Le benëꞌ Pedro lidxëꞌ Cornelio
10
Zoëꞌ yödzö Cesarea tu bönniꞌ lëꞌ Cornelio,
bönniꞌ rinná béꞌenëꞌ tu gáyuꞌë bönniꞌ röjáquiëꞌ gudil-la,
nazíꞌi lágaquiëꞌ Bönniꞌ Italia Röjáquiëꞌ Gudil-la.
2 Cornelio naꞌ reaj ládxëꞌë Dios,
en rádxinëꞌ Lëꞌ,
ateꞌ yúguꞌtë bönachi nacuáꞌ lidxëꞌ núngaca lëꞌ tsözxö́n.
Runödzjëꞌ Cornelio dumí zián le rácalen bönachi yechiꞌ,
en rulídzaticaꞌsëꞌ Dios.
3 Tu dza idú ridödi xihuö́ biléꞌenëꞌ Cornelio ca tu lu yëla bë́chigal,
raziëꞌ tu gubáz láꞌayi queëꞌ Dios ga naꞌ zoëꞌ,
en rëꞌ lëꞌ:
―Cornelio.
4 Gúdxinëꞌ Cornelio.
Buyúëꞌ gubáz láꞌayi naꞌ,
en gudxëꞌ lëꞌ:
―¿Bizxi rnnoꞌ,
Xan?
Gubáz láꞌayi naꞌ gudxëꞌ lëꞌ,
rnnëꞌ:
―Dios riyönnëꞌ le rulidzuꞌ-nëꞌ,
en nö́zinëꞌ ca runuꞌ,
rácalenuꞌ bönachi yechiꞌ.
5 Naꞌa,
gusö́l-laꞌ yuguꞌ bönniꞌ tsöjáquiëꞌ yödzö Jope tsöjlídzagaquiëꞌ bönniꞌ naꞌ lëꞌ Simón,
zoa iaꞌtú lëꞌ Pedro.
6 Bönniꞌ ni zoëꞌ lidxëꞌ tu bönniꞌ runëꞌ tsahuiꞌ guídi zxa bëdxi.
Bönniꞌ ni,
lëscaꞌ lëꞌ Simón,
ateꞌ zoa lidxëꞌ raꞌ nísadoꞌ.
Pedro naꞌ guíëꞌ liꞌ le ral-laꞌ gunuꞌ.
7 Cateꞌ chibuzë́ꞌë gubáz láꞌayi naꞌ bë́ꞌlenëꞌ lëꞌ didzaꞌ,
bulidzëꞌ Cornelio chópabiꞌ biꞌi huen dxin queëꞌ,
en tuëꞌ bönniꞌ rejëꞌ gudil-la reaj ládxëꞌë Dios,
en dzáguiëꞌ bönachi nacuáꞌ lidxëꞌ Cornelio.
8 Cateꞌ budxi busiyönnëꞌ légaquiëꞌ yúguꞌtë le guca,
gusö́l-lëꞌë légaquiëꞌ yödzö Jope.
9 Dza buropi,
tsanni niꞌ yúꞌugaquiëꞌ nöza,
en taꞌdxinëꞌ galaꞌ ga dë Jope naꞌ,
laꞌ níꞌisö gurenëꞌ Pedro ícjoꞌolö yuꞌu para ulidzëꞌ Dios,
niꞌ naca idú huagubidza.
10 Laꞌ náꞌasö ridunëꞌ Pedro,
en gúꞌunnëꞌ gahuëꞌ,
ateꞌ tsanni niꞌ tuꞌpë́ꞌë queëꞌ,
biléꞌenëꞌ le naca ca tu lu yëla bë́chigal.
11 Biléꞌenëꞌ nayalaj lúzxiba,
en ruhuötaj tu le naca ca tu lariꞌ guitsaꞌ zxön ga zoëꞌ,
le nagaꞌ idapa laꞌa.
12 Lahui lariꞌ naꞌ dxíagacabaꞌ yuguꞌ böaꞌ guixiꞌ izáꞌa nacuáꞌ tapa niꞌa náꞌagacabaꞌ,
en yuguꞌ böaꞌ táꞌayöj lë́ꞌegacabaꞌ lu yu,
en yuguꞌ böaꞌ zoa xíligacabaꞌ.
13 Níꞌirö biyönnëꞌ chiꞌi nu rë lëꞌ:
―Pedro,
guyasa.
Bë́ti-gacabaꞌ,
en gudagu.
14 Bubiꞌë didzaꞌ Pedro,
rnnëꞌ:
―¡Calëga,
Xan!
