11
Naꞌ niaꞌ ¿aba wlej yic̱hj Chiozaꞌ yell c̱heꞌnaꞌ toshiizin, lla? ¡Bi nakan kaꞌ! Ḻaꞌ ḻekzkaꞌ nadꞌ nakꞌ beṉꞌ Israel. Goljꞌ lo dia c̱he dii Abrahamaꞌ naꞌ nakꞌ xiiṉ dia c̱he dii Benjamínnaꞌ.
2 Kaniꞌteyi wlej Chiozaꞌ netoꞌ beṉꞌ Israel kwenc̱he nakntoꞌ yell c̱heꞌ, naꞌ aga ba wlej yic̱hjeꞌ netoꞌ. ¿Abi chjtinile ka na Choꞌa Xtillꞌ Chiozaꞌ c̱he Elíazaꞌ? nan ka beꞌḻwilleꞌ Chiozaꞌ wdaweꞌ xya c̱he beṉꞌ Israelkaꞌ, chiꞌe:
3 “X̱anꞌ, beṉꞌ wlall c̱haꞌkaꞌ ba betgakeꞌ beṉꞌkaꞌ wdix̱jee daa golloꞌ ḻegakeꞌ naꞌ ba blliayiꞌgakeꞌ ganaꞌ chzeyntoꞌ bayix̱ꞌkaꞌ choṉntoꞌ liꞌ. Stochga nadꞌ chgaaṉaꞌ, naꞌ ḻekzkaꞌ cheengakileꞌ witgakeꞌ nadꞌ.”
4 Naꞌch Chiozaꞌ golleꞌneꞌ: “Ni nzoaꞌ galla mil beṉꞌ Israel, beṉꞌ chzenag c̱haꞌ naꞌ biṉꞌ wc̱hekꞌ xibeꞌkaꞌ lao Baalaꞌ.”
5 Naꞌ kaꞌkzan chak ṉaanlla, zi x̱onjchga netoꞌ beṉꞌ Israel chzenagntoꞌ c̱heꞌ. Naꞌ yeḻꞌ beṉꞌ wen c̱heꞌnaꞌ wlejeꞌ netoꞌ gakntoꞌ lallꞌ nee daa nakeꞌ beṉꞌ chiyeshꞌlallii.
6 Naꞌ shi yeḻꞌ beṉꞌ wen c̱heꞌnanꞌ wlejeꞌ netoꞌ, zejin aga wlejeꞌ netoꞌ ni c̱he shi bi dii wennan chonntoꞌ. Ḻaꞌ sheḻꞌ wlejeꞌ netoꞌ ni c̱he dii wennaꞌ chonntoꞌ, bi nakan to goklen daa beneꞌ c̱hentoꞌ, sheḻꞌkaꞌ.
7 Beṉꞌ Israelkaꞌ goklallꞌgakeꞌ yiyakgakeꞌ beṉꞌ wen lao Chiozaꞌ tobiaꞌlallꞌzgakeꞌ, naꞌ bi gokan, san beṉꞌkaꞌ ba wlej Chiozanꞌ bdoḻꞌ bllongakileꞌn. Naꞌ beṉꞌkaꞌ sto, zizikchli gokchgakeꞌ beṉꞌ widenag.
8 Gok ka na Choꞌa Xtillꞌ Chiozaꞌ daa na: “Chiozaꞌ bc̱hoḻ bṉitileꞌ ḻegakeꞌ kwenc̱he bi shajniꞌgakileꞌ. Naꞌ ax̱t ṉaanlla nakgakeꞌ ka to beṉꞌ bi chen chleꞌi.”
9 Ki wna dii Davinaꞌ:
“Yiyakshga lṉi c̱heꞌkaꞌ ka to yalj dii wzapan ḻegakeꞌ,
naꞌ ka to dii chgoo chc̱hewꞌgakeꞌ, naꞌ sakꞌziꞌgakeꞌ.
10 Gakshgagakeꞌ ka beṉꞌ lc̱hoḻ;
naꞌ toshiizi gak c̱hegakeꞌ ka to beṉꞌ noaꞌ to dii zii wal.”
11 Naꞌch niaꞌ: ¿Adaa bi bzenag beṉꞌ Israelkaꞌ c̱he Chiozanꞌ wchooṉlallee ḻegakeꞌ toshiizi, lla? ¡Bi nakan kaꞌ! San daa bi bzoagakeꞌ xtilleenanꞌ, naꞌchan bisleꞌ beṉꞌkaꞌ bi naklə beṉꞌ Israel kwenc̱he beṉꞌ Israelkaꞌ ḻekzkaꞌ gaklallꞌgakeꞌ yisleꞌ ḻegakeꞌ.
