Rucúdzuꞌë didzaꞌ Jesús que lëꞌa quégacabaꞌ böꞌcuꞌ zxilaꞌ
10
Gunnë́ꞌ caꞌ Jesús:
―Le nácatë reaꞌ libíꞌiliꞌ:
Nu bönniꞌ bitiꞌ raziëꞌ sacaꞌ ga nu riyaza lëꞌa quégacabaꞌ böꞌcuꞌ zxilaꞌ,
pero tsáziëꞌ sacaꞌ ga yúbölö,
bönniꞌ ni náquiëꞌ gubán,
en ribán cazëꞌ.
2 Nu bönniꞌ raziëꞌ sacaꞌ ga nu riyaza náquiëꞌ bönniꞌ run chiꞌi cazëꞌ böꞌcuꞌ zxilaꞌ naꞌ.
Jesús el buen pastor (Juan 10.1-21)
3 Para tsáziëꞌ bönniꞌ ni,
risalaj nu zoa run chiꞌi ga nu riyaza,
ateꞌ taꞌyö́nibaꞌ böꞌcuꞌ zxilaꞌ naꞌ chiꞌë,
en tuꞌúnbëꞌëbaꞌ-nëꞌ.
Lëꞌ rulidzëꞌ-baꞌ que queë́baꞌ ca lë́gacabaꞌ,
en rubéajëꞌ yuguꞌ böꞌcuꞌ zxilaꞌ naꞌ.
4 Cateꞌ chinubéajëꞌ-baꞌ yúguꞌtëbaꞌ böꞌcuꞌ zxilaꞌ néquigacabaꞌ queëꞌ,
röjnö́ruëꞌ lógacabaꞌ,
ateꞌ böꞌcuꞌ zxilaꞌ naꞌ röjnógacabaꞌ lëꞌ,
tuꞌ tuꞌúnbëꞌëbaꞌ chiꞌë.
5 Bönniꞌ yúbölö bitiꞌ tsöjnógacabaꞌ lëꞌ,
pero uluꞌzxúnnajbaꞌ queëꞌ,
tuꞌ cabí núnbëꞌgacabaꞌ chíꞌigaquiëꞌ bönniꞌ yúbölö.
6 Le rucudzuꞌ didzaꞌ ni gudxëꞌ Jesús légaquiëꞌ,
pero bitiꞌ gulaꞌyéajniꞌinëꞌ lë naꞌ rëꞌ légaquiëꞌ.
Náquiëꞌ Jesús ca bönniꞌ rapa chiꞌë-baꞌ böꞌcuꞌ zxilaꞌ
7 Níꞌirö Jesús rëꞌ légaquiëꞌ leyúbölö,
rnnëꞌ:
―Le nácatë reaꞌ libíꞌiliꞌ:
Nedaꞌ nacaꞌ ca tu ga taꞌyázabaꞌ böꞌcuꞌ zxilaꞌ.
8 Chigulaꞌlë́ꞌë zián bönniꞌ gulaꞌnnë́ꞌ nácagaquiëꞌ Cristo,
pero yúguꞌtë bönniꞌ naꞌ bilaꞌdxinëꞌ zíꞌalö ca nedaꞌ,
nácagaquiëꞌ gubán,
en taꞌbán cazëꞌ,
ateꞌ bitiꞌ buluꞌzë́ nágabaꞌ böꞌcuꞌ zxilaꞌ naꞌ légaquiëꞌ.
9 Nedaꞌ nacaꞌ ca tu ga nu riyaza.
Nútiꞌtës bönniꞌ tsázalenëꞌ nedaꞌ,
ulë́ꞌ bönniꞌ naꞌ,
en gáquiëꞌ ca tubaꞌ böꞌcuꞌ zxilaꞌ rázabaꞌ,
en rurúajbaꞌ,
en ridzö́libaꞌ le rágubaꞌ.
10 ’Zaꞌzëꞌ bönniꞌ gubán para cuanëꞌ-baꞌ,
en gútiëꞌ-baꞌ,
en usunítiëꞌ-baꞌ.