Catu caz gudahuaꞌ le cabí ral-laꞌ gágutuꞌ,
o le cabí naca dxiꞌa.
15 Le buropi luzuí biyönnëꞌ chiꞌi nu naꞌ gudxi lëꞌ:
―Le nunëꞌ Dios dxiꞌa,
bitiꞌ innóꞌ que:
“Bitiꞌ naca dxiꞌa.”
16 Tsonna luzuí guca caní,
ateꞌ níꞌirö laꞌ buë́pitë lariꞌ zxön naꞌ lúzxiba.
17 Tsanni niꞌ röꞌë böniga Pedro,
rizáꞌ ládxëꞌë bizxi saꞌyéaj lë naꞌ biléꞌenëꞌ ca tu lu yëla bë́chigal,
bilaꞌdxinëꞌ bönniꞌ naꞌ nasö́l-lëꞌë Cornelio légaquiëꞌ raꞌ yuꞌu,
taꞌnabëꞌ gazxi zoa lidxëꞌ Simón naꞌ.
18 Cateꞌ bilaꞌdxinëꞌ niꞌ,
buluꞌlidzëꞌ nupa nacuáꞌ yuꞌu naꞌ,
en gulaꞌnábinëꞌ légaquiëꞌ channö zoëꞌ tu bönniꞌ lëꞌ Simón niꞌ,
zoa iaꞌtú lëꞌ Pedro.
19 Tsanni niꞌ rizáꞌ ládxëꞌë Pedro ca naca lë naꞌ biléꞌenëꞌ,
Dios Böꞌ Láꞌayi gudxëꞌ lëꞌ,
rnnëꞌ:
―Buyútsöcaꞌ.
Chibilaꞌdxinëꞌ tsonnëꞌ bönniꞌ ni,
tuꞌguiljëꞌ liꞌ.
20 Guyaschi naꞌa,
en bötaj zxan yuꞌu.
Bitiꞌ gaca chopa ládxuꞌu tséajlenuꞌ légaquiëꞌ,
tuꞌ nasö́l-laꞌa nedaꞌ yuguꞌ bönniꞌ ni.
21 Níꞌirö bötjëꞌ Pedro zxan yuꞌu ga naꞌ nacuꞌë bönniꞌ naꞌ nasö́l-lëꞌë Cornelio,
en gudxëꞌ légaquiëꞌ:
―Nedaꞌ bönniꞌ ruguílajliꞌ.
¿Bizxi huen záꞌaliꞌ ni?
22 Buluꞌbiꞌë didzaꞌ,
tëꞌ lëꞌ:
―Cornelio,
tu bönniꞌ rinná béꞌenëꞌ bönniꞌ röjáquiëꞌ gudil-la,
nasö́l-lëꞌë netuꞌ.
Náquiëꞌ bönniꞌ tsahuiꞌ,
en rádxinëꞌ Dios.
Yúguꞌtë bönniꞌ judío tunëꞌ bal bönniꞌ ni,
en nadxíꞌiguequinëꞌ lëꞌ.
Iaꞌtú le guca,
tu gubáz láꞌayi queëꞌ Dios bë́ꞌlenëꞌ lëꞌ didzaꞌ,
en gudxëꞌ lëꞌ isö́l-lëꞌë nu udulídza liꞌ guíduꞌ lidxëꞌ para yönnëꞌ didzaꞌ guꞌu.
23 Níꞌirö Pedro guluꞌë légaquiëꞌ lu yuꞌu,
en bëꞌë ga ilaꞌcuꞌë.
Cateꞌ zaꞌ reníꞌ iaꞌtú dza,
guyasëꞌ Pedro,
en guyéajlenëꞌ légaquiëꞌ.
Bal-lëꞌ bö́chiꞌruꞌ nacuꞌë Jope naꞌ gulunëꞌ lëꞌ tsözxö́n.
24 Dza bunni niꞌ,
bilaꞌdxinëꞌ Cesarea.
Chizóëꞌ Cornelio ribözëꞌ légaquiëꞌ,
ateꞌ chinutubëꞌ yuguꞌ diꞌa dza queëꞌ,
en yuguꞌ böchiꞌ luzë́ꞌë nadxíꞌirönëꞌ lidxëꞌ.
25 Cateꞌ guyáziëꞌ Pedro löꞌa,
birúajëꞌ Cornelio yuꞌu,
yöjtságuiëꞌ lëꞌ.
Biyéchuëꞌ xiniꞌë Pedro,
en guyéaj ládxëꞌë lëꞌ ca runruꞌ queëꞌ Dios caz.
26 Pedro buchisëꞌ lëꞌ,
en gudxëꞌ lëꞌ:
―Guyasa.
