Taꞌbö́ëꞌ gadxi bönniꞌ para ilácalenëꞌ bönachi queëꞌ Cristo
6
Dza niꞌ,
tuꞌ gulaꞌyán bönachi taꞌyéajlëꞌ Cristo,
yuguꞌ bönniꞌ judío tuꞌë didzaꞌ griego gulaꞌnnë́ꞌ quégaquiëꞌ bönniꞌ judío tuꞌë didzaꞌ hebreo tuꞌ nözi le raca cateꞌ taꞌguísiëꞌ le ilágunu nigula uzëbi,
tuꞌ cuntu nu ruíꞌi le ilágunu nigula uzëbi quégaquiëꞌ bönniꞌ niꞌ tuꞌë didzaꞌ griego.
2 Níꞌirö idxínnutëꞌ bönniꞌ gubáz naꞌ nasö́l-lëꞌë Cristo buluꞌtubëꞌ yúguꞌtë bönachi niꞌ taꞌyéajlëꞌ Cristo,
ateꞌ tëꞌ légaquiëꞌ:
―Bitiꞌ naca dxiꞌa soa dxituꞌ,
en cabí guntuꞌ libán que xtídzëꞌë Dios,
para guntuꞌ dxin cúꞌutuꞌ le ilágugaca bönachi.
3 Que lë ni naꞌ,
böchiꞌ luzáꞌatuꞌ,
guliꞌcö́ gadxëꞌ bönniꞌ ládjaliꞌ,
para ugúꞌuruꞌ lu náꞌagaquiëꞌ dxin ni.
Yuguꞌ bönniꞌ naꞌ run bayudxi ilácagaquiëꞌ bönniꞌ tun yúguꞌtë bönachi légaquiëꞌ bal,
en nácagaquiëꞌ bönniꞌ taꞌyéajniꞌi,
en naca bëꞌ Dios Böꞌ Láꞌayi zóalenëꞌ légaquiëꞌ.
4 Netuꞌ ni ulídzaticaꞌstuꞌ-nëꞌ Dios,
en usédituꞌ bönachi xtídzëꞌë Dios.
5 Yúguꞌtëꞌ gulaꞌyaza ládxiꞌgaquiëꞌ didzaꞌ ni,
ateꞌ gulaꞌbö́ëꞌ Esteban,
tu bönniꞌ réajlëꞌë Cristo idú ládxëꞌë,
en zóalenëꞌ Dios Böꞌ Láꞌayi lëꞌ.
Lëscaꞌ gulaꞌbö́ëꞌ Felipe,
en Prócoro,
en Nicanor,
en Timón,
en Parmenas,
en Nicolás,
bönniꞌ yödzö Antioquía,
bönniꞌ zíꞌalö butsë́ꞌë ca runëꞌ para tseaj ládxëꞌë Dios ca tunëꞌ yuguꞌ bönniꞌ judío.
6 Níꞌirö buluꞌsudxinëꞌ bönniꞌ naꞌ gulaꞌbö́ëꞌ lógaquiëꞌ gubáz naꞌ nasö́l-lëꞌë Cristo.
Yuguꞌ bönniꞌ gubáz naꞌ gulaꞌxóa náꞌagaquiëꞌ légaquiëꞌ,
niꞌ tuꞌlidzëꞌ Dios.
7 Guzërö xtídzëꞌë Xanruꞌ,
ateꞌ gulaꞌyandaꞌ bönachi taꞌyéajlëꞌ Cristo nacuáꞌ Jerusalén.
Lëscaꞌ zián bixúz judío gulaꞌzíꞌ lu náꞌagaquiëꞌ le réajlëꞌëruꞌ Cristo.
Taꞌzönëꞌ Esteban
8 Esteban naꞌ benëꞌ le tun ga rubániruꞌ,
en yuguꞌ le taca bëꞌ lógaca bönachi lu yödzö,
zóalen yöl-laꞌ huáca queëꞌ Dios lëꞌ le buzáꞌ ládxëꞌë queëꞌ.
9 Níꞌirö gulaꞌyasëꞌ bal-lëꞌ bönniꞌ nabábagaquiëꞌ yuꞌu ga tuꞌdubëꞌ bönniꞌ judío,
en tuꞌsëdëꞌ queëꞌ Dios,
nazíꞌi le Yuꞌu Quégaquiëꞌ Bönniꞌ Nadzángaquiëꞌ.
Bönniꞌ narúajgaquiëꞌ yödzö Cirene,
en yödzö Alejandría,
en luyú Cilicia,
en luyú Asia,
gulunëꞌ légaquiëꞌ tsözxö́n.
Bönniꞌ ni gulaꞌdíl-lalenëꞌ Esteban didzaꞌ.
10 Bitiꞌ guca táꞌbagaꞌgaquiëꞌ didzaꞌ ruꞌë Esteban naꞌ,
tuꞌ bëꞌë didzaꞌ len yöl-laꞌ réajniꞌi,
tuꞌ zóalenëꞌ Dios Böꞌ Láꞌayi lëꞌ.
11 Níꞌirö gulaꞌguízxjëꞌ bönniꞌ ilaꞌzíꞌ yëꞌë,
ilaꞌnnë́ꞌ:
“Netuꞌ biyö́nituꞌ didzaꞌ ruꞌë Esteban ni,
rnnë ziꞌë queëꞌ Moisés,
en queëꞌ Dios.”
12 Caní guca,
bönniꞌ ni gulaꞌguꞌë xilá ládxiꞌgaca bönachi,
tsözxö́n len bönniꞌ gula tuꞌzéajniꞌinëꞌ,
en yuguꞌ bönniꞌ yudoꞌ usëdi.
Yúguꞌtë bönniꞌ ni gulaꞌbía diꞌë Esteban naꞌ.
Gulaꞌzönëꞌ lëꞌ,
en gulaꞌchë́ꞌë lëꞌ lógaquiëꞌ bönniꞌ yudoꞌ tuꞌchiꞌa tuꞌsörö́ëꞌ.
13 Lëscaꞌ buluꞌcuꞌë lógaquiëꞌ nupa gulaꞌguíxjöꞌ le cabí nácatë,
bönniꞌ naꞌ gulaꞌnnë́ꞌ:
―Bitiꞌ zoëꞌ dxisö bönniꞌ ni rnnë ziꞌë que yudoꞌ láꞌayi ni,
en que xibá queëꞌ Dios.
14 Biyö́nituꞌ didzaꞌ bëꞌë bönniꞌ ni ca gunëꞌ Jesús,
bönniꞌ Nazaret,
rnnëꞌ usunítiëꞌ yudoꞌ ni,
en utsë́ꞌë yuguꞌ le nalë́biruꞌ runruꞌ,
yuguꞌ lë naꞌ gunná béꞌenëꞌ Moisés rëꞌu.
15 Níꞌirö bönniꞌ yudoꞌ tuꞌchiꞌa tuꞌsörö́ëꞌ,
en yúguꞌtë nupa rö́ꞌgaca niꞌ buluꞌyúëꞌ Esteban,
ateꞌ bilaꞌléꞌenëꞌ lahuëꞌ,
rnaꞌ ca rnaꞌ lahuëꞌ tu gubáz láꞌayi queëꞌ Dios.