Dul-laꞌ gulunëꞌ Ananías, en Safira
5
Tu bönniꞌ yúbölö lëꞌ Ananías,
bë́tiꞌë tu cöꞌ xiyúëꞌ.
Safira,
nigula queëꞌ,
bennu tsözxö́n lëꞌ.
2 Ananías naꞌ bucachiꞌ lanëꞌ lateꞌ dumí que yu naꞌ,
ateꞌ nö́zinu caꞌ nigula queëꞌ.
Le bugáꞌanasö yöjuꞌë,
en guluꞌë le lu náꞌagaquiëꞌ gubáz nasö́l-lëꞌë Cristo.
Rnnëꞌ:
―Tsca nisö guzxiꞌa.
3 Pedro gudxëꞌ lëꞌ:
―Ananías,
¿naruꞌ guyázatsö Satanás tuꞌ xihuiꞌ lu icja ládxiꞌdoꞌo,
en ben ga rizíꞌ yéꞌenuꞌ Dios Böꞌ Láꞌayi,
ateꞌ bucachiꞌ lanuꞌ lateꞌ dumí que xiyúꞌ naꞌ?
4 Tsanni niꞌ nagáꞌana yu naꞌ lu noꞌo,
¿naruꞌ cabí nequi quez quiuꞌ?
Gudödi bë́tiꞌu le,
¿naruꞌ cabí dë caz lu noꞌo dumí que naꞌ?
¿Bizx que gurö́ꞌö icjuꞌ gunuꞌ caní?
Dios caz guzxíꞌ yéꞌenuꞌ,
calë́gasö bönachi.
5,6 Cateꞌ biyönnëꞌ Ananías didzaꞌ ni, gudzöꞌë, en gútitëꞌ. Níꞌirö gulaꞌbígaꞌtëbiꞌ biꞌi raꞌbán, ateꞌ buluꞌchö́libiꞌ lëꞌ lariꞌ, en guluáꞌabiꞌ lëꞌ, en yöjcáchiꞌgacabiꞌ lëꞌ. Guladxi gulaꞌdzöbi yúguꞌtë nupa niꞌ bilaꞌyöni ca guca lë ni.
7 Ca tsonna hora gudödi niꞌ,
bidxinnu nigula queëꞌ Ananías naꞌ niꞌ,
en bitiꞌ nö́zinu lë naꞌ guca queëꞌ bönniꞌ queë́nu.
8 Níꞌirö Pedro gudxëꞌ-nu:
―Gudíxjöiꞌi nedaꞌ.
¿Naruꞌ guzxíꞌiliꞌ tsca nisö xiyuliꞌ naꞌ?
Gunnánu:
―Ön,
tsca nisö guzxíꞌituꞌ.
9 Níꞌirö Pedro gudxëꞌ-nu:
―¿Bizx que ben tuz xtídzaꞌliꞌ guzxíꞌ bëꞌ xíhuiꞌliꞌ Dios Böꞌ Láꞌayi?
Buyútsöcaꞌ.
Chizóa uluꞌdxinbiꞌ yuguꞌ biꞌi buluꞌcáchiꞌbiꞌ-nëꞌ bönniꞌ quiuꞌ,
ateꞌ uluꞌbéajbiꞌ caꞌ liꞌ.
10 Níꞌirö laꞌ gudzö́ꞌtënu xiniꞌë Pedro,
en gútitënu.
Cateꞌ gulaꞌyázabiꞌ biꞌi raꞌbán naꞌ,
gulaꞌléꞌebiꞌ-nu chinátinu.
Níꞌirö buluꞌbéajbiꞌ-nu,
en yöjcáchiꞌgacabiꞌ-nu cuita lëꞌë bönniꞌ queë́nu.
11 Que lë ni naꞌ guladxi gulaꞌdzöbi yúguꞌtë bönachi queëꞌ Dios,
ateꞌ guladxi caꞌ yúguꞌtë nupa bilaꞌyöni ca guca lë ni.
Tunëꞌ bönniꞌ gubáz nasö́l-lëꞌë Cristo le taca bëꞌ
12 Gulunëꞌ bönniꞌ gubáz naꞌ nasö́l-lëꞌë Cristo zián le taca bëꞌ,
en zián yöl-laꞌ huáca zxön lógaca bönachi lu yödzö.
Yúguꞌtëꞌ buluꞌdubëꞌ tsözxö́n ga naca chila yudoꞌ nazíꞌi le Chila Queëꞌ Salomón.
