Saulo ruhuöáquiëꞌ queëꞌ Cristo
9
Niꞌ ruzenëꞌ bach Saulo nupa taꞌyéajlëꞌ Xanruꞌ,
gúꞌunnëꞌ gútiëꞌ légaquiëꞌ.
Para gunëꞌ caní bidxinëꞌ lahuëꞌ bixúz lo,
2 en gunábinëꞌ lëꞌ tu guichi unná bëꞌ,
le tsöjuꞌë lógaquiëꞌ bönniꞌ unná bëꞌ quégaca yuꞌu gapa tuꞌdubëꞌ bönniꞌ judío,
en tuꞌsëdëꞌ queëꞌ Dios lu yödzö Damasco,
ateꞌ channö utsöjxáquiëꞌ yuguꞌ bönniꞌ,
en nigula taꞌyéajlëꞌë Jesús niꞌ,
gaca ichë́ꞌë légaquiëꞌ nadzúngaquiëꞌ lu yödzö Jerusalén.
3 Tsanni niꞌ yúꞌugaquiëꞌ nöza Saulo,
en nupa nacuáꞌlen lëꞌ,
söjáquiëꞌ,
en cateꞌ chizóa ilaꞌdxinëꞌ Damasco,
tsálidoꞌos buzeniꞌdaꞌ tu beníꞌ zaꞌ lúzxiba,
le buzeníꞌ ga niꞌ söjáquiëꞌ.
4 Níꞌirö gudzöꞌë Saulo lu yu,
en biyönnëꞌ chiꞌi Nu rë lëꞌ:
―Saulo,
Saulo,
¿bizx que ribía ládxuꞌu nedaꞌ?
5 Saulo gunábinëꞌ Lëꞌ,
gunnë́ꞌ:
―¿Nuzxi liꞌ,
Xan?
Lëꞌ gunnë́ꞌ:
―Nedaꞌ Jesús,
Nu ribía ládxuꞌu.
Run ziꞌ cuinuꞌ,
ridáꞌbaguꞌu nedaꞌ.
Raca quiuꞌ ca naꞌ raca queë́baꞌ bëdxi,
run ziꞌ cuinbaꞌ richéguꞌbaꞌ yaga tuchiꞌ túndëꞌë-baꞌ ziꞌ.
6 Níꞌirö Saulo guzxízidëꞌë,
gúdxinëꞌ,
en gunnë́ꞌ:
―Xan,
¿bizxi rë́ꞌënuꞌ gunaꞌ?
Xanruꞌ gudxëꞌ lëꞌ:
―Guyasa,
en guyáz lu yödzö,
ateꞌ niꞌ isö́l-laꞌa quiuꞌ nu guíë liꞌ le ral-laꞌ gunuꞌ.
7 Guládxinëꞌ yuguꞌ bönniꞌ naꞌ söjácalenëꞌ Saulo,
tuꞌ bilaꞌyönnëꞌ chiꞌi naꞌ,
sal-laꞌ cuntu nu bilaꞌléꞌenëꞌ.
8 Níꞌirö böasëꞌ Saulo luyú,
en cateꞌ guxáꞌ guiö́j lahuëꞌ,
bitiꞌ caꞌ riléꞌenëꞌ.
Que lë ni naꞌ gulaꞌguélëꞌë nëꞌë,
en gulaꞌchë́ꞌë lëꞌ Damasco.
9 Guzóëꞌ niꞌ tsonna dza nachul-la lahuëꞌ,
en bitiꞌ bi güíꞌi gudahuëꞌ.
10 Zoëꞌ caꞌ Ananías,
bönniꞌ réajlëꞌë Cristo,
yödzö Damasco,
ateꞌ Xanruꞌ buluíꞌi lahuëꞌ ga zoëꞌ ca tu lu yëla bë́chigal,
en gudxëꞌ lëꞌ:
―Ananías.
Lëꞌ bubiꞌë didzaꞌ,
gunnë́ꞌ:
―Ni zoaꞌ,
Xan.
11 Xanruꞌ gudxëꞌ lëꞌ:
―Guyasa,
en guyéaj ga naca laꞌ nöza naꞌ nazíꞌi le Nöza Li,
ateꞌ lu yuꞌu lidxëꞌ Judas gunaba didzaꞌ queëꞌ Saulo,
bönniꞌ Tarso.
