Ananíazaꞌ naꞌ Safíranaꞌ wxiyeꞌgakeꞌ
5
Naꞌ wzoa to beṉꞌ wlieꞌ Ananías, naꞌ xooleꞌnaꞌ wlieꞌ Safira, naꞌ biyitꞌgakeꞌ shkweꞌ yell-lio c̱heꞌkaꞌ.
2 Naꞌ Ananíazaꞌ len xooleꞌnaꞌ gokgakeꞌ toz bkwaaṉgakeꞌ latꞌ mechaꞌ naꞌ bentezgakeꞌ ka beꞌ doxenan postlkaꞌ.
3 Naꞌch Pédronaꞌ golleꞌneꞌ:
―Ananías, ¿berac̱he beꞌzoꞌ latj wṉabiaꞌ Satanázaꞌ yic̱hjlallꞌdoꞌnaꞌ naꞌ chakiloꞌ siyoo Espíritu Sántonaꞌ daa bgaaṉlenoꞌ latꞌ mechaꞌ daa wdixjgakeꞌ c̱he yell-lio c̱hoꞌnaꞌ?
4 C̱hoꞌ yell-lionaꞌ kanaꞌ ziꞌ yiyitoon, naꞌ c̱hoꞌ mechaꞌ daa bex̱oo c̱heyin ka biyitoon. ¿Berac̱he wloolzə yic̱hjlallꞌdoꞌnaꞌ siyoo? Aga beṉꞌ yell-lionin chziyoo, san Chiozanꞌ cheeniloꞌ siyoo.
5 Naꞌch ka beni Ananíazaꞌ daa goll Pédronaꞌ, to ka billeezeꞌ witeꞌ. Naꞌ ḻe blleb yogꞌ beṉꞌkaꞌ wṉezi ka gok c̱heꞌ.
6 Naꞌ bllin to c̱hop biꞌ wewꞌ ganaꞌ chtoḻ Ananíazaꞌ, naꞌ bitobgakbee to lechꞌ naꞌ jakwashꞌgakbee.
7 Naꞌ gok ka do shoṉ gor ka bllin xooleꞌnaꞌ, aga ṉezileꞌ bin ba gok c̱he beṉꞌ c̱heꞌnaꞌ.
8 Naꞌ wṉabi Pédronaꞌneꞌ, chiꞌeneꞌ:
―Wnashki nadꞌ, ¿aka to nakz beṉꞌ c̱hoꞌnaꞌn biyitꞌle yell-lio c̱helenaꞌ?
Naꞌ Safíranaꞌ chiꞌeneꞌ:
―Awe, kaꞌtꞌkzan biyitꞌntoꞌn.
9 Naꞌch cheꞌ Pédronaꞌneꞌ:
―¿Berac̱he benzle toz dillꞌ kon beṉꞌ c̱hoꞌnaꞌ chakile wak siyeꞌle Espíritu c̱he Chiozaꞌ? Choꞌa yooni ba zizaꞌ biꞌkaꞌ jakwashꞌgakbꞌ dii beṉꞌ c̱hoꞌnaꞌ, naꞌ ṉaa lljakwashꞌgakbꞌ liꞌ.
10 Naꞌ lii billeete Safíranaꞌ witeꞌ lao Pédronaꞌ. Naꞌ ka biyoo biꞌ wewꞌkaꞌ bleꞌgakibꞌ ba witeꞌ, naꞌch bibejgakbee naꞌ jakwashꞌgakbee kwit dii beṉꞌ c̱heꞌnaꞌ.
11 Naꞌ ḻe blleb beṉꞌkaꞌ nonḻilallꞌ Jesucrístonaꞌ len yogꞌ beṉꞌkaꞌ wṉezi ka gok c̱he dii Ananíazaꞌ naꞌ dii Safíranaꞌ.
Postlkaꞌ bengakeꞌ dii zan yeḻꞌ wak
12 Naꞌ postlkaꞌ bengakeꞌ dii zan yeḻꞌ wak naꞌ bichlə dii chonan ka yibani beṉꞌ ladj beṉꞌkaꞌ lleꞌ Jerusalénnaꞌ. Naꞌ yogꞌ beṉꞌkaꞌ chonḻilallꞌ Jesúzaꞌ chdop chllaggakeꞌ ḻoo koridor c̱he yoodoꞌnaꞌ daa le Koridor c̱he dii Salomón.
13 Naꞌ nochlə beṉꞌkaꞌ aga biyaxjgakileꞌ gongakeꞌ ḻegakeꞌ txen, ḻaꞌkzi ḻe bleꞌshiigakileꞌ ḻegakeꞌ.
14 Naꞌ beṉꞌ zan, ka noolə ka beṉꞌ byo, benḻilallꞌgakeꞌ X̱ancho Jesúzaꞌ.
15 Naꞌ chyix̱jgakeꞌ tnezkaꞌ beṉꞌkaꞌ bi shaoꞌ, nx̱oagakeꞌ ḻegakeꞌ no lo yaglaꞌ naꞌ no lo daa, kwenc̱he katꞌ te Pédronaꞌ ḻaꞌc̱hꞌ bx̱en c̱heꞌnaꞌ ten ganaꞌ degakeꞌ naꞌ yiyakgakileꞌ.