Lëscaꞌ bönachi yödzölió nacaꞌ ca nacuꞌ liꞌ.
27 Niꞌ tuíꞌisëꞌ caꞌ didzaꞌ,
guyázatëꞌ Pedro yuꞌu,
en yöjxáquiëꞌ nudúbigaca bönachi zián niꞌ.
28 Níꞌirö Pedro gudxëꞌ légaquiëꞌ,
rnnëꞌ:
―Libiꞌiliꞌ nöz quéziliꞌ ca rinná bëꞌ xibá queëꞌ Moisés,
rnna bitiꞌ ral-laꞌ gunëꞌ tu bönniꞌ judío tsözxö́n o tsázalenëꞌ nu bönniꞌ izáꞌa.
Naꞌa,
Dios buluíꞌinëꞌ nedaꞌ bitiꞌ ral-laꞌ inníaꞌ queëꞌ nitúëꞌ bönniꞌ náquiëꞌ cáꞌasö o bitiꞌ náquiëꞌ dxiꞌa.
29 Que lë ni naꞌ cateꞌ bulídzaliꞌ nedaꞌ,
laꞌ bídateaꞌ,
en bitiꞌ guca chopa ládxaꞌa.
Rinabaꞌ naꞌa,
¿bizx que naꞌ bulídzaliꞌ nedaꞌ?
30 Níꞌirö bubiꞌë didzaꞌ Cornelio,
gunnë́ꞌ:
―Chiguca tapa dza ca zóaruꞌ naꞌa,
idú ridödi xihuö́,
cateꞌ niꞌ runaꞌ gubasa,
en rulidzaꞌ-nëꞌ Dios lu yuꞌu lidxaꞌ ni,
biléꞌedaꞌ-biꞌ tubiꞌ bönniꞌ raꞌbán nácubiꞌ lariꞌ rëpi yösa beníꞌ,
duluíꞌi lobiꞌ nedaꞌ.
31 Caní gúdxibiꞌ nedaꞌ:
“Cornelio.
Dios riyönnëꞌ le rulidzuꞌ-nëꞌ,
en nö́zinëꞌ ca runuꞌ,
rácalenuꞌ yuguꞌ bönachi yechiꞌ.
32 Naꞌa,
isö́l-luꞌu nu bönniꞌ lu yödzö Jope para tsöjlídzëꞌ tu bönniꞌ lëꞌ Simón,
zoa iaꞌtú lëꞌ Pedro.
Bönniꞌ ni zoëꞌ lidxëꞌ tu bönniꞌ runëꞌ tsahuiꞌ guídi zxa bëdxi,
en lëꞌ caꞌ Simón.
Zoa lidxëꞌ bönniꞌ ni raꞌ nísadoꞌ.
Cateꞌ idxinëꞌ Pedro naꞌ ga zuꞌ,
usiyönnëꞌ liꞌ didzaꞌ dxiꞌa.”
33 Caní guca,
laꞌ gusö́l-laꞌteaꞌ nu tsöjlidzaꞌ liꞌ,
ateꞌ tsáhuiꞌdoꞌ benuꞌ biduꞌ ga zóatuꞌ ni.
Que lë ni naꞌ zóatuꞌ ni yúguꞌtëtuꞌ,
nudúbituꞌ lahuëꞌ Dios para uzë́ nágatuꞌ le inná béꞌenëꞌ Dios liꞌ innóꞌ.
Didzaꞌ bëꞌë Pedro lidxëꞌ Cornelio
34 Níꞌirö gusí lahuëꞌ Pedro ruꞌë didzaꞌ,
rnnëꞌ:
―Le nácatë réajniꞌidaꞌ naꞌa,
bitiꞌ ruyusëꞌ Dios yöl-laꞌ rinnësö quégaca bönachi,
pero tuz ca riléꞌenëꞌ rëꞌu.
35 Dios raza ládxëꞌë bönachi idútë yödzölió,
nupa naꞌ tadxi Lëꞌ,
en tun le naca dxiꞌa.
36 Gusö́l-lëꞌë Dios xtídzëꞌë ga nacuáꞌ bönachi Israel,
en gusö́l-lëꞌë nu ben libán que didzaꞌ dxiꞌa,
le run ga raca dxiꞌa quégaca bönachi,
lë naꞌ bidxín queë́ruꞌ lu nëꞌë Jesucristo.
Lë cazëꞌ náquiëꞌ Xanruꞌ yúguꞌtëruꞌ.
37 Libíꞌiliꞌ nöz quéziliꞌ lë naꞌ guca luyú Judea,
le gusí lo guca luyú Galilea gudödi benëꞌ libán Juan para ilaꞌdila bönachi nisa.