13 Ladaj nupa niꞌ bitiꞌ taꞌyéajlëꞌ Cristo,
cuntu nu burugui tsöjtáꞌ légaquiëꞌ,
ateꞌ bönachi lu yödzö niꞌ gulún légaquiëꞌ bal.
14 Níꞌirö iaꞌbal-la bönachi zián caꞌ gulaꞌyéajlëꞌ Cristo,
bönniꞌ,
en nigula.
15 Cateꞌ bilaꞌléꞌe bönachi yuguꞌ le tunëꞌ bönniꞌ niꞌ taꞌyéajlëꞌë Cristo,
yöjuáꞌagaca nupa teꞌe gapa naca laꞌ nöza,
ateꞌ gulaꞌxóëꞌ léguequi lu daꞌa yaga,
en iaꞌbal-la lu dáꞌasö,
para cateꞌ tödëꞌ niꞌ Pedro,
tsa zxúl-lasö queëꞌ cuꞌu zxul-la bal-la bönachi huëꞌ naꞌ,
para uluꞌhuöáca.
16 Lëscaꞌ bilaꞌrúaj bönachi yuguꞌ dzaga yödzö,
en bilaꞌdxín Jerusalén,
nuáꞌagaca nupa teꞌe,
en nupa taꞌguíꞌi taꞌzacaꞌ tuꞌ yúꞌugaca böꞌ xihuiꞌ léguequi,
ateꞌ buluꞌhuöáca yúguꞌtëguequi.
Bönniꞌ yudoꞌ taꞌbía ládxiꞌgaquiëꞌ bönniꞌ gubáz nasö́l-lëꞌë Cristo
17 Que lë ni naꞌ bixúz lo,
en bönniꞌ yudoꞌ saduceo naꞌ dáꞌgaquiëꞌ bixúz lo,
buluꞌzxéꞌenëꞌ Pedro.
18 Níꞌirö bixúz lo naꞌ,
en bönniꞌ naꞌ dáꞌgaquiëꞌ lëꞌ gulaꞌzönëꞌ gubáz naꞌ nasö́l-lëꞌë Cristo,
ateꞌ gulaꞌguꞌë légaquiëꞌ lidxi guíë.
19 Níꞌirö bidxinëꞌ gubáz láꞌayi queëꞌ Xanruꞌ chiꞌi dzö́ꞌölö,
ateꞌ gusaljëꞌ lidxi guíë naꞌ,
en bubéajëꞌ légaquiëꞌ.
20 Gubáz láꞌayi naꞌ gudxëꞌ légaquiëꞌ,
rnnëꞌ:
―Guliꞌtséaj,
guliꞌtsöjsóa chila yudoꞌ,
en guliꞌtsöjëꞌlen bönachi niꞌ didzaꞌ,
quíxjöiꞌiliꞌ légaquiëꞌ ca naca yöl-laꞌ naꞌbán idú ni,
en ca gaca ilaꞌdéliꞌnëꞌ le.
21 Cateꞌ bilaꞌyönnëꞌ didzaꞌ ni ruꞌë gubáz láꞌayi naꞌ,
gulaꞌyáziëꞌ chila yudoꞌ cateꞌ zaꞌ reníꞌ zíladoꞌ,
en buluꞌsédinëꞌ bönachi.
Laꞌ níꞌisö buluꞌdubëꞌ bixúz lo,
en nupa nacuáꞌlen lëꞌ tsözxö́n,
len bönniꞌ yudoꞌ tuꞌchiꞌa tuꞌsörö́ëꞌ,
en bönniꞌ gula tuꞌzéajniꞌinëꞌ bönachi Israel,
ateꞌ gulaꞌsö́l-lëꞌë nupa tsöjaca lidxi guíë para tsöjxíꞌgaquiëꞌ yuguꞌ gubáz naꞌ nasö́l-lëꞌë Cristo,
tuꞌ téquinëꞌ niꞌ nacuꞌë lidxi guíë naꞌ.
22 Cateꞌ niꞌa náꞌagaquiëꞌ bönniꞌ yudoꞌ naꞌ bilaꞌdxinëꞌ niꞌ,
bitiꞌ yöjxácaꞌgaquiëꞌ légaquiëꞌ lu yuꞌu lidxi guíë naꞌ,
ateꞌ níꞌirö buluꞌhuö́ajëꞌ tsöjtíxjöꞌgaquiëꞌ caꞌ.