16 Naꞌ ḻekzkaꞌ zan beṉꞌ yellkaꞌ llia gaozə Jerusalénnaꞌ chajgakeꞌ lao postlkaꞌ chjwaꞌgakeꞌ beṉꞌ cheꞌi yillweꞌ naꞌ beṉꞌ yoo dii x̱iwꞌkaꞌ. Naꞌ yogꞌḻoḻzgakeꞌ chiyaki.
Wloogakeꞌ postlkaꞌ lillyanaꞌ
17 Naꞌch bx̱oz choo bx̱oz xennaꞌ naꞌ saduceokaꞌ, beṉꞌkaꞌ nakgakeꞌneꞌ txen, gokxee gokzbangakileꞌ postlkaꞌ.
18 Naꞌch bex̱ꞌgakeꞌ postlkaꞌ naꞌ wloogakeꞌ ḻegakeꞌ lillyanaꞌ.
19 Naꞌ waḻaꞌ bllin to anjl c̱he X̱ancho Chiozaꞌ bsaljeꞌ lillyanaꞌ naꞌ bibejeꞌ ḻegakeꞌ, naꞌ golleꞌ:
20 ―Ḻi yiyaj yoodoꞌnaꞌ, naꞌ ḻi wzajnii beṉꞌkaꞌ chdop chllag naꞌ doxen ka nak yeḻꞌ mban zejḻi kaṉi daa weꞌ Chiozaꞌ ḻegakeꞌ.
21 Naꞌch ka wyeeniꞌ, biyajgakeꞌ yoodoꞌnaꞌ ka goll anjlaꞌ ḻegakeꞌ, naꞌ bliꞌ bsedgakileꞌ beṉꞌkaꞌ.
Naꞌch bx̱oz choo bx̱oz xennaꞌ naꞌ beṉꞌkaꞌ nakgakeꞌneꞌ txen bitopgakeꞌ yogꞌḻoḻ beṉꞌkaꞌ chṉabiaꞌ yell Israelaꞌ, naꞌ bseḻꞌgakeꞌ beṉꞌ kwenc̱he nan lljx̱iꞌgakeꞌ postlkaꞌ de lillyanaꞌ.
22 Naꞌ ka bllin beṉꞌkaꞌ chap yoodoꞌnaꞌ choꞌa lillyanaꞌ, kochno postlkaꞌ de naꞌ.
23 Naꞌch jayellgakeꞌ beṉꞌkaꞌ chṉabiaꞌ:
―Nejc̱hec̱h lillyanaꞌ, naꞌ lleꞌte soldadkaꞌ choꞌa puertkaꞌ chapgakeꞌn, naꞌ ka bsaljntoꞌn, ni to beṉꞌ bi yoo ḻoꞌinnaꞌ.
24 Naꞌ beenaꞌ ngoo lo nee beṉꞌkaꞌ chap yoodoꞌnaꞌ, len bx̱ozkaꞌ chṉabiaꞌ, ka bengakileꞌ cheꞌgakeꞌ kaꞌ, naꞌ gokgakileꞌ gate yiyoll yido dga.
25 Naꞌ ni choeꞌtegakeꞌ dillꞌ, bllin to beṉꞌ chiꞌe ḻegakeꞌ:
―Beṉꞌkaꞌ wloole lillyanaꞌ lleꞌtgakeꞌ yoodoꞌnaꞌ chliꞌ chsedgakileꞌ beṉꞌkaꞌ lleꞌ naꞌ.
26 Naꞌch wyaj beṉꞌkaꞌ chap yoodoꞌnaꞌ kon beenaꞌ chṉabiaꞌ ḻegakeꞌ jaxiꞌgakeꞌ postlkaꞌ xochi. Bibi bengakileꞌ ḻegakeꞌ daa bllebgakeꞌ shi beṉꞌkaꞌ chzenag c̱hegakeꞌ wlliagakeꞌ ḻegakeꞌ yaj.
27 Naꞌ ka billinlengakeꞌ postlkaꞌ lao beṉꞌkaꞌ chṉabiaꞌ yell Israelaꞌ, naꞌ bx̱oz choo bx̱oz xennaꞌ chiꞌe ḻegakeꞌ:
28 ―¿Abi chajḻeꞌkzlen nantoꞌ leꞌ bich wliꞌ wsedzile beṉꞌ xtillꞌ Jesúzaꞌ? Naꞌ ḻi wwia ka ba benle, ba bliꞌ bsedile yogꞌ beṉꞌ Jerusalénki choꞌa xtilleenaꞌ, naꞌ cheenile wtobile netoꞌ daa betgakeꞌneꞌ.
