Bernabénaꞌ naꞌ Sáulonaꞌ jeꞌgakeꞌ choꞌa xtillꞌ Chiozaꞌ yell zitꞌkaꞌ
13
Naꞌ ladj beṉꞌkaꞌ nonḻilallꞌ Jesúzaꞌ yell Antioquíanaꞌ lengakeꞌ beṉꞌ chyix̱jee daa cheꞌ Chiozaꞌ naꞌ beṉꞌ chliꞌ chsedi choꞌa xtillꞌ Chiozaꞌ. Naꞌ ḻegakeꞌ beṉꞌki: Bernabénaꞌ, Simónnaꞌ, beenaꞌ cheꞌgakeꞌ beṉꞌ gasj, Lúcionaꞌ beṉꞌ Cirénenaꞌ, Sáulonaꞌ naꞌ Manaénnaꞌ, beenaꞌ bgol-len Heródezaꞌ beenaꞌ wṉabiaꞌ ganaꞌ mbani Galileanaꞌ.
2 Naꞌ to shii ka zoagakeꞌ wbasaa naꞌ choeꞌlaꞌogakeꞌ Chiozaꞌ wṉe Espíritu Sántonaꞌ ḻegakeꞌ, chiꞌe:
―Ḻi wzoa Bernabénaꞌ naꞌ Sáulonaꞌ kwenc̱he gongakeꞌ xshinꞌnaꞌ, ḻaꞌ ni c̱heyinnanꞌ ba wlejꞌ ḻegakeꞌ.
3 Naꞌ ka wyeelo beꞌḻwillgakeꞌ Chiozaꞌ naꞌ biyoll wzoagakeꞌ wbasaa, naꞌ bx̱oa neekaꞌ yic̱hj beṉꞌkaꞌ c̱hop, naꞌch bseḻꞌgakeꞌ ḻegakeꞌ ganaꞌ lljengakeꞌ xshin Chiozaꞌ.
Páblonaꞌ naꞌ Bernabénaꞌ beꞌgakeꞌ choꞌa xtillꞌ Chiozaꞌ ganaꞌ le Chipre
4 Naꞌch Espíritu Sántonaꞌ bseḻee Bernabénaꞌ naꞌ Sáulonaꞌ yell Seleúcianaꞌ ganaꞌ wyoogakeꞌ barkwaꞌ kwenc̱he jwaan ḻegakeꞌ yell-lio Chíprenaꞌ daa llia lo nisdoꞌnaꞌ.
5 Naꞌ ka wlez barkwaꞌ choꞌa yell Salamínanaꞌ, bchejgakeꞌ naꞌ wzologakeꞌ wdix̱jeꞌgakeꞌ choꞌa xtillꞌ Chiozaꞌ to to ganaꞌ chdop chllag beṉꞌ Israelkaꞌ choeꞌḻwillgakeꞌ Chiozaꞌ. Naꞌ nc̱heꞌgakeꞌ sto beṉꞌ le Juan kwenc̱he gakleneꞌ ḻegakeꞌ.
6 Naꞌ wdegakeꞌ to to yellkaꞌ llia Chíprenaꞌ. Naꞌ ka bllingakeꞌ yell Páfozaꞌ, naꞌ jadiꞌgakeꞌ to beṉꞌ Israel, beenaꞌ le Barjesús. Nakeꞌ to beṉꞌ willaꞌ, naꞌ chziyee beṉꞌ chiꞌe nakeꞌ to beṉꞌ chyix̱jee daa cheꞌ Chiozaꞌ ḻeꞌ.
7 Naꞌ beeni nllaguileꞌ beenaꞌ chṉabiꞌe doxen Chíprenaꞌ, beenaꞌ leꞌ Sergio Paulo. Naꞌ Sergio Paulonaꞌ nakeꞌ to beṉꞌ chajnii, naꞌ goxeꞌ Bernabénaꞌ len Sáulonaꞌ kwenc̱he wzajniꞌgakileꞌneꞌ choꞌa xtillꞌ Chiozaꞌ.