Lu yuꞌu naꞌ rulidzëꞌ Dios.
12 Chibiléꞌenëꞌ tu bönniꞌ ca tu lu yëla bë́chigal zëꞌë tsáziëꞌ ga zoëꞌ,
lëꞌ Ananías,
en ixóa nëꞌë lëꞌ para huöálaj guiö́j lahuëꞌ.
13 Níꞌirö bubiꞌë didzaꞌ Ananías,
rëꞌ Lëꞌ:
―Xan,
zián nupa chibuluꞌsiyö́nnëꞌ nedaꞌ ca runëꞌ bönniꞌ ni,
zián le naca döꞌ nuꞌë le benëꞌ quégaca bönachi taꞌyéajlëꞌ Liꞌ,
nacuáꞌ Jerusalén.
14 Zëꞌë caꞌ ni,
dë lu nëꞌë uláz quégaquiëꞌ bixúz unná bëꞌ sönëꞌ yúguꞌtë nupa tuꞌlidza Dios len Loꞌ Liꞌ.
15 Níꞌirö Xanruꞌ rëꞌ Ananías naꞌ,
rnnëꞌ:
―Guyéaj,
tuꞌ gurö́ cazaꞌ nedaꞌ bönniꞌ ni para gunëꞌ libán ca naca quiaꞌ lógaca bönachi izáꞌa,
en lógaquiëꞌ bönniꞌ taꞌnná béꞌenëꞌ légaquiëꞌ,
encaꞌ lógaca bönachi Israel.
16 Uluíꞌidaꞌ lëꞌ le zián le quiꞌi sáquëꞌë uláz quiaꞌ nedaꞌ,
gunëꞌ xichinaꞌ.
17 Níꞌirö guyijëꞌ Ananías niꞌ,
ateꞌ guyáziëꞌ yuꞌu,
en guxóa nëꞌë Saulo,
ateꞌ rëꞌ lëꞌ:
―Böchaꞌa Saulo,
Xanruꞌ Jesús,
Nu naꞌ buluíꞌi lahui laꞌ nöza ga niꞌ zoꞌo,
gusö́l-lëꞌë nedaꞌ para huöálaj guiö́j loꞌ,
en idisóalenëꞌ Dios Böꞌ Láꞌayi liꞌ.
18 Laꞌ níꞌisö gulaꞌguínnaj le naca ca xilácubaꞌ böla lu guiö́j lahuëꞌ,
ateꞌ laꞌ böáljatë guiö́j lahuëꞌ.
Níꞌirö guyasëꞌ Saulo,
en bidilëꞌ nisa.
19 Gudödi niꞌ gudahuëꞌ,
en böáca ládxëꞌë.
Ca chopa tsonna dza guzóalenëꞌ yuguꞌ bönniꞌ taꞌyéajlëꞌë Cristo nacuꞌë Damasco.
Runëꞌ libán Saulo lu yödzö Damasco
20 Laꞌ gusí lotëꞌ Saulo runëꞌ libán queëꞌ Cristo gapa naca lu yuꞌu ga tuꞌdubëꞌ bönniꞌ judío,
en tuꞌsëdëꞌ queëꞌ Dios,
rnnëꞌ:
―Jesús náquiëꞌ Zxíꞌini cazëꞌ Dios.
21 Buluꞌbáninëꞌ yúguꞌtë bönniꞌ niꞌ taꞌyönnëꞌ lëꞌ,
taꞌnnë́ꞌ:
―¿Naruꞌ calëga bönniꞌ ni bönniꞌ naꞌ busunítiëꞌ nupa nacuáꞌ Jerusalén,
en tuꞌlidza Dios lu Lëꞌ Jesús?
Para gunëꞌ caní bidëꞌ caꞌ ni para ichë́ꞌë légaquiëꞌ nadzúngaquiëꞌ lógaquiëꞌ bixúz unná bëꞌ.
22 Bidíparö ládxëꞌë Saulo,
en benëꞌ ga gulaꞌböꞌë böniga bönniꞌ judío nacuꞌë Damasco,
tuꞌ buluíꞌinëꞌ légaquiëꞌ Jesús naca cazëꞌ Cristo,
bönniꞌ naꞌ tunëꞌ löza idinná béꞌenëꞌ légaquiëꞌ.
