Bllin Páblonaꞌ len Bernabénaꞌ Icónionaꞌ
14
Naꞌ ka bllin Páblonaꞌ len Bernabénaꞌ Icónionaꞌ, wyajgakeꞌ ganaꞌ chdop chllag beṉꞌ Israelkaꞌ choeꞌḻwillgakeꞌ Chiozaꞌ. Naꞌ Chiozaꞌ gokleneꞌ ḻegakeꞌ ka beꞌgakeꞌ choꞌa xtilleenaꞌ kwenc̱he beṉꞌ zan benḻilallꞌgakeꞌ Jesúzaꞌ, ka beṉꞌ Israel naꞌ ka beṉꞌ bi nak beṉꞌ Israel.
2 Naꞌ beṉꞌ Israelkaꞌ, beṉꞌkaꞌ bi goni shajḻeꞌ c̱he Jesúzaꞌ, wlooyeḻꞌgakeꞌ baḻ beṉꞌkaꞌ bi nak beṉꞌ Israel kwenc̱he gokzbangakileꞌ beṉꞌkaꞌ nonḻilallꞌ Jesúzaꞌ.
3 Daan bigaaṉ Páblonaꞌ len Bernabénaꞌ Icónionaꞌ ssha, naꞌ beꞌgakeꞌ xtillꞌ X̱ancho Jesúzaꞌ naꞌ bi bllebgakeꞌ, ḻaꞌ nx̱enilallꞌgakeꞌ zoalen X̱ancho Chiozaꞌ ḻegakeꞌ. Naꞌ X̱anchonaꞌ gokleneꞌ ḻegakeꞌ bliꞌgakeꞌ yeḻꞌ wak c̱heꞌnaꞌ kwenc̱he gokbeꞌi beṉꞌ nan choeꞌgakeꞌ dillꞌ ḻi.
4 Naꞌ beṉꞌ Icóniokaꞌ gokgakeꞌ c̱hoplə, baḻeꞌ wdaꞌgakeꞌ beṉꞌ Israelkaꞌ naꞌ zi baḻeꞌ wdaꞌgakeꞌ Páblonaꞌ len Bernabénaꞌ.
5 Naꞌch beṉꞌ Israelkaꞌ bengakeꞌ txen beṉꞌkaꞌ bi nak beṉꞌ Israel naꞌ gokgakeꞌ toz len beṉꞌ wṉabiaꞌkaꞌ, goklallꞌgakeꞌ yiya dii gongakileꞌ Páblonaꞌ len Bernabénaꞌ naꞌ wlliagakeꞌ ḻegakeꞌ yaj.
6 Naꞌ ka wṉezi Páblonaꞌ len Bernabénaꞌ ka ba chwia beṉꞌkaꞌ gongakileꞌ ḻegakeꞌ, lii bizaꞌtegakeꞌ, wyajgakeꞌ yell Lístranaꞌ naꞌ yell Dérbenaꞌ, yellkaꞌ llia ganaꞌ mbani Licaónianaꞌ.
7 Naꞌ ḻekzkaꞌ beꞌgakeꞌ dillꞌ wen dillꞌ kob c̱he Jesúzaꞌ naꞌ.
Blliagakeꞌ Páblonaꞌ yaj yell Lístranaꞌ
8 Naꞌ Lístranaꞌ jadiꞌgakeꞌ to beṉꞌ nxiṉj ṉiꞌenaꞌ ka goljtieꞌ. Naꞌ bi chak see daa bi chzoa c̱hec̱h ṉiꞌenaꞌ.
9 Naꞌ chiꞌe chzenagueꞌ dillaa choeꞌ Páblonaꞌ. Naꞌ Páblonaꞌ chwieꞌneꞌ naꞌ gokbeꞌileꞌ chajḻiꞌe wak yiyon Chiozaꞌ ḻeꞌ kwenc̱he gak see.
10 Naꞌch golleꞌneꞌ zillj:
―Wzollaꞌ.
Naꞌ lii wzollaꞌtieꞌ naꞌ gok wzee.