8 Naꞌ beṉꞌ willaꞌnaꞌ, nsiꞌgakeꞌneꞌ Elimas (naꞌ zejin beṉꞌ willaꞌ), goklallee goneꞌ ka bi shajḻeꞌ beṉꞌ wṉabiaꞌnaꞌ c̱he choꞌa xtillꞌ Chiozaꞌ.
9 Naꞌch Sáulonaꞌ, beenaꞌ ḻekzkaꞌ lieꞌ Pablo, daa chṉabiaꞌchga Espíritu Sántonaꞌ ḻeꞌ, bwiayeṉee Elímazaꞌ,
10 naꞌ golleꞌneꞌ:
―¡Liꞌ benꞌ wxiyeꞌ, beṉꞌ wen dii mal, xiiṉ dii x̱iwaan nakoꞌ naꞌ chakzbaniloꞌ yogꞌ daa nak dii wen! ¿Bic̱he chshok chlewzoꞌ daa nak dii ḻi c̱he X̱ancho Chiozaꞌ?
11 Naꞌ ṉaa Chiozaꞌ wseḻee yeḻꞌ ziꞌ c̱hoꞌ, goneꞌ ka ic̱hoḻoꞌ naꞌ shloll wen bich ileꞌiloꞌ beeniꞌ c̱he wbillaꞌ.
Naꞌ kate golleꞌneꞌ kaꞌ lii wc̱hoḻtieꞌ, naꞌ chgan chtobzileꞌ chṉabeꞌ no yiyox̱ꞌ neenaꞌ daa bich chleꞌileꞌ.
12 Naꞌ ka bleꞌi beṉꞌ wṉabiaꞌnaꞌ daa gok, naꞌ wyajḻiꞌe, naꞌ le bibanileꞌ ka nak choꞌa xtillꞌ X̱ancho Jesúzaꞌ daa chliꞌ chsedgakileꞌneꞌ.
Páblonaꞌ naꞌ Bernabénaꞌ wyajgakeꞌ yell Antioquíanaꞌ daa llia ganaꞌ mbani Pisídianaꞌ
13 Naꞌch Páblonaꞌ naꞌ beṉꞌkaꞌ chdaleneꞌ wyoogakeꞌ barkwaꞌ yell Páfozaꞌ naꞌ wyajgakeꞌ yell Pérgenaꞌ daa llia ganaꞌ mbani Panfílianaꞌ, naꞌ Juan Márconaꞌ bixoṉjeꞌ ziyajeꞌ Jerusalénnaꞌ.
14 Naꞌ Páblonaꞌ len beṉꞌkaꞌ chdaleneꞌ naꞌ, bizaꞌgakeꞌ yell Pérgenaꞌ naꞌ wyajgakeꞌ yell Antioquíanaꞌ daa llia ganaꞌ mbani Pisídianaꞌ. Naꞌ ka bllin lla sabdaꞌ, llanaꞌ chombaaṉ beṉꞌ Israelkaꞌ, wyajgakeꞌ ganaꞌ chdop chllaggakeꞌ choeꞌḻwillgakeꞌ Chiozaꞌ, naꞌ jc̱heꞌlengakeꞌ beṉꞌkaꞌ.
15 Naꞌ ka biyoll blabgakeꞌ latꞌ ley c̱he Chiozaꞌ naꞌ zi latꞌ daa bzej dii beṉꞌkaꞌ wdix̱jee daa goll Chiozaꞌ ḻegakeꞌ, naꞌch beṉꞌkaꞌ chgoo xṉezi c̱heyi diikaꞌ chongakeꞌ ganaꞌ chdop chllaggakeꞌ bseḻꞌgakeꞌ to beṉꞌ ganaꞌ chiꞌ Páblonaꞌ len Bernabénaꞌ naꞌ golleꞌ ḻegakeꞌ:
―Leꞌ beṉꞌ bishꞌ, shi bi dillꞌ de weꞌlenle beṉꞌki kwenc̱he wtipch lallꞌgakeꞌ, wak weꞌlen ṉaa.
