞌgaca bönachi,
buzóëꞌ le naca bëꞌ runëꞌ légaquiëꞌ bal,
gusö́l-lëꞌë Dios Böꞌ Láꞌayi quégaquiëꞌ,
ca naꞌ gusö́l-lëꞌë Lëꞌ queë́ruꞌ.
9 Bitiꞌ butsë́ꞌë ca benëꞌ quégaquiëꞌ,
en queë́ruꞌ,
en lëscaꞌ bunëꞌ dxiꞌa icja ládxiꞌdoꞌgaquiëꞌ tuꞌ taꞌyéajlëꞌë Cristo.
10 Naꞌa,
¿bizx que run leliꞌ-nëꞌ Dios,
rusubágaꞌliꞌ yuaꞌ xiyéngaca böchiꞌ luzáꞌaruꞌ?
Yuaꞌ ni,
le naca le taꞌnná bëꞌ xibá queëꞌ Moisés,
bitiꞌ guca guáꞌaruꞌ rëꞌu,
en bitiꞌ guca iluꞌë xuz xtóꞌoruꞌ le.
11 Rëꞌu ni,
réajlëꞌëruꞌ nuláruꞌ niꞌa que le buzáꞌ ládxëꞌë Xanruꞌ Jesús queë́ruꞌ,
en ca naꞌ nuláruꞌ rëꞌu,
uluꞌlë́ꞌ caꞌ légaquiëꞌ.
12 Cateꞌ budxi bëꞌë Pedro didzaꞌ ni,
yúguꞌtëꞌ gulaꞌcuꞌë dxisö,
ateꞌ buluꞌzë́ nágagaquiëꞌ didzaꞌ guluꞌë Bernabé,
en Pablo.
Buluꞌsiyönnëꞌ légaquiëꞌ yuguꞌ le taca bëꞌ,
en le tun ga tuꞌbani bönachi,
yuguꞌ le benëꞌ Dios lu náꞌagaquiëꞌ ga nacuáꞌ bönachi izáꞌa.
13 Cateꞌ Bernabé,
en Pablo budxi guluꞌë didzaꞌ ni,
bubiꞌë didzaꞌ Jacobo,
gunnë́ꞌ:
―Libiꞌiliꞌ,
bö́chaꞌa.
Buliꞌzë́ nágaliꞌ le guíaꞌ libíꞌiliꞌ.
14 Simón Pedro chigudíxjöiꞌi quézinëꞌ rëꞌu ca benëꞌ Dios,
buluꞌe lahui yöl-laꞌ huáca queëꞌ le zíꞌalö luzuí lógaca yuguꞌ bönachi izáꞌa para bubéajëꞌ quez queëꞌ bönachi nútsaꞌgaca ládjagaquiëꞌ.
15 Ca naca lë ni röjlö́zgaca xtídzaꞌgaquiëꞌ bönniꞌ guluꞌë didzaꞌ uláz queëꞌ Dios,
ca naꞌ nazúaj lu guichi láꞌayi,
rnna:
16 Dza tödi lë ni huödaꞌ,
en uchisaꞌ Nu inná bëꞌ,
bönniꞌ naꞌ tsáziëꞌ xilatjëꞌ David.
Gunaꞌ ca run nu ruchisa tu yuꞌu naguinnaj.
Uchisaꞌ caꞌ bönachi ilaꞌcuáꞌ lidxëꞌ,
nupa nagáꞌanagaca.
Gunaꞌ ca run nu ruchisa tu zöꞌö yexuꞌ.
Caní uchisaꞌ le gunná bëꞌë David
17 para uluꞌguilaj iaꞌzícaꞌrö bönachi Xanruꞌ.
Uluꞌguilaj bönachi izáꞌa Lëꞌ,
ateꞌ siꞌ láguequi:
Bönachi Queëꞌ Dios.
18 Caní rnnëꞌ Xanruꞌ,
Nu naꞌ dza niꞌte ben ga naca bëꞌ yúguꞌtë lë ni.
19 ’Que lë ni naꞌ runi nedaꞌ bitiꞌ ral-laꞌ gun níguiruꞌ bönachi izáꞌa,
nupa tuꞌhuöáca queëꞌ Dios.
