Pédronaꞌ len Juannaꞌ gokgakeꞌ lo naꞌ beṉꞌkaꞌ chṉabiaꞌ beṉꞌ Israelkaꞌ
4
Naꞌ ni choeꞌlente Pédronaꞌ len Juannaꞌ beṉꞌkaꞌ dillꞌ ka bllin bx̱ozkaꞌ len beenaꞌ ngoo lo nee beṉꞌkaꞌ chap yoodoꞌnaꞌ naꞌ len zi baḻ saduceokaꞌ.
2 Ḻe chllaagakeꞌ daa chliꞌ chsedi Pédronaꞌ len Juannaꞌ beṉꞌkaꞌ lleꞌ naꞌ nakan gok biban Jesúzaꞌ ladj beṉꞌ wetkaꞌ.
3 Naꞌch bex̱ꞌgakeꞌ ḻegakeꞌ, naꞌ daa ba wlleꞌ, jḻoogakeꞌ ḻegakeꞌ lillyanaꞌ, ax̱t betiyoch bibejgakeꞌ ḻegakeꞌ.
4 Per beṉꞌ zan beṉꞌkaꞌ bzenaggakeꞌ dillaa beꞌ Pédronaꞌ len Juannaꞌ benḻilallꞌgakeꞌ Jesúzaꞌ. Naꞌ kaꞌ, wyanch beṉꞌkaꞌ benḻilallꞌgakeꞌneꞌ, naꞌ gokgakeꞌ ka do gayaa mil to beṉꞌ byokaꞌzə.
5 Naꞌ betiyo bidop billag beṉꞌkaꞌ chṉabiaꞌ beṉꞌ Israelkaꞌ yell Jerusalénnaꞌ, len beṉꞌ golkaꞌ chṉabiaꞌ, naꞌ beṉꞌkaꞌ chliꞌ chsedi leyaꞌ.
6 Naꞌ ḻekzkaꞌ len Anázaꞌ, beenaꞌ nak bx̱oz choo bx̱oz xen, naꞌ Caifázaꞌ, Juannaꞌ, Alejándronaꞌ, naꞌ nokchlə beṉꞌkaꞌ nak dialla c̱he bx̱oz choo bx̱oz xennaꞌ.
7 Naꞌch bzegakeꞌ Pédronaꞌ len Juannaꞌ gchoḻeꞌkaꞌ, naꞌ wṉabgakileꞌ ḻegakeꞌ:
―¿No lsens c̱heyi naꞌ no bseḻꞌ leꞌ chonle diiki?
8 Naꞌ Espíritu Santo c̱he Chiozaꞌ bzajniileꞌ Pédronaꞌ kwenc̱he golleꞌ ḻegakeꞌ ki:
―Leꞌ beṉꞌ wṉabiaꞌ, naꞌ leꞌ beṉꞌ gol chṉabiaꞌle yell Israeli,
9 chṉabile netoꞌ ka nak dii wennaꞌ gok c̱he beeni, naꞌ cheenile iṉezile nakan gok biyakileꞌ.
10 Cheenintoꞌ yogꞌḻoḻ-le iṉezile naꞌ yogꞌḻoḻ beṉꞌ Israelkaꞌ iṉezgakileꞌ, beeni chwiale ze laoleni biyakileꞌ kon yeḻꞌ wak c̱he Jesucristo, beṉꞌ Nazaretaꞌ, beenaꞌ betle ḻee yag cruzaꞌ, per Chiozaꞌ bisbaneꞌneꞌ ladj beṉꞌ wetkaꞌ.
11 C̱he Jesúzanꞌ choeꞌn dillꞌ daa nan “yajaꞌ daa bi wyoolallꞌle leꞌ nakle wen yoo, ḻeyeṉꞌlannanꞌ yajaꞌ daa ba nc̱hejcha yoonaꞌ.”
12 Bichga zoa sto beṉꞌ yoblə gak yisleꞌ choꞌ kwenc̱he bi kwiayiꞌcho. Ḻaꞌ kochno zoa doxen yell-lioni beṉꞌ ba wlej Chiozaꞌ kwenc̱he yisleꞌ choꞌ.
