Tútiëꞌ Jacobo, en taꞌguꞌë Pedro lidxi guíë
12
Dza naꞌ Herodes,
bönniꞌ unná bëꞌ,
benëꞌ ga gulaꞌzönëꞌ bal-lëꞌ bönniꞌ queëꞌ Cristo para uluꞌsacaꞌ ziꞌë légaquiëꞌ.
2 Gunná béꞌenëꞌ bönniꞌ gulútiëꞌ Jacobo,
bö́chëꞌë Juan.
Guluꞌë lëꞌ guíë tuchiꞌ.
3 Cateꞌ gúquibeꞌenëꞌ Herodes gulaꞌyaza ládxiꞌgaquiëꞌ bönniꞌ judío lë ni,
benëꞌ ga gulaꞌzönëꞌ caꞌ Pedro.
Gulaca lë ni dza niꞌ raca laní cateꞌ tahuëꞌ yöta xtila bitiꞌ nazíꞌi cúa zi que.
4 Gudödi gulaꞌzönëꞌ Pedro,
gulaꞌguꞌë lëꞌ lidxi guíë,
en buluꞌdödëꞌ lëꞌ lu náꞌagaquiëꞌ tapa cöꞌ bönniꞌ röjáquiëꞌ gudil-la,
nacuꞌë tapëꞌ tu huéaj cöꞌ naꞌ,
para uyúgaquiëꞌ lëꞌ.
Yuꞌu ládxëꞌë Herodes ubéajëꞌ Pedro lógaca bönachi tödi Laní Pascua,
laní naꞌ tuꞌsubanëꞌ ca benëꞌ Dios,
bubéajëꞌ bönachi judío luyú Egipto.
5 Caní guca,
nun chíꞌigacrëꞌ Pedro lu yuꞌu lidxi guíë naꞌ,
pero bönachi queëꞌ Cristo buluꞌlídzaticaꞌsö Dios,
taꞌnábini Dios gácalenëꞌ Pedro.
Dios rubéajëꞌ Pedro lidxi guíë
6 Cateꞌ siꞌ idxín dza yuꞌu ládxëꞌë Herodes ubéajëꞌ Pedro lidxi guíë naꞌ,
laꞌ dzöꞌ níꞌisö dëꞌ rásiëꞌ Pedro,
ateꞌ nacuꞌë chopëꞌ bönniꞌ röjáquiëꞌ gudil-la cuita lëꞌë Pedro naꞌ,
en núgaꞌgaquiëꞌ lëꞌ chopa du guíë.
Gulaꞌcuꞌë iaꞌbal-lëꞌ bönniꞌ röjáquiëꞌ gudil-la tapa chiꞌë ga nu riyaza lidxi guíë naꞌ.
7 Tsálidoꞌos buluíꞌi lahuëꞌ tu gubáz láꞌayi queëꞌ Xanruꞌ niꞌ,
ateꞌ buzeníꞌdaꞌ beníꞌ lidxi guíë.
Gudanëꞌ gubáz láꞌayi naꞌ cuita lëꞌë Pedro,
ateꞌ busubanëꞌ lëꞌ,
en gudxëꞌ lëꞌ:
―Guyaschi.
―Bégaꞌ lëꞌu,
en gudáꞌ xirachuꞌ.
Laꞌ bentëꞌ Pedro caní.
Níꞌirö gubáz láꞌayi naꞌ gudxëꞌ lëꞌ,
rnnëꞌ:
―Guxóa lariꞌ cúdzuꞌu,
en gudá len nedaꞌ.
9 Burúajëꞌ Pedro,
saꞌyéajlenëꞌ gubáz láꞌayi naꞌ,
pero bitiꞌ réquibeꞌenëꞌ nácatë le runëꞌ gubáz láꞌayi naꞌ.
Gúquinëꞌ yë́lasö rinenëꞌ.