11 Ka bleꞌi beṉꞌ Lístrakaꞌ daa ben Páblonaꞌ, wzolo chosyaagakeꞌ chṉegakeꞌ xtilleekaꞌ daa nak dillꞌ Licaonia cheꞌgakeꞌ:
―¡Ba betj chios c̱hechokaꞌ gani zoacho naꞌ chleꞌgakichoneꞌ ka beṉec̱h!
12 Naꞌ wnagakeꞌ Bernabénaꞌ nakeꞌ chios c̱heꞌkaꞌ beenaꞌ nsiꞌgakeꞌ Júpiter, naꞌ Páblonaꞌ nakeꞌ chios c̱heꞌkaꞌ beenaꞌ nsiꞌgakeꞌ Mercurio, ḻaꞌ ḻenꞌ choꞌe dillaa.
13 Naꞌ bx̱oz c̱he yoodoꞌ c̱he Júpiteraꞌ, daa zoa katez choogakeꞌ yellaꞌ, jwee gooṉkaꞌ naꞌ nwaḻee ḻegakb bga de yej, naꞌ ḻeꞌ, naꞌ beṉꞌkaꞌ ndop nllag naꞌ, goklallꞌgakeꞌ witgakeꞌ ḻegakb kwenc̱he weꞌlaꞌogakeꞌ Páblonaꞌ len Bernabénaꞌ.
14 Naꞌ ka gokbeꞌi Bernabénaꞌ len Páblonaꞌ bin gon beṉꞌkaꞌ, naꞌ wzologakeꞌ bc̱hezꞌ xeꞌkaꞌ, ḻaꞌ chakgakileꞌ dii mal nlleban chon beṉꞌkaꞌ. Naꞌ jsedogakeꞌ ladjeꞌkaꞌ, naꞌ wṉegakeꞌ zillj, cheꞌgakeꞌ:
15 ―Leꞌ beṉꞌdoꞌ, ¿berac̱he chonzle kaꞌ? Ḻekzkaꞌ beṉꞌ yell-lioz netoꞌ, ka leꞌ, naꞌ ba bidntoꞌ kwenc̱he wzajniintoꞌ leꞌ chiyaḻꞌ kwejyic̱hjle diiki bibi zakꞌ naꞌ gonḻilallꞌle Chios, beṉꞌ yaa beṉꞌ bannaꞌ, beenaꞌ ben yabanaꞌ, yell-lioni, naꞌ nisdoꞌnaꞌ, naꞌ yogꞌ dii de xan yabanaꞌ, lo yell-lioni, naꞌ ḻoo nisdoꞌnaꞌ.
16 Kaniꞌyi Chiozaꞌ bwialozeꞌ c̱he beṉec̱haꞌ bengakeꞌ kon daa nazan c̱hegakeꞌ.
17 Naꞌ ḻaꞌkzi bwialozeꞌ ka bengakeꞌ, bliileꞌ ḻegakeꞌ yeḻꞌ wak c̱heꞌnaꞌ kwenc̱he kaꞌ gakbeꞌgakileꞌ zoeꞌ. Ḻaꞌ ḻenꞌ choneꞌ yejaꞌ kwenc̱he chak dii chaz chaaṉcho naꞌ chatꞌ dii cheej chaocho kwenc̱he soacho mbalaz.
18 Naꞌ ḻaꞌkzi Páblonaꞌ len Bernabénaꞌ gollgakeꞌ kaꞌ, kaṉi goongakileꞌ bi witgakeꞌ gooṉkaꞌ daa nan weꞌlaꞌogakeꞌ ḻegakeꞌ.
19 Naꞌ bllin baḻ beṉꞌ Israelkaꞌ zaak Antioquíanaꞌ naꞌ Icónionaꞌ, naꞌ wlooyeḻꞌgakeꞌ beṉꞌ Lístrakaꞌ kwenc̱he blliagakeꞌ Páblonaꞌ yajaꞌ. Naꞌ daa gokgakileꞌ ba witenꞌ, naꞌch bx̱obgakeꞌneꞌ jadix̱jgakeꞌneꞌ choꞌa yellaꞌte.