Rulë́ꞌ Saulo lu náꞌagaquiëꞌ bönniꞌ judío
23 Cateꞌ chigudödi zián dza,
gulún xtídzaꞌgaquiëꞌ bönniꞌ judío nacuꞌë niꞌ ilútiëꞌ Saulo.
24 Rëla,
en të dza gulaꞌbö́ꞌ nísiëꞌ yuguꞌ bönniꞌ judío ga nu ridödi lu zöꞌö run chiꞌi yödzö naꞌ para ilútiëꞌ lëꞌ,
pero gúquibeꞌenëꞌ Saulo le të́ꞌënnëꞌ ilunëꞌ queëꞌ.
25 Níꞌirö yuguꞌ bönniꞌ taꞌyéajlëꞌë Cristo gulaꞌguélëꞌë Saulo chiꞌi dzö́ꞌölö,
ateꞌ gulaꞌguꞌë lëꞌ tu lu gaꞌböra zxön nagaꞌ du,
en buluꞌzötjëꞌ lëꞌ níꞌilö lu zöꞌö run chiꞌi yödzö naꞌ.
Rudxinëꞌ Saulo Jerusalén
26 Cateꞌ budxinëꞌ Saulo Jerusalén,
gúꞌunnëꞌ tsöjenëꞌ tsözxö́n bönniꞌ niꞌ taꞌyéajlëꞌë Cristo,
pero yúguꞌtëꞌ guládxinëꞌ lëꞌ,
tuꞌ cabí téquinëꞌ réajlëꞌë Saulo naꞌ Cristo.
27 Níꞌirö bönniꞌ naꞌ lëꞌ Bernabé gudélëꞌë Saulo,
en guchë́ꞌë lëꞌ ga naꞌ nacuꞌë bönniꞌ gubáz nasö́l-lëꞌë Cristo.
Busiyönnëꞌ légaquiëꞌ ca naꞌ guca queëꞌ Saulo,
biléꞌenëꞌ Xanruꞌ laꞌ nöza,
ateꞌ Xanruꞌ caz bë́ꞌlenëꞌ lëꞌ didzaꞌ,
en ca naꞌ benëꞌ Saulo lu yödzö Damasco,
len yöl-laꞌ rugu ladxiꞌ benëꞌ libán ca naca queëꞌ Jesús.
28 Níꞌirö Saulo guzóalenëꞌ légaquiëꞌ lu yödzö Jerusalén,
ateꞌ gudálenëꞌ légaquiëꞌ tsözxö́n.
29 Lu yöl-laꞌ rugu ladxiꞌ benëꞌ libán Saulo ca naca queëꞌ Xanruꞌ,
en gudíl-lalenëꞌ didzaꞌ bönniꞌ judío tuꞌë didzaꞌ griego,
ateꞌ légaquiëꞌ gulaꞌzóa gulaꞌböꞌë ilútiëꞌ lëꞌ.
30 Cateꞌ guléquibeꞌenëꞌ bö́chiꞌruꞌ taꞌyéajlëꞌë Cristo lë ni,
gulaꞌchë́ꞌë Saulo lu yödzö Cesarea,
ateꞌ gulaꞌsö́l-lëꞌë lëꞌ yödzö Tarso,
le naca ladzëꞌ Saulo.
31 Níꞌirö guca tsahuiꞌ quégaca yúguꞌtë cöꞌ bönachi queëꞌ Cristo,
nacuáꞌ idú luyú Judea,
en luyú Galilea,
en luyú Samaria,
ateꞌ bilaꞌdipa ládxiꞌgaquiëꞌ.
Gulaꞌcuꞌë lu yöl-laꞌ radxi quégaquiëꞌ Xanruꞌ,
ateꞌ gulaꞌyanëꞌ tuꞌ gúcalenëꞌ Dios Böꞌ Láꞌayi légaquiëꞌ.
Pedro ruúnëꞌ tu bönniꞌ lëꞌ Eneas
32 Iaꞌtú le guca,
cateꞌ Pedro yöjyúëꞌ yuguꞌ bö́chiꞌruꞌ,
bidxinëꞌ ga nacuꞌë bönniꞌ taꞌyéajlëꞌë Jesús lu yödzö Lida.
