15
Naꞌ choꞌ ba zoac̱hec̱hcho chonḻilallꞌcho Chiozaꞌ, chiyaḻꞌ gapcho yeḻꞌ chxenlallꞌ c̱he beṉꞌkaꞌ biṉꞌ gakcha, naꞌ bi chiyaḻꞌ gonzcho daa cheenzicho goncho.
2 To tocho chiyaḻꞌ goncho dii gaklenan bishꞌ ljwellchokaꞌ kwenc̱he gakchagakeꞌ.
3 Ḻaꞌ Crístonaꞌ aga beneꞌ daa wyazlallꞌ to kwinzeꞌ, san gok c̱heꞌ ka na Choꞌa Xtillꞌ Chiozaꞌ, daa na: “Daa wchell wṉe beṉꞌ c̱hoꞌ bzoaziꞌyaagakan nadꞌ.”
4 Naꞌ yogꞌ diikaꞌ na Choꞌa Xtillꞌ Chiozaꞌ bzejgakeꞌn kwenc̱he wzajniin choꞌ naꞌ wtipan lallꞌcho kwenc̱he gapcho yeḻꞌ chxenlallꞌ lao diikaꞌ chen chleꞌicho naꞌ goncho lez dii wennaꞌ ba bc̱heb Chiozaꞌ c̱hecho.
5 Chiozaꞌ, beenaꞌ choṉ choꞌ yeḻꞌ chxenlallꞌ naꞌ chtipeꞌ lallꞌcho, gaklenshgueꞌ leꞌ soalen ljwell-le wen kon ka bliꞌyi Cristo Jesúzaꞌ choꞌ,
6 kwenc̱he yogꞌle gakle toz weꞌlaꞌole Chiozaꞌ, beenaꞌ nak X̱a X̱ancho Jesucrístonaꞌ.
7 Daan, ḻi wleb ljwell-le, ka ben Crístonaꞌ blebeꞌ leꞌ bénleneꞌ txen, kwenc̱he koole Chiozaꞌ balaaṉ.
8 Naꞌ niaꞌ leꞌ, Crístonaꞌ bideꞌ kwenc̱he gakleneꞌ netoꞌ beṉꞌ Israel, kon ka bc̱heb Chiozaꞌ lao dii x̱ozxtoꞌntoꞌkaꞌ kwenc̱he iṉezintoꞌ choneꞌ kon ka chc̱hebeꞌ.
9 Naꞌ ḻekzkaꞌ bideꞌ kwenc̱he beṉꞌkaꞌ bi nak beṉꞌ Israel weꞌlaꞌogakeꞌneꞌ daa chiyeshꞌlallileꞌ ḻegakeꞌ. Chak ka na Choꞌa Xtillꞌ Chiozaꞌ daa na:
Daan, weꞌlawaa liꞌ ladj beṉꞌkaꞌ bi nak beṉꞌ Israel,
naꞌ goḻꞌ iṉiaꞌ weꞌlawaa liꞌ.
10 Naꞌ gan yoblə chiznan:
Leꞌ bi nakle beṉꞌ Israel, ḻi yibaleni netoꞌ nakntoꞌ yell c̱heꞌ.
11 Naꞌ ḻekzkaꞌ gan yoblə chiznan:
Yogꞌle leꞌ bi nakle beṉꞌ Israel, ḻi weꞌlaꞌo X̱ancho Chiozaꞌ.
Leꞌ lleꞌle yogꞌte yell, ḻi goḻ iṉieꞌ.
12 Naꞌ ḻekzkaꞌ dii Isaíazaꞌ bzejeꞌ daa na:
Ka to yag dii chigaa, kaꞌ yiyak xiiṉ dia c̱he dii Isaínaꞌ,
daa galj to beṉꞌ iṉabiꞌe beṉꞌkaꞌ bi nak beṉꞌ Israel,
naꞌ gongakeꞌ lez gakleneꞌ ḻegakeꞌ.