29 Naꞌch Pédronaꞌ len postlkaꞌ sto cheꞌgakeꞌ:
―Chonchan byen wzenagntoꞌ c̱he Chiozaꞌ aga ka c̱he beṉꞌ yell-lioni.
30 Leꞌ betle Jesúzaꞌ naꞌ bdaꞌleneꞌ ḻee yag cruzaꞌ. Naꞌ Chios, beenaꞌ beꞌlaꞌo dii x̱ozxtoꞌchokaꞌ, ḻeꞌ bisbaneꞌneꞌ ladj beṉꞌ wetkaꞌ.
31 Naꞌ Chiozaꞌ ba mbekeꞌneꞌ kwiteꞌ de shḻinaꞌ ganaꞌ ba chiꞌe chṉabiꞌe, naꞌ nzoeꞌneꞌ kwenc̱he yisleꞌ beṉꞌ lao dii malaꞌ, ḻaꞌ cheenileꞌ yogꞌ beṉꞌ Israelki yiyaj yileni dii malkaꞌ chongakeꞌ kwenc̱he yiziꞌxen Chiozaꞌ c̱hegakeꞌ.
32 Naꞌ netoꞌ choeꞌntoꞌ dillꞌ daa bleꞌintoꞌ gok c̱he Jesúzaꞌ, naꞌ daa betj Espíritu Sántonaꞌ, beenaꞌ ba bzoa Chiozaꞌ ḻoo yic̱hjlallꞌdoꞌ yogꞌ beṉꞌ chzenagueꞌ c̱heꞌ, ḻekzkaꞌ chliꞌn nakan ka nanntoꞌ.
33 Naꞌ ka beni beṉꞌ wṉabiaꞌkaꞌ daa goll postlkaꞌ, ḻe bllaagakeꞌ naꞌ goklallꞌgakeꞌ witgakeꞌ ḻegakeꞌ.
34 Naꞌ ladj beṉꞌkaꞌ chṉabiaꞌ len to fariseo, beṉꞌ le Gamaliel, beṉꞌ chliꞌ chsedi leyaꞌ, naꞌ yogꞌz beṉꞌ chleꞌshiꞌgakileꞌneꞌ. Naꞌ wzollee, golleꞌ ḻegakeꞌ kwejgakeꞌ postlkaꞌ xtit chyoolə,
35 naꞌ golleꞌ beṉꞌ wṉabiaꞌkaꞌ:
―Leꞌ, beṉꞌ Israel, ḻi wsakꞌ shi bin gonile beṉꞌki.
36 Ḻi lljadini kani batz bchej to beṉꞌ le Teudas, naꞌ wneꞌ nakeꞌ to beṉꞌ zakii, naꞌ ka do tap guiyoa beṉꞌ bengakeꞌneꞌ txen. Naꞌ ka betgakeꞌneꞌ, yogꞌ beṉꞌkaꞌ gokgakeꞌneꞌ txen biyesḻesgakeꞌ, bich bi bengakeꞌ.
37 Naꞌ ka wde gok kaꞌ, wizak dii yoblə kanaꞌ chlabgakeꞌ baḻ beṉꞌ lleꞌ to to yell, naꞌ bizchej Judas beṉꞌ Galileanaꞌ, naꞌ kaꞌkzə beṉꞌ zan bengakeꞌneꞌ txen. Naꞌ ḻekzkaꞌ betgakeꞌneꞌ naꞌ biyesḻes beṉꞌkaꞌ gokgakeꞌneꞌ txen.
38 Naꞌ ṉaa, niaꞌ leꞌ bibi gonile beṉꞌki, ḻaꞌ ka nak dga chliꞌ chsedgakileꞌ, shi nakan dii chyiljlallꞌzgakeꞌ winitlokzan.
39 Naꞌ shi nakan c̱he Chios, aga wak yisol yiṉitlen. Chiyaḻꞌ wwiayeṉꞌle kwenc̱he bi gakdiḻ-lenle Chiozaꞌ.
40 Naꞌch betjgakileꞌ daa goll Gamalielaꞌ ḻegakeꞌ. Naꞌ bizgoogakeꞌ postlkaꞌ, naꞌ bet wdingakeꞌ ḻegakeꞌ, naꞌ dii yoblə bllongakeꞌ kochno wliꞌ wsedgakileꞌ xtillꞌ Jesúzaꞌ. Naꞌ biyollaꞌ bisangakeꞌ ḻegakeꞌ.
41 Naꞌch bichej postlkaꞌ ganaꞌ ndop nllag beṉꞌkaꞌ chṉabiaꞌ, naꞌ ḻe chibagakileꞌ daa beꞌ Chiozaꞌ latj bc̱hiꞌ bsakꞌ beṉꞌkaꞌ ḻegakeꞌ daa choeꞌgakeꞌ xtillꞌ Jesúzaꞌ.
42 Naꞌ yogꞌ lla postlkaꞌ bliꞌ bsedgakileꞌ xtillꞌ Jesucrístonaꞌ yoodoꞌnaꞌ naꞌ lill beṉꞌ.