38 Nö́ziliꞌ ca benëꞌ Dios le guca queëꞌ Jesús,
bönniꞌ Nazaret.
Gusö́l-lëꞌë Dios Böꞌ Láꞌayi,
en yöl-laꞌ huáca queëꞌ para sóalengaca Lëꞌ.
Nö́ziliꞌ ca naꞌ gudë́ꞌ Jesús,
runëꞌ le naca tsahuiꞌ,
en ruúnëꞌ yúguꞌtë nupa gulaꞌguíꞌi gulaꞌzacaꞌ lu naꞌ tuꞌ xihuiꞌ.
Caní benëꞌ,
tuꞌ guzóalenëꞌ Dios Lëꞌ.
39 Naꞌa,
netuꞌ runtuꞌ ba nalí que yúguꞌtë lë naꞌ benëꞌ Jesús luyú Judea,
en lu yödzö Jerusalén,
en ca naꞌ guca,
gulútiëꞌ Jesús,
cateꞌ buluꞌdë́ꞌë Lëꞌ lëꞌe yaga cruz.
40 Níꞌirö Dios busubanëꞌ Lëꞌ cateꞌ guca tsonna dza nátiëꞌ,
en benëꞌ ga buluíꞌi lahuëꞌ ga zóatuꞌ netuꞌ.
41 Bitiꞌ buluíꞌi lahuëꞌ lógaca yúguꞌtë bönachi,
pero lotuꞌ netuꞌ buluíꞌi lahuëꞌ.
Dios gurö́ëꞌ netuꞌ dza niꞌte para guntuꞌ ba nalí queëꞌ Jesús,
ateꞌ güíꞌi gudágulentuꞌ Lëꞌ tsözxö́n gudödi bubanëꞌ lu yöl-laꞌ guti.
42 Gunná béꞌenëꞌ Dios netuꞌ guntuꞌ libán lógaca bönachi,
ateꞌ runtuꞌ ba nalí queëꞌ Cristo,
náquiëꞌ Nu buzóa cazëꞌ Dios para uchiꞌa usörö́ëꞌ nupa nabángaca,
en nupa chinátigaca.
43 Lëscaꞌ yúguꞌtë bönniꞌ guluꞌë didzaꞌ uláz queëꞌ Dios gulunëꞌ ba nalí queëꞌ Jesús,
gulaꞌnnë́ꞌ:
“Yúguꞌtë nupa ilaꞌyéajlëꞌ Lëꞌ,
Dios uniti lahuëꞌ dul-laꞌ nabágaꞌgaquiëꞌ niꞌa que le benëꞌ Lëꞌ.”
Dios Böꞌ Láꞌayi ridisóalenëꞌ bönachi izáꞌa
44 Niꞌ ruíꞌisëꞌ caní didzaꞌ Pedro,
laꞌ bidxintëꞌ Dios Böꞌ Láꞌayi,
bidisóalenëꞌ légaquiëꞌ,
yúguꞌtë nupa niꞌ taꞌyöni libán runëꞌ lëꞌ.
45 Gulaꞌnáꞌ badxëꞌ bönniꞌ judío taꞌyéajlëꞌë Cristo,
nupa naꞌ bilaꞌdxín niꞌ tsözxö́n len Pedro,
tuꞌ bidëꞌ Dios Böꞌ Láꞌayi,
Nu naꞌ nasö́l-lëꞌë Dios Xuz.
Bidisóalenëꞌ bönachi niꞌ bitiꞌ nácagaca judío.
46 Caní gulunëꞌ tuꞌ bilaꞌyönnëꞌ tuꞌë bönniꞌ ziꞌtuꞌ naꞌ didzaꞌ yúbölö,
en tunëꞌ Dios zxön.
47 Níꞌirö bëꞌë didzaꞌ Pedro,
gunnë́ꞌ:
―¿Naruꞌ huácatsö nu inná beꞌe bönachi ni para cabí ilaꞌdila nisa?
Naca bëꞌ Dios Böꞌ Láꞌayi bidisóalenëꞌ légaquiëꞌ,
ca naꞌ bidisóalenëꞌ netuꞌ.
48 Gunná bëꞌë Pedro ilaꞌdilëꞌ nisa tuꞌ nazíꞌ lu náꞌagaquiëꞌ Lëꞌ Xanruꞌ Jesús.
Níꞌirö yuguꞌ bönniꞌ niꞌ gulátaꞌyuëꞌ lahuëꞌ Pedro ugáꞌanalenëꞌ légaquiëꞌ ca chopa tsonna dza.