16 Naꞌch wzollaꞌ Páblonaꞌ naꞌ bḻis neenaꞌ kwenc̱he kweꞌgakeꞌ llizə wzenaggakeꞌ, naꞌ chiꞌe:
―Leꞌ, beṉꞌ Israel, naꞌ leꞌ bi nakle beṉꞌ Israel choeꞌlaꞌole Chiozaꞌ, ḻi wzenag dga iṉiaꞌ:
17 Chios, beenaꞌ nonḻilallꞌcho choꞌ beṉꞌ Israel, wlejeꞌ dii x̱ozxtoꞌchokaꞌ naꞌ beneꞌ ka wyangakeꞌ shlak wzoagakeꞌ Egíptonaꞌ. Naꞌ bllin lla bibejeꞌ ḻegakeꞌ kon yeḻꞌ wak c̱heꞌnaꞌ.
18 Naꞌ wdapeꞌ yeḻꞌ chxenlallꞌ c̱he yeḻꞌ widenag c̱heꞌkaꞌ lo c̱hoa yizaꞌ wzoagakeꞌ latjaꞌ ganaꞌ bibi chashj chḻeb.
19 Naꞌ blliayee yellkaꞌ gall kwen lleꞌ ganaꞌ mbani Canaánnaꞌ kwenc̱he biꞌe dii x̱ozxtoꞌchokaꞌ yell-lio c̱heꞌkaꞌ.
20 Kanꞌ gok lawi tap guiyoa yoo gashj yiz. Naꞌtech, bzoaꞌ Chiozaꞌ beṉꞌkaꞌ wloo lallꞌ naꞌgakeꞌ ḻegakeꞌ, ax̱t nika bllin lla wzoa dii Samuelaꞌ, beenaꞌ wdix̱jee daa goll Chiozaꞌneꞌ.
21 Naꞌch wṉabgakeꞌ soa to beṉꞌ wṉabiaꞌ kwenc̱he iṉabiꞌe ḻegakeꞌ. Naꞌ Chiozaꞌ biꞌe ḻegakeꞌ dii Saúlaꞌ, beenaꞌ wṉabiꞌe ḻegakeꞌ lo c̱hoa yiz. Gokeꞌ xiiṉ dii beenaꞌ wle Cis, beenaꞌ gok xiiṉ dia c̱he dii Benjamínnaꞌ.
22 Naꞌ ka bikwas Chiozaꞌ yeḻꞌ wṉabiaꞌ c̱he dii Saúlaꞌ, bizoeꞌ dii Davinaꞌ iṉabiꞌe naꞌ biꞌe dillꞌ c̱heꞌ, wneꞌ: “Davinaꞌ, xiiṉ Isaínaꞌ, nakeꞌ to beṉꞌ chon ka chazlallaa, naꞌ ṉezidꞌ goneꞌ yogꞌ daa cheenidꞌ goneꞌ.”
23 Naꞌ lo dia c̱he dii Davinaꞌ golj Jesucrístonaꞌ, beenaꞌ wlej Chiozaꞌ kwenc̱he yisleꞌ choꞌ beṉꞌ Israel lawi dii malaꞌ kon kaꞌ bc̱hebeꞌ goneꞌ.
24 Naꞌ ka ziꞌ solo Jesúzaꞌ wliꞌ wsedileꞌ beṉꞌ, dii Juannaꞌ golleꞌ yogꞌ beṉꞌ Israelkaꞌ chiyaḻꞌ yiyaj yilengakileꞌ xtoḻeekaꞌ naꞌ c̱hoagakeꞌ nisaꞌ.