10 Cateꞌ chigulaꞌdödëꞌ ga nacuꞌë bönniꞌ zíꞌalö,
en bönniꞌ buropi cöꞌ,
bönniꞌ naꞌ röjáquiëꞌ gudil-la tapa chiꞌë,
bilaꞌdxinëꞌ ga zoa le néquini guíë le nusayaj ga nu riyaza lidxi guíë naꞌ,
ga nu rurúaj laꞌ nöza que yödzö.
Ga nu riyaza naꞌ,
rácasö que guyalaj.
Cateꞌ bilaꞌrúajëꞌ niꞌ,
gulaꞌzë́ꞌë ga ridzaga iaꞌturö nöza,
ateꞌ niꞌ gubáz láꞌayi naꞌ laꞌ buláꞌalentëꞌ Pedro.
11 Níꞌirö réquibeꞌenëꞌ Pedro,
ateꞌ lu icja ládxiꞌdaꞌazëꞌ gunnë́ꞌ:
―Naꞌa chinözdaꞌ le nácatë gusö́l-lëꞌë Xanruꞌ gubáz láꞌayi queëꞌ,
en busölë́ꞌ nedaꞌ lu nëꞌë Herodes,
en lu yúguꞌtë le gulë́ꞌënnëꞌ bönniꞌ judío ilunëꞌ quiaꞌ.
12 Tsanni niꞌ yuꞌë nöza Pedro,
rizáꞌ ládxëꞌë ca naca lë naꞌ guca,
ateꞌ bidxinëꞌ lídxinu María,
xináꞌabiꞌ Juan,
biꞌi naꞌ zoa iaꞌtú labiꞌ Marcos.
Lu yuꞌu naꞌ nudúbigaca bönachi zián taꞌyéajlëꞌ Cristo,
en tuꞌlidza Dios.
13 Cateꞌ bulidzëꞌ Pedro raꞌ yuꞌu löꞌa,
birúajbiꞌ biꞌi nigula lëbiꞌ Rode para inö́zibiꞌ nuzxi naꞌ.
14 Cateꞌ búnbëꞌëbiꞌ biꞌi nigula ni chiꞌë Pedro,
lu yöl-laꞌ rudzeja queë́biꞌ bitiꞌ gusaljbiꞌ yuꞌu,
pero carelö bö́ajbiꞌ lu yuꞌu,
yöjtíxjöiꞌibiꞌ nupa nacuáꞌ niꞌ,
rnnabiꞌ:
―Zoëꞌ Pedro raꞌ yuꞌu.
15 Níꞌirö gulë́ꞌ lëbiꞌ:
―Nachixi icjuꞌ.
Lëbiꞌ tsútsurö ben xtídzaꞌbiꞌ naca caní.
Níꞌirö gulaꞌnnë́ꞌ:
―Calëga lëꞌ.
Bixín queëꞌ naꞌ.
16 Tsanni naꞌ bitiꞌ zoa dxíëꞌ Pedro rulidzëꞌ nupa nacuáꞌ lu yuꞌu.
Cateꞌ gulaꞌsaljëꞌ yuꞌu,
gulaꞌnítisinëꞌ cateꞌ bilaꞌléꞌenëꞌ lëꞌ.
17 Níꞌirö guchisa nëꞌë Pedro para ilaꞌcuꞌë dxisö,
ateꞌ busiyönnëꞌ légaquiëꞌ ca benëꞌ Xanruꞌ,
bubéajëꞌ lëꞌ lidxi guíë.
Níꞌirö gudxëꞌ légaquiëꞌ:
―Guliꞌsiyö́nnëꞌ caꞌ Jacobo,
en yuguꞌ bö́chiꞌruꞌ ca naꞌ guca.
Níꞌirö burúajëꞌ Pedro,
saꞌyéajëꞌ ga yúbölö.
18 Cateꞌ zaꞌ reníꞌ dza naꞌ,
bönniꞌ röjáquiëꞌ gudil-la gulaꞌböꞌë böniga nacxi guca,
bítiꞌrö yuꞌë Pedro lidxi guíë.
