Wlejgakeꞌ gall beṉꞌ gak lallꞌ nagakeꞌ mandadkaꞌ
6
Naꞌ ka zej chanch beṉꞌkaꞌ chonḻilallꞌ Jesúzaꞌ, beṉꞌkaꞌ chṉe dillꞌ griegonaꞌ wzolo cheꞌgakeꞌ aga chaklebi ikaa noolə wizebkaꞌ chṉe dillꞌ griegonaꞌ ka to daa chkaa nool wizebkaꞌ chṉe dillꞌ hebrewaꞌ katꞌ chyisgakeꞌ yeḻꞌ wawaꞌ yogꞌ lla.
2 Naꞌch postlkaꞌ shlliṉ btiꞌagakeꞌ yogꞌ beṉꞌkaꞌ chonḻilallꞌ Jesúzaꞌ, naꞌ cheꞌgakeꞌ:
―Bi gak wsanntoꞌ c̱hix̱jeꞌntoꞌ choꞌa xtillꞌ Chiozaꞌ kwenc̱he kooz lo nantoꞌ weꞌntoꞌ dii yeej gao beṉꞌ.
3 Naꞌ leꞌ beṉꞌ bishꞌ, ḻi kwej gall beṉꞌ ladjleni, beṉꞌ chon wen, beṉꞌ chajnii, naꞌ chṉabiaꞌ Espíritu Sántonaꞌ ḻegakeꞌ. Naꞌ gak lallꞌ naꞌgakeꞌ c̱hisgakeꞌ yeḻꞌ wawaꞌ.
4 Naꞌ netoꞌ weꞌḻ-lallꞌchntoꞌ weꞌḻwillntoꞌ Chiozaꞌ naꞌ wliꞌ wsedchintoꞌ beṉꞌ choꞌa xtilleenaꞌ.
5 Naꞌ yogꞌz beṉꞌkaꞌ biyoolallꞌgakeꞌ ka goll postlkaꞌ, naꞌ wlejgakeꞌ beenaꞌ le Esteban, nakeꞌ beṉꞌ nonḻilallꞌchgueꞌ Chiozaꞌ naꞌ chṉabiaꞌ Espíritu Sántonaꞌ ḻeꞌ. Naꞌ ḻekzkaꞌ wlejgakeꞌ Felípenaꞌ, Prócoronaꞌ, Nicanoraꞌ, Timónnaꞌ, Parménazaꞌ, naꞌ Nicolázaꞌ, beṉꞌ Antioquíanaꞌ, beenaꞌ beneꞌ txen beṉꞌ Israelkaꞌ.
6 Naꞌ jwaꞌgakeꞌ ḻegakeꞌ ganaꞌ lleꞌ postlkaꞌ, naꞌ postlkaꞌ bx̱oa neekaꞌ yic̱hjeꞌkaꞌ naꞌ wṉabgakileꞌ Chiozaꞌ gakleneꞌ ḻegakeꞌ.
7 Naꞌ beṉꞌ zanch beni choꞌa xtillꞌ Chiozaꞌ naꞌ wyanchga beṉꞌkaꞌ benḻilallꞌgakeꞌ Jesúzaꞌ Jerusalénnaꞌ, naꞌ zan bx̱ozkaꞌ bzenaggakeꞌ naꞌ benḻilallꞌgakeꞌ Jesúzaꞌ.
Bex̱ꞌgakeꞌ Estébannaꞌ
8 Naꞌ Estébannaꞌ, wzoalenchga yeḻꞌ wak c̱he Chiozaꞌ ḻeꞌ, naꞌ dii xen gokleneꞌneꞌ kwenc̱he bliꞌe yeḻꞌ wakkaꞌ naꞌ bichlə dii chonan ka yibani beṉꞌ.
9 Naꞌch lleꞌ shkwen beṉꞌ Israelkaꞌ ba biyell bilaꞌ lo naꞌ beṉꞌkaꞌ wxiꞌ ḻegakeꞌ, naꞌ non c̱heləgakeꞌ chdop chllaggakeꞌ ganaꞌ choeꞌḻwillgakeꞌ Chiozaꞌ. Naꞌ gokgakeꞌ toz baḻ beṉꞌ Cirene, beṉꞌ Alejandría, beṉꞌ Cilicia, naꞌch beṉꞌ zaak do Ásianaꞌ, gokdiḻ-lengakeꞌ Estébannaꞌ.
10 Naꞌ aga gokgakeꞌ yeḻꞌ sinꞌ c̱he Estébannaꞌ, daa chṉieꞌ kon ka cheꞌ Espíritu c̱he Chiozaꞌneꞌ.
11 Naꞌ wdixjgakeꞌ baḻ beṉꞌ kwenc̱he wxiyeꞌgakeꞌ, cheꞌgakeꞌ: “Ba benintoꞌ Estébannaꞌ chṉieꞌ zban c̱he dii Moisézaꞌ naꞌ c̱he Chiozaꞌ.”
12 Naꞌ daa gollgakeꞌ kaꞌ, bta bṉegakeꞌ beṉꞌ zan, len beṉꞌ golkaꞌ chṉabiaꞌ naꞌ beṉꞌkaꞌ chliꞌ chsedi leyaꞌ kwenc̱he bex̱ꞌgakeꞌ Estébannaꞌ naꞌ jwaꞌgakeꞌneꞌ lao beṉꞌkaꞌ chṉabiaꞌ beṉꞌ Israelkaꞌ.
13 Naꞌ wdiljchgakeꞌ beṉꞌkaꞌ wxiyeꞌ, kwenc̱he gollgakeꞌ:
―Bi chsankzə beeni iṉieꞌ c̱he yoodoꞌ c̱he Chios c̱hechonaꞌ, naꞌ c̱he ley c̱heꞌnaꞌ.
14 Naꞌ ba bizenintoꞌ chizneꞌ Jesús, beṉꞌ Nazaretaꞌ, yic̱hiṉjeꞌ yoodoꞌ c̱hechonaꞌ naꞌ yishaꞌtieꞌ daa ba yoolocho choncho ka daa bliꞌ bsedi dii Moisézaꞌ choꞌ.
15 Naꞌ yogꞌ beṉꞌkaꞌ chiꞌ chongakeꞌ yeḻꞌ josc̱hisaꞌ, ka bwiagakeꞌ Estébannaꞌ naꞌ bleꞌgakileꞌ chey cheeniꞌ choꞌalaweꞌnaꞌ ka choꞌalao anjl.