Beꞌḻwill Jesúzaꞌ Chiozaꞌ c̱he beṉꞌkaꞌ nakgakeꞌneꞌ txen
17
Naꞌ ka wde wna Jesúzaꞌ diikaꞌ, naꞌ bḻis jalaweꞌnaꞌ bwieꞌ yabalə, naꞌ golleꞌ:
―X̱a, ba bllin gor illagloaꞌ daa llia biaꞌ wtiḻꞌ. Wloo nadꞌ balaaṉ, nadꞌ nakꞌ xiiṉoꞌ, kwenc̱he ḻekzkaꞌ nadꞌ kwaa liꞌ balaaṉ.
2 Ḻaꞌ ba benoꞌ lo naꞌ iṉabiaꞌ lao yogꞌḻoḻ beṉꞌ, kwenc̱he gonꞌ ka gatꞌ yeḻꞌ mban zejḻi kaṉi c̱he beṉꞌkaꞌ wlejoꞌ gonḻilallꞌgakeꞌ nadꞌ.
Jesús ora por sus seguidores (Juan 17.1-26)
3 Naꞌ daa gatꞌ yeḻꞌ mban zejḻi kaṉi c̱he beṉꞌ, zejin nombiaꞌgakeꞌ liꞌ, nakoꞌ dowalj Chios, naꞌ ḻekzkaꞌ nombiaꞌgakeꞌ nadꞌ, beṉꞌ bseḻoo yell-lioni.
4 ’Nadꞌ ba wloꞌa liꞌ balaaṉ lao beṉꞌ yell-lioki, naꞌ ba biyoll benꞌ daa bllioꞌ biaꞌ gonꞌ.
5 Naꞌ ṉaa, X̱a, yiyoṉgachoꞌ nadꞌ balaaṉnaꞌ katꞌ yiyedꞌ kwitoꞌnaꞌ ka balaaṉnaꞌ daa wdapkzꞌ kanaꞌ wzoalenꞌ liꞌ ka ziꞌ x̱e sil yell-lioni.
6 ’Ba beṉoꞌ nadꞌ beṉꞌki wlejoꞌ yell-lioni kwenc̱he gonḻilallꞌgakeꞌ nadꞌ, naꞌ ba bzajniidꞌ ḻegakeꞌ ka nakoꞌ. Lallꞌ nonꞌ nakgakeꞌ, naꞌ benoꞌ ka benḻilallꞌgakeꞌ nadꞌ naꞌ chzenaggakeꞌ xtilloonaꞌ.
7 Naꞌ ṉaa ba ṉezgakileꞌ yogꞌ dillꞌkaꞌ biꞌa nakan dii wnoꞌ.
8 Ḻaꞌ ba beꞌlenꞌ ḻegakeꞌ dillꞌ daa nllioꞌ biaꞌ weꞌlengakee naꞌ ba bzenaggakeꞌn. Naꞌ ba gokbeꞌgakileꞌ dii ḻi wzaa ganaꞌ zoꞌ naꞌ ba wyajḻeꞌgakeꞌ linꞌ bseḻoo nadꞌ.
9 ’Chṉabidꞌ liꞌ gaklenoꞌ ḻegakeꞌ. Aga chṉabꞌ gaklenoꞌ yogꞌ beṉꞌ yell-lioki, san chṉabꞌ gaklenoꞌ beṉꞌkaꞌ wlejoꞌ kwenc̱he gonḻilallꞌgakeꞌ nadꞌ, ḻaꞌ lallꞌ nonꞌ nakgakeꞌ.
10 Naꞌ yogꞌ beṉꞌkaꞌ nak lallꞌ naꞌ ḻekzkaꞌ nakgakeꞌ lallꞌ noꞌ. Naꞌ ḻegakeꞌ ba wloogakeꞌ nadꞌ balaaṉ.
11 ’Naꞌ ṉaa ba chizaꞌ yell-lioni. Naꞌ ḻegakeꞌ yigaaṉgakeꞌ ni. X̱a, liꞌ nakoꞌ dowalj beṉꞌ wen beṉꞌ shaoꞌ. Wdapgach beṉꞌkaꞌ ba beṉoꞌ nonḻilallꞌgakeꞌ nadꞌ kon yeḻꞌ wak c̱hoꞌnaꞌ kwenc̱he gakgakeꞌ toz, ka nakcho choꞌ nakcho toz.
12 Shlak wzoalenꞌ ḻegakeꞌ yell-lioni ba wdap bwiaꞌ ḻegakeꞌ kon yeḻꞌ wak c̱hoꞌnaꞌ. Naꞌ ni toeꞌ bi wlliayiꞌ, ḻetechokzə beenaꞌ ba nakan kwiayee, kwenc̱he gak ka na Choꞌa Xtilloonaꞌ.
13 ’Naꞌ ṉaa ba zizaa ganaꞌ zoꞌ. Naꞌ niaꞌ liꞌ diiki shlak ni zoaꞌ yell-lioni kwenc̱he beṉꞌki gapgakeꞌ yeḻꞌ xaba ka daa napꞌ.
14 Nadꞌ ba bzajniidꞌ ḻegakeꞌ choꞌa xtilloonaꞌ, naꞌ beṉꞌkaꞌ bi nombiaꞌ liꞌ chakziꞌ chakzbangakileꞌ ḻegakeꞌ daa bi nakgakeꞌ ḻegakeꞌ txen, ka chonꞌ nadꞌ bi chonꞌ txen beṉꞌkaꞌ bi nombiaꞌ liꞌ.
15 Aga chṉabidꞌ liꞌ yikoo beṉꞌki nonḻilallꞌ liꞌ lo yell-lioni, san chṉabꞌ wkweejgachgakoꞌneꞌ kwenc̱he ki c̱hitj seni dii malaꞌ daa chda yell-lioni ḻegakeꞌ.
16 Bi nongakeꞌ txen beṉꞌkaꞌ bi nombiaꞌ liꞌ, ka chonꞌ nadꞌ bi chonꞌ beṉꞌkaꞌ txen.
17 Bengach kwenc̱he beṉꞌki nonḻilallꞌ nadꞌ gakchgakeꞌ ka chazlalloo daa chzenaggakeꞌ dillꞌ ḻi c̱hoꞌnaꞌ, ḻaꞌ choꞌa xtilloonaꞌ nakan dii ḻi.
18 Ka benoꞌ bseḻoo nadꞌ kwenc̱he bidsoaꞌ yell-lioni, kaꞌkzan chseḻaa ḻegakeꞌ kwenc̱he shajgakeꞌ ladj beṉꞌ yell-lioki.
19 Chzanlallaa kwinꞌ gonꞌ ka noꞌ ni c̱hegakeꞌ, kwenc̱he ḻekzkaꞌ gongakeꞌ ka noꞌ daa ba chzenaggakeꞌ dillꞌ ḻi c̱hoꞌnaꞌ.
20 ’Aga chṉabidꞌ liꞌ gaklenoꞌ to ḻezgakeꞌ, san ḻekzkaꞌ chṉabꞌ gaklenoꞌ beṉꞌkaꞌ gonḻilallꞌ nadꞌ katꞌ wzenaggakeꞌ choꞌa xtillaanaꞌ daa weꞌ beṉꞌki.
21 X̱a, chṉabidꞌ liꞌ gonshgoꞌ ka gak yogꞌgakeꞌ toz, ka nakcho choꞌ nakcho toz. Ḻekzkaꞌ chṉabꞌ gakgakeꞌ choꞌ toz kwenc̱he beṉꞌkaꞌ bi nonḻilallꞌ liꞌ shajḻeꞌgakeꞌ linꞌ bseḻoo nadꞌ.
22 Ba wloꞌa ḻegakeꞌ balaaṉ ka daa wloo nadꞌ, kwenc̱he gakgakeꞌ toz ka nakcho choꞌ nakcho toz.
23 Nadꞌ nakgakee toz ka nakcho choꞌ nakcho toz. Bengach ka gakgakeꞌ toz ka chiyaḻꞌ, kwenc̱he beṉꞌkaꞌ bi nonḻilallꞌ liꞌ gakbeꞌgakileꞌ linꞌ bseḻoo nadꞌ, naꞌ gakbeꞌgakileꞌ chakiloꞌ beṉꞌkaꞌ nonḻilallꞌ nadꞌ ka chakiloꞌ nadꞌ.
24 ’X̱a, liꞌ ba beṉoꞌ nadꞌ ḻegakeꞌ, naꞌ cheenidꞌ soalengakeꞌ nadꞌ ganaꞌ soaꞌ kwenc̱he ileꞌgakileꞌ balaaṉ c̱haꞌnaꞌ daa beṉoꞌ nadꞌ ka ziꞌ x̱e silte yell-lioni daa chakiloꞌ nadꞌ.
25 X̱a, liꞌ nakoꞌ beṉꞌ ḻi beṉꞌ shaoꞌ. Ḻaꞌkzi beṉꞌkaꞌ bi nonḻilallꞌ nadꞌ bi nombiaꞌgakeꞌ liꞌ, nadꞌ nombiꞌa liꞌ naꞌ beṉꞌki nonḻilallꞌ nadꞌ ṉezgakileꞌ linꞌ bseḻoo nadꞌ.
26 Naꞌ ba bzajniidꞌ ḻegakeꞌ non nakoꞌ, naꞌ zizikli wzajniꞌchgakidee kwenc̱he kon ka chakiloꞌ nadꞌ kaꞌkzə gakgakileꞌ beṉꞌ, naꞌ nadꞌ soalenkzgakee.