25 Naꞌ ka ba zoa yiyoll gon dii Juannaꞌ daa nak lallꞌ nee goneꞌ, naꞌ ba zoate illin lla gueteꞌ, naꞌ wneꞌ: “Bi nakꞌ beenaꞌ chakile nakꞌ. Ziꞌ zaꞌlə beenaꞌ zakꞌch ka nadꞌ. Naꞌ nadꞌ ni bi zakaa gakꞌ xmoseꞌ kwenc̱he wḻec̱hjꞌ xeleꞌnaꞌ.”
26 ’Leꞌ beṉꞌ bishꞌ, leꞌ nakle xiiṉ dia c̱he dii Abrahamaꞌ, naꞌ leꞌ choeꞌlaꞌole Chiozaꞌ ḻaꞌkzi bi nakle beṉꞌ Israel, Chiozaꞌ ba bseḻee choꞌa xtilleenaꞌ laochoni daa choꞌen dillꞌ yisleꞌ beṉꞌ kwenc̱he bi kwiayiꞌgakeꞌ.
27 Beṉꞌ Jerusalénkaꞌ naꞌ beṉꞌ wṉabiaꞌ c̱heꞌkaꞌ bi gokbeꞌgakileꞌ bseḻꞌ Chiozaꞌ Jesúzaꞌ. Ni bi wyajniꞌgakileꞌ diikaꞌ bzej dii beṉꞌkaꞌ wdix̱jee daa goll Chiozaꞌ ḻegakeꞌ kaniꞌyi, ḻaꞌkzi chlabgakeꞌn yogꞌ lla sabd ganaꞌ chdop chllaggakeꞌ choeꞌḻwillgakeꞌneꞌ. Naꞌ daa wnagakeꞌ chiyaḻꞌ guet Jesúzaꞌ, billinin daa bzej dii beṉꞌkaꞌ beꞌ dillꞌ daa goll Chiozaꞌ ḻegakeꞌ.
28 Ḻaꞌkzi bibi dii mal billelgakileꞌ ben Jesúzaꞌ dii gonan ka wc̱hoglogakeꞌ witgakeꞌneꞌ, wṉabgakileꞌ Pilátonaꞌ goneꞌ mandad witgakeꞌneꞌ.
29 Naꞌch ka biyoll bengakileꞌneꞌ yogꞌ daa nyoj ḻee choꞌa xtillꞌ Chiozaꞌ gak c̱heꞌ, naꞌch biḻetjgakeꞌneꞌ ḻee yag cruzaꞌ naꞌ jakwashꞌgakeꞌneꞌ.
30 Naꞌ Chiozaꞌ biḻiseꞌneꞌ ladj beṉꞌ wetkaꞌ.
31 Naꞌ ka wde bibaneꞌ, zan lla bliꞌlaweꞌ beṉꞌkaꞌ wno wnaḻꞌgakeꞌneꞌ dezd ka wzee Galileanaꞌ zejeꞌ Jerusalénnaꞌ. Naꞌ ḻegakenꞌ choeꞌlengakee beṉꞌ wlall c̱hechokaꞌ xtilleenaꞌ ṉaa.
32 ’Naꞌ chyix̱jeꞌintoꞌ leꞌ dillꞌ wen dillꞌ kob c̱he Jesúzaꞌ daa bc̱heb Chiozaꞌ lao dii x̱ozxtoꞌchokaꞌ.
33 Naꞌ ṉaa ba biyoll bido beneꞌ ka bc̱hebeꞌ goneꞌ c̱hecho, choꞌ nakcho xiiṉ dia c̱hegakeꞌ, daa bisbaneꞌ Jesúzaꞌ ladj beṉꞌ wetkaꞌ. Gok ka nyoj Salmo de wchopinaꞌ, ganaꞌ nan: “Linꞌ nakoꞌ Xiiṉꞌ, naꞌ ṉaa, daa solo iṉabiꞌo naꞌ iṉezi beṉꞌ nadaan nakꞌ X̱oꞌ.”