20 Ral-laꞌ uzúajruꞌ lu guichi quégaquiëꞌ uluꞌcáꞌanëꞌ yuguꞌ le bitiꞌ ral-laꞌ ilahuëꞌ,
le nadödi lógaca budóꞌ guiö́j budóꞌ yaga,
en cabí ilunëꞌ le ruáꞌ döꞌ,
en cabí ilahuëꞌ xipë́laꞌgacabaꞌ böaꞌ guixiꞌ bitiꞌ narúaj-gácabaꞌ rön,
en cabí ilahuëꞌ xichönbaꞌ bítiꞌtës böaꞌ guixiꞌ.
21 Dza niꞌte nacuáꞌ yúguꞌtë yödzö nupa tun libán lu yuꞌu gapa tuꞌdubëꞌ bönniꞌ judío,
en tuꞌsëdëꞌ queëꞌ Dios.
Tunëꞌ libán niꞌ que le buzúajëꞌ lu guichi Moisés.
Tuꞌlaba cazëꞌ le yuguꞌ dza láꞌayi.
22 Níꞌirö gulaꞌyaza ládxiꞌgaquiëꞌ gubáz nasö́l-lëꞌë Cristo,
en bönniꞌ gula tapa chiꞌë,
en yúguꞌtë bönachi queëꞌ Cristo,
ilaꞌbö́ëꞌ bal-lëꞌ bönniꞌ ládjagaquiëꞌ,
en ilaꞌsö́l-lëꞌë légaquiëꞌ Antioquía.
Tsöjácalenëꞌ Pablo,
en Bernabé.
Chopëꞌ naꞌ gulaꞌbö́ëꞌ,
lë́gaquiëꞌ Judas,
zoa iaꞌtú lëꞌ Barsabás,
encaꞌ Silas.
Nácagaquiëꞌ bönniꞌ lo ládjagaquiëꞌ bö́chiꞌruꞌ niꞌ.
23 Buluꞌzúajëꞌ lu guichi le buluꞌdödëꞌ lu náꞌagaquiëꞌ iluꞌë,
le rnna caní:
“Netuꞌ,
gubáz nasö́l-lëꞌë Cristo,
en bönniꞌ gula tun chiꞌë,
en yuguꞌ bö́chiꞌruꞌ,
rugápatuꞌ libíꞌiliꞌ Dios,
bö́chiꞌtuꞌ,
nácaliꞌ bönachi izáꞌa zóaliꞌ Antioquía,
en yuguꞌ yödzö luyú Siria,
en Cilicia.
24 Biyö́nituꞌ ca tun bal-la bönachi bilaꞌrúaj ga zóatuꞌ,
nupa naꞌ bitiꞌ nasö́l-laꞌtuꞌ.
Dutsáꞌagaquiëꞌ libíꞌiliꞌ len le taꞌnnë́ꞌ,
en tuꞌbequi böniga icja ládxiꞌdoꞌoliꞌ,
tuꞌ taꞌnná bëꞌë irugu lu xipë́laꞌliꞌ,
en gunliꞌ ca rinná bëꞌ xibá queëꞌ Moisés.
25 Que lë ni naꞌ guyaza ládxiꞌtuꞌ cateꞌ chibén tuz xtídzaꞌtuꞌ,
gurötuꞌ chopëꞌ bönniꞌ,
nupa isö́l-laꞌtuꞌ para uduyúgaquiëꞌ libíꞌiliꞌ.
Guídlengaquiëꞌ Bernabé,
en Pablo,
nupa naꞌ nadxíꞌiruꞌ.
26 Chiyöjáquiëꞌ Bernabé,
en Pablo gapa guzóa bönadxi ilátiëꞌ tuꞌ nadxíꞌiguequinëꞌ Xanruꞌ Jesucristo.
27 Caní naca,
risö́l-laꞌtuꞌ Judas,
en Silas ga zóaliꞌ.
Chopëꞌ ni uluꞌsiyönnëꞌ libíꞌiliꞌ lë ni ruzúajtuꞌ lu guichi ni.
28 Dios Böꞌ Láꞌayi buluíꞌinëꞌ netuꞌ le raza ládxëꞌë,
en lëscaꞌ caní raza ládxiꞌtuꞌ netuꞌ,
bitiꞌ usubágaꞌrötuꞌ libíꞌiliꞌ yuaꞌ,
le naca le rinná bëꞌ xibá queëꞌ Moisés,
pero yuguꞌ lë nisö run bayudxi gunliꞌ:
29 Bitiꞌ gáguliꞌ le nadödi lógaca budóꞌ guiö́j budóꞌ yaga.
Bitiꞌ gáguliꞌ rön.
Bitiꞌ gáguliꞌ xipë́laꞌgacabaꞌ böaꞌ guixiꞌ bitiꞌ narúaj-gácabaꞌ rön.