13 Ḻe bibani beṉꞌ wṉabiaꞌkaꞌ daa chwiagakeꞌ bi blleb Pédronaꞌ len Juannaꞌ choeꞌgakeꞌ dillaa laweꞌkaꞌ, ḻaꞌ nakbiaꞌ aga bi nsedgakeꞌ naꞌ aga no nakgakeꞌ. Naꞌ gokbeꞌgakileꞌ daa wdalengakeꞌ Jesúzaꞌ txenan chongakeꞌ kaꞌ.
14 Naꞌ daa ze beenaꞌ biyaki ṉiꞌenaꞌ kwiteꞌkaꞌ, bibi gok yeꞌgakeꞌ ḻegakeꞌ.
15 Naꞌch bibejgakeꞌ ḻegakeꞌ shlak beꞌlen ljwellgakeꞌ dillꞌ nak koogakeꞌ xṉezin.
16 Cheꞌ ljwelleꞌ:
―¿Nakra goncho c̱he beṉꞌki? Ḻaꞌ yogꞌzə beṉꞌ zoa Jerusalénni iṉezgakileꞌ ba bengakeꞌ to yeḻꞌ wak xen, naꞌ aga wak iṉacho bi nakan kaꞌ.
17 Naꞌ kwenc̱he bich ides dillꞌkaꞌ choeꞌgakeꞌ, chiyaḻꞌ kooshebchogakeꞌ kwenc̱he kochno weꞌlengakeꞌ dillꞌ c̱he Jesúzaꞌ.
18 Naꞌch goxgakeꞌ Pédronaꞌ len Juannaꞌ dii yoblə, naꞌ gollgakeꞌ ḻegakeꞌ bich wliꞌ wsedgakileꞌ beṉꞌ ni bi weꞌlengakeꞌ ḻegakeꞌ xtillꞌ Jesúzaꞌ.
19 Naꞌ Pédronaꞌ len Juannaꞌ cheꞌgakeꞌ:
―Ḻi wwiayeṉꞌshki shi nakan wen lao Chiozaꞌ wzenagntoꞌ c̱hele lwaa dii wzenagntoꞌ c̱heꞌ.
20 Bi gak wsanntoꞌ weꞌntoꞌ dillꞌ daa ben bleꞌintoꞌ c̱he Jesúzaꞌ.
21 Naꞌch beṉꞌ wṉabiaꞌkaꞌ biya dii gollgakeꞌ ḻegakeꞌ kwenc̱he nan illebgakeꞌ, naꞌch bisanchokləgakeꞌ ḻegakeꞌ, ḻaꞌ bibi billel-lallꞌgakeꞌ gongakeꞌ daa yogꞌzə beṉꞌ choeꞌlaꞌogakeꞌ Chiozaꞌ ni c̱he daa gok.
22 Naꞌ beenaꞌ biyaki ṉiꞌenaꞌ kon yeḻꞌ wak c̱he Jesúzaꞌ ba wdeileꞌ c̱hoa yiz.
Wṉabgakileꞌ Chiozaꞌ gakleneꞌ ḻegakeꞌ weꞌgakeꞌ xtilleenaꞌ
23 Naꞌ ka bisangakeꞌ Pédronaꞌ len Juannaꞌ, biyajgakeꞌ ganaꞌ zoa beṉꞌkaꞌ nonlengakeꞌ txen naꞌ gollgakeꞌ ḻegakeꞌ yogꞌ daa goll bx̱ozkaꞌ chṉabiaꞌ naꞌ beṉꞌ golkaꞌ chṉabiaꞌ.
24 Naꞌ ka bengakileꞌ daa gollgakeꞌ ḻegakeꞌ, naꞌch gokgakeꞌ toz beꞌḻwillgakeꞌ Chiozaꞌ, cheꞌgakeꞌ:
―Chios, liꞌ nakoꞌ beṉꞌ zeelo chṉabiaꞌ. Liꞌ benoꞌ yabanaꞌ, yell-lioni, naꞌ nisdoꞌnaꞌ, naꞌ yogꞌte dii de lo yell-lioni.
25 Naꞌ Espíritu Santo c̱hoꞌnaꞌ bx̱oeꞌ dillꞌki choꞌa ḻollꞌ dii Davinaꞌ kanaꞌ wneꞌ:
¿Berac̱he chllaa chlokz beṉꞌ yell-lioki?