19 Níꞌirö gusö́l-lëꞌë Herodes nupa tsöjxíꞌgaca Pedro.
Cateꞌ bitiꞌ buluꞌdzö́linëꞌ lëꞌ,
Herodes gunabi yúdxinëꞌ yuguꞌ bönniꞌ naꞌ röjáquiëꞌ gudil-la,
bönniꞌ gulún chiꞌë Pedro.
Gudödi niꞌ gunná béꞌenëꞌ nupa bë́tigaca yuguꞌ bönniꞌ naꞌ röjáquiëꞌ gudil-la.
Níꞌirö buzë́ꞌë Herodes luyú Judea,
saꞌyéajëꞌ Cesarea,
ateꞌ bugáꞌanëꞌ niꞌ.
Ca gútiëꞌ Herodes
20 Dza níꞌisö rilenëꞌ Herodes bönachi yödzö Tiro,
en yödzö Sidón.
Zíꞌalö bönachi lu xiyúëꞌ Herodes naꞌ gulaꞌsö́l-laꞌ le biyadzaj quégaca bönachi lu xiyúgaca yödzö Tiro,
en Sidón naꞌ,
pero tuꞌ rilenëꞌ Herodes légaquiëꞌ,
bítiꞌrö bi taꞌsö́l-lëꞌë quégaquiëꞌ.
Níꞌirö gulunëꞌ tuz bönniꞌ Tiro,
en Sidón naꞌ,
ateꞌ gulunëꞌ ga soëꞌ Blasto unë́ quégaquiëꞌ lahuëꞌ Herodes naꞌ.
Náquiëꞌ Blasto naꞌ huen dxin nadéliꞌnëꞌ lataj lo lahuëꞌ Herodes.
Gulë́ꞌënnëꞌ bönniꞌ Tiro,
en Sidón naꞌ ilaꞌdxinëꞌ lahuëꞌ Herodes,
para ilaꞌnábinëꞌ lëꞌ ugáꞌana tsahuiꞌ didzaꞌ bizxaj quégaquiëꞌ.
21 Níꞌirö budxíëꞌ bëꞌ Herodes dza yönnëꞌ légaquiëꞌ,
ateꞌ dza naꞌ guröꞌë xilatjëꞌ ga ruchiꞌa rusörö́ëꞌ bi raca,
nácuëꞌ lariꞌ nazacaꞌ,
en benëꞌ libán lógaquiëꞌ.
22 Níꞌirö buluꞌlidzëꞌ zidzaj bönniꞌ naꞌ,
taꞌnnë́ꞌ:
―¡Calëga bö́nniꞌsö ni!
¡Dios caz ni ruꞌë didzaꞌ!
23 Laꞌ náꞌasö laꞌ bëꞌtëꞌ gubáz láꞌayi queëꞌ Xanruꞌ lëꞌ tuꞌ buziꞌë lë cazëꞌ yöl-laꞌ ba ral-laꞌ gaca queëꞌ Dios.
Níꞌirö guröꞌë Herodes naꞌ buzugaꞌ,
ateꞌ gútiëꞌ tuꞌ tágubaꞌ lëꞌ.
24 Níꞌirö guca libán que xtídzëꞌë Xanruꞌ,
ateꞌ gulaꞌyán nupa nazíꞌ lu náꞌagaca le.
Le zíꞌalö luzuí röjéngaquiëꞌ Bernabé, en Saulo libán
25 Cateꞌ Bernabé,
en Saulo chibuluꞌdödëꞌ dumí naꞌ lu náꞌagaquiëꞌ bönniꞌ gula tapa chiꞌë bönachi queëꞌ Cristo nacuꞌë Jerusalén,
buluꞌzë́ꞌë niꞌ,
yöjhuö́jgaquiëꞌ yödzö Antioquía.
Gulaꞌchë́ꞌë-biꞌ caꞌ biꞌi Juan,
zoa iaꞌtú labiꞌ Marcos.