Bitiꞌ gunliꞌ le ruáꞌ döꞌ.
Channö gun chiꞌi cuinliꞌ para gunliꞌ ca rnna yuguꞌ lë ni,
gunliꞌ dxiꞌa.”
30 Caní guca,
yuguꞌ bönniꞌ naꞌ nasö́l-laꞌgaquiëꞌ bilaꞌdxinëꞌ Antioquía.
Buluꞌtubëꞌ bönachi queëꞌ Cristo nacuáꞌ niꞌ,
ateꞌ gulaꞌguꞌë guichi naꞌ lu náꞌagaquiëꞌ.
31 Cateꞌ chibudxi buluꞌlabëꞌ le,
buluꞌdzéjanëꞌ ca naca le nazúaj lu guichi naꞌ,
le ruhuë́ tsahuiꞌ légaquiëꞌ.
32 Tuꞌ nácagaquiëꞌ Judas,
en Silas bönniꞌ tuꞌë didzaꞌ uláz queëꞌ Dios buluꞌhuë́ tsáhuëꞌë légaquiëꞌ,
en buluꞌtipëꞌ ládxiꞌgaquiëꞌ bö́chiꞌruꞌ niꞌ,
buluꞌgunëꞌ dxin didzaꞌ zián le guluíꞌilenëꞌ légaquiëꞌ.
33 Gudödi buluꞌdzénëꞌ Judas,
en Silas niꞌ nababa dza,
níꞌirö bö́chiꞌruꞌ niꞌ buluꞌzenëꞌ légaquiëꞌ dxiꞌa didzaꞌ para tsöjhuö́ajgaquiëꞌ Jerusalén ga nacuꞌë bönniꞌ gulaꞌsö́l-lëꞌë légaquiëꞌ.
34 Guyaza ládxëꞌë Silas bugáꞌanëꞌ Antioquía.
35 Buluꞌgáꞌanëꞌ caꞌ Pablo,
en Bernabé Antioquía naꞌ,
ateꞌ buluꞌsédinëꞌ bönachi,
en gulunëꞌ libán que xtídzëꞌë Xanruꞌ.
Lëscaꞌ caní gulún ziánrö caꞌ bönachi.
Risí lahuëꞌ Pablo röjenëꞌ libán le buropi luzuí
36 Gudödi nababa dza Pablo gudxëꞌ Bernabé:
―Uyéajruꞌ leyúbölö tsöjyúgacaruꞌ-nëꞌ bö́chiꞌruꞌ nacuꞌë yúguꞌtë yödzö gapa chiyöjenruꞌ libán que xtídzëꞌë Xanruꞌ,
para iléꞌeruꞌ nacxi raca quégaquiëꞌ.
37 Gúꞌunnëꞌ Bernabé ilaꞌchë́ꞌë-biꞌ biꞌi Juan Marcos,
tséajlenbiꞌ légaquiëꞌ,
38 pero bitiꞌ guyaza ládxëꞌë Pablo ilaꞌchë́ꞌë-biꞌ tséajlenbiꞌ légaquiëꞌ tuꞌ buláꞌalenbiꞌ légaquiëꞌ luyú Panfilia,
en bítiꞌrö yöjénlenbiꞌ légaquiëꞌ dxin queëꞌ Xanruꞌ.
39 Bitiꞌ guca tuz xtídzaꞌgaquiëꞌ Bernabé,
en Pablo ga bidxintë buluꞌláꞌalenëꞌ tuëꞌ iaꞌtúëꞌ.
Bernabé guchë́ꞌë-biꞌ biꞌi Marcos,
ateꞌ gulaꞌbenëꞌ tu lëꞌe barco,
yöjáquiëꞌ luyú Chipre.
40 Pablo gurö́ëꞌ Silas para tséajlenëꞌ lëꞌ.
Níꞌirö yuguꞌ bö́chiꞌruꞌ gulaꞌguꞌë légaquiëꞌ lu nëꞌë Xanruꞌ,
en gulaꞌnábinëꞌ Lëꞌ uzáꞌ ládxëꞌë quégaquiëꞌ,
ateꞌ buluꞌzë́ꞌë Pablo,
en Silas niꞌ.
41 Gulaꞌdödëꞌ yuguꞌ yödzö luyú Siria,
en Cilicia,
ateꞌ buluꞌtipëꞌ ládxiꞌgaca bönachi queëꞌ Cristo nacuáꞌ niꞌ.