14
Ḻi gap yeḻꞌ chxenlallꞌ c̱he beenaꞌ biṉꞌ gakcha, naꞌ bi gakdiḻ-lenleneꞌ ni c̱he diikaꞌ bi nak dii llialo.
2 Ḻaꞌ baḻ beṉꞌ chakgakileꞌ nakkzan wen gaogakeꞌ bittezə yeḻꞌ wao, naꞌ zi baḻeꞌ chakgakileꞌ chiyaḻꞌ gaogakeꞌ shgaḻꞌ yix̱ꞌ kwan.
3 Beenaꞌ cheej chao bittezə, bi chiyaḻꞌ gonileꞌ nakzi beenaꞌ bi cheej chao yogꞌḻoḻ. Naꞌ beenaꞌ bi cheej chao yogꞌḻoḻ, bi chiyaḻꞌ gakileꞌ beenaꞌ cheej chao bittezə bi choneꞌ wen. Ḻaꞌ Chiozaꞌ ba noni xiiṉeꞌ c̱hoptegakeꞌ.
4 ¿Nora nakoꞌ liꞌ wwia wyizoꞌ nak chon wen llin c̱he beṉꞌ yoblə? Toz x̱aneꞌnanꞌ ṉezileꞌ shi choneꞌ wen wa bi choneꞌ wen. Naꞌ wzakkzileꞌ goneꞌ ka chiyaḻꞌ, ḻaꞌ X̱anchonaꞌ napeꞌ yeḻꞌ wak kwenc̱he goneꞌ ka soac̱hec̱h xiiṉeꞌkaꞌ gongakeꞌ ka cheenileꞌ.
5 Naꞌ nitꞌ beṉꞌ chakgakileꞌ zoa lla nakchan lla choo lla xench aga ka lla yoblə. Naꞌ ḻekzkaꞌ zoa beṉꞌ chakgakileꞌ toz ka nak yogꞌte llakaꞌ. To to beṉꞌ chiyaḻꞌ soeꞌ do yic̱hj do lallee goneꞌ ka chakileꞌ nakan wen.
6 Naꞌ beenaꞌ chaki zoa lla nakan lla choo lla xench aga ka lla yoblə, chbejeꞌn kwenc̱he kwee X̱ancho Crístonaꞌ balaaṉ. Naꞌ beenaꞌ chaki toz ka nak yogꞌte llakaꞌ, ḻekzkaꞌ X̱ancho Crístonanꞌ chgwee balaaṉ daa chakileꞌ kaꞌ. Naꞌ beenaꞌ chao bittezə, chgwee X̱anchonaꞌ balaaṉ, ḻaꞌ choꞌe Chiozaꞌ yeḻꞌ chox̱ken katꞌ chaweꞌn. Naꞌ beenaꞌ bi chao yogꞌḻoḻ, ḻekzkaꞌ chgwee X̱ancho Crístonaꞌ balaaṉ, ḻaꞌ ḻekzkaꞌ choꞌe Chiozaꞌ yeḻꞌ chox̱ken katꞌ chaweꞌ.
7 Ni tocho bi chiyaḻꞌ secho wṉeyi c̱he kwinzcho. Shi mbancho wa shi guetcho chiyaḻꞌ secho wṉeyi daa cheeni Crístonaꞌ.
8 Shi mbancho naꞌ goncho ka shoꞌ X̱ancho Jesucrístonaꞌ balaaṉ, naꞌ shi guetcho naꞌ guetcho ka shoꞌe balaaṉ. Ḻaꞌ, ḻaa mbancho wa ba witcho, lallꞌ naꞌ X̱anchonaꞌkzan nakcho.
9 Crístonaꞌ witeꞌ naꞌ bibaneꞌ ladj beṉꞌ wetkaꞌ kwenc̱he gakeꞌ X̱an yogꞌḻoḻ beṉꞌ, ka beṉꞌ mban naꞌ ka beṉꞌ ba wit.
10 Bi chiyaḻꞌ yiya yiyiljcho bishꞌ ljwellchonaꞌ, ni bi chiyaḻꞌ gonichoneꞌ nakzi. Ḻaꞌ yogꞌḻoḻcho lljazecho lao Chiozaꞌ kwenc̱he wc̱hogloeꞌ c̱he to tocho.