Nedaꞌ bidaꞌ para gataꞌ yöl-laꞌ naꞌbán idú quégaca bönachi nácagaca ca böꞌcuꞌ zxilaꞌ quiaꞌ.
Le nácatë gataꞌ quégaquiëꞌ yöl-laꞌ naꞌbán idú naꞌ.
11 Nedaꞌ run chíꞌigacaꞌ bönachi quiaꞌ ca runëꞌ bönniꞌ naꞌ,
lu yöl-laꞌ dxiꞌi ladxiꞌ queëꞌ rapa chiꞌë yuguꞌ böꞌcuꞌ zxilaꞌ.
Bönniꞌ naꞌ rapa chiꞌë-baꞌ böꞌcuꞌ zxilaꞌ caní zoa cazëꞌ udödëꞌ yöl-laꞌ naꞌbán queëꞌ niꞌa quégacabaꞌ böꞌcuꞌ zxilaꞌ queëꞌ.
12 Tu bönniꞌ nazxjëꞌ rapa chiꞌë-baꞌ böꞌcuꞌ zxilaꞌ,
cateꞌ riléꞌenëꞌ záꞌabaꞌ böꞌcuꞌ guíꞌa síniaꞌ,
rucáꞌanëꞌ-baꞌ böꞌcuꞌ zxilaꞌ naꞌ,
en ruzxúnnajëꞌ,
ateꞌ böꞌcuꞌ guíꞌa síniaꞌ naꞌ ráguyaꞌabaꞌ yuguꞌ böꞌcuꞌ zxilaꞌ naꞌ,
en rusilásibaꞌ légacabaꞌ.
Caní runëꞌ bönniꞌ naꞌ rapa chiꞌë-baꞌ böꞌcuꞌ zxilaꞌ tuꞌ cabí náquiëꞌ idú nu run chiꞌi-baꞌ böꞌcuꞌ zxilaꞌ,
ateꞌ bitiꞌ néquigacabaꞌ que cazëꞌ böꞌcuꞌ zxilaꞌ naꞌ.
13 Ruzxúnnajëꞌ bönniꞌ nazxjëꞌ naꞌ tuꞌ rapa chiꞌë-baꞌ böꞌcuꞌ zxilaꞌ naꞌ para síꞌisëꞌ dumí,
en bitiꞌ ruíꞌi ládxëꞌë-baꞌ böꞌcuꞌ zxilaꞌ naꞌ.
14,15 ’Nedaꞌ nacaꞌ bönniꞌ, lu yöl-laꞌ dxiꞌi ladxiꞌ quiaꞌ run chíꞌigacaꞌ-baꞌ böꞌcuꞌ zxilaꞌ. Ca naꞌ núnbëꞌë Xuzaꞌ nedaꞌ, ateꞌ nedaꞌ núnbëꞌa-nëꞌ Xuzaꞌ, lëscaꞌ caní núnbeꞌegacadaꞌ bönachi quiaꞌ nácagaca ca böꞌcuꞌ zxilaꞌ quiaꞌ, en rudödaꞌ yöl-laꞌ naꞌbán quiaꞌ niꞌa quégacabaꞌ böꞌcuꞌ zxilaꞌ naꞌ, ateꞌ böꞌcuꞌ zxilaꞌ naꞌ néquiguequibaꞌ quiaꞌ núnbëꞌgacabaꞌ nedaꞌ.
16 Lëscaꞌ nacuáꞌabaꞌ iaꞌzícaꞌröbaꞌ böꞌcuꞌ zxilaꞌ quiaꞌ bitiꞌ nabábagacabaꞌ ni.
Lëscaꞌ légacabaꞌ ral-laꞌ tsöjxíꞌgacaꞌ-baꞌ.
Légacabaꞌ uluꞌzë́ nágabaꞌ chiꞌa,
en ilácabaꞌ tuz len iaꞌzícaꞌröbaꞌ böꞌcuꞌ zxilaꞌ quiaꞌ,
ateꞌ nedaꞌ caz gun chíꞌigacaꞌ-baꞌ.
