Biyaki to beṉꞌ bi chak saꞌ
3
To lla do ka chida shoṉə shlleꞌnaꞌ, ka goraꞌ chdop chllag beṉꞌ Israelkaꞌ choeꞌḻwillgakeꞌ Chiozaꞌ, Pédronaꞌ len Juannaꞌ wyajgakeꞌ yoodoꞌnaꞌ.
2 Naꞌ choꞌa puert c̱he zeenaꞌ daa nec̱hj yoodoꞌnaꞌ, puert daa nsiꞌgakeꞌ Puert Xochi, chiꞌ to beṉꞌ nxiṉj ṉiꞌenaꞌ ka goljtieꞌ. Naꞌ yogꞌ lla chjḻekgakeꞌneꞌ naꞌ kwenc̱he chṉabeꞌ karidá lao beṉꞌkaꞌ chdop chllag yoodoꞌnaꞌ.
3 Naꞌ ka bllin Pédronaꞌ naꞌ Juannaꞌ ganaꞌ chiꞌe, naꞌ wṉabileꞌ ḻegakeꞌ izangakileꞌ latꞌ mech weꞌgakeꞌneꞌ.
4 Naꞌch Pédronaꞌ len Juannaꞌ bwiagakeꞌneꞌ, naꞌ Pédronaꞌ golleꞌneꞌ:
―Bwiakachi netoꞌ.
―Bibi mech napꞌ goṉꞌ liꞌ, ḻete dii napꞌ goṉꞌ liꞌ. Kon yeḻꞌ wak c̱he Jesucristo, beṉꞌ Nazaretaꞌ, niaꞌ liꞌ bizollaꞌ naꞌ bigoo nez.
7 Naꞌch Pédronaꞌ wdoyoeꞌ nee de shḻinaꞌ naꞌ bisolléeneꞌ, naꞌ lii biyakteyi ṉiꞌenaꞌ.
8 Naꞌch ka beṉꞌ bxitꞌzə beneꞌ bizollee. Naꞌ wyooleneꞌ ḻegakeꞌ leshꞌ chyoodoꞌnaꞌ chec̱hj chdeꞌ naꞌ chxitꞌshesheꞌ choeꞌlawee Chiozaꞌ.
9 Naꞌ yogꞌ beṉꞌkaꞌ lleꞌ naꞌ bleꞌgakileꞌneꞌ chdeꞌ choeꞌlawee Chiozaꞌ,
10 naꞌ billej bibangakileꞌ daa nombiaꞌgakeꞌneꞌ chbiꞌe chṉabeꞌ karidá choꞌa puert daa nsiꞌgakeꞌ Puert Xochi.
Bzajnii Pédronaꞌ beṉꞌkaꞌ ndop nllag leshꞌ chyoodoꞌnaꞌ
11 Naꞌ beenaꞌ biyaki ṉiꞌenaꞌ aga bsaneꞌ Pédronaꞌ len Juannaꞌ, kon noeꞌ ḻegakeꞌ. Naꞌ yogꞌ beṉꞌkaꞌ lleꞌ leshꞌ chyoodoꞌnaꞌ chillej chibangakileꞌ naꞌ wyajdogakeꞌ ganaꞌ zoa koridor daa le Koridor C̱he dii Salomón ganaꞌ zelengakeꞌ beenaꞌ biyaki.
12 Naꞌ ka bleꞌi Pédronaꞌ beṉꞌkaꞌ chdop chllag naꞌ, golleꞌ ḻegakeꞌ:
―Leꞌ beṉꞌ Israel, ¿berac̱he chibanzile daa biyaki beeni? ¿Naꞌ berac̱he chwiazle netoꞌ? ¿Achakile kon yeḻꞌ wak c̱hentoꞌnanꞌ biyaki beeni? ¿Awa chakile daa zoantoꞌ chonntoꞌ ka chiyoolallii Chiozanꞌ biyakileꞌ? Aga daan.
13 Chios, beenaꞌ beꞌlaꞌo dii Abrahamaꞌ, dii Isaacaꞌ, dii Jacobaꞌ, naꞌ nochlə dii x̱oztoꞌchokaꞌ, ḻenꞌ wloꞌe Xiiṉeꞌ Jesúzaꞌ balaaṉ xennaꞌ, beenaꞌ benle lo naꞌ beṉꞌkaꞌ betgakeꞌneꞌ. Naꞌ ka goklallꞌ Pilátonaꞌ yisaneꞌneꞌ, bi beꞌle latj.
14 Lwaa dii nan iṉable yisaneꞌ Jesúzaꞌ, beenaꞌ nak ḻiizelozi beṉꞌ ḻi beṉꞌ shaoꞌ, beṉꞌ wen xyanaꞌlə wṉable bisaneꞌ.
15 Kanꞌ benle betle Jesúzaꞌ, beenaꞌ choṉ yeḻꞌ mban daa nak dowalj. Per Chiozaꞌ bisbaneꞌneꞌ ladj beṉꞌ wetkaꞌ, naꞌ netoꞌ choeꞌntoꞌ dillꞌ daa ṉezintoꞌ bibaneꞌ.
16 Daa chonḻilallꞌntoꞌ Jesúzanꞌ, ba biyaki beeni chwiale naꞌ nombiaꞌle. Dii ḻi, daa nonḻilallꞌntoꞌ Jesúzanꞌ chwiatele ba biyakchaileꞌ.
17 ’Leꞌ beṉꞌ bishꞌ, ṉezidꞌ, ka leꞌ naꞌ ka beṉꞌkaꞌ chṉabiaꞌ leꞌ, bi gokbeꞌile bin benle ka betle Jesúzaꞌ.
18 Naꞌ Chiozaꞌ biꞌe latj gok kaꞌ kwenc̱he billinin ka wna dii beṉꞌkaꞌ wdix̱jee xtilleenaꞌ kaniꞌyi, daa wnagakeꞌ Crístonaꞌ biya dii wc̱hiꞌ wsakꞌ beṉꞌ ḻeꞌ.
19 Naꞌ ṉaa, ḻi wzenag c̱he X̱ancho Chiozaꞌ, naꞌ ḻi yiyaj yileni dii malkaꞌ chonle kwenc̱he yiziꞌxeneꞌ c̱hele naꞌ wzoeꞌ leꞌ mbalaz.
20 Naꞌ yiseḻee Crístonaꞌ, beenaꞌ wlejeꞌ kwenc̱he iṉabiꞌe, kon ka wdix̱jee dii beṉꞌkaꞌ kaniꞌyi.
21 Chonan byen yigaaṉeꞌ yabanaꞌ ax̱t ka illin lla yiyonshaoꞌ Chiozaꞌ yogꞌḻoḻte dii de, kon ka goll Chiozaꞌ dii beṉꞌkaꞌ wlejeꞌ wdix̱jeꞌgakeꞌ choꞌa xtilleenaꞌ kaniꞌyi.
22 Ḻaꞌ dii Moisézaꞌ golleꞌ dii x̱ozxtoꞌchokaꞌ dillꞌki: “X̱ancho Chiozaꞌ kwejeꞌ sto beṉꞌ ka nadꞌ ladjleni, beṉꞌ c̱hix̱jeꞌileꞌ leꞌ bi dillꞌ weꞌleneꞌneꞌ. Naꞌ ḻi wzenag yogꞌ daa iṉeꞌ.
23 Naꞌ beenaꞌ bi wzenag c̱heꞌ, Chiozaꞌ kwej yic̱hjeꞌneꞌ naꞌ bich gak goneꞌ txen beṉꞌkaꞌ nak yell c̱he Chiozaꞌ.”
24 ’Naꞌ yogꞌḻoḻ dii beṉꞌkaꞌ wdix̱jee daa goll Chiozaꞌ ḻegakeꞌ kaniꞌyi, wzolozan kon dii Samuelaꞌ, wdix̱jeꞌgakeꞌ gak diiki chak ṉaa.
25 Lenꞌ, naki c̱hele daa ba bc̱heb Chiozaꞌ lao dii beṉꞌkaꞌ wdix̱jee daa golleꞌ ḻegakeꞌ kaniꞌyi. Naꞌ ḻekzkaꞌ naki c̱hele dii wennaꞌ daa bc̱heb Chiozaꞌ goneꞌ c̱he dii x̱ozxtoꞌcho Abrahamaꞌ, ka golleꞌneꞌ: “Ni c̱he xiiṉ dia c̱hoꞌnaꞌ gonꞌ dii wen c̱he yogꞌḻoḻ beṉꞌ lleꞌ zbii zkaaṉ yell-lioni.”
26 Naꞌ ka bseḻꞌ Chiozaꞌ Xiiṉeꞌ Jesúzaꞌ, zigaate bseḻeeneꞌ ladjchoni kwenc̱he gak wen c̱hecho naꞌ to tocho yiyaj yilenicho dii malkaꞌ choncho.