33 Yöjxáquiëꞌ tu bönniꞌ niꞌ lëꞌ Eneas,
chiguca xunuꞌ iz dëꞌ réꞌenëꞌ,
nacúꞌuniëꞌ bin.
34 Pedro gudxëꞌ lëꞌ:
―Eneas,
Jesucristo ruúnëꞌ liꞌ.
Guyasa,
en butubi xtoꞌo.
Laꞌ guyásatëꞌ Eneas naꞌ.
35 Yúguꞌtë nupa nacuáꞌ yödzö Lida,
en yödzö Sarón bilaꞌléꞌe lëꞌ,
ateꞌ buluꞌhuöáca queëꞌ Xanruꞌ,
tuꞌ chitaꞌyéajlëꞌ Lëꞌ.
Rátinu Dorcas, en rubannu
36 Iaꞌstú le guca,
lu yödzö Jope zóanu tu nigula réajlëꞌënu Cristo,
lënu Tabita,
en ca naca didzaꞌ griego lënu Dorcas.
Bennu nigula ni zián le nácagaca dxiꞌa le tácalen bönachi yechiꞌ.
37 Le guca dza niꞌ,
güíꞌinu Dorcas naꞌ,
en gútinu.
Gudödi gulaꞌguíbinu lënu,
gulaꞌguíxjëꞌ-nu tu lu yuꞌu ga naca buropi cuía.
38 Tuꞌ dë yödzö Lida gálaꞌsö ga naꞌ dë yödzö Jope,
ga naꞌ zoëꞌ Pedro,
bilaꞌyönnëꞌ bönniꞌ Jope naꞌ taꞌyéajlëꞌë Cristo zoëꞌ Pedro niꞌ,
ateꞌ que lë ni naꞌ gulaꞌsö́l-lëꞌë chopëꞌ bönniꞌ ga naꞌ zoëꞌ,
ateꞌ gulátaꞌyuëꞌ lahuëꞌ,
tëꞌ lëꞌ:
―Bitiꞌ tsenuꞌ guíduꞌ queë́tuꞌ.
39 Níꞌirö laꞌ guyásatëꞌ Pedro,
saꞌyéajlenëꞌ légaquiëꞌ.
Cateꞌ bidxinëꞌ niꞌ,
laꞌ gulaꞌchëꞌtëꞌ lëꞌ ga naca lu yuꞌu ga dënu nigula nati naꞌ.
Níꞌirö yuguꞌ nigula uzëbi buluꞌdúbinu gásibiꞌilëꞌ,
taꞌbö́dxinu,
en tuꞌluíꞌinu lëꞌ lariꞌ quégaquiëꞌ bönniꞌ,
en nigula,
yuguꞌ le bennu Dorcas cateꞌ niꞌ zóalennu légacanu.
40 Níꞌirö Pedro bubéajëꞌ níꞌilö yúguꞌtë nupa nacuáꞌ niꞌ,
ateꞌ buzóa zxibëꞌ,
rulidzëꞌ Dios.
Níꞌirö buécjëꞌ ga dënu Dorcas naꞌ,
gunnë́ꞌ:
―Tabita,
guyasa.
Laꞌ buxaꞌtë guiö́j lonu Dorcas.
Cateꞌ biléꞌenu-nëꞌ Pedro,
laꞌ guyástënu,
gurö́ꞌönu.
41 Gudélëꞌë Pedro náꞌanu,
en buchisëꞌ-nu.
Níꞌirö bulidzëꞌ bönniꞌ naꞌ taꞌyéajlëꞌë Jesús,
len yuguꞌ nigula uzëbi naꞌ,
ateꞌ busudxinëꞌ Dorcas naꞌ lógaquiëꞌ,
nabannu.
42 Ca guca lë ni guzë́ didzaꞌ idú lu yödzö Jope,
ateꞌ gulaꞌyéajlëꞌ bönachi zián Xanruꞌ Jesús.
43 Bugáꞌanëꞌ Pedro yödzö Jope naꞌ zián dza lu yuꞌu lidxëꞌ Simón,
bönniꞌ runëꞌ tsahuiꞌ guídi zxa bëdxi.