Le gulunëꞌ Pablo, en Bernabé lu yödzö Iconio
14
Cateꞌ bilaꞌdxinëꞌ Pablo,
en Bernabé yödzö Iconio,
gulaꞌyuꞌë tsözxö́n lu yuꞌu ga tuꞌdubëꞌ bönniꞌ judío,
en tuꞌsëdëꞌ queëꞌ Dios,
ateꞌ guluꞌë didzaꞌ niꞌ.
Caní guca,
zián bönachi judío,
encaꞌ zián bönachi izáꞌa gulaꞌyéajlëꞌ Cristo.
2 Níꞌirö bönniꞌ judío bitiꞌ taꞌyéajlëꞌë gulaꞌgúꞌu yö́l-lëꞌë bal-lëꞌ bönniꞌ izáꞌa,
para cabí ilaꞌléꞌenëꞌ dxiꞌa bö́chiꞌruꞌ taꞌyéajlëꞌë Cristo.
3 Tuꞌ gulaꞌyéajlëꞌ bönachi zián naꞌ Cristo,
gulaꞌcuꞌë Pablo,
en Bernabé niꞌ zián dza,
ateꞌ lu yöl-laꞌ rugu ladxiꞌ guluꞌë xtídzëꞌë Dios,
tuꞌ tuꞌzxöni ládxiꞌgaquiëꞌ Xanruꞌ.
Lë cazëꞌ Xanruꞌ buluꞌe naca idútë li didzaꞌ tuꞌë ca naca le ruzáꞌ ládxëꞌë Dios quégaca bönachi,
tuꞌ bëꞌë légaquiëꞌ lataj gulunëꞌ yuguꞌ le taca bëꞌ,
en le tun ga tuꞌbani bönachi.
4 Níꞌirö bönachi lu yödzö naꞌ bilaꞌrúaj choplö.
Bal-lëꞌ gulaꞌdë́ꞌë bönniꞌ judío bitiꞌ taꞌyéajlëꞌë,
ateꞌ iaꞌbal-lëꞌ gulaꞌdë́ꞌë Bernabé,
en Pablo,
gubáz naꞌ nasö́l-lëꞌë Cristo.
5 Níꞌirö bönniꞌ judío bitiꞌ taꞌyéajlëꞌë naꞌ,
en yuguꞌ bönniꞌ izáꞌa niꞌ gulunëꞌ tuz bönniꞌ taꞌnná béꞌenëꞌ légaquiëꞌ,
ateꞌ buluꞌdubëꞌ para iluꞌë döꞌ quégaquiëꞌ gubáz naꞌ nasö́l-lëꞌë Cristo,
en uluꞌladxëꞌ légaquiëꞌ guiö́j.
6 Cateꞌ téquibeꞌenëꞌ Pablo,
en Bernabé lë ni,
buluꞌzxúnnajëꞌ niꞌ,
yöjáquiëꞌ yödzö Listra,
en Derbe luyú Licaonia,
ateꞌ gulaꞌdödëꞌ yúguꞌtë yö́dzödoꞌ idú gásibiꞌilö niꞌ,
7 gapa niꞌ gulunëꞌ libán que didzaꞌ dxiꞌa ca naca queëꞌ Cristo.
Tuꞌladxëꞌ Pablo guiö́j lu yödzö Listra
8 Zoëꞌ tu bönniꞌ lu yödzö Listra bitiꞌ raca sëꞌë.
Rö́ꞌösëꞌ niꞌ tuꞌ cabí rizë́ꞌë cateꞌ niꞌ guljëꞌ,
en catu caz guzëꞌe niꞌë.
9 Bönniꞌ ni ruzë́ náguiëꞌ didzaꞌ ruꞌë Pablo.
Pablo buyúëꞌ lëꞌ,
en gúquibeꞌenëꞌ réajlëꞌë Cristo para huöáquiëꞌ.
10 Níꞌirö Pablo bëꞌë zidzaj didzaꞌ,
en rëꞌ lëꞌ:
―Guzuí.
Laꞌ guxítiꞌtëꞌ bönniꞌ naꞌ,
en guzëꞌe niꞌë.