34 Chiozaꞌ ba biꞌe dillꞌ yiḻiseꞌneꞌ ladj beṉꞌ wetkaꞌ naꞌ bichga gueteꞌ, naꞌ wneꞌ: “Dii ḻi gaklenꞌ leꞌ dii xen wal ka bc̱hebꞌ lao dii Davinaꞌ.”
35 Naꞌ ḻekzkaꞌ sto Salmo nan: “Bi wiꞌo latj goollꞌ iteb beli chen c̱haꞌni, daa nakꞌ lallꞌ noꞌ.”
36 Naꞌ ṉezicho dii Davinaꞌ gokleneꞌ dii x̱ozxtoꞌchokaꞌ kon ka bllia Chiozaꞌ biꞌa goneꞌ, naꞌ ka bllin lla witeꞌ jakwashꞌgakeꞌneꞌ ganaꞌ bkwashꞌgakeꞌ dii x̱ozxtoeꞌkaꞌ, naꞌ goollꞌ bteb beli chen c̱heꞌnaꞌ.
37 Per kwerp c̱he Jesúzaꞌ, beenaꞌ bisban Chiozaꞌ ladj beṉꞌ wetkaꞌ, bi wlliayiꞌn.
38 Leꞌ beṉꞌ bishꞌ, chyix̱jeꞌintoꞌ leꞌ Chiozaꞌ chiziꞌxeneꞌ xtoḻꞌ nottez beṉꞌ chonḻilallee Jesúzaꞌ.
39 Nottez beṉꞌ gonḻilalleeneꞌ yiyakeꞌ beṉꞌ ḻi beṉꞌ shaoꞌ lao Chiozaꞌ. Aga no yiyak beṉꞌ ḻi beṉꞌ shaoꞌ lao Chiozaꞌ daa choneꞌ daa na ley c̱he dii Moisézaꞌ.
40 Naꞌ ḻi wsakꞌ kwenc̱he ki gak c̱hele ka bzej dii beṉꞌkaꞌ beꞌ dillꞌ daa goll Chiozaꞌ ḻegakeꞌ kaniꞌyi, ganaꞌ nan:
41 Ḻi wwia, leꞌ beṉꞌ wenḻe. Ḻi yibani.
Wllin lla kwiayiꞌle daa bi chajḻeꞌle.
Llaki mbanle gonꞌ to dii wal
dii bi shajḻeꞌle ḻaꞌkzi shi no iṉa leꞌ ki gak.
42 Naꞌ ka bichejlen Páblonaꞌ beṉꞌkaꞌ nakgakeꞌneꞌ txen ganaꞌ chdop chllag beṉꞌ Israelkaꞌ, naꞌch beṉꞌkaꞌ bi nak beṉꞌ Israel wṉabgakileꞌneꞌ weꞌleneꞌ ḻegakeꞌ choꞌa xtillꞌ Chiozaꞌ lla sabdaꞌ sto.
43 Naꞌ ka billeshgakeꞌ, zan beṉꞌ Israelkaꞌ, naꞌ zan beṉꞌkaꞌ chongakeꞌ ḻegakeꞌ txen choeꞌlaꞌogakeꞌ Chiozaꞌ, janogakeꞌ Páblonaꞌ len Bernabénaꞌ. Naꞌ Páblonaꞌ len Bernabénaꞌ gollgakeꞌ ḻegakeꞌ chiyaḻꞌ soac̱hec̱hgakeꞌ gonḻilallꞌgakeꞌ Chiozaꞌ daa ḻe chakileꞌ ḻegakeꞌ.
