Ruúnëꞌ Jesús tu bönniꞌ guljëꞌ nachúl-latë lahuëꞌ
9
Cateꞌ gudödëꞌ Jesús tu lataj,
biléꞌenëꞌ tu bönniꞌ niꞌ guljëꞌ nachúl-latë lahuëꞌ.
2 Gulaꞌnábinëꞌ Jesús bönniꞌ usëda queëꞌ,
taꞌnnë́ꞌ:
―Bönniꞌ Usedi,
¿nuzxi ben dul-laꞌ?
¿Naruꞌ bönniꞌ ni o xuz xinë́ꞌë tuꞌ guljëꞌ nachúl-latë lahuëꞌ?
Jesús cura a un ciego (Juan 9.1-41)
3 Bubiꞌë didzaꞌ Jesús,
rëꞌ légaquiëꞌ:
―Bitiꞌ naca tuꞌ benëꞌ dul-laꞌ bönniꞌ ni,
en calëga tuꞌ gulunëꞌ dul-laꞌ xuz xinë́ꞌë,
pero naca para iláꞌ lahui yöl-laꞌ huáca queëꞌ Dios niꞌa queëꞌ bönniꞌ ni.
4 Run bayudxi gunruꞌ xichinëꞌ Xuzaꞌ nasö́l-lëꞌë nedaꞌ,
tsanni ni naca ca lahuiꞌ dza.
Huadxín dza gaca chul-la que yöl-laꞌ guti,
cateꞌ cuntu nu gaca gun dxin.
5 Tsanni ni zoaꞌ yödzölió ni,
nacaꞌ beníꞌ quégaca bönachi yödzölió.
6 Cateꞌ Jesús budxi bëꞌë didzaꞌ ni,
gurúꞌunëꞌ zxönaꞌ lu yu,
en benëꞌ gúnaꞌdoꞌ len zxönaꞌ naꞌ,
ateꞌ buguꞌë gunaꞌ naꞌ guiö́j lahuëꞌ bönniꞌ naꞌ nachul-la lahuëꞌ.
7 Níꞌirö rëꞌ lëꞌ:
―Guyéaj yöjtibi loꞌ lu beaj nisa nazíꞌi le Siloé.
Siloé naca tu didzaꞌ hebreo le rnna:
Nasöl-laꞌ.
Níꞌirö bönniꞌ naꞌ nachul-la lahuëꞌ guyijëꞌ niꞌ,
yöjtibi lahuëꞌ.
Cateꞌ buzë́ꞌë niꞌ chiriléꞌenëꞌ.
8 Níꞌirö buluꞌbani bönachi dzaga yuꞌu queëꞌ,
en nupa niꞌ bilaꞌléꞌe lëꞌ zíꞌatëlö cateꞌ niꞌ nachul-la lahuëꞌ,
taꞌnná:
―¿Naruꞌ calëga bönniꞌ ni bönniꞌ naꞌ riböꞌë rinabëꞌ nu bi unödzaj queëꞌ?
9 Bal-lëꞌ taꞌnnë́ꞌ:
―Lëꞌ naꞌ.
Iaꞌbal-lëꞌ taꞌnnë́ꞌ:
―Calëga lëꞌ,
pero ca rnaꞌ lahuëꞌ bönniꞌ naꞌ,
rnaꞌ lahuëꞌ caꞌ bönniꞌ ni.
Lëꞌ rnnëꞌ:
―Nedaꞌ naꞌ.
10 Níꞌirö gulaꞌnábinëꞌ lëꞌ,
taꞌnnë́ꞌ:
―¿Nacxi caz guca,
guyalaj guiö́j loꞌ?
11 Bubiꞌë didzaꞌ,
rëꞌ légaquiëꞌ:
―Bönniꞌ naꞌ lëꞌ Jesús benëꞌ gúnaꞌdoꞌ,
ateꞌ gudëbëꞌ gúnaꞌdoꞌ naꞌ guiö́j lahuaꞌ,
en gudxëꞌ nedaꞌ:
“Guyéaj raꞌ beaj nisa nazíꞌi le Siloé,
yöjtibi loꞌ.”
Guyijaꞌ niꞌ,
yöjtibi lahuaꞌ,
ateꞌ guyálajtë guiö́j lahuaꞌ.
12 Níꞌirö gulaꞌnábinëꞌ lëꞌ,
taꞌnnë́ꞌ:
―¿Gazxi zoëꞌ bönniꞌ naꞌ?
Lëꞌ rëꞌ légaquiëꞌ:
―Bitiꞌ nözdaꞌ.
Yuguꞌ bönniꞌ yudoꞌ taꞌnáb yúdxinëꞌ bönniꞌ naꞌ guyalaj guiö́j lahuëꞌ
13 Níꞌirö gulaꞌchë́ꞌë bönniꞌ naꞌ zíꞌalö nachul-la lahuëꞌ,
en buluꞌsudxinëꞌ lëꞌ lógaquiëꞌ bönniꞌ yudoꞌ fariseo.
14 Tuꞌ naca dza láꞌayi quégaquiëꞌ cateꞌ benëꞌ Jesús gúnaꞌdoꞌ naꞌ,
en gusaljëꞌ guiö́j lahuëꞌ bönniꞌ naꞌ zíꞌalö nachul-la lahuëꞌ,
15 que lë ni naꞌ yuguꞌ bönniꞌ yudoꞌ fariseo naꞌ gulaꞌnábinëꞌ lëꞌ leyúbölö nacxi guca guyalaj guiö́j lahuëꞌ.
Lëꞌ gudxëꞌ légaquiëꞌ:
―Budxíëꞌ gúnaꞌdoꞌ guiö́j lahuaꞌ,
ateꞌ yöjtibaꞌ le,
en riléꞌedaꞌ.
16 Níꞌirö guluꞌë didzaꞌ bal-lëꞌ bönniꞌ yudoꞌ fariseo naꞌ,
taꞌnnë́ꞌ:
―Bitiꞌ nasöl-lëꞌ Dios bönniꞌ naꞌ,
tuꞌ cabí rapa chiꞌë dza láꞌayi.
Iaꞌbal-lëꞌ taꞌnnë́ꞌ:
―¿Naruꞌ huácatsö tu bönniꞌ dul-laꞌ gunëꞌ yuguꞌ yöl-laꞌ huáca runëꞌ bönniꞌ naꞌ?
Caní guca,
bilaꞌrúajëꞌ choplö.
17 Leyúbölö gulaꞌnábinëꞌ bönniꞌ naꞌ zíꞌalö nachul-la lahuëꞌ,
taꞌnnë́ꞌ:
―¿Bizxi rnnoꞌ liꞌ queëꞌ bönniꞌ naꞌ,
gusaljëꞌ guiö́j loꞌ?
Lëꞌ rnnëꞌ:
―Náquiëꞌ bönniꞌ ruꞌë didzaꞌ uláz queëꞌ Dios.
18 Bitiꞌ gulaꞌyéajlëꞌë bönniꞌ judío unná bëꞌ naꞌ guljëꞌ nachúl-latë lahuëꞌ bönniꞌ naꞌ,
en guyalaj guiö́j lahuëꞌ,
cateꞌ buluꞌlídzarëꞌ xuz xinë́ꞌë bönniꞌ naꞌ guyalaj guiö́j lahuëꞌ,
19 ateꞌ gulaꞌnábinëꞌ légaquiëꞌ,
taꞌnnë́ꞌ:
―¿Naruꞌ náquiëꞌ bönniꞌ ni zxíꞌiniliꞌ,
rnnaliꞌ guljëꞌ nachúl-latë lahuëꞌ?
¿Nacxi caz naca riléꞌenëꞌ naꞌa?
20 Buluꞌbiꞌë didzaꞌ xuz xinë́ꞌë naꞌ,
tëꞌ légaquiëꞌ:
―Nö́zituꞌ bönniꞌ ni náquiëꞌ zxíꞌinituꞌ,
en guljëꞌ nachúl-latë lahuëꞌ,
21 pero nacxi guca,
riléꞌenëꞌ naꞌa,
bitiꞌ nöztuꞌ,
en nuzxi naꞌ gusalaj guiö́j lahuëꞌ,
bitiꞌ nöztuꞌ.
Guliꞌnabi-nëꞌ lëꞌ,
tuꞌ chináquiëꞌ bönniꞌ chinaca.
Lë cazëꞌ quíxjöꞌë.
22 Caní gulaꞌnnë́ꞌ xuz xinë́ꞌë bönniꞌ naꞌ zíꞌalö nachul-la lahuëꞌ,
tuꞌ tádxinëꞌ yuguꞌ bönniꞌ judío unná bëꞌ,
tuꞌ chigulún xtídzaꞌgaquiëꞌ bönniꞌ judío naꞌ channö nu bönniꞌ siꞌ lu nëꞌë Jesús náquiëꞌ Cristo,
tsaz uluꞌbéajëꞌ bönniꞌ naꞌ lu yuꞌu ga tuꞌdubëꞌ bönniꞌ judío,
en tuꞌsëdëꞌ queëꞌ Dios.
23 Que lë ni naꞌ gulaꞌnnë́ꞌ xuz xinë́ꞌë:
“Guliꞌnabi-nëꞌ lëꞌ,
tuꞌ chináquiëꞌ bönniꞌ chinaca.”
24 Níꞌirö yuguꞌ bönniꞌ judío unná bëꞌ buluꞌlidzëꞌ leyúbölö bönniꞌ naꞌ zíꞌalö nachul-la lahuëꞌ,
ateꞌ tëꞌ lëꞌ:
―Niꞌa queëꞌ Xanruꞌ Dios gudixjöꞌ le nácatë.
Netuꞌ réquibeꞌetuꞌ bönniꞌ naꞌ náquiëꞌ bönniꞌ dul-laꞌ.
25 Níꞌirö bubiꞌë didzaꞌ,
rnnëꞌ:
―Channö náquiëꞌ bönniꞌ dul-laꞌ bitiꞌ nözdaꞌ.
Tu le nözdaꞌ.
Zíꞌalö nachul-la lahuaꞌ,
ateꞌ naꞌa riléꞌedaꞌ.
26 Gulaꞌnábinëꞌ lëꞌ leyúbölö,
taꞌnnë́ꞌ:
―¿Bizxi benëꞌ quiuꞌ?
¿Nacxi benëꞌ gusaljëꞌ guiö́j loꞌ?
27 Bubiꞌë didzaꞌ,
rëꞌ légaquiëꞌ:
―Chigúdxi cazaꞌ libíꞌiliꞌ,
pero bitiꞌ gúꞌuniliꞌ siꞌ lu náꞌaliꞌ xtídzaꞌa.
¿Bizx que naꞌ rë́ꞌëniliꞌ yö́niliꞌ leyúbölö?
¿Naruꞌ rë́ꞌëniliꞌ táꞌaliꞌ caꞌ Lëꞌ?
28 Níꞌirö buluꞌlidza ziꞌë lëꞌ,
taꞌnnë́ꞌ:
―Liꞌ doꞌo Lëꞌ,
pero netuꞌ dáꞌatuꞌ Moisés.
29 Netuꞌ nöztuꞌ Dios bë́ꞌlenëꞌ Moisés didzaꞌ,
pero ca naca queëꞌ bönniꞌ ni,
bitiꞌ nöztuꞌ nuzxi caz gusöl-laꞌ Lëꞌ.
30 Níꞌirö bubiꞌë didzaꞌ bönniꞌ naꞌ,
rëꞌ légaquiëꞌ:
―Lë ni run ga rubánidaꞌ.
Libíꞌiliꞌ bitiꞌ nö́ziliꞌ nuzxi gusöl-laꞌ bönniꞌ ni,
ateꞌ Lëꞌ gusaljëꞌ guiö́j lahuaꞌ.
31 Nö́ziruꞌ bitiꞌ riyönnëꞌ Dios yuguꞌ bönniꞌ dul-laꞌ,
pero channö reaj ládxëꞌë tu bönniꞌ Dios,
en runëꞌ ca rë́ꞌënëꞌ Lëꞌ,
Dios riyönnëꞌ bönniꞌ ni.
32 Dza niꞌte bitiꞌ riyö́n nu gunná channö nu bönniꞌ gusaljëꞌ guiö́j lahuëꞌ tu bönniꞌ guljëꞌ nachúl-latë lahuëꞌ.
33 Laꞌtuꞌ cabí náquiëꞌ bönniꞌ ni queëꞌ Dios,
bitiꞌ bi gaca gunëꞌ.
34 Níꞌirö buluꞌbiꞌë didzaꞌ,
tëꞌ lëꞌ:
―Ca guljuꞌ naca bëꞌ nabáguꞌu dul-laꞌ.
¿Naruꞌ liꞌ ruséditsenuꞌ netuꞌ?
Níꞌirö buluꞌbéajëꞌ lëꞌ níꞌilö.
Nupa nácagaca chul-la niti
35 Biyönnëꞌ Jesús ca gulunëꞌ bönniꞌ judío unná bëꞌ,
buluꞌbéajëꞌ bönniꞌ naꞌ zíꞌalö nachul-la lahuëꞌ.
Cateꞌ budzáguëꞌ lëꞌ,
gudxëꞌ lëꞌ:
―¿Ba réajlëꞌu Zxíꞌinëꞌ Dios?
36 Bubiꞌë didzaꞌ lëꞌ,
rëꞌ Jesús:
―¿Nuzxi naꞌ,
Xan,
para tséajlëꞌa Lëꞌ?
37 Jesús rëꞌ lëꞌ:
―Chibiléꞌenuꞌ Lëꞌ,
ateꞌ nedaꞌ ni ruíꞌilenaꞌ liꞌ didzaꞌ,
nacaꞌ Zxíꞌinëꞌ Dios.
38 Níꞌirö bönniꞌ naꞌ,
guyalaj guiö́j lahuëꞌ,
guyéaj ládxëꞌë Jesús,
en rëꞌ Lëꞌ:
―Xan,
réajlëꞌa Liꞌ.
39 Jesús rnnëꞌ:
―Para uchiꞌa usörö́aꞌ bönachi bidaꞌ yödzölió ni,
para uluꞌléꞌe nupa nachul-la nanítigaca,
en ilaca ca nu nachul-la lahui nupa téquiguequi taꞌléꞌe.
40 Cateꞌ yuguꞌ bönniꞌ yudoꞌ fariseo naꞌ nacuáꞌlenëꞌ Jesús bilaꞌyönnëꞌ didzaꞌ ni,
níꞌirö tëꞌ Lëꞌ:
―¿Naruꞌ nachul-la nanítitsatuꞌ?
41 Bubiꞌë didzaꞌ Jesús,
rëꞌ légaquiëꞌ:
―Laꞌnáruꞌ nachúl-lasö guiö́j loliꞌ,
bitiꞌ ibágaꞌliꞌ dul-laꞌ.
Naꞌa rnnaliꞌ:
“Riléꞌetuꞌ.”
Que lë ni naꞌ nabágaꞌliꞌ dul-laꞌ.