17 ’Que lë ni naꞌ nadxíꞌinëꞌ Xuzaꞌ nedaꞌ,
tuꞌ rudödaꞌ yöl-laꞌ naꞌbán quiaꞌ,
guꞌa lataj nu guti nedaꞌ,
ateꞌ uziꞌa le leyúbölö,
ubanaꞌ lu yöl-laꞌ guti.
18 Cuntu nu bönniꞌ séquiꞌnëꞌ gútiëꞌ nedaꞌ,
pero nedaꞌ rudödi cazaꞌ yöl-laꞌ naꞌbán quiaꞌ,
gátiaꞌ.
Dë lu naꞌa udödaꞌ le,
en dë lu naꞌa uziꞌa le leyúbölö.
Caní naca le gunná béꞌenëꞌ Xuzaꞌ nedaꞌ.
19 Cateꞌ yuguꞌ bönniꞌ judío bilaꞌyönnëꞌ didzaꞌ ni,
leyúbölö bilaꞌrúajëꞌ choplö ca téquinëꞌ queëꞌ.
20 Ziánëꞌ taꞌnnë́ꞌ:
―Yuꞌu böꞌ xihuiꞌ Lëꞌ,
en nachixi icjëꞌ.
¿Bizx que ruzë́ nágaliꞌ Lëꞌ?
21 Iaꞌbal-lëꞌ taꞌnnë́ꞌ:
―Bitiꞌ caꞌ ruꞌë caní didzaꞌ bönniꞌ yuꞌu böꞌ xihuiꞌ lëꞌ.
¿Naruꞌ huácatsö böꞌ xihuiꞌ usalaj guiö́j lógaquiëꞌ bönniꞌ nachul-la lógaquiëꞌ?
Yuguꞌ bönniꞌ judío unná bëꞌ tuꞌzóëꞌ Jesús tsöláꞌalö
22 Raca beoꞌ ziaga,
en naca dza naꞌ tunëꞌ laní yödzö Jerusalén,
tuꞌsubanëꞌ ca gulaꞌguꞌë yudoꞌ quégaquiëꞌ lu nëꞌë Dios.
Jesús acusado de blasfemia (Juan 10.22-42)
23 Ridë́ꞌ Jesús raꞌ yudoꞌ ga naca chila que,
nazíꞌi le Chila Queëꞌ Salomón.
24 Yuguꞌ bönniꞌ judío unná bëꞌ gulaꞌguꞌë Jesús lë́ꞌalö,
en tëꞌ Lëꞌ:
―¿Bátaxi caz usanuꞌ runuꞌ ga rö́ꞌötuꞌ böniga?
Channö nacuꞌ liꞌ Cristo,
ca nácatë gudíxjöiꞌi netuꞌ.
25 Jesús rëꞌ légaquiëꞌ:
―Chigudxi cazaꞌ libíꞌiliꞌ,
pero bitiꞌ réajlëꞌëliꞌ nedaꞌ.
Yuguꞌ dxin runaꞌ tuꞌ dë lu naꞌa uláz queëꞌ Xuzaꞌ nácagaca bëꞌ Nu nacaꞌ.
26 Libíꞌiliꞌ bitiꞌ réajlëꞌëliꞌ nedaꞌ,
tuꞌ cabí nabábalenliꞌ nupa nácagaca böꞌcuꞌ zxilaꞌ quiaꞌ,
ca naꞌ chigudxi cazaꞌ libíꞌiliꞌ.
27 Taꞌyö́nibaꞌ böꞌcuꞌ zxilaꞌ quiaꞌ chiꞌa,
en tuꞌúnbeꞌebaꞌ nedaꞌ,
ateꞌ nedaꞌ núnbeꞌegacadaꞌ-baꞌ,
ateꞌ ridijácalenbaꞌ nedaꞌ.
28 Nedaꞌ runödzjaꞌ yöl-laꞌ naꞌbán idú quégacabaꞌ,
ateꞌ bitiꞌ caꞌ ilaꞌnítibaꞌ,
ateꞌ cuntu nu sequiꞌ ubéaj légacabaꞌ lu naꞌa nedaꞌ.
