Betgakeꞌ Jacóbonaꞌ naꞌ wloogakeꞌ Pédronaꞌ lillyanaꞌ
12
Naꞌ do kanaꞌkzə beṉꞌ wṉabiaꞌ Heródezaꞌ bex̱ee baḻ beṉꞌkaꞌ nonḻilallꞌ Jesúzaꞌ kwenc̱he wc̱hiꞌ wsakee ḻegakeꞌ.
2 Naꞌ bc̱hogloeꞌ gueti Jacóbonaꞌ yesya, beenaꞌ nak beṉꞌ bishꞌ Juannaꞌ.
3 Naꞌ ka gokbeꞌileꞌ bibayi beṉꞌkaꞌ chṉabiaꞌ beṉꞌ Israelkaꞌ daa beneꞌ kaꞌ, naꞌch ḻekzkaꞌ bex̱ee Pédronaꞌ lo lṉi Paskwaꞌ kanaꞌ chaogakeꞌ yetxtilaꞌ daa bi nc̱hix̱ levadúranaꞌ.
4 Naꞌ ka bdoḻileꞌneꞌ, wdix̱jeꞌneꞌ lillyanaꞌ ganaꞌ wdap shinꞌto soldadkaꞌ ḻeꞌ, naꞌ beneꞌ tap wejeꞌ kwenc̱he bibeji ljwellgakeꞌ wdapgakeꞌneꞌ. Naꞌ gokileꞌ yiyoll lṉi Paskwaꞌ kwejeꞌneꞌ lao beṉꞌ yellkaꞌ naꞌ wc̱hogloeꞌ c̱heꞌ gueteꞌ.
5 Shlak nej Pédronaꞌ lillyanaꞌ, beṉꞌkaꞌ nonḻilallꞌ Jesúzaꞌ toshiizi beꞌḻwillgakeꞌ Chiozaꞌ ni c̱heꞌ.
Chiozaꞌ bibejeꞌ Pédronaꞌ lillyanaꞌ
6 Naꞌ lleꞌnaꞌ ka wx̱ezə kwej Heródezaꞌneꞌ kwenc̱he wc̱hogloeꞌ c̱heꞌ gueteꞌ, Pédronaꞌ dieꞌ cheseꞌ ladj c̱hop soldadkaꞌ, naꞌ nc̱hejgakeꞌneꞌ c̱hop gden, naꞌ zi c̱hop soldadkaꞌ chapgakeꞌ choꞌa lillyanaꞌ.
7 Naꞌ tokonganzi bllin to anjl c̱he X̱ancho Chiozaꞌ ganaꞌ de Pédronaꞌ naꞌ to beeniꞌ xen wyoo ḻoo lillyanaꞌ. Naꞌ anjlaꞌ wdaneꞌ kwit ḻiꞌenaꞌ bisbaneꞌneꞌ, chiꞌeneꞌ:
―Ḻobeꞌte wyas.
―Bikaacha ḻiꞌonaꞌ naꞌ bilej xeloꞌnaꞌ.
Naꞌ ben Pédronaꞌ daa chiꞌeneꞌ, naꞌch cheꞌ anjlaꞌneꞌ:
―Bix̱oa kolloo xacheloꞌnaꞌ, naꞌ da dinoꞌ nadꞌ.
9 Naꞌch zjano Pédronaꞌ anjlaꞌ, ni bi ṉezileꞌ shi ka chakkzan, kon gokileꞌ chleꞌdoꞌzilenꞌ.
10 Naꞌ bidegakeꞌ ganaꞌ lleꞌ soldadkaꞌ shkwen, naꞌ bidetegakeꞌ ganaꞌ lleꞌ beṉꞌkaꞌ zi shkwen, naꞌ ka bllingakeꞌ ganaꞌ zoa puert de yanaꞌ daa ḻiizelote, to kwinzin byaljan naꞌ bichejgakeꞌ. Naꞌ ka ba biyoogakeꞌ nezaꞌ, bikwaaṉ anjlaꞌ toz Pédronaꞌ.
11 Kanaꞌch gokbeꞌi Pédronaꞌ, naꞌ wneꞌ:
―Ṉaach chakbeꞌidꞌ dii ḻi Chiozaꞌ ba bseḻee anjl c̱heꞌnaꞌ kwenc̱he bisleꞌ nadꞌ lo naꞌ Heródezaꞌ, naꞌ bi wtiḻꞌ daa non beṉꞌ Israelki lez gak c̱haꞌ.
12 Naꞌ ka gokbeꞌileꞌ ba bichejeꞌ lillyanaꞌ, naꞌ ziyajeꞌ lill Maríanaꞌ xṉaꞌ Juannaꞌ, beenaꞌ nsiꞌgakeꞌ Marcos. Naꞌ lill Maríanaꞌ ndop nllag beṉꞌ zan choeꞌḻwillgakeꞌ Chiozaꞌ.
