Ruúnëꞌ Jesús tu bönniꞌ nacúꞌuniëꞌ bin ga nazíꞌi le Betesda
5
Gudödi guca lë ni,
guca laní quégaquiëꞌ bönniꞌ judío,
ateꞌ guyijëꞌ Jesús Jerusalén.
2 Lu yödzö naꞌ,
galaꞌ ga tuꞌúꞌubaꞌ böꞌcuꞌ zxilaꞌ,
dë tu le zxön yudzu nisa,
nazíꞌi le Betesda lu didzaꞌ hebreo,
en nacuáꞌ gayuꞌ chila don que.
Jesús cura en Sábado (Juan 5.1-15)
3 Yuguꞌ lu chila naꞌ dë́gaquiëꞌ zián bönniꞌ téꞌenëꞌ,
bönniꞌ nachul-la lógaquiëꞌ,
en bönniꞌ bitiꞌ gaca sáꞌgaquiëꞌ,
en bönniꞌ nacúꞌunigaquiëꞌ bin.
Taꞌbözëꞌ bata utá cuini nisa naꞌ.
4 Caní raca,
tuꞌ ruhuötjëꞌ tu gubáz láꞌayi queëꞌ Dios tu chiꞌi huéaj,
en röjtsuꞌë lu nisa naꞌ,
en rutë́ꞌ nisa naꞌ.
Huöácatëꞌ nu bönniꞌ tsöjtsúꞌutiëꞌ lu nisa naꞌ cateꞌ rutá cuini ca naca bítiꞌtës yödzöhuë́ꞌ raca queëꞌ.
5 Zoëꞌ tu bönniꞌ niꞌ,
chiguca chizxunuꞌ uruáꞌ iz réꞌenëꞌ.
6 Cateꞌ biléꞌenëꞌ Jesús dëꞌ bönniꞌ huëꞌ naꞌ niꞌ,
réquibeꞌenëꞌ chiguca zián iz réꞌenëꞌ,
ateꞌ gunábinëꞌ lëꞌ,
rnnëꞌ:
―¿Ba rë́ꞌënuꞌ huöácuꞌ?
7 Bubiꞌë didzaꞌ bönniꞌ huëꞌ naꞌ,
rëꞌ Jesús:
―Bönniꞌ,
cuntu nu zoa cuꞌu nedaꞌ lu nisa naꞌ cateꞌ rutá cuini.
Tsanni saꞌyéajaꞌ nedaꞌ,
röjtsuꞌë bönniꞌ yúbölö zíꞌalö ca nedaꞌ.
8 Jesús rëꞌ lëꞌ:
―Guyaschi.
Buáꞌ le denuꞌ,
en guzëꞌe.
9 Laꞌ böácatëꞌ bönniꞌ naꞌ,
ateꞌ buꞌë le gútiꞌnëꞌ,
en guzë́ꞌë.
Dza naꞌ raca caní naca dza láꞌayi quégaquiëꞌ bönniꞌ judío.
10 Níꞌirö bönniꞌ judío unná bëꞌ gulë́ꞌ bönniꞌ naꞌ nuhuöáquiëꞌ,
taꞌnnë́ꞌ:
―Dza láꞌayi naca naꞌa.
Bitiꞌ ral-laꞌ uꞌu le rátiꞌnuꞌ.
11 Bubiꞌë didzaꞌ bönniꞌ naꞌ,
rëꞌ légaquiëꞌ:
―Bönniꞌ naꞌ bunëꞌ nedaꞌ gudxi cazëꞌ nedaꞌ,
gunnë́ꞌ:
“Buáꞌ le denuꞌ,
en guzëꞌe.”
Bönniꞌ naꞌ bunëꞌ nedaꞌ.
12 Níꞌirö gulaꞌnábinëꞌ lëꞌ,
taꞌnnë́ꞌ:
―¿Nuzxi naꞌ gudxi caní liꞌ:
“Buáꞌ le denuꞌ,
en guzëꞌe”?