11 Choꞌa Xtillꞌ Chiozaꞌ nan:
X̱ancho Chiozaꞌ neꞌ, dii ḻi zoakzꞌ nadꞌ, naꞌ dii ḻi yogꞌ beṉꞌ wc̱hekꞌ xibeꞌkaꞌ lawaꞌni,
naꞌ yoguee weꞌgakeꞌ dillꞌ nan nadꞌ nakꞌ Chios.
12 Naꞌchan to tocho yidecho kwent lao Chiozaꞌ c̱he diikaꞌ bencho.
13 Daan, bich chiyaḻꞌ yiya yiyilj ljwellcho. San wsakꞌcho bi goncho bittezə dii gonan ka ixop bishꞌ ljwellchonaꞌ goneꞌ dii malaꞌ wa gakc̱hoplallee.
14 Daa bzajnii X̱ancho Jesúzaꞌ nadꞌ, ṉezidꞌ aga bi yeḻꞌ wao de dii chx̱iṉj chḻenan choꞌ, ḻete shi to beṉꞌ chakileꞌ de yeḻꞌ wao dii chx̱iṉj chḻenan yic̱hjlallꞌdoꞌenaꞌ, bi nakan wen gaweꞌn shi ṉaa.
15 Naꞌ shi daa cheej chawoꞌ chonan ka chakc̱hoplallꞌ bishꞌ ljwelloꞌnaꞌ, aga chakiloꞌnenꞌ shi ni cheej chaozoꞌn. Bi chiyaḻꞌ yeej gawoꞌ daa gonan ka kwiayiꞌ beenaꞌ wit Crístonaꞌ ni c̱heꞌ.
16 Ḻaꞌkzi chonle bittezə dii chakile nakan wen, bi chiyaḻꞌ gonchlen shi chonan ka iṉa beṉꞌ yoblə aga wenan chonle.
17 Ḻaꞌ shi ba chṉabiaꞌ Chiozaꞌ choꞌ, diikaꞌ cheej chaocho bi nakan dii llialo, san dii llialo yiyakcho beṉꞌ ḻi beṉꞌ shaoꞌ naꞌ soalen ljwellcho mbalaz, naꞌ soacho yiba yizakicho daa zoalen Espíritu Sántonaꞌ choꞌ.
18 Naꞌ shi zoacho choncho diiki chazlallꞌ Crístonaꞌ, naꞌ yibayi Chiozaꞌ ka choncho naꞌ ḻekzkaꞌ beṉꞌ yell-lioni iṉagakeꞌ choncho wen.
19 Daan, chiyaḻꞌ goncho to dii byen soalen ljwellcho mbalaz naꞌ gakchachcho ganga.
20 Bi yeej gaocho to dii gonan ka yinit dii wennaꞌ ba ben Chiozaꞌ c̱hecho. Dii ḻi, yogꞌ diikaꞌ cheej chaocho nakgakan wen, san bi nakan wen yeej gaocho to dii chonan ka gakc̱hoplallꞌ beṉꞌ yoblə.
21 Wentelan bi gaocho belaa ni bi yeejcho vinonaꞌ, ni bi gonzcho bittezə dii gonan ka gakc̱hoplallꞌ bishꞌ ljwellchokaꞌ.
22 Chiyaḻꞌ iṉeziloꞌ daa yeej gawoꞌ do yic̱hj do lalloo bi nakan mal lao Chiozaꞌ. Chakomba beenaꞌ bibi chzaꞌlallee c̱heyi daa ṉezileꞌ nak wen.
23 Beenaꞌ chonc̱hoplallꞌ katꞌ yeej gaweꞌ to yeḻꞌ wao, chapeꞌ doḻꞌ daa bi chaweꞌn do yic̱hj do lallee. Naꞌ yogꞌ daa bi goncho do yic̱hj do lallꞌcho, nakan xya.