23 Gulë́ꞌ bönniꞌ yudoꞌ tuꞌchiꞌa tuꞌsörö́ëꞌ naꞌ,
taꞌnnë́ꞌ:
―Le nácatë yöjxácaꞌtuꞌ nayáyajtë lidxi guíë,
ateꞌ nacuáꞌ nupa tun chiꞌi raꞌ lidxi guíë naꞌ,
pero cateꞌ gusálajtuꞌ,
cuntu nu yöjxácaꞌtuꞌ lu yuꞌu naꞌ.
24 Cateꞌ bixúz lo,
en yuguꞌ bixúz unná bëꞌ,
en bönniꞌ nacuáꞌ lu nëꞌë niꞌa náꞌagaca bönachi yudoꞌ,
bilaꞌyönnëꞌ didzaꞌ ni,
gulaꞌbö́ꞌdëꞌë böniga tuꞌ cabí nö́ziguequinëꞌ bizxi guntë lë naꞌ raca.
25 Níꞌirö bidxinëꞌ tu bönniꞌ niꞌ,
en gudíxjöiꞌinëꞌ légaquiëꞌ,
rnnëꞌ:
―Buliꞌyútsöcaꞌ.
Yuguꞌ bönniꞌ naꞌ gulúꞌugacaliꞌ-nëꞌ lidxi guíë nacuꞌë chila yudoꞌ tuꞌsë́dinëꞌ bönachi.
26 Níꞌirö guyijëꞌ bönniꞌ naꞌ rinná béꞌenëꞌ niꞌa náꞌagaca bönachi yudoꞌ,
dzágagaquiëꞌ lëꞌ niꞌa náꞌagaquiëꞌ naꞌ,
ateꞌ gulaꞌchë́ꞌë yuguꞌ gubáz naꞌ nasö́l-lëꞌë Cristo,
pero bitiꞌ bi gulunëꞌ quégaquiëꞌ,
tuꞌ guládxinëꞌ uluꞌladxiꞌ bönachi nacuáꞌ niꞌ légaquiëꞌ guiö́j.
27 Cateꞌ chinachë́ꞌgaquiëꞌ yuguꞌ gubáz naꞌ,
buluꞌsudxinëꞌ légaquiëꞌ lógaquiëꞌ bönniꞌ yudoꞌ tuꞌchiꞌa tuꞌsörö́ëꞌ naꞌ,
ateꞌ bixúz lo gunábinëꞌ légaquiëꞌ,
rnnëꞌ:
28 ―¿Naruꞌ cabí gúdxidaꞌatuꞌ libíꞌiliꞌ bitiꞌ usë́diliꞌ bönachi ca naca queëꞌ bönniꞌ naꞌ?
Naꞌa,
chigudísiliꞌ xibá ni idútë yödzö Jerusalén,
en rë́ꞌëniliꞌ usubágaꞌliꞌ netuꞌ xíguiaꞌ tuꞌ nözi yöl-laꞌ guti queëꞌ bönniꞌ naꞌ.
29 Níꞌirö buluꞌbiꞌë didzaꞌ Pedro,
en iaꞌzícaꞌrëꞌ gubáz naꞌ nasö́l-lëꞌë Cristo,
taꞌnnë́ꞌ:
―Run bayudxi uzërö nágatuꞌ xtídzëꞌë Dios ca xtídzaꞌgaca bönachi.
30 Libíꞌiliꞌ bë́tiliꞌ-nëꞌ Jesús cateꞌ niꞌ budáꞌaliꞌ-nëꞌ lëꞌe yaga cruz,
pero Dios quégaquiëꞌ xuz xtóꞌoruꞌ busubanëꞌ Lëꞌ.
31 Jesús ni,
Dios buzóa cazëꞌ Lëꞌ ga nayë́pisëtërëꞌ cuita lëꞌë ibëla,
para gáquiëꞌ Bönniꞌ Lo,
en Bönniꞌ Rusölá,
en gunëꞌ ga uluꞌbíꞌi ládxiꞌgaca bönachi Israel,
para gaca uniti lahuëꞌ dul-laꞌ nabágaꞌgaquiëꞌ.
32 Ca naca lë ni,
runtuꞌ netuꞌ ba nalí que,
ateꞌ lëscaꞌ runëꞌ Dios Böꞌ Láꞌayi ba nalí que,
Böꞌ naꞌ risö́l-lëꞌë Dios quégaca nupa tun ca rnna xtídzëꞌë.
