13
Yogꞌcho chiyaḻꞌ wzenagcho c̱he beṉꞌkaꞌ chṉabiaꞌ, ḻaꞌ aga bi yeḻꞌ wṉabiaꞌ de dii bi nak c̱he Chiozaꞌ. Naꞌ Chiozaꞌ nzoeꞌ beṉꞌkaꞌ kwenc̱he iṉabiaꞌgakeꞌ.
2 Naꞌ beenaꞌ chizoshyiꞌ beṉꞌkaꞌ chṉabiaꞌ, daa nllia Chiozaꞌ biaꞌ gonchon chizoshyiꞌe. Naꞌ beṉꞌkaꞌ chon kaꞌ, c̱hoglo c̱hegakeꞌ sakꞌziꞌgakeꞌ.
3 Beṉꞌkaꞌ chṉabiaꞌ, aga zoagakeꞌ kwenc̱he wwall wshebgakeꞌ beṉꞌkaꞌ chon wenan, san beṉꞌkaꞌ chon malan chiyaḻꞌ gall illebgakeꞌ ḻegakeꞌ. Shi chall chlleboꞌ beṉꞌkaꞌ chṉabiaꞌ, ben wen, naꞌ iṉegakeꞌ wen c̱hoꞌ.
4 Ḻaꞌ Chiozaꞌ nzoeꞌ beṉꞌkaꞌ chṉabiaꞌ kwenc̱he soacho mbalaz. Per shi bi chonoꞌ wen, naꞌchan shoꞌ sheboꞌ, ḻaꞌ aga zoaxenzə beṉꞌkaꞌ chṉabiaꞌn, san Chiozanꞌ nzoeꞌ ḻegakeꞌ kwenc̱he wsakꞌziꞌgakeꞌ ka chiyaḻi beenaꞌ bi chon wen.
5 Daan, chonan byen wzenagcho c̱he beṉꞌkaꞌ chṉabiaꞌ, aga kwenc̱hezə bi wsakꞌziꞌgakeꞌ chonꞌ, san daa ṉezicho chiyaḻꞌ goncho wenan.
6 Naꞌ ḻekzkaꞌ chiyaḻꞌ weꞌcho daa chidoḻꞌcho c̱hixjcho, ḻaꞌ Chiozaꞌ nzoeꞌ ḻegakeꞌ kwenc̱he chṉabiaꞌgakeꞌ, naꞌ ḻennanꞌ noni xshingakeꞌ.
7 Naꞌ chiyaḻꞌ yiyixjcho c̱he yogꞌ beṉꞌ shi bi chbagꞌcho c̱hegakeꞌ. Shi chaḻꞌcho daa chc̱hixj beṉꞌkaꞌ chṉabiaꞌ choꞌ, chiyaḻꞌ c̱hixjchon. Naꞌ beenaꞌ chiyaḻꞌ idap balaaṉ, chiyaḻꞌ gapchoneꞌ balaaṉ. Naꞌ beenaꞌ chidoḻꞌ shoꞌe balaaṉ, chiyaḻꞌ koochoneꞌ balaaṉ.
8 Bi chiyaḻꞌ ibagꞌcho c̱he beṉꞌ, san daa chiyaḻꞌ goncho gaki ljwellcho, ḻaꞌ beenaꞌ ba chaki bishꞌ ljwelleꞌnaꞌ ba choneꞌ doxen ka na ley c̱he Chiozaꞌ.
9 Naꞌ ki na ley c̱heꞌnaꞌ: “Bi talenoꞌ nool bi nak xooloꞌ. Bi gonoꞌ xya. Bi kwanoꞌ. Bi selalloo bi de c̱he beṉꞌ.” Yogꞌkzə diikin ba choncho lente yogꞌ diikaꞌ sto nllia leyaꞌ biaꞌ shi ba choncho dga na: “Chiyaḻꞌ gaki bishꞌ ljwelloꞌnaꞌ ka chaki kwinoꞌ.”
10 Shi ba chakicho bishꞌ ljwellchonaꞌ, bibi dii mal gonichoneꞌ. Daan, ba choncho doxen ka nllia leyaꞌ biaꞌ shi ba chaki ljwellcho.
11 Ḻi gakbeꞌi ka nak llaki zoacho ṉaa. Ba goḻꞌ goncho ka dii le naꞌ bich gonzcho ka beṉꞌ ches, ḻaꞌ gaoch ba zoa yisla Chiozaꞌ choꞌ lao dii malaꞌ aga ka kanaꞌ ziꞌ wyajḻeꞌcho choꞌa xtilleenaꞌ.
12 Ba zoa gao te c̱he yell-lioni gani chṉabiaꞌ dii malaꞌ daa zaklebi yel c̱hoḻaꞌ, naꞌ ba zoa gao ileꞌicho beeniꞌ c̱he Chiozaꞌ. Daan, chiyaḻꞌ kwej yic̱hjcho dii malaꞌ naꞌ soacho goncho dii wennaꞌ ḻega beṉꞌ yoo beeniꞌ c̱he Chiozaꞌ.
13 Chiyaḻꞌ wsaꞌ c̱hecho wen, ka beṉꞌ chda tella. Bi chiyaḻꞌ goncho txen ga cheej chao beṉꞌ naꞌ chzoll chnitgakileꞌ, ni bi chiyaḻꞌ talencho xiiṉ xool beṉꞌ wa xiiṉ xyo beṉꞌ, ni bi chiyaḻꞌ goncho bichlə daa nak zban. Naꞌ bi chiyaḻꞌ gakdiḻ-lencho beṉꞌ, ni bi chiyaḻꞌ gakcho beṉꞌ xeꞌ.
14 San chiyaḻꞌ gon kwincho lallꞌ naꞌ X̱ancho Jesucrístonaꞌ naꞌ koo yic̱hjcho wsaꞌ c̱hecho ka chazlallee naꞌ bich secho wṉeyi weꞌcho choꞌa xbayi beli chenni.