13 Chios, beenaꞌ noncho lez goneꞌ wen c̱hecho, gonshgueꞌ ka yibaile naꞌ soale mbalaz daa nonḻilallꞌlene, kwenc̱he zizikli gonchleneꞌ lez daa zoalen yeḻꞌ wak c̱he Espíritu Sánto c̱heꞌnaꞌ leꞌ.
14 Leꞌ beṉꞌ bishꞌdawaa naꞌ leꞌ beṉꞌ zandawaa, ṉezyeṉidꞌ ḻe beṉꞌ wen nakle naꞌ ḻe ba chajniile, naꞌ ba chak wzajnii ljwell-le.
15 Naꞌ ḻee yishi ba biyaxjidꞌ bzejꞌ leꞌ c̱he baḻ diikaꞌ bi chiyaḻꞌ guetlallꞌle, ḻaꞌ chaklen Chiozaꞌ nadꞌ kwenc̱he
16 chonꞌ xshin Jesucrístonaꞌ ladj beṉꞌkaꞌ bi nak beṉꞌ Israel. Naꞌ llinni chonꞌ nakan ka xshin bx̱oz, beenaꞌ chjwaꞌ lao Chiozaꞌ diikaꞌ bibi ndaꞌ nchen. Ḻaꞌ daa choeꞌlenꞌ ḻegakeꞌ dillꞌ wen dillꞌ kob c̱heꞌnaꞌ kwenc̱he gonḻilallꞌgakeꞌ Crístonaꞌ, naꞌ yix̱is yiyib Espíritu Sántonaꞌ yic̱hjlallꞌdoꞌekaꞌ, naꞌ gakgakeꞌ lallꞌ naꞌ Chiozaꞌ, wak iṉacho nakgakeꞌ ka to dii bibi ndaꞌ nchen daa chzanidꞌ wiꞌaneꞌ.
17 Daa chaklen Cristo Jesúzaꞌ nadꞌ, chibaidꞌ choꞌa dillꞌ chonꞌ xshin Chiozaꞌ daa beneꞌ lallꞌ naꞌ.
18 Aga wiyaxjidꞌ wiꞌa dillꞌ c̱he bichlə dii ba benꞌ, san choꞌa dillꞌ ka ba bc̱hin Crístonaꞌ nadꞌ kwenc̱he zan beṉꞌkaꞌ bi nak beṉꞌ Israel chzenaggakeꞌ c̱heꞌ. Bc̱hineꞌ diikaꞌ wniaꞌ naꞌ diikaꞌ benꞌ
19 kon yeḻꞌ wak c̱he Espíritu c̱heꞌnaꞌ kwenc̱he gok diikaꞌ ben bleꞌi beṉꞌ naꞌ wyajḻeꞌgakeꞌ. Wzolozꞌ Jerusalénnaꞌ naꞌ wyaꞌ ax̱t doxen ganaꞌ mbani Ilíriconaꞌ beꞌlenꞌ yogꞌ beṉꞌ dillꞌ wen dillꞌ kob c̱he Crístonaꞌ.
20 Naꞌ benꞌ byen jtix̱jiꞌa dillꞌ wen dillꞌ kob c̱heꞌnaꞌ ganaꞌ konoṉꞌ iṉezin, kwenc̱he bi jac̱hishꞌ jaḻanꞌ xshin beṉꞌ yoblə.
21 San kon ka na Choꞌa Xtillꞌ Chiozaꞌ, ganaꞌ nan:
Beṉꞌkaꞌ biṉꞌ gombiaꞌgakeꞌ xtilleenaꞌ, gombiaꞌgakeꞌn,
naꞌ beṉꞌkaꞌ biṉꞌ yengakileꞌ xtilleenaꞌ, shajniꞌgakileꞌn.