29 Xuzaꞌ Dios bennëꞌ quiaꞌ légacabaꞌ,
ateꞌ Lëꞌ nápatërëꞌ yöl-laꞌ huáca ca yúguꞌtë bönachi,
ateꞌ cuntu nu sequiꞌ ubéaj légacabaꞌ lu nëꞌë Xuzaꞌ.
30 Nedaꞌ,
en Dios Xuz,
tuz nácatuꞌ.
31 Leyúbölö yuguꞌ bönniꞌ judío unná bëꞌ naꞌ buluꞌguélëꞌë guiö́j uluꞌladxëꞌ Jesús.
32 Jesús rëꞌ légaquiëꞌ:
―Zian le naca dxiꞌa benaꞌ loliꞌ tuꞌ dë lu naꞌa uláz queëꞌ Xuzaꞌ.
¿Niꞌa que bízxilö dxin dxiꞌa ni uládxiꞌliꞌ nedaꞌ guiö́j?
33 Buluꞌbiꞌë didzaꞌ bönniꞌ judío unná bëꞌ naꞌ,
tëꞌ Lëꞌ:
―Niꞌa que dxin dxiꞌa bitiꞌ uládxiꞌtuꞌ liꞌ guiö́j,
pero tuꞌ cabí rnníoꞌ dxiꞌa queëꞌ Dios,
tuꞌ nacuꞌ liꞌ bönáchisö,
en run cuinuꞌ Dios.
34 Bubiꞌë didzaꞌ Jesús,
rëꞌ légaquiëꞌ:
―¿Naruꞌ cabí nazúaj lu guichi lu xibá queë́liꞌ ca gunnë́ꞌ Dios,
rnna:
“Nedaꞌ rnníaꞌ:
Nácaliꞌ yuguꞌ dios”?
35 Nöz quéziruꞌ le nazúaj lu guichi láꞌayi nazúaj tsaz.
Lu guichi láꞌayi naꞌ ruíꞌi lágaquiëꞌ dios,
bönniꞌ niꞌ Dios bë́ꞌlenëꞌ légaquiëꞌ didzaꞌ.
36 Dios bubéajëꞌ nedaꞌ quez queëꞌ,
en gusö́l-lëꞌë nedaꞌ yödzölió ni.
¿Naruꞌ rnnátsaliꞌ quiaꞌ:
“Liꞌ bitiꞌ rnníoꞌ dxiꞌa queëꞌ Dios”,
tuꞌ gunníaꞌ:
Zxíꞌinëꞌ Dios nacaꞌ?
37 Channö cabí runaꞌ dxin budödëꞌ Xuzaꞌ Dios lu naꞌa,
bitiꞌ ral-laꞌ tséajlëꞌëliꞌ nedaꞌ.
38 Channö runaꞌ dxin budödëꞌ Dios lu naꞌa,
sal-laꞌ bitiꞌ réajlëꞌëliꞌ nedaꞌ caz,
guliꞌtséajlëꞌ le nácagaca bëꞌ dxin naꞌ runaꞌ,
para guéquibeꞌeliꞌ náquiëꞌ Dios Xuz tuz len nedaꞌ,
ateꞌ nedaꞌ caꞌ nacaꞌ tuz len Xuzaꞌ.
39 Leyúbölö gulaꞌzóa gulaꞌböꞌë ilaꞌzönëꞌ Jesús,
pero Lëꞌ bulë́ꞌ lu náꞌagaquiëꞌ.
40 Níꞌirö guyijëꞌ Jesús leyúbölö iaꞌtsöláꞌa yegu Jordán,
ga niꞌ buquilëꞌ Juan bönachi nisa zíꞌatëlö,
ateꞌ bugáꞌanëꞌ Jesús niꞌ.
41 Bilaꞌdxín bönachi zián ga zoëꞌ Jesús,
taꞌnná:
―Le nácatë bitiꞌ benëꞌ Juan nitú yöl-laꞌ huáca zxön,
pero yúguꞌtë le gunnë́ꞌ Juan naꞌ ca ral-laꞌ gaca queëꞌ bönniꞌ ni,
idútë li zeaj naca.
42 Que lë ni naꞌ gulaꞌyéajlëꞌë bönniꞌ zián Jesús ga naꞌ zoëꞌ.