10
Naꞌ leꞌ beṉꞌ bishꞌ naꞌ leꞌ beṉꞌ zanꞌ, daa llialallaa naꞌ daa chṉabꞌ katꞌ choeꞌḻwillꞌ Chiozaꞌ chṉabidee yisleꞌ beṉꞌ wlall c̱haꞌkaꞌ, beṉꞌkaꞌ nak beṉꞌ Israel, kwenc̱he bi kwiayiꞌgakeꞌ.
2 Ṉez nḻeꞌidꞌ c̱hegakeꞌ zechgagakeꞌ wṉeyi gongakeꞌ ka cheeni Chiozaꞌ, toz daa bi ṉezgakileꞌ nakyeṉꞌan cheenileꞌ gongakeꞌ.
3 Daa bi chajniꞌgakileꞌ toz Chiozanꞌ chiyoneꞌ beṉꞌ beṉꞌ ḻi beṉꞌ shaoꞌ, chaklallꞌgakeꞌ yiyon kwingakeꞌ beṉꞌ wen, naꞌ bi cheengakileꞌ gonḻilallꞌgakeꞌ Crístonaꞌ kwenc̱he yiyakgakeꞌ beṉꞌ ḻi beṉꞌ shaoꞌ laweꞌnaꞌ.
4 Ḻaꞌ daa bid Crístonaꞌ, beneꞌ daa bi gok gon leyaꞌ, naꞌ yogꞌ beṉꞌkaꞌ gonḻilallꞌgakeꞌneꞌ yiyakgakeꞌ beṉꞌ ḻi beṉꞌ shaoꞌ lao Chiozaꞌ. Naꞌ bich goncho lez daa goncho ka na leyanꞌ yiyakcho beṉꞌ wen laweꞌnaꞌ.
5 Dii Moisézaꞌ bzejeꞌ ka chiyaḻꞌ gon beṉꞌkaꞌ zoa xṉiꞌa leyaꞌ kwenc̱he yiyakgakeꞌ beṉꞌ wen lao Chiozaꞌ, naꞌ nan: “Nottezə beṉꞌ chon doxen ka na leyaꞌ siꞌe banez yeḻꞌ mban c̱heꞌnaꞌ.”
6 Naꞌ c̱he beṉꞌkaꞌ nak beṉꞌ ḻi beṉꞌ shaoꞌ lao Chiozaꞌ daa nonḻilallꞌgakeꞌneꞌ, wneꞌ: “Bi saꞌlallꞌzle, iṉale: ¿Nora gak shaj yabanaꞌ?”, (kwenc̱he goneꞌ ka yetj Crístonaꞌ yell-lioni).
7 “Ni bi iṉale: ¿Nora gak yetj ganaꞌ lleꞌ beṉꞌ wetkaꞌ?”, (kwenc̱he lljalejeꞌ Crístonaꞌ ladjeꞌkaꞌ).
8 Ki chizna daa bzej dii Moisézaꞌ: “Dillaa daa ba wna Chiozaꞌ zoalenan leꞌ naꞌ ba yoon choꞌa ḻollꞌlenaꞌ naꞌ ḻoo yic̱hjlallꞌdoꞌlenaꞌ”, naꞌ ḻennanꞌ daa choeꞌlenntoꞌ leꞌ, nantoꞌ chiyaḻꞌ gonḻilallꞌle Crístonaꞌ.
9 Shi wiꞌo dillꞌ Jesúzaꞌ nakeꞌ X̱ancho naꞌ shajḻiꞌo do yic̱hj do lalloo nan Chiozaꞌ bisbaneꞌneꞌ ladj beṉꞌ wetkaꞌ, naꞌ yisla Chiozaꞌ liꞌ kwenc̱he bi kwiayoo.
10 Ḻaꞌ daa shajḻeꞌcho do yic̱hj do lallꞌchon, yiyakcho beṉꞌ ḻi beṉꞌ shaoꞌ lao Chiozaꞌ, naꞌ ḻekzkaꞌ daa choeꞌcho dillꞌ nan Crístonaꞌ nakeꞌ X̱ancho, yisleꞌ choꞌ kwenc̱he bi kwiayiꞌcho.