13 Bitiꞌ nö́zinëꞌ bönniꞌ naꞌ nuhuöáquiëꞌ nuzxi naꞌ,
tuꞌ chibuzë́ꞌë Jesús lataj niꞌ tuꞌ nacuáꞌ bönachi zián niꞌ.
14 Gudödi guca lë ni,
Jesús yöjxáquiëꞌ bönniꞌ naꞌ ga naca chila yudoꞌ,
ateꞌ rëꞌ lëꞌ:
―Buyútsöcaꞌ.
Chiböácuꞌ.
Bítiꞌrö gunuꞌ dul-laꞌ,
para cabí gaca quiuꞌ tu le nácarö ziꞌ ca lë naꞌ guca quiuꞌ.
15 Guyijëꞌ bönniꞌ naꞌ,
yöjtíxjöiꞌinëꞌ yuguꞌ bönniꞌ judío unná bëꞌ Jesús naꞌ bunëꞌ lëꞌ.
16 Que lë ni naꞌ bönniꞌ judío unná bëꞌ gulaꞌbía ládxiꞌgaquiëꞌ Jesús,
en gulë́ꞌënnëꞌ ilútiëꞌ Lëꞌ,
tuꞌ runëꞌ yuguꞌ lë ni cateꞌ naca dza láꞌayi quégaquiëꞌ.
Jesús defiende su autoridad (Juan 5.16-47)
―Xuzaꞌ náꞌatë runëꞌ dxin,
ateꞌ nedaꞌ caꞌ runaꞌ dxin.
18 Que lë ni naꞌ gulë́ꞌënirönëꞌ bönniꞌ judío unná bëꞌ ilútiëꞌ Jesús,
calë́gasö tuꞌ guditsjëꞌ xibá que dza láꞌayi quégaquiëꞌ,
pero lëscaꞌ tuꞌ gunnë́ꞌ Dios caz náquiëꞌ Xuzëꞌ,
ateꞌ caní naca nun cuinëꞌ ca náquiëꞌ Dios.
Yöl-laꞌ unná bëꞌ dë lu nëꞌë Zxíꞌinëꞌ Dios
19 Níꞌirö bubiꞌë didzaꞌ Jesús,
rëꞌ légaquiëꞌ:
―Le nácatë reaꞌ libíꞌiliꞌ.
Bitiꞌ bi gaca gunaꞌ nedaꞌ,
Zxíꞌinëꞌ Dios,
rácasö quiaꞌ,
pero tuz lë naꞌ riléꞌedaꞌ runëꞌ Dios Xuz.
Yúguꞌtë le runëꞌ Dios Xuz,
lëscaꞌ caní runaꞌ nedaꞌ,
Zxíꞌinëꞌ.
20 Dios Xuz nadxíꞌinëꞌ nedaꞌ,
Zxíꞌinëꞌ,
en ruluíꞌinëꞌ nedaꞌ yúguꞌtë le runëꞌ,
ateꞌ yuguꞌ le zxö́ntërö ca lë ni uluíꞌinëꞌ nedaꞌ,
le ilún ga ubániliꞌ libíꞌiliꞌ.
21 Ca naꞌ runëꞌ Dios Xuz,
rusubanëꞌ nupa nátigaca,
en rugúꞌë légaquiëꞌ yöl-laꞌ naꞌbán,
lëscaꞌ caní runaꞌ nedaꞌ,
Zxíꞌinëꞌ,
runödzjaꞌ quégaca bönachi yöl-laꞌ naꞌbán ca rë́ꞌëni quézidaꞌ.
22 Cuntu nu ruchiꞌa rusörö́ëꞌ Dios Xuz,
pero chinudödëꞌ lu naꞌa nedaꞌ,
Zxíꞌinëꞌ,
yúguꞌtë yöl-laꞌ unná bëꞌ para uchiꞌa usörö́aꞌ bönachi.
23 Caní naca para ilún bal yúguꞌtë bönachi nedaꞌ,
Zxíꞌinëꞌ,
ca naꞌ tun bal Dios Xuz.
