16
Cheenidꞌ gombiaꞌle beṉꞌ zanchonaꞌ le Febe, beenaꞌ zoa chakleneꞌ bishꞌ ljwellchokaꞌ nonḻilallꞌ Jesucrístonaꞌ yell Cencreanaꞌ.
2 Daa nonḻilallee X̱ancho Jesucrístonaꞌ, wlebgachleneꞌ do yic̱hj do lallꞌle katꞌ yideꞌ ganaꞌ zoale, ḻaꞌ kanꞌ chiyaḻꞌ goncho, choꞌ nakcho lallꞌ naꞌ Chiozaꞌ. Naꞌ gaklenleneꞌ shi bi dii chyalljileꞌ, ḻaꞌ ḻenꞌ ba gokleneꞌ zan bishꞌ ljwellchokaꞌ naꞌ lentiaꞌ ba gokleneꞌ.
3 Ḻi wwapgach chiox Priscílanaꞌ len beṉꞌ c̱heꞌ, Aquílanaꞌ, beṉꞌkaꞌ chonlengakeꞌ nadꞌ xshin Cristo Jesúzaꞌ.
4 Ḻegakeꞌ bzoa dii nxoll yeḻꞌ mban c̱heꞌkaꞌ kwenc̱he goklengakeꞌ nadꞌ. Naꞌ aga to nadꞌzan niaꞌ chox̱kengakeꞌ bengakeꞌ kaꞌ, san len yogꞌ beṉꞌkaꞌ bi nak beṉꞌ Israel, beṉꞌkaꞌ ba nonḻilallꞌ Crístonaꞌ to to yell ganaꞌ jtix̱jiꞌa xtilleenaꞌ.
5 Naꞌ ḻekzkaꞌ ḻi wwapgach chiox beṉꞌkaꞌ chdop chllag choeꞌlaꞌogakeꞌ Crístonaꞌ lilleꞌkaꞌ. Naꞌ wwapgachle chiox Epenétonaꞌ, beenaꞌ ḻe chakidꞌ, beenaꞌ gok beṉꞌ nech benḻilallee Crístonaꞌ ganaꞌ mbani Ásianaꞌ.
6 Ḻi wwapgach Maríanaꞌ chiox, ḻaꞌ ḻe ba bilaḻ bizodileꞌ kwenc̱he gokleneꞌ leꞌ.
7 Ḻi wwapgach chiox beṉꞌ wlall c̱haꞌkaꞌ Andróniconaꞌ naꞌ Júniazaꞌ, beṉꞌkaꞌ wyoolenꞌ txen lillyanaꞌ. Nechgakeꞌ benḻilallꞌgakeꞌ Crístonaꞌ ka nadꞌ, naꞌ mbejlaogakeꞌ ladj beṉꞌkaꞌ chjtix̱jee xtilleenaꞌ.
8 Ḻi wwapgach chiox Ámpliazaꞌ. Ḻe chakidee daa nakeꞌ X̱ancho Jesucrístonaꞌ txen.
9 Ḻi wwapgach chiox Urbánonaꞌ, beenaꞌ chonleneꞌ netoꞌ xshin Cristo Jesúzaꞌ, naꞌ Estáquizaꞌ, beenaꞌ ḻe chakidꞌ.
10 Ḻi wwapgach chiox Apélezaꞌ, beenaꞌ ba bliꞌe chakileꞌ Crístonaꞌ do yic̱hj do lallee. Naꞌ ḻi wwapgach chiox Aristóbulonaꞌ naꞌ beṉꞌkaꞌ nakeꞌ txen ḻoo yoo lilleꞌnaꞌ.
11 Ḻi wwapgach chiox Herodiónnaꞌ, beenaꞌ nak beṉꞌ wlall c̱haꞌ. Naꞌ ḻekzkaꞌ ḻi wwapgach chiox Narcísonaꞌ naꞌ beṉꞌkaꞌ nakeꞌ txen ḻoo yoo lilleꞌnaꞌ, beṉꞌkaꞌ nonḻilallꞌ X̱ancho Jesucrístonaꞌ.
12 Ḻi wwapgach chiox Trifénanaꞌ naꞌ Trifósanaꞌ, noolkaꞌ chon xshin X̱ancho Jesucrístonaꞌ. Naꞌ ḻi wwapgach chiox Pérsidanaꞌ, beenaꞌ ḻe chakicho, ḻaꞌ ḻe ba bilaḻileꞌ beneꞌ xshin X̱anchonaꞌ.
13 Ḻi wwapgach chiox Rúfonaꞌ beenaꞌ ḻe zoac̱hec̱heꞌ chonḻilallee X̱ancho Jesucrístonaꞌ, naꞌ ḻekzkaꞌ xṉeenaꞌ, beenaꞌ chonileꞌ nadꞌ ka xiiṉeꞌ.
14 Ḻi wwapgach chiox Asíncritonaꞌ, Flegóntenaꞌ, Hérmazaꞌ, Patróbazaꞌ, Hérmezaꞌ naꞌ beṉꞌ bishꞌchokaꞌ naꞌ beṉꞌ zanchokaꞌ zoalen ḻegakeꞌ.