33 Cateꞌ bilaꞌyönnëꞌ bönniꞌ yudoꞌ tuꞌchiꞌa tuꞌsörö́ëꞌ naꞌ lë ni,
gulaꞌlenëꞌ,
en gulë́ꞌënnëꞌ ilútiëꞌ légaquiëꞌ.
34 Níꞌirö guzuínëꞌ tu bönniꞌ yudoꞌ ruchiꞌa rusörö́ëꞌ lógaquiëꞌ,
lëꞌ Gamaliel,
tu bönniꞌ yudoꞌ fariseo.
Rácadëꞌë bönniꞌ ni xibá queëꞌ Moisés,
ateꞌ yúguꞌtë bönachi tun lëꞌ bal.
Gudxëꞌ nupa naꞌ uluꞌbéaj yuguꞌ gubáz naꞌ nasö́l-lëꞌë Cristo lö́ꞌalö tu chíꞌidoꞌ.
35 Níꞌirö gudxëꞌ bönniꞌ yudoꞌ tuꞌchiꞌa tuꞌsörö́ëꞌ naꞌ,
gunnë́ꞌ:
―Libiꞌiliꞌ,
bönniꞌ Israel,
buliꞌyutëz queë́liꞌ ca naca le rë́ꞌëniliꞌ gunliꞌ quégaquiëꞌ bönniꞌ ni.
36 Ral-laꞌ tsöjnéliꞌ ca guca zíꞌatëlö cateꞌ siꞌ idxín dza ni zóaruꞌ naꞌa.
Birúajëꞌ Teudas,
ateꞌ ben cuinëꞌ ca tu bönniꞌ nayë́pisëtërëꞌ.
Guláquiëꞌ bönniꞌ yöjtáꞌgaquiëꞌ lëꞌ idú tapa gáyuꞌë bönniꞌ.
Yuguꞌ bönniꞌ röjáquiëꞌ gudil-la gulútiëꞌ lëꞌ,
ateꞌ gulásilasi yúguꞌtë nupa niꞌ yöjtáꞌgaca lëꞌ,
ateꞌ gunítisö caꞌ yúguꞌtë le benëꞌ bönniꞌ naꞌ.
37 Gudödi guca lë ni,
birúajëꞌ caꞌ Judas,
tu bönniꞌ Galilea.
Benëꞌ caní cateꞌ niꞌ gulaꞌyúꞌu lu guichi bönachi taꞌguízxaj lázagaquiëꞌ,
ateꞌ yöjtáꞌgaca bönachi zián lëꞌ.
Lëscaꞌ gulútiëꞌ bönniꞌ ni,
ateꞌ gulásilasi yúguꞌtë nupa niꞌ yöjtáꞌgaca lëꞌ.
38 Que lë ni naꞌ reaꞌ libíꞌiliꞌ:
Guliꞌsán-gaquiëꞌ bönniꞌ ni,
en bitiꞌ bi gunliꞌ quégaquiëꞌ.
Channö naca quégacasö bönachi lë ni taꞌnnë́ꞌ o lë ni tunëꞌ,
initi caz,
39 pero channö naca queëꞌ Dios,
bitiꞌ gaca usunítiliꞌ le.
¡Buliꞌyú cuinliꞌ cabí tíl-lalenliꞌ-nëꞌ Dios!
40 Níꞌirö gulunëꞌ tuz didzaꞌ len lëꞌ.
Buluꞌlidzëꞌ yuguꞌ gubáz naꞌ nasö́l-lëꞌë Cristo,
ateꞌ gulaꞌguínëꞌ légaquiëꞌ,
en buluꞌzenëꞌ légaquiëꞌ bach para cabirö iluíꞌilenëꞌ bönachi didzaꞌ ca naca queëꞌ Jesús.
Níꞌirö buluꞌsanëꞌ légaquiëꞌ.
41 Bilaꞌrúajëꞌ gubáz naꞌ nasö́l-lëꞌë Cristo lógaquiëꞌ bönniꞌ yudoꞌ tuꞌchiꞌa tuꞌsörö́ëꞌ naꞌ.
Tuꞌdzéjanëꞌ tuꞌ bëꞌë Dios légaquiëꞌ lataj gulaꞌguíꞌi gulaꞌzáquëꞌë tuꞌ dáꞌgaquiëꞌ Jesús.
42 Yuguꞌ dza buluꞌsë́ditiquiꞌsinëꞌ bönachi,
en gulunëꞌ libán queëꞌ Jesucristo lu chila yudoꞌ,
en gapa naca lu yuꞌu lídxigaca bönachi.