Nu bitiꞌ run bal nedaꞌ,
Zxíꞌinëꞌ,
bitiꞌ run bal Dios Xuz,
nasö́l-lëꞌë nedaꞌ,
Zxíꞌinëꞌ naꞌ.
24 ’Le nácatë reaꞌ libíꞌiliꞌ.
Bönniꞌ naꞌ riyönnëꞌ didzaꞌ ruáꞌa,
en réajlëꞌë Dios Xuz naꞌ nasö́l-lëꞌë nedaꞌ dë yöl-laꞌ naꞌbán idú queëꞌ,
ateꞌ bitiꞌ irugu queëꞌ.
Náquiëꞌ ca nu chinubán lu yöl-laꞌ guti tuꞌ chidë́ yöl-laꞌ naꞌbán idú queëꞌ.
25 Le nácatë reaꞌ libíꞌiliꞌ,
zaꞌ dza,
en chiridxín dza naꞌ,
cateꞌ ilaꞌyöni nupa chinátigaca chiꞌa nedaꞌ,
Zxíꞌinëꞌ Dios,
ateꞌ nupa ilaꞌyöni xtídzaꞌa,
en ilún ca rnna,
huöátaꞌ yöl-laꞌ naꞌbán quéguequi.
26 Ca naꞌ dë lu nëꞌë Dios Xuz unödzjëꞌ yöl-laꞌ naꞌbán quégaca bönachi,
lëscaꞌ caní benëꞌ ga dë lu naꞌa nedaꞌ,
Zxíꞌinëꞌ,
unödzjaꞌ yöl-laꞌ naꞌbán quégaca bönachi.
27 Lëscaꞌ caní budödëꞌ lu naꞌa yöl-laꞌ unná bëꞌ uchiꞌa usörö́aꞌ bönachi,
tuꞌ nacaꞌ Bönniꞌ Guljëꞌ Bönachi.
28 Bitiꞌ ubániliꞌ ca naca lë ni,
tuꞌ huadxín dza cateꞌ yúguꞌtë nupa chinátigaca ilaꞌyöni chiꞌa,
29 en uluꞌrúaj yeru ba.
Uluꞌbán nupa naꞌ gulún le naca tsahuiꞌ,
en huöátaꞌ yöl-laꞌ naꞌbán quéguequi,
pero nupa naꞌ gulún le bitiꞌ naca tsahuiꞌ,
uluꞌbán,
ateꞌ irugu quéguequi ilátigaca tsaz.
Le naca bëꞌ le náquiëꞌ Jesús
30 Gunnë́ꞌ caꞌ Jesús:
―Bitiꞌ bi gaca gunaꞌ laꞌ nédaꞌsö.
Ca naca le riyöndaꞌ rëꞌ Xuzaꞌ nedaꞌ,
caní ruchiꞌa rusörö́aꞌ,
ateꞌ ca naꞌ ruchiꞌa rusörö́aꞌ naca tsahuiꞌ,
tuꞌ cabí runaꞌ ca rë́ꞌënisidaꞌ nedaꞌ,
pero ca rë́ꞌëni quézinëꞌ Xuzaꞌ nasö́l-lëꞌë nedaꞌ,
runaꞌ.
31 Channö nedaꞌ runaꞌ ba nalí que laꞌ cuin cazaꞌ,
bitiꞌ naca lesacaꞌ lë naꞌ runaꞌ ba nalí.
32 Zoa Nu yúbölö Nu run ba nalí quiaꞌ nedaꞌ,
Lëꞌ Xuzaꞌ,
ateꞌ nözdaꞌ naca lesacaꞌ le runëꞌ ba nalí quiaꞌ.
33 Libíꞌiliꞌ gusö́l-laꞌliꞌ bönniꞌ yöjnábiguequinëꞌ Juan,
ateꞌ lë naꞌ benëꞌ ba nalí quiaꞌ naca idútë li.
34 Nedaꞌ bitiꞌ naquindaꞌ nu bönniꞌ gunëꞌ ba nalí quiaꞌ,
pero ruáꞌa didzaꞌ caní para uláliꞌ.
