Pédronaꞌ golleꞌ beṉꞌ Jerusalénkaꞌ ka gok
11
Naꞌ postlkaꞌ naꞌ nochlə beṉꞌkaꞌ nonḻilallꞌ Jesúzaꞌ Judeanaꞌ bengakileꞌ nan beṉꞌkaꞌ bi nak benꞌ Israel ḻekzkaꞌ chajḻeꞌgakeꞌ choꞌa xtillꞌ Chiozaꞌ.
2 Naꞌ ka billin Pédronaꞌ Jerusalénnaꞌ gokdiḻ-len x̱oṉj beṉꞌ ḻeꞌ, beṉꞌkaꞌ cheꞌ chonan byen shoꞌ beṉꞌ byokaꞌ nonḻilallꞌ Chiozaꞌ seṉ daa le circuncisión ḻaꞌkzi bi nakgakeꞌ beṉꞌ Israel.
3 Naꞌ gollgakeꞌneꞌ:
―¿Bic̱he wyoozoꞌ ḻoo yoo lill beṉꞌkaꞌ bi nak beṉꞌ Israel naꞌ weej wdaolenzgakoꞌneꞌ?
4 Naꞌch Pédronaꞌ golleꞌ ḻegakeꞌ yogꞌ ka gok, chiꞌe:
5 ―Kanaꞌ ni zoa yell Jópenaꞌ, shlak choeꞌḻwillꞌ Chiozaꞌ bleꞌdoꞌidꞌ to dii nak ka lechꞌ xen, dii nchej tap yic̱hjten, chetjan xan yabanaꞌ naꞌ blaꞌten ganaꞌ ziaꞌ.
6 Naꞌ ka bwiayeṉaa diikaꞌ llia ḻoo lechaa, naꞌ bleꞌidꞌ lleꞌ bayix̱ꞌ ba zoa tap ṉiꞌa naꞌb, naꞌ no ba zṉia, no ba chx̱obi ḻeꞌin lo yonaꞌ, naꞌ ba zoa x̱ilin.
7 Naꞌ benidꞌ shii to beṉꞌ neꞌ nadꞌ: “Wzollaꞌ Pedro, bet bakaꞌ naꞌ wdao.”
8 Naꞌ goshee: “Bi, X̱anꞌ, ni tshii biṉꞌ gawꞌ baki bi nak ba xilallꞌ.”
9 Naꞌ sto shii benidꞌ shii beenaꞌ neꞌ nadꞌ: “Daa ba wna Chiozaꞌ wak gawoꞌ bich iṉazoꞌ bi nakan xilallꞌ.”
10 Gokte shoṉ shii wne kaꞌ, naꞌtech biyep lechꞌ xennaꞌ yabanaꞌ.
11 Naꞌ shintg bleꞌdoꞌidꞌ diikaꞌ katꞌ bidse shoṉə beṉꞌ choꞌa yoonaꞌ ganaꞌ zoaꞌ, zaakeꞌ yell Cesareanaꞌ ziddiljgakeꞌ nadꞌ.
12 Naꞌ Espíritu c̱he Chiozaꞌ wneꞌ nadꞌ bi gonc̱hoplallaa shaꞌlenꞌ ḻegakeꞌ. Naꞌ lenkz beṉꞌ bishꞌchoki x̱op wzaꞌlengakeꞌ nadꞌ, naꞌ yogꞌtentoꞌ wyoontoꞌ lill Cornélionaꞌ.
13 Naꞌ Cornélionaꞌ bseesileꞌ netoꞌ nan bleꞌileꞌ to anjl zieꞌ lilleꞌnaꞌ. Naꞌ anjlaꞌ golleꞌneꞌ: “Bseḻꞌ to c̱hop beṉꞌ yell Jópenaꞌ kwenc̱he lljx̱iꞌgakeꞌ beenaꞌ le Simón Pedro.
14 Naꞌ ḻeꞌ iṉeꞌ liꞌ nakan gonoꞌ kwenc̱he yilalenoꞌ beṉꞌkaꞌ lleꞌ ḻoo yoo lilloꞌnaꞌ bi kwiayiꞌle.”
15 Naꞌ ka wzoloaꞌ choeꞌlengakee dillꞌ, betj Espíritu Sántonaꞌ wyoꞌe ḻoo yic̱hjlallꞌdoꞌekaꞌ, ka bidsoeꞌ ḻoo yic̱hjlallꞌdoꞌchoki.
16 Naꞌch jadinidꞌ daa wna X̱ancho Jesúzaꞌ kanaꞌ wneꞌ: “Dii ḻi Juannaꞌ bchoeꞌ beṉꞌ nis, san leꞌ, dii zakꞌchi gak c̱hele, daa yidsoa Espíritu Sántonaꞌ ḻoo yic̱hjlallꞌdoꞌlenaꞌ.”
17 Ḻaꞌ Chiozaꞌ beneꞌ ka zoa Espíritu Sántonaꞌ ḻoo yic̱hjlallꞌdoꞌekaꞌ ka zoeꞌ ḻoo yic̱hjlallꞌdoꞌchoki, choꞌ chonḻilallꞌcho X̱ancho Jesucrístonaꞌ. Naꞌ ¿nora nakꞌ nadꞌ wllonꞌ gon Chiozaꞌ daa cheenileꞌ goneꞌ?