¿Berac̱he toshiizi chgoo beṉꞌki xṉezin gongakeꞌ daa bi nxe bi nzakꞌ?
26 Beṉꞌkaꞌ chṉabiaꞌ lo yell-lioni gokgakeꞌ toz
gokzbangakileꞌ naꞌ biṉiatezgakeꞌ X̱ancho Chiozaꞌ
len Crístonaꞌ, beenaꞌ wlejeꞌ kwenc̱he iṉabiꞌe.
27 ’Dii ḻi yell Jerusalénni Heródezaꞌ naꞌ Poncio Pilátonaꞌ, len beṉꞌ zitꞌkaꞌ naꞌ beṉꞌ Israelkaꞌ, bdop bllaggakeꞌ gokgakeꞌ toz goklallꞌgakeꞌ wlliayiꞌgakeꞌ Jesúzaꞌ, beenaꞌ nak ḻiizelozi beṉꞌ ḻi beṉꞌ shaoꞌ, beenaꞌ wlejoꞌ kwenc̱he iṉabiꞌe.
28 Naꞌ daa bengakeꞌ kaꞌ, gok ka bllioꞌ biaꞌ.
29 Naꞌ ṉaa Chios, bwia ka ngoosheb beṉꞌ wṉabiaꞌkaꞌ netoꞌ, naꞌ goklen netoꞌ nakntoꞌ wen llin c̱hoꞌ, kwenc̱he weꞌchntoꞌ choꞌa xtilloonaꞌ naꞌ bi gall illebntoꞌ.
30 Bliꞌ yeḻꞌ wak c̱hoꞌnaꞌ kwenc̱he yiyaki beṉꞌ bi shaoꞌ naꞌ kwenc̱he gonntoꞌ bichlə dii yibani beṉꞌ kon yeḻꞌ wak c̱he Xiiṉoꞌ Jesúzaꞌ, beenaꞌ nak ḻiizelozi beṉꞌ ḻi beṉꞌ shaoꞌ.
31 Naꞌ ka biyoll beꞌḻwillgakeꞌ Chiozaꞌ, wxoꞌ wṉib latjaꞌ ganaꞌ ndop nllaggakeꞌ, naꞌ wṉabiaꞌchga Espíritu Sántonaꞌ ḻegakeꞌ naꞌ bi bllebgakeꞌ weꞌgakeꞌ choꞌa xtillꞌ Chiozaꞌ.
Daa de c̱he to toeꞌ benin c̱he yoguee
32 Naꞌ yogꞌ beṉꞌkaꞌ ba chonḻilallꞌ Jesúzaꞌ, toz ka gok yic̱hjlallꞌdoꞌekaꞌ. Naꞌ yogꞌ daa de c̱he to toeꞌ, benin c̱he yoguee. Ni toeꞌ bi wna: “C̱haꞌ dga.”
33 Naꞌ postlkaꞌ, kon yeḻꞌ wak xen c̱he Chiozaꞌ, beꞌchgakeꞌ dillꞌ c̱he X̱ancho Jesúzaꞌ daa bibaneꞌ ladj beṉꞌ wetkaꞌ, naꞌ Chiozaꞌ dii xen gokleneꞌ yogꞌḻoḻeꞌ.
34 Naꞌ ni toeꞌ bibi byallji, ḻaꞌ beenaꞌ de yell-lio c̱heꞌ wa lilleꞌ naꞌ chiyiteen, naꞌ mechaꞌ daa chox̱ee c̱heyin
35 choꞌen postlkaꞌ kwenc̱he choeꞌgakeꞌ kon kaꞌkꞌ wej chyallji to toeꞌ.
36 Naꞌ wzoa to beṉꞌ Chipre lieꞌ José. Nakeꞌ dia c̱he dii Levínaꞌ, naꞌ postlkaꞌ bsiꞌgakeꞌneꞌ Bernabé, naꞌ zejin witip lallꞌ beṉꞌ.
37 Naꞌ Joséni biyitee to yell-lio dii napeꞌ, naꞌ mechaꞌ biꞌen postlkaꞌ.