15 Ḻi wwapgach chiox Filólogonaꞌ naꞌ Júlianaꞌ, naꞌ Nerewaꞌ len beṉꞌ zaneꞌnaꞌ, naꞌ Olímpazaꞌ naꞌ yogꞌ beṉꞌkaꞌ zoalen ḻegakeꞌ, beṉꞌkaꞌ nak lallꞌ naꞌ Chiozaꞌ.
16 Ḻi wwapgach chiox ljwell-le ḻega beṉꞌ chaki ljwellin daa nakle Chiozaꞌ txen. Yogꞌ beṉꞌkaꞌ nonḻilallꞌ Crístonaꞌ yellkaꞌ ganaꞌ ba wyaꞌ chwapgakeꞌ leꞌ chiox.
17 Leꞌ beṉꞌ bishꞌ naꞌ leꞌ beṉꞌ zanꞌ, ḻi wsakꞌ bi wzenagle c̱he beṉꞌkaꞌ chon ka chak beṉꞌ c̱hoplə, naꞌ gongakeꞌ ka gakllejile c̱he dillꞌ ḻinaꞌ ba nsedle. Bi gonle ḻegakeꞌ txen.
18 Beṉꞌkaꞌ chon kaꞌ aga chongakeꞌ ka cheeni X̱ancho Jesucrístonaꞌ, san chongakeꞌ daa nazan c̱hegakeꞌ. Naꞌ choeꞌlaꞌo choeꞌ dillꞌgakeꞌ naꞌ choeꞌgakeꞌ dillꞌ goll-lallꞌ kwenc̱he chonllej chongaṉgakileꞌ beṉꞌkaꞌ chajḻeꞌdaz.
19 Yogꞌte beṉꞌ ba ṉezgakileꞌ nakle beṉꞌ wizoa dillꞌ, naꞌ ḻe chiba chizakidꞌ ka chonle. Naꞌ cheenidꞌ gakle beṉꞌ sinꞌ kwenc̱he gonchle diikaꞌ nak wen naꞌ bibi dii mal gonle.
20 Naꞌ Chiozaꞌ, beenaꞌ chon ka soacho mbalaz, lii wlliayiꞌtieꞌ yeḻꞌ wak c̱he Satanázaꞌ naꞌ goneꞌ ka wlej wshoshjlen. X̱ancho Jesucrístonaꞌ gaklenshgueꞌ leꞌ.
21 Timotewi, beeni chonleneꞌ nadꞌ xshin Chiozaꞌ, chwapeꞌ leꞌ chiox naꞌ ḻekzkaꞌ Lúcioni, Jasónni naꞌ Sosípateri, beṉꞌki nak beṉꞌ wlall c̱haꞌ.
22 Nadꞌ, Tercio, chzejꞌ dga na Pábloni, naꞌ ḻekzkaꞌ chwapꞌ leꞌ chiox daa nakcho X̱ancho Jesucrístonaꞌ txen.
23 Naꞌ Gáyoni chwapeꞌ leꞌ chiox, beeni noṉeꞌ lilleꞌni zoantoꞌ, naꞌ ḻekzkaꞌ lilleꞌni noꞌen kwenc̱he chdop chllag beṉꞌki choeꞌlaꞌogakeꞌ Crístonaꞌ. Naꞌ Erástoni, beeni ngoo lo nee mech c̱he yelli, chwapeꞌ leꞌ chiox, naꞌ ḻekzkaꞌ bishꞌ ljwellchoni le Cuarto.
24 X̱ancho Jesucrístonaꞌ gaklenshgueꞌ yogꞌḻoḻtele. Kanꞌ gakan.
25 Chiyaḻꞌ weꞌlaꞌocho Chiozaꞌ, beenaꞌ wak goneꞌ ka soac̱hec̱hle gonḻilallꞌleneꞌ daa wyajḻeꞌle dillꞌ wen dillꞌ kob c̱heꞌnaꞌ daa chyix̱jiꞌa, daa chzajniin choꞌ c̱he Jesucrístonaꞌ. Nakan daa kono wṉezi kaniꞌteyi,
26 per ṉaa, Chios, beenaꞌ zoa zejḻi kaṉi, chaklallee iṉezichon, naꞌ ba beneꞌ ka chajniicho diikaꞌ bzej dii beṉꞌkaꞌ wdix̱jee daa golleꞌ ḻegakeꞌ kaniꞌyi kwenc̱he yogꞌ beṉꞌ lleꞌ doxen yell-lioni shajḻeꞌgakeꞌn naꞌ wzenaggakeꞌ c̱heyin.
27 Toz Chiozaꞌ zeelo nakeꞌ beṉꞌ sinꞌ. Naꞌ chiyaḻꞌ koochoneꞌ balaaṉ zejḻi kaṉi daa bseḻee Jesucrístonaꞌ. Kanꞌ nakan.