11 Cateꞌ yuguꞌ bönniꞌ Listra bilaꞌléꞌenëꞌ lë naꞌ benëꞌ Pablo,
gulaꞌsí lógaquiëꞌ tuꞌë zidzaj didzaꞌ lu didzaꞌ tuꞌë bönniꞌ Licaonia naꞌ,
taꞌnnë́ꞌ:
―¡Yuguꞌ dios bönniꞌ ni!
¡Nuhuö́tjagaquiëꞌ ga zóaruꞌ,
en tuꞌluíꞌi cuíngaquiëꞌ ca nácagaquiëꞌ bönniꞌ!
12 Gulaꞌnnë́ꞌ Bernabé naꞌ náquiëꞌ Júpiter,
ca lëꞌ dios lo quégaquiëꞌ,
ateꞌ gulaꞌnnë́ꞌ náquiëꞌ Pablo Mercurio,
iaꞌtú dios quégaquiëꞌ.
Caní gulaꞌnnë́ꞌ tuꞌ ruꞌë didzaꞌ Pablo ca naꞌ taꞌnnë́ꞌ runëꞌ Mercurio naꞌ.
13 Zoa yudoꞌ que Júpiter ga niꞌ nacuꞌë,
cuita nöza ga niꞌ taꞌyaza bönachi lu yödzö naꞌ.
Laꞌ bidxintëꞌ bixúz que Júpiter naꞌ,
nachë́ꞌë-baꞌ yuguꞌ bëdxi,
en nuꞌë caꞌ yuguꞌ breguiꞌ yöj,
ateꞌ dzágagaca bönachi zián lëꞌ.
Gulë́ꞌënnëꞌ ilútiëꞌ-baꞌ bëdxi naꞌ lógaquiëꞌ Pablo,
en Bernabé para ilaꞌyéaj ládxiꞌgaquiëꞌ légaquiëꞌ ca tunëꞌ quégaca dios quégaquiëꞌ.
14 Cateꞌ Bernabé,
en Pablo,
gubáz naꞌ nasö́l-lëꞌë Cristo,
guléquibeꞌenëꞌ lë ni,
gulaꞌchözëꞌ lariꞌ nácugaquiëꞌ.
Tuꞌhuíꞌininëꞌ tuꞌ tunëꞌ bönniꞌ ni le cabí ral-laꞌ ilunëꞌ,
ateꞌ gulaꞌxítiꞌë,
en yöjcuꞌë gatsaj láhuiꞌlö bönachi zián naꞌ,
en guluꞌë zidzaj didzaꞌ,
tëꞌ légaquiëꞌ:
15 ―¡Libíꞌiliꞌ bönachi!
¿Bizx que runliꞌ caní?
Lëscaꞌ bönniꞌ ca libíꞌiliꞌ nácatuꞌ,
en riguíxjöiꞌituꞌ libíꞌiliꞌ lë ni caz ral-laꞌ ucáꞌanaliꞌ,
le cabí nácatë,
para guéquiliꞌ queëꞌ Dios ban.
Dios ni benëꞌ lúzxiba,
en yödzölió,
en nísadoꞌ,
en yúguꞌtë le nacuáꞌ tu tu lataj naꞌ.
16 Yuguꞌ iz chigulaꞌdödi,
gulún yúguꞌtë bönachi ca rnnasö que queëguequi,
ateꞌ Dios bitiꞌ buzáguëꞌë xinö́zguequi,
17 pero benëꞌ ga gulaca le tun ba nalí queëꞌ,
yuguꞌ le nácagaca dxiꞌa benëꞌ quégaquiëꞌ.
Risö́l-lëꞌë queë́ruꞌ nisa guiö́j,
en runëꞌ ga taꞌyán le rázaruꞌ.
Ruzölaj rudzéꞌenëꞌ rëꞌu,
en runëꞌ ga rudzeja ládxiꞌruꞌ.
18 Sal-laꞌ Bernabé,
en Pablo gulë́ꞌ légaquiëꞌ caní,
cánnisö bilaꞌdéliꞌnëꞌ buluꞌzáguëꞌë xinö́zguequi bönachi zián naꞌ,
para cabí ilútiëꞌ-baꞌ bëdxi naꞌ lógaquiëꞌ.
19 Níꞌirö bal-lëꞌ bönniꞌ judío bitiꞌ taꞌyéajlëꞌë,
narúajgaquiëꞌ Antioquía,
en Iconio,
bilaꞌdxinëꞌ niꞌ,
ateꞌ gulaꞌgúꞌu yö́l-lëꞌë bönachi zián naꞌ.