12 Shi yeḻꞌ widenag c̱he beṉꞌ Israelkanꞌ benan ka gok wen c̱he beṉꞌkaꞌ bi nak beṉꞌ Israel, ¿alechlə ki gakch wen c̱hegakeꞌ katꞌ beṉꞌ Israelkaꞌ yiyonḻilallꞌgakeꞌneꞌ?
13 De to dii cheenidꞌ weꞌlenꞌ leꞌ dillꞌ, leꞌ bi nakle beṉꞌ Israel. Chiozaꞌ ba wlejeꞌ nadꞌ naꞌ bseḻee nadꞌ laolenaꞌ. Naꞌ do yic̱hj do lallaa chonꞌ dga beneꞌ lallꞌ naꞌ gonꞌ,
14 kwenc̱he shi baḻ beṉꞌ wlall c̱haꞌkaꞌ gaklallꞌgakeꞌ gak c̱hegakeꞌ ka ba chwiagakeꞌ chak c̱hele, naꞌ yilagakeꞌ bi kwiayiꞌgakeꞌ.
15 Ḻaꞌ shi daa bzoa Chiozaꞌ beṉꞌ Israelkaꞌ kaꞌlə, beneꞌ ka beṉꞌkaꞌ bi nak beṉꞌ Israel bizoalengakeꞌneꞌ wen, ḻe mbalaz katꞌ illin lla yilebeꞌ beṉꞌ Israelkaꞌ sto shii. Ḻaꞌ gak c̱hegakeꞌ ka to beṉꞌ biban ladj beṉꞌ wetkaꞌ.
16 Naꞌ shi ḻee kwanaꞌ chbejcho daa chonicho yetxtil nechaꞌ daa choeꞌcho Chiozaꞌ, zejin doxente kwanaꞌ nakan c̱heꞌ. Naꞌ shi lo yagaꞌ nakan c̱he Chiozaꞌ, ḻekzkaꞌ xoziinkaꞌ nakgakan c̱heꞌ.
17 Beṉꞌ Israelkaꞌ zaklebgakileꞌ yag olivo wennaꞌ daa bc̱hogueꞌ baḻ xoziinkaꞌ, naꞌ leꞌ bi nakle beṉꞌ Israel zaklebileꞌ yag olivo yix̱aa daa bidee ḻee yag wennaꞌ. Naꞌ yag wennaꞌ nox̱aan xozii yag olivo yix̱aa diikaꞌ bidee ḻeꞌinnaꞌ naꞌ choꞌen yeḻꞌ mban c̱hegakan.
18 Per bi gakile nakchle beṉꞌ wench aga ka beṉꞌ Israelkaꞌ, beṉꞌkaꞌ zaklebi xozꞌ yagaꞌ diikaꞌ bc̱hogueꞌ. Bi shep shaꞌlallꞌle, ḻaꞌ aga xozꞌ yaganꞌ choꞌen yeḻꞌ mban c̱heyin san loinnanꞌ choeꞌn yeḻꞌ mban c̱he xoziinkaꞌ.
19 Naꞌ wnaljale: “Bc̱hogueꞌ xoziinkaꞌ kwenc̱he bidee netoꞌ ḻeꞌinnaꞌ.”
20 Lekzile kanꞌ nakan, ḻaꞌ daa bi benḻilallꞌgakeꞌ Chiozanꞌ, bzoeꞌ ḻegakeꞌ kaꞌlə, naꞌ biyakle lallꞌ nee daa nonḻilallꞌleneꞌ. Daan, bi shep shaꞌlallꞌle, san ḻi gall illeb Chiozaꞌ.
21 Ḻaꞌ shi Chiozaꞌ bi biyeshileꞌ xozꞌ yagaꞌ diikaꞌ nak dowalj, ḻekzkaꞌ goneꞌ c̱hele shi ṉaa.
22 Ḻi gakbeꞌi ka beṉꞌ wen beṉꞌ shaoꞌ nak Chiozaꞌ naꞌ ḻekzkaꞌ nakeꞌ beṉꞌ chsakꞌziꞌ. Ḻaꞌ bsakꞌziꞌe beṉꞌkaꞌ bi benḻilallꞌgakeꞌneꞌ, naꞌ ba choneꞌ wen c̱hele. Naꞌ goncheꞌ wen c̱hele shi gonle ka dii le gonḻilallꞌleneꞌ, san shi bich gonḻilallꞌleneꞌ ḻekzkaꞌ wzoeꞌ leꞌ kaꞌlə.