44 Naꞌ ka bizoa xmannaꞌ sto, llanaꞌ chombaaṉ beṉꞌ Israelkaꞌ, zi latꞌz ki biya beṉꞌkaꞌ lleꞌ yellaꞌ bdop kwenc̱he wzenaggakeꞌ choꞌa xtillꞌ Chiozaꞌ.
45 Naꞌ ka bleꞌi beṉꞌ Israelkaꞌ beṉꞌ zan ndop nllag, naꞌ gokxeꞌgakileꞌ Páblonaꞌ naꞌ wṉegakeꞌ zban c̱he dillaa choꞌe, naꞌ biya dii wnagakeꞌ c̱heꞌ.
46 Naꞌch Páblonaꞌ len Bernabénaꞌ aga bllebgakeꞌ, naꞌ gollgakeꞌ beṉꞌ Israelkaꞌ:
―Benan byen zigaate leꞌ wzajniintoꞌ choꞌa xtillꞌ Chiozaꞌ. Per daa bi cheenile wzenaglen, chliꞌle bi chidoḻꞌle goṉ Chiozaꞌ yeḻꞌ mban c̱hele zejḻi kaṉi, naꞌ solochokləntoꞌ ṉaa wzajniintoꞌn beṉꞌkaꞌ bi nak beṉꞌ Israel.
47 Ḻaꞌ dgan non X̱ancho Chiozaꞌ mandad gonntoꞌ, naꞌ neꞌ:
Ba bzoaꞌ liꞌ kwenc̱he gonoꞌ ka shoꞌ beeniꞌ c̱haꞌnaꞌ ḻoo yic̱hjlallꞌdoꞌ beṉꞌkaꞌ bi nak beṉꞌ Israel.
Naꞌ yoo beṉꞌkaꞌ lleꞌ doxen yell-lioni ka gongakeꞌ kwenc̱he yilagakeꞌ naꞌ bi kwiayiꞌgakeꞌ.
48 Naꞌ beṉꞌkaꞌ bi nak beṉꞌ Israel, ka bengakileꞌ daa wna Páblonaꞌ len Bernabénaꞌ, ḻe bibagakileꞌ naꞌ wnagakeꞌ ḻe mba nak choꞌa xtillꞌ Chiozaꞌ. Naꞌ yogꞌ beṉꞌkaꞌ ba wlej Chiozaꞌ kwenc̱he gatꞌ yeḻꞌ mban c̱hegakeꞌ zejḻi kaṉi benḻilallꞌgakeꞌ Jesúzaꞌ.
49 Kaꞌ gok bllilj choꞌa xtillꞌ X̱ancho Jesúzaꞌ doxen naꞌ.
50 Naꞌ beṉꞌ Israelkaꞌ, beṉꞌkaꞌ bi wyajḻeꞌgakeꞌ c̱he Jesúzaꞌ, wlooyeḻꞌgakeꞌ baḻ noolə wniaꞌkaꞌ, beṉꞌkaꞌ choeꞌlaꞌo Chiozaꞌ, naꞌ beṉꞌ byokaꞌ ḻe zeyi c̱heyin yellaꞌ kwenc̱he bengakileꞌ Páblonaꞌ naꞌ Bernabénaꞌ zban, naꞌ bilaggakeꞌ ḻegakeꞌ yell c̱heꞌkaꞌ.
51 Naꞌch Páblonaꞌ len Bernabénaꞌ ka bizaꞌgakeꞌ wllib ṉiꞌekaꞌ bishte c̱he yellaꞌ daa bi goklallꞌ beṉꞌkaꞌ lleꞌ naꞌ wzenaggakeꞌ c̱he Chiozaꞌ. Naꞌ wyajgakeꞌ yell Icónionaꞌ.
52 Naꞌ beṉꞌkaꞌ nonḻilallꞌ Jesúzaꞌ wzoachgagakeꞌ mbalaz, naꞌ Espíritu Sántonaꞌ wṉabiꞌe ḻoo yic̱hjlallꞌdoꞌekaꞌ.