11 Choꞌa Xtillꞌ Chiozaꞌ nan: “Nottez beṉꞌ gonḻilalleeneꞌ, biga yiyajileꞌ daa benḻilalleeneꞌ.”
12 Ḻaa nakcho beṉꞌ Israel, ḻaa bi nakcho beṉꞌ Israel, Crístonaꞌ nakeꞌ X̱ancho, naꞌ chakleneꞌ yogꞌcho choꞌ chṉabcho yeḻꞌ goklen laweꞌnaꞌ.
13 Ḻaꞌ nottezə beṉꞌ iṉabeꞌ gaklen X̱ancho Crístonaꞌ ḻeꞌ, naꞌ yisleꞌneꞌ kwenc̱he bi kwiayee.
14 Per ¿nakra gon beṉꞌ iṉabgakeꞌ gakleneꞌ ḻegakeꞌ shi biṉꞌ gonḻilallꞌgakeꞌneꞌ? Naꞌ ¿nakra gongakeꞌ gonḻilallꞌgakeꞌneꞌ shi biṉꞌ yengakileꞌ xtilleenaꞌ? Naꞌ ¿nakra gak yengakileꞌ xtilleenaꞌ shi kono zoa c̱hix̱jeꞌileꞌn ḻegakeꞌ?
15 Naꞌ ¿nakra gak soa beṉꞌ c̱hix̱jee xtilleenaꞌ shi kono wseḻꞌ ḻegakeꞌ? Ka na Choꞌa Xtillꞌ Chiozaꞌ: “Mbalaz inlleb katꞌ ilaꞌ beṉꞌkaꞌ zidtix̱jeꞌgakeꞌ dillꞌ wen dillꞌ kob c̱he Chiozaꞌ.”
16 Per aga yogꞌ beṉꞌ Israelkaꞌ chzenaggakeꞌ dillꞌ wen dillꞌ kob c̱he Chiozaꞌ. Chak ka bzej dii Isaíazaꞌ, ganaꞌ na: “X̱anꞌ, kono chajḻeꞌ dillaa daa chyix̱jeꞌntoꞌ.”
17 Daan, kwenc̱he gonḻilallꞌ beṉꞌ Crístonaꞌ chiyaḻꞌ yengakileꞌ xtilleenaꞌ.
18 Naꞌ niaꞌ: ¿Abiṉꞌ yengakileꞌ choꞌa xtilleenanꞌ, lla? ¡Yogꞌzeꞌ ba bengakileꞌn! Ḻaꞌ choꞌa xtillꞌ Chiozaꞌ nan:
Choꞌa xtilleekaꞌ chllinan doxen yell-lioni
ax̱t ganaꞌ zeelo chiyoll chidon.
19 Naꞌ chizniaꞌ, ¿anti netoꞌ beṉꞌ Israelan bi wyajniintoꞌn, lla? Zajniintoꞌn. Ḻaꞌ dii Moisézaꞌ wdix̱jiꞌe daa goll Chiozaꞌneꞌ c̱he beṉꞌ Israelkaꞌ kanaꞌ wneꞌ:
Nadꞌ Chios gonꞌ wen c̱he beṉꞌkaꞌ bi nakgakeꞌ yell c̱haꞌ kwenc̱he gaklallꞌle gonꞌ c̱hele ka chonꞌ c̱hegakeꞌ.
Naꞌ gonꞌ kwenc̱he illaale daa chonꞌ wen c̱he beṉꞌ zitꞌkaꞌ beṉꞌkaꞌ bi napgakeꞌ yeḻꞌ chajnii.
20 Naꞌtech dii Isaíazaꞌ biyaxjileꞌ wneꞌ:
Beṉꞌkaꞌ bi wze wṉeyi gombiaꞌgakeꞌ nadꞌ, benꞌ ka bembiaꞌgakeꞌ nadꞌ.
Naꞌ benꞌ kwenc̱he beṉꞌkaꞌ bi wyoo yic̱hjgakeꞌ nadꞌ bembiaꞌgakeꞌ nadꞌ.
21 Naꞌ dii Isaíazaꞌ ḻekzkaꞌ wdix̱jiꞌe daa goll Chiozaꞌneꞌ c̱he beṉꞌ Israelkaꞌ kanaꞌ wneꞌ: “Toshiizi goklallaa gaklen beṉꞌ widenagkaꞌ, beṉꞌkaꞌ bi chzoa xtillaanaꞌ.”