20 Naꞌ beṉꞌkaꞌ nonḻilallꞌ Jesúzaꞌ bdiꞌa bllaggakeꞌ ganaꞌ de Páblonaꞌ, naꞌ biyaseꞌ biyoꞌe yellaꞌ sto shii. Naꞌ betiyo bizee len Bernabénaꞌ naꞌ biyajgakeꞌ yell Dérbenaꞌ.
21 Naꞌ ḻekzkaꞌ wdix̱jeegakeꞌ dillꞌ wen dillꞌ kob c̱he Jesúzaꞌ yell Dérbenaꞌ, naꞌ beṉꞌ zan benḻilallꞌgakeꞌ Jesúzaꞌ. Naꞌtech, bizaꞌgakeꞌ bidegakeꞌ yell Lístranaꞌ, Icónionaꞌ naꞌch Antioquíanaꞌ.
22 Naꞌ to to yellkaꞌ ganaꞌ bidegakeꞌ btipgakeꞌ lallꞌ beṉꞌkaꞌ ba chajḻeꞌ c̱he Jesúzaꞌ kwenc̱he soac̱hec̱hgakeꞌ gonḻilallꞌchgakeꞌneꞌ. Naꞌ gollgakeꞌ chiyaḻꞌ yizo yizakicho bittez dii yen ileꞌicho kwenc̱he gak lljazoalencho Chiozaꞌ ganaꞌ chṉabiꞌe.
23 Naꞌ to to yellkaꞌ wlejgakeꞌ to c̱hop beṉꞌ koo lallꞌ naꞌgakeꞌ beṉꞌkaꞌ ba nonḻilallꞌgakeꞌ Jesúzaꞌ. Naꞌ wzoagakeꞌ wbasꞌ beꞌḻwillgakeꞌ Chiozaꞌ, naꞌch bengakeꞌ ḻegakeꞌ lallꞌ naꞌ X̱ancho Jesúzaꞌ, beenaꞌ nonḻilallꞌgakeꞌ.
Páblonaꞌ len Bernabénaꞌ biyajgakeꞌ yell Antioquíanaꞌ daa llia ganaꞌ mbani Sírianaꞌ
24 Naꞌ wde Páblonaꞌ len Bernabénaꞌ ganaꞌ mbani Pisídianaꞌ naꞌ bllingakeꞌ ganaꞌ mbani Panfílianaꞌ.
25 Naꞌ beꞌgakeꞌ choꞌa xtillꞌ Chiozaꞌ yell Pérgenaꞌ. Naꞌch bizaꞌgakeꞌ ziyajgakeꞌ yell Atálianaꞌ.
26 Naꞌ yell Atálianaꞌ biyoogakeꞌ to ḻoo barkw naꞌ billingakeꞌ yell Antioquíanaꞌ ganaꞌ lleꞌ beṉꞌkaꞌ bengakeꞌ ḻegakeꞌ lo naꞌ Chiozaꞌ kanaꞌ bseḻꞌgakeꞌ ḻegakeꞌ lljengakeꞌ llinnaꞌ daa ba biyoll jengakeꞌ.
27 Naꞌ ka billingakeꞌ yell Antioquíanaꞌ, btopgakeꞌ beṉꞌkaꞌ nonḻilallꞌ Jesúzaꞌ, naꞌ gollgakeꞌ yogꞌ daa goklen Chiozaꞌ ḻegakeꞌ to to yellkaꞌ. Naꞌ ḻekzkaꞌ gollgakeꞌ ka ben Chiozaꞌ biꞌe latj c̱he beṉꞌkaꞌ bi nak beṉꞌ Israel kwenc̱he benḻilallꞌgakeꞌ Jesúzaꞌ.
28 Naꞌ Páblonaꞌ len Bernabénaꞌ bigaaṉgakeꞌ ssha yell Antioquíanaꞌ len beṉꞌkaꞌ nonḻilallꞌ Jesúzaꞌ.