Níꞌirö yúguꞌtëꞌ buluꞌladxëꞌ Pablo guiö́j,
en guláꞌayöjëꞌ lëꞌ níꞌilö raꞌ yödzö naꞌ,
tuꞌ téquinëꞌ chinátiëꞌ.
20 Níꞌirö buluꞌdubëꞌ yuguꞌ bönniꞌ taꞌyéajlëꞌë Cristo idú gásibiꞌilö ga dëꞌ Pablo.
Guyasëꞌ lëꞌ,
en buáziëꞌ lu yödzö naꞌ.
Cateꞌ zaꞌ reníꞌ iaꞌtú dza,
burúajlenëꞌ Bernabé,
yöjáquiëꞌ yödzö Derbe.
21 Lu yödzö niꞌ gulunëꞌ libán que didzaꞌ dxiꞌa ca naca queëꞌ Jesucristo,
ateꞌ bönachi zián niꞌ gulaꞌyéajlëꞌ Cristo.
Gudödi niꞌ yöjhuö́jgaquiëꞌ Listra,
en Iconio,
en Antioquía.
22 Cateꞌ gulaꞌdödëꞌ Bernabé,
en Pablo yuguꞌ yödzö naꞌ,
buluꞌtipëꞌ ládxiꞌgaquiëꞌ bönniꞌ niꞌ taꞌyéajlëꞌë Cristo,
en buluꞌsë́ꞌë ládxiꞌgaquiëꞌ uluꞌgáꞌanëꞌ tsutsu ca naꞌ taꞌyéajlëꞌë Lëꞌ.
Gulë́ꞌ légaquiëꞌ:
―Rëꞌu tsaza cázaruꞌ ga rinná bëꞌë Dios,
run bayudxi quíꞌi sácaꞌruꞌ zián le gaca queë́ruꞌ.
23 Buluꞌcuꞌë yuguꞌ bönniꞌ gula ilún chiꞌë bönachi queëꞌ Cristo tu cöꞌ huéaj bönachi niꞌ queëꞌ Cristo.
Cateꞌ chiguluíꞌilenëꞌ Dios didzaꞌ,
en gulunëꞌ gubasa,
níꞌirö gulaꞌguꞌë légaquiëꞌ lu nëꞌë Xanruꞌ,
Nu naꞌ taꞌyéajlëꞌë.
Pablo, en Bernabé tuꞌdxinëꞌ Antioquía luyú Siria
24 Níꞌirö Pablo,
en Bernabé gulaꞌdödëꞌ luyú Pisidia,
ateꞌ bilaꞌdxinëꞌ luyú Panfilia.
25 Budxi gulunëꞌ libán que xtídzëꞌë Cristo lu yödzö Perge,
yöjáquiëꞌ yödzö Atalia.
26 Buluꞌzë́ꞌë niꞌ,
ateꞌ gulaꞌbenëꞌ tu lëꞌe barco,
en buluꞌdxinëꞌ yödzö Antioquía,
ga naꞌ nacuꞌë bönniꞌ queëꞌ Cristo,
bönniꞌ naꞌ gulaꞌsö́l-lëꞌë légaquiëꞌ tsöjéngaquiëꞌ libán,
cateꞌ niꞌ gulaꞌguꞌë légaquiëꞌ lu nëꞌë Dios,
Nu naꞌ ruzáꞌ ladxiꞌ quégaquiëꞌ ilunëꞌ xichinëꞌ,
dxin naꞌ chibudxi gulunëꞌ.
27 Cateꞌ niꞌ buluꞌdxinëꞌ Antioquía,
buluꞌdubi bönachi queëꞌ Cristo nacuáꞌ niꞌ.
Níꞌirö Pablo,
en Bernabé buluꞌsiyönnëꞌ légaquiëꞌ ca nácagaca le zxön benëꞌ Dios lu náꞌagaquiëꞌ,
encaꞌ ca benëꞌ Dios,
bëꞌë yuguꞌ bönachi izáꞌa lataj taꞌyéajlëꞌ caꞌ Lëꞌ.
28 Pablo,
en Bernabé buluꞌgáꞌanalenëꞌ bönachi niꞌ taꞌyéajlëꞌ Cristo zián dza.