18 Naꞌch ka biyoll bzenag beṉꞌ Jerusalénkaꞌ nonḻilallꞌ Jesúzaꞌ dillaa beꞌ Pédronaꞌ, naꞌ wzoagakeꞌ llizə, bich bi gollgakeꞌneꞌ. Naꞌ beꞌlaꞌogakeꞌ Chiozaꞌ, cheꞌgakeꞌ:
―Len beṉꞌkaꞌ bi nak beṉꞌ Israel ba beꞌ Chiozaꞌ latj yiyaj yilengakileꞌ dii malkaꞌ chongakeꞌ kwenc̱he gatꞌ yeḻꞌ mban c̱hegakeꞌ zejḻi kaṉi.
Beṉꞌkaꞌ nonḻilallꞌ Jesúzaꞌ Antioquíanaꞌ
19 Naꞌ beṉꞌ Israelkaꞌ nonḻilallꞌ Jesúzaꞌ, beṉꞌkaꞌ bsheshlesgakeꞌ ka wde wit dii Estébannaꞌ, baḻeꞌ wyaj zitꞌ ax̱t Fenícianaꞌ, naꞌ zi baḻeꞌ bllin Chíprenaꞌ naꞌ zibaḻeꞌ bllin yell Antioquíanaꞌ. Naꞌ ganaꞌ bllin to toeꞌ beꞌlengakeꞌ to beṉꞌ wlall c̱heꞌkaꞌz xtillꞌ Jesúzaꞌ.
20 Per baḻ beṉꞌkaꞌ nak beṉꞌ Chipre naꞌ beṉꞌ Cirene, ka bllingakeꞌ yell Antioquíanaꞌ, wzologakeꞌ beꞌlengakeꞌ beṉꞌ bi nak beṉꞌ Israel dillꞌ wen dillꞌ kob c̱he X̱ancho Jesúzaꞌ.
21 Naꞌ yeḻꞌ wak c̱he X̱anchonaꞌ wzoalenan ḻegakeꞌ, naꞌ beṉꞌ zan wlej yic̱hjgakeꞌ diikaꞌ nx̱enilallꞌgakeꞌ naꞌ benḻilallꞌgakeꞌ X̱ancho Jesúzaꞌ.
22 Naꞌ beṉꞌkaꞌ nonḻilallꞌ Jesúzaꞌ Jerusalénnaꞌ, ka wṉezgakileꞌ ba nonḻilallꞌ beṉꞌ Antioquíakaꞌ Jesúzaꞌ, naꞌ bseḻꞌgakeꞌ Bernabénaꞌ jawieꞌ ḻegakeꞌ.
23 Naꞌ ka bllineꞌ Antioquíanaꞌ, bleꞌileꞌ ba goklenchga Chiozaꞌ ḻegakeꞌ naꞌ ḻe bibaileꞌ. Naꞌ btipcheꞌ lallꞌ beṉꞌkaꞌ kwenc̱he soac̱hec̱hgakeꞌ gonḻilallꞌgakeꞌ X̱ancho Jesúzaꞌ do yic̱hj do lallꞌgakeꞌ.
24 Naꞌ beṉꞌ zanch benḻilallꞌgakeꞌ X̱ancho Jesúzaꞌ, ḻaꞌ Bernabénaꞌ nakeꞌ to beṉꞌ wen, naꞌ chṉabiaꞌ Espíritu Sántonaꞌ ḻeꞌ, naꞌ ḻe benḻilallee Chiozaꞌ.
25 Naꞌ ka wde, wzaꞌ Bernabénaꞌ zejeꞌ Társonaꞌ kwenc̱he lljadiljeꞌ Sáulonaꞌ, naꞌ ka billelileꞌneꞌ naꞌ bc̱hiꞌeneꞌ Antioquíanaꞌ.
26 Naꞌ wzoalengakeꞌ beṉꞌkaꞌ nonḻilallꞌ Jesúzaꞌ Antioquíanaꞌ twiz, naꞌ bliꞌ bsedgakileꞌ beṉꞌ zan. Naꞌ Antioquíanaꞌ dii nechdoꞌ bsiꞌgakeꞌ beṉꞌkaꞌ nonḻilallꞌ Jesucrístonaꞌ “Cristianos”.
27 Naꞌ do kanaꞌkzə, baḻ beṉꞌkaꞌ chyix̱jee daa cheꞌ Chiozaꞌ ḻegakeꞌ wzaꞌgakeꞌ Jerusalénnaꞌ bllingakeꞌ Antioquíanaꞌ.
28 Naꞌ wzollaꞌ toeꞌ, beenaꞌ le Ágabo, naꞌ biꞌe dillꞌ ka ba bzajnii Espíritu c̱he Chiozaꞌ ḻeꞌ, naꞌ golleꞌ kweꞌ to wbin wal doxen yell-lioni. Naꞌ kaꞌ gok kanaꞌ chṉabiaꞌ beenaꞌ le Claudio ganaꞌ mbani Rómanaꞌ.
29 Naꞌ beṉꞌ Antioquíakaꞌ nonḻilallꞌ Jesúzaꞌ beꞌgakeꞌ dillꞌ weꞌgakeꞌ kon kaꞌkꞌ wej gak weꞌ to toeꞌ kwenc̱he gaklengakeꞌ beṉꞌkaꞌ nonḻilallꞌ Jesúzaꞌ ganaꞌ mbani Judeanaꞌ, ganaꞌ chiꞌ wbinnaꞌ.
30 Naꞌ kaꞌ bengakeꞌ, naꞌ daa bdop bigox̱ꞌgakeꞌn Bernabénaꞌ len Sáulonaꞌ kwenc̱he jasangakeꞌn lao beṉꞌkaꞌ ngoo lallꞌ naꞌ beṉꞌkaꞌ nonḻilallꞌ Jesúzaꞌ Judeanaꞌ.