22 Naꞌ ni c̱he llin dga chonꞌ biṉꞌ gak yidꞌ ganaꞌ zoale, ḻaꞌkzi zan shii ba goklallaa yidwiaꞌ leꞌ.
23 Per ṉaa ba biyoll benꞌ xshin Chiozaꞌ doxen gani chdaꞌ, naꞌ chakidꞌ wak yidwiaꞌ leꞌ, ḻaꞌ kanaꞌte chaklallaa yidꞌ.
24 Cheenidꞌ tiaꞌ ganaꞌ zoale katꞌ shaꞌ Espáñanaꞌ, ḻaꞌ cheenidꞌ ileꞌidꞌ leꞌ, ḻaꞌc̱hꞌ shloll, kwenc̱he soacho mbalaz. Naꞌ chbezꞌ gaklenle nadꞌ kwenc̱he gak koochꞌ nez.
25 Per ṉaa, yiyaa Jerusalénnaꞌ lljasanꞌ dii chyallji beṉꞌ bishꞌchokaꞌ lleꞌ naꞌ.
26 Ḻaꞌ beṉꞌkaꞌ choeꞌlaꞌogakeꞌ Crístonaꞌ Macedónianaꞌ naꞌ Acáyani do yic̱hj do lallꞌgakeꞌ ba btopgakeꞌ mech dii wseḻꞌgakeꞌ c̱he beṉꞌ yeshꞌdoꞌkaꞌ len ladj beṉꞌkaꞌ nonḻilallꞌ Crístonaꞌ Jerusalénnaꞌ.
27 Do yic̱hj do lallꞌgakeꞌ chaklallꞌgakeꞌ gaklengakeꞌ ḻegakeꞌ, naꞌ dii ḻi nakan to dii chiyaḻꞌ gongakeꞌ, ḻaꞌ lengakeꞌ ba naki c̱hegakeꞌ dii wenkaꞌ ba bc̱heb Chiozaꞌ c̱he netoꞌ beṉꞌ Israel, naꞌ chiyaḻꞌ yigoogakeꞌ wzon c̱he beṉꞌ Israelkaꞌ weꞌgakeꞌ daa chyalljgakileꞌ.
28 Naꞌ ka yiyoll lljasanꞌ mechi dga bengakeꞌ lo naꞌ, naꞌ kwaa nez shaꞌ Espáñanaꞌ naꞌ tiaꞌ yidwiaꞌ leꞌ.
29 Naꞌ ṉezidꞌ katꞌ yidwiaꞌ leꞌ, dii xen inlleb gaklen Crístonaꞌ choꞌ.
30 Leꞌ beṉꞌ bishꞌ naꞌ leꞌ beṉꞌ zanꞌ, daa nonḻilallꞌcho X̱ancho Jesucrístonaꞌ naꞌ daa chon Espíritu Sántonaꞌ ka chaki ljwellcho, chatꞌyoidꞌ leꞌ gakle nadꞌ txen iṉabgachile Chiozaꞌ gakleneꞌ nadꞌ lawi diikaꞌ chdiḻ chllagꞌ.
31 Ḻi iṉabi Chiozaꞌ yisleꞌ nadꞌ lo naꞌ beṉꞌkaꞌ bi chonḻilallꞌgakeꞌ Crístonaꞌ, beṉꞌkaꞌ lleꞌ ganaꞌ mbani Judeanaꞌ, naꞌ ḻekzkaꞌ ḻi iṉabileꞌ shoꞌlallꞌ bishꞌ ljwellchokaꞌ lleꞌ Jerusalénnaꞌ dga lljasanꞌ c̱hegakeꞌ,
32 kwenc̱he zoaꞌ mbalaz yidwiaꞌ leꞌ, shi Chiozaꞌ goṉeꞌ latj, naꞌ yiyakshaoꞌlallaa daa soacho txen.
33 Naꞌ Chiozaꞌ, beenaꞌ chon ka zoacho mbalaz, soalenshgueꞌ yogꞌle. Kaꞌ gakan.