23 Naꞌ shi beṉꞌ Israelkaꞌ gonḻilallꞌgakeꞌneꞌ, naꞌ yidee ḻegakeꞌ sto shii ḻee yagaꞌ, ḻaꞌ Chiozaꞌ wak goneꞌn.
24 Naꞌ leꞌ bi nakle beṉꞌ Israel, wak iṉacho nakle ka xozꞌ yag olivo yix̱aa diikaꞌ bidee ḻee yag olivo wennaꞌ, ḻaꞌkzi bi nakan dowalj xoziin. ¿Alechlin diikaꞌ nak dowalj xoziin ki yideen sto shii? Beṉꞌ Israelkaꞌ nakgakeꞌ ka xoziin daa nak dowalj, naꞌ aga bi lallj nakan yileb Chiozaꞌ ḻegakeꞌ dii yoblə.
25 Leꞌ beṉꞌ bishꞌ naꞌ leꞌ beṉꞌ zanꞌ, de to dii biṉꞌ iṉezile daa bzajnii Chiozaꞌ nadꞌ, naꞌ cheenidꞌ iṉezilen kwenc̱he bi gakzle beṉꞌ chaꞌsib naꞌ gakzile zakꞌchle ka netoꞌ beṉꞌ Israel. Ḻaꞌ aga toshiizin gak beṉꞌ Israelkaꞌ beṉꞌ widenag, san katꞌkaꞌ ba bzaꞌ beṉꞌkaꞌ bi nak beṉꞌ Israel gonḻilallꞌgakeꞌ Crístonanꞌ, bich gak beṉꞌ Israelkaꞌ widenag.
26 Naꞌ ka illin lla gak kaꞌ, naꞌch yogꞌ beṉꞌ Israelkaꞌ yiyakgakeꞌ lallꞌ naꞌ Chiozaꞌ. Naꞌ gak ka na Choꞌa Xtilleenaꞌ daa na:
Yell Jerusalénnaꞌ ichej to beṉꞌ
yisell yiḻee beṉꞌkaꞌ nak xiiṉ dia c̱he dii Jacobaꞌ lao dii malaꞌ.
27 Naꞌ dgan chc̱hebꞌ gonꞌ c̱hegakeꞌ,
yiziꞌxenꞌ saaxya c̱heꞌkaꞌ.
28 Naꞌ daa bi bzenag beṉꞌ Israelkaꞌ dillꞌ wen dillꞌ kob c̱he Crístonaꞌ, bllaa Chiozaꞌ ḻegakeꞌ. Naꞌ daa gok kaꞌ gotꞌ latj benḻilallꞌleneꞌ, leꞌ bi nakle beṉꞌ Israel. Per Chiozaꞌ ni chakileꞌ netoꞌ beṉꞌ Israel daa wlejeꞌ dii x̱ozxtoꞌntoꞌkaꞌ kwenc̱he gakgakeꞌ beṉꞌ yell c̱heꞌ.
29 Naꞌ daa choṉ Chiozaꞌ, aga wikwaseꞌn naꞌ bi chiyajileꞌ daa chax chṉabeꞌ choꞌ.
30 Kanaꞌ, leꞌ bi nakle beṉꞌ Israel, bi bzenagle c̱he Chiozaꞌ. Per ṉaa, daa gok beṉꞌ wlall c̱haꞌkaꞌ beṉꞌ widenag lao Chiozaꞌ, ba biyeshꞌlallileꞌ leꞌ.
31 Naꞌ daa bi chzenaggakeꞌ c̱he Chiozaꞌ ṉaa, chak kaꞌ kwenc̱he wliyi Chiozaꞌ ḻegakeꞌ nan ḻekzkaꞌ chiyeshꞌlallileꞌ ḻegakeꞌ ka chiyeshꞌlallileꞌ leꞌ.
32 Ḻaꞌ Chiozaꞌ biꞌe latj yogꞌḻoḻ beṉꞌ gokgakeꞌ beṉꞌ widenag kwenc̱he yogꞌḻoḻgakeꞌ yiyeshꞌlallileꞌ.
33 ¡Dii xen inlleb nak yeḻꞌ sinꞌ naꞌ yeḻꞌ chajnii c̱he Chiozaꞌ! ¡Ni to kono chajnii daa nllieꞌ biaꞌ gak wa daa nllieꞌ biaꞌ goneꞌ!
34 Ḻaꞌ “ni to kono ṉezi daa chzaꞌlallꞌ X̱ancho Chiozaꞌ, naꞌ ni to kono gak wzajniileꞌneꞌ nakan chiyaḻꞌ goneꞌ.
35 Biga zoa beṉꞌ ba biꞌe Chiozaꞌ dii naki c̱heꞌ kwenc̱he goneꞌ lez yigoo Chiozaꞌ wzon c̱heꞌ.”
36 Ḻaꞌ ḻenꞌ bx̱e bsileꞌ yogꞌḻoḻte dii de naꞌ bllieꞌ biaꞌ chongakan ka chaklallee, naꞌ yogꞌḻoḻ dii de nakan c̱heꞌ. ¡Ḻeꞌ chidoḻee koochoneꞌ balaaṉ zejḻi kaṉi! Kanꞌ nakan.