13 Ka bllineꞌ, naꞌ wṉieꞌ choꞌa leejaꞌ, naꞌ bchej to biꞌ noolə le Rode, jawiabꞌ no beenaꞌ chṉe.
14 Naꞌ ka biyombiaꞌbꞌ shii Pédronaꞌ chibachgaibꞌ, naꞌ daa ḻe chibaibꞌ bikz bsaljbꞌ. Zigaate jayellbꞌ beṉꞌkaꞌ lleꞌ ḻoo yoonaꞌ ba ze Pédronaꞌ choꞌa leejaꞌ.
15 Naꞌch cheꞌgakeꞌbꞌ:
―Chakziloꞌn.
Naꞌ ḻebꞌ wzeyidbꞌ cheꞌbꞌ ḻenꞌ. Naꞌ ḻegakeꞌ cheꞌgakeꞌbꞌ:
―Anjl c̱heꞌnaꞌljan.
16 Naꞌ Pédronaꞌ ni zieꞌ chṉieꞌ choꞌa leejaꞌ. Naꞌ ka bsaljgakeꞌ bleꞌgakileꞌneꞌ, bibanchgagakileꞌ.
17 Naꞌch Pédronaꞌ beneꞌ to seṉ kon neenaꞌ kwenc̱he soagakeꞌ llizə, naꞌ golleꞌ ḻegakeꞌ ka ben X̱ancho Chiozaꞌ bibejeꞌneꞌ lillyanaꞌ. Naꞌ chiꞌe ḻegakeꞌ:
―Ḻi yeꞌ Jacóbonaꞌ naꞌ yogꞌ beṉꞌ bishꞌchokaꞌ ka ba ben X̱anchonaꞌ c̱haꞌ.
Naꞌch bizee ziyajeꞌ gan yoblə.
18 Naꞌ ka wyeeniꞌ, wcheꞌ to yeḻꞌ wban xen ladj soldadkaꞌ daa bi gokbeꞌgakileꞌ nak gok bichej Pédronaꞌ.
19 Naꞌch Heródezaꞌ bta bṉieꞌ beṉꞌkaꞌ biyiljgakeꞌneꞌ, naꞌ bi billelgakileꞌneꞌ. Naꞌch wṉabileꞌ soldadkaꞌ chap lillyanaꞌ nak gok bichejeꞌ, naꞌ bikz bi dillꞌ beꞌgakeꞌ. Naꞌch beneꞌ mandad betgakeꞌ soldadkaꞌ. Naꞌ ka wde beneꞌ kaꞌ, wzee Judeanaꞌ jsoeꞌ Cesareanaꞌ.
Ka wit Heródezaꞌ
20 Heródezaꞌ chllee beṉꞌ Tírokaꞌ naꞌ beṉꞌ Sidónkaꞌ. Naꞌ beṉꞌki gokgakeꞌ toz bshaljlengakeꞌ Blástonaꞌ, to wen llin zakii c̱he Heródezaꞌ, naꞌ bengakileꞌneꞌ wen kwenc̱he gokleneꞌ ḻegakeꞌ, ḻaꞌ byalljgakileꞌ siꞌgakeꞌ dii yeej gaogakeꞌ ganaꞌ chṉabiaꞌ Heródezaꞌ. Naꞌ Blástonaꞌ bshaljleneꞌ Heródezaꞌ kwenc̱he wxiꞌxeneꞌ c̱he beṉꞌ Tírokaꞌ naꞌ beṉꞌ Sidónkaꞌ naꞌ yizoaleneꞌ ḻegakeꞌ wen sto shii.
21 Naꞌ Heródezaꞌ bllieꞌ biaꞌ batan lljawiagakeꞌneꞌ. Naꞌ gokweꞌ xeꞌnaꞌ daa ḻe nak daa chakweꞌ katꞌ chliꞌlaweꞌ lao lkweꞌ beṉꞌ. Naꞌch jshieꞌ ganaꞌ chc̱hogloeꞌ c̱he beṉꞌ, naꞌ biꞌe dillꞌ lao beṉꞌkaꞌ ndop nllag naꞌ.
22 Naꞌ shlak choꞌe dillꞌ, naꞌ besyaa beṉꞌkaꞌ cheꞌgakeꞌ:
―To chiozaꞌn chṉe, aga konteḻe beṉaan.
23 Naꞌ anjl c̱he X̱ancho Chiozaꞌ lii beꞌtieꞌ Heródezaꞌ to yillweꞌ wal benan ka chyiṉ chḻallꞌ beḻ bzogꞌkaꞌ ḻoo ḻiꞌenaꞌ naꞌ witeꞌ, daa biꞌe latj wloo beṉꞌkaꞌ ḻeꞌ balaaṉ daa chidoḻꞌ toz beenaꞌ nak dowalj Chios.
24 Naꞌ dillꞌ wen c̱he Chiozaꞌ zej chlliljchan doxen.
25 Naꞌ Bernabénaꞌ len Sáulonaꞌ ka wde bengakeꞌ daa chiyaḻꞌ gongakeꞌ Jerusalénnaꞌ, bizaꞌgakeꞌ biyajgakeꞌ Antioquíanaꞌ, naꞌ bc̱heꞌgakeꞌ Juannaꞌ, beenaꞌ ḻekzkaꞌ nsiꞌgakeꞌ Marcos.