Didzaꞌ bëꞌë Pedro lógaca bönachi queëꞌ Cristo nacuáꞌ Jerusalén
11
Bilaꞌyönnëꞌ gubáz nasö́l-lëꞌë Cristo,
en bö́chiꞌruꞌ nacuꞌë luyú Judea ca naꞌ bönniꞌ bitiꞌ nácagaquiëꞌ judío gulaꞌzíꞌ lu náꞌagaquiëꞌ xtídzëꞌë Dios.
2 Cateꞌ budxinëꞌ Pedro Jerusalén,
bö́chiꞌruꞌ judío gulaꞌdíl-lalenëꞌ lëꞌ didzaꞌ.
3 Gulë́ꞌ Pedro:
―¿Bizx que yöjtsúꞌulenuꞌ bönniꞌ bitiꞌ nácagaquiëꞌ judío,
en gudágulenuꞌ légaquiëꞌ tsözxö́n?
4 Níꞌirö gusí lahuëꞌ Pedro rusiyönnëꞌ légaquiëꞌ idútë lë naꞌ guca,
rnnëꞌ:
5 ―Guzóaꞌ lu yödzö Jope,
en cateꞌ niꞌ rulidzaꞌ-nëꞌ Dios,
biléꞌedaꞌ ca tu lu yëla bë́chigal tu le buluíꞌinëꞌ Dios nedaꞌ.
Biléꞌedaꞌ bötaj birúaj lúzxiba tu le naca ca tu lariꞌ guitsaꞌ zxön,
nagaꞌ idapa laꞌa,
ateꞌ bidxín ga naꞌ zoaꞌ.
6 Cateꞌ niꞌ ruyúaꞌ le para iléꞌedaꞌ le dxía láhuilö,
biléꞌegacadaꞌ-baꞌ böaꞌ guixiꞌ nacuáꞌ tapa níꞌagacabaꞌ,
yuguꞌ böaꞌ guixiꞌ síniaꞌ,
en böaꞌ táꞌayöj lë́ꞌegacabaꞌ lu yu,
en böaꞌ zoa xíligacabaꞌ.
7 Biyöndaꞌ chiꞌi nu gudxi nedaꞌ:
“Pedro,
guyasa.
Bëti-baꞌ,
en gudagu.”
8 Níꞌirö gudxaꞌ-nëꞌ:
“Bitiꞌ caꞌ,
Xan.
Catu caz gudahuaꞌ tu le cabí ral-laꞌ gágutuꞌ,
o tu le cabí naca dxiꞌa.”
9 Níꞌirö le buropi luzuí bulidza chiꞌi lúzxiba naꞌ nedaꞌ,
en gudxi nedaꞌ:
“Le nunëꞌ Dios dxiꞌa,
bitiꞌ innóꞌ bitiꞌ naca dxiꞌa.”
10 Tsonna luzuí guca caní,
ateꞌ níꞌirö idútë lë naꞌ biléꞌedaꞌ laꞌ buë́pitë lúzxiba.
11 Laꞌ níꞌisö bilaꞌdxintëꞌ tsonnëꞌ bönniꞌ raꞌ yuꞌu ga naꞌ zoaꞌ,
narúajgaquiëꞌ yödzö Cesarea,
nasö́l-lëꞌë légaquiëꞌ tu bönniꞌ lëꞌ Cornelio.
Sududíljagaquiëꞌ nedaꞌ.
12 Dios Böꞌ Láꞌayi gudxëꞌ nedaꞌ:
“Guyéajlen légaquiëꞌ,
en cabí gaca chopa ládxuꞌu.”
Lëscaꞌ izxópatëꞌ bö́chiꞌruꞌ ni gulaꞌzáꞌlenëꞌ nedaꞌ tsözxö́n.
Guyéajtuꞌ Cesarea,
ateꞌ guyaztuꞌ lidxëꞌ tu bönniꞌ zoëꞌ niꞌ.
13 Bönniꞌ niꞌ gudíxjöiꞌinëꞌ netuꞌ ca naꞌ biléꞌenëꞌ,
bidxinëꞌ tu gubáz láꞌayi queëꞌ Dios lu yuꞌu lidxëꞌ.
Guzuínëꞌ lahuëꞌ,
en gudxëꞌ lëꞌ:
“Naꞌa isö́l-laꞌgacuꞌ-nëꞌ bönniꞌ tsöjáquiëꞌ yödzö Jope,
tsöjlídzagaquiëꞌ Simón,
zoa iaꞌtú lëꞌ Pedro.
14 Bönniꞌ naꞌ usiyönnëꞌ liꞌ naca gaca ulóꞌ liꞌ,
en uluꞌlágaca caꞌ yúguꞌtë bönachi nacuáꞌ lidxuꞌ.”
15 Cateꞌ niꞌ gusí lahuaꞌ ruíꞌilenaꞌ légaquiëꞌ didzaꞌ,
bidisóalenëꞌ Dios Böꞌ Láꞌayi légaquiëꞌ ca naꞌ bidisóalenëꞌ rëꞌu zíꞌatëlö.
16 Níꞌirö yöjnedaꞌ didzaꞌ naꞌ bëꞌë Xanruꞌ,
gunnë́ꞌ:
“Le nácatë Juan buquilëꞌ bönachi nisa lu nisa,
pero libíꞌiliꞌ,
gaca queë́liꞌ le ruluíꞌisö yöl-laꞌ ridila nisa naꞌ,
idisóalenëꞌ Dios Böꞌ Láꞌayi libíꞌiliꞌ.”
17 Que lë ni naꞌ,
channö Dios gusö́l-lëꞌë Dios Böꞌ Láꞌayi quégaquiëꞌ,
laꞌ tuz ca benëꞌ queë́ruꞌ rëꞌu réajlëꞌëruꞌ Xanruꞌ Jesucristo,
¿núzxitë nedaꞌ inná béꞌedaꞌ-nëꞌ Dios?
18 Níꞌirö,
cateꞌ bilaꞌyönnëꞌ lë ni,
gulaꞌcuáꞌ dxíëꞌ,
en gulaꞌguꞌë Dios yöl-laꞌ ba,
taꞌnnë́ꞌ:
―Caní naca,
Dios ruꞌë lataj bönniꞌ bitiꞌ nácagaquiëꞌ judío,
tuꞌbíꞌi ládxiꞌgaquiëꞌ para ilaꞌdéliꞌnëꞌ yöl-laꞌ naꞌbán idú.
Yuguꞌ bönniꞌ nacuꞌë Antioquía taꞌyéajlëꞌë Cristo
19 Cateꞌ niꞌ yuguꞌ bönniꞌ judío bitiꞌ taꞌyéajlëꞌë gulútiëꞌ Esteban,
en gulaꞌbía ládxiꞌgaquiëꞌ iaꞌzícaꞌrö bönachi taꞌyéajlëꞌ Cristo,
buluꞌzxunnaj bönachi ni,
en gulásilasi zián yödzö luyú Fenicia,
en luyú Chipre,
en lu yödzö Antioquía.
Gulunëꞌ libán niꞌ que xtídzëꞌë Dios,
pero lógacasö bönachi judío.
20 Yuguꞌ bönniꞌ Chipre,
en yuguꞌ bönniꞌ Cirene,
gulaꞌcuáꞌlenëꞌ légaquiëꞌ,
ateꞌ yuguꞌ bönniꞌ ni,
cateꞌ bilaꞌdxinëꞌ lu yödzö Antioquía,
guluíꞌilenëꞌ caꞌ didzaꞌ yuguꞌ bönniꞌ izáꞌa.
Gulunëꞌ libán lógaquiëꞌ que didzaꞌ dxiꞌa ca naca queëꞌ Xanruꞌ Jesús.
21 Yöl-laꞌ huáca queëꞌ Xanruꞌ guzóalen légaquiëꞌ,
ateꞌ bönachi zián gulaꞌyéajlëꞌ Xanruꞌ,
en buluꞌhuöáca queëꞌ.
22 Cateꞌ bidxín didzaꞌ ca guca lë ni,
ateꞌ bilaꞌyönnëꞌ bönniꞌ queëꞌ Cristo nacuꞌë Jerusalén,
gulaꞌsö́l-lëꞌë Bernabé tséajëꞌ Antioquía naꞌ.
23 Cateꞌ Bernabé naꞌ bidxinëꞌ Antioquía,
biléꞌenëꞌ le ruzáꞌ ládxëꞌë Dios quégaquiëꞌ,
en budzéjanëꞌ.
Guchíziëꞌ icja nágagaquiëꞌ para ilaꞌdíaꞌticaꞌsëꞌ queëꞌ Xanruꞌ idú ládxiꞌgaquiëꞌ.
24 Náquiëꞌ Bernabé naꞌ tsahuiꞌ,
en idú zóalenëꞌ Dios Böꞌ Láꞌayi lëꞌ,
en idú ládxëꞌë réajlëꞌë Cristo.
Niꞌa que libán benëꞌ Bernabé naꞌ,
bönachi zián lu yödzö naꞌ gulaꞌyéajlëꞌ Xanruꞌ.
25 Gudödi niꞌ,
guyijëꞌ Bernabé naꞌ yödzö Tarso,
yöjdiljëꞌ Saulo.
Cateꞌ budzö́linëꞌ lëꞌ,
buchë́ꞌë lëꞌ Antioquía.
26 Idú ca tu iz gulaꞌcuꞌë niꞌ,
tunëꞌ tsözxö́n bönachi queëꞌ Cristo,
en tuꞌsë́dinëꞌ bönachi zián.
Lu yödzö Antioquía naꞌ,
gusí lo gulaꞌzíꞌ lágaquiëꞌ cristiano le rnna len didzaꞌ xidzaꞌ:
Bönachi Queëꞌ Cristo,
nupa niꞌ taꞌyéajlëꞌ Lëꞌ.
27 Dza niꞌ bilaꞌrúajëꞌ Jerusalén,
en yöjáquiëꞌ Antioquía bal-lëꞌ bönniꞌ tuꞌë didzaꞌ uláz queëꞌ Dios.
28 Guzuínëꞌ Agabo,
bönniꞌ dzáguiëꞌ yuguꞌ bönniꞌ naꞌ,
en uláz queëꞌ Dios Böꞌ Láꞌayi buzéajniꞌinëꞌ légaquiëꞌ,
gunnë́ꞌ:
―Siꞌ gaca gubín idútë yödzölió.
Guca gubín naꞌ cateꞌ niꞌ rinná bëꞌë Claudio,
lu yödzö Roma.
29 Níꞌirö gulaꞌzíꞌ lu náꞌagaquiëꞌ bönniꞌ taꞌyéajlëꞌë Cristo nacuꞌë Antioquía,
ilaꞌsö́l-lëꞌë tsca le dësö que queë́gaquiëꞌ,
le gácalen bö́chiꞌruꞌ nacuꞌë luyú Judea.
30 Caní gulunëꞌ,
ateꞌ lë naꞌ buluꞌnödzjëꞌ,
gulaꞌguꞌë lu náꞌagaquiëꞌ Bernabé,
en Saulo para iluꞌë le lógaquiëꞌ bönniꞌ gula tapa chiꞌë bönachi queëꞌ Cristo nacuꞌë Judea.