35 Didzaꞌ bëꞌë Juan naꞌ gulaca ca tu guíꞌ yöri,
le guyegui,
en buzeníꞌ,
ateꞌ libíꞌiliꞌ,
tu chíꞌisö guyaza ládxiꞌliꞌ uzíꞌiliꞌ xibé beníꞌ queëꞌ.
36 Naꞌa,
zoa le run ba nalí quiaꞌ nedaꞌ le nácarö idú li ladxeꞌ ca lë naꞌ benëꞌ ba nalí quiaꞌ Juan.
Yuguꞌ le budödëꞌ Dios Xuz lu naꞌa gunaꞌ,
laꞌ leze naꞌ runaꞌ,
ateꞌ yuguꞌ lë naꞌ runaꞌ,
tun ba nalí quiaꞌ,
en nácagaca bëꞌ gusö́l-lëꞌë Dios Xuz nedaꞌ.
37 Lëscaꞌ Dios Xuz nasö́l-lëꞌë nedaꞌ runëꞌ ba nalí quiaꞌ.
Catu caz biyö́niliꞌ chiꞌë,
en catu caz biléꞌeliꞌ lahuëꞌ,
38 en cabí nazíꞌ lu náꞌaliꞌ xtídzëꞌë,
tuꞌ cabí réajlëꞌëliꞌ nedaꞌ,
Nu naꞌ gusö́l-lëꞌë.
39 Rusë́daliꞌ le nazúaj lu guichi láꞌayi,
tuꞌ réquiliꞌ huátaꞌ yöl-laꞌ naꞌbán idú queë́liꞌ niꞌa que lë naꞌ nazúaj lu guichi láꞌayi,
ateꞌ lë naꞌ nazúaj lu guichi run ba nalí quiaꞌ nedaꞌ.
40 Bitiꞌ rë́ꞌëniliꞌ guídaliꞌ quiaꞌ nedaꞌ para gataꞌ yöl-laꞌ naꞌbán queë́liꞌ.
41 ’Bitiꞌ riguiljaꞌ yöl-laꞌ ba le ilaꞌgúꞌu bönachi nedaꞌ.
42 Nedaꞌ núnbëꞌa libíꞌiliꞌ,
en nözdaꞌ bitiꞌ nadxíꞌiliꞌ-nëꞌ Dios.
43 Bidxinaꞌ ni uláz queëꞌ Dios Xuz,
ateꞌ libíꞌiliꞌ bitiꞌ rizíꞌ lu náꞌaliꞌ nedaꞌ,
pero channö huadxín nu yúbölö nu guídi rácasö que,
siꞌ lu náꞌaliꞌ nu naꞌ.
44 ¿Nacxi caz gaca tséajlëꞌëliꞌ Dios channö rizíꞌiliꞌ yöl-laꞌ run zxön que luzáꞌaliꞌ tuliꞌ iaꞌtuliꞌ,
en bitiꞌ riguíljaliꞌ yöl-laꞌ run zxön naꞌ zaꞌ lu nëꞌë laꞌs dui Dios?
45 Bitiꞌ uzóa ícjaliꞌ uzéguiaꞌ libíꞌiliꞌ didzaꞌ lahuëꞌ Xuzaꞌ.
Nu naꞌ uzegui libíꞌiliꞌ didzaꞌ naca lë cazëꞌ Moisés,
bönniꞌ naꞌ ruzxöni ládxiꞌliꞌ-nëꞌ,
sal-laꞌ gútiëꞌ dza niꞌte.
46 Laꞌtuꞌ réajlëꞌëliꞌ-nëꞌ Moisés,
tséajlëꞌëliꞌ caꞌ nedaꞌ,
tuꞌ buzúajëꞌ Moisés lu guichi ca naca quiaꞌ nedaꞌ.
47 Naꞌa,
¿nacxi caz gaca tséajlëꞌëliꞌ didzaꞌ ruáꞌa nedaꞌ channö cabí réajlëꞌëliꞌ yuguꞌ le